Mibuzyo Yabasikubala

Ino Ndilili Saatani Naakatandwa Kujulu?—Ciy. 12:1-9.

Nokuba kuti bbuku lyamu Bbaibbele lya Ciyubunuzyo kunyina nolyaamba ciindi cini Saatani naakali kuyootandwa kujulu, lyaamba zyintu zyakali kuyoocitika zyalo izikonzya kutugwasya kuzyiba ciindi naakatandwa kujulu. Cakusaanguna akati kazyintu eezyi, nkutalisyigwa kwa Bwami bwabu Mesiya. Mpoonya kwakazooba “nkondo mujulu,” yalo iyakapa kuti Saatani azundwe mane akutandwa kujulu.

Magwalo cakusalazya atondezya 1914 kuba mwaka nocakamana “ciindi cabamasi” alimwi akutalisyigwa kwa Bwami. * (Lk. 21:24) Ino kwakainda ciindi cilamfwu buti kaitanatalika nkondo yalo iyakapa kuti Saatani atandwe?

Lugwalo lwa Ciyubunuzyo 12:4 lwaamba kuti: “Simwaaba oyo wakaima kunembo lyamwanakazi iwakali kwaamba kutumbuka, kuti atumbuka alye mwanaakwe.” Eeci citondezya kuti Saatani wakali kuyanda kunyonyoona Bwami bupya cakufwambaana ikuti kacikonzyeka ciindi nobwakatalisyigwa buyo. Nokuba kuti Jehova wakakasya Saatani kuzuzikizya makanze aakwe mabyaabi, Saatani wakalikanzide kunyonyoona Bwami oobu bupya. Nkekaambo kaako “Mikayeli abaangelo bakwe” bakabweza ntaamu cakufwambaana kuti bagwisye ‘simwaaba ooyu abangelo bakwe’ kujulu kutegwa Bwami oobu butanyonyooki. Eeci caamba kuti Saatani wakazundwa alimwi akutandwa kujulu ciindi Bwami nobwakatalika buyo mumwaka wa 1914.

Kaambo kambi ikeelede kuyeeyegwa kajatikizya kubusyigwa kwa Banakristo bananike kwalo ikwakatalika ciindi Bwami nobwakatalisyigwa buyo, kweelana ambwaatondezya Magwalo. * (Ciy. 20:6) Mbwaanga kunyina Munakristo munanike iwaambwa kuti wakasangana Jesu munkondo yakulwana simwaaba abangelo bakwe, kulangilwa kuti inkondo eeyi alimwi akutandwa kwa Saatani amadaimona aakwe zyakalicitikide kale ciindi banabakwabo Kristo aaba nobakatalika kubusyigwa.

Aboobo, Bbaibbele talyaambi ciindi cini Saatani amadaimona aakwe nobakatandwa kujulu. Nokuba boobo, cilisalede kuti eeci cakacitika Jesu Kristo naakabikkwa buyo acuuno cabwami kujulu mumwaka wa 1914.

Bupanduluzi buyungizidwe