Mga Pakiana Tikang ha mga Magbarasa

Kakan-o hi Satanas ginlabog tikang ha langit?—Pah. 12:1-9.

Bisan kon an libro han Pahayag ha Biblia waray magsaysay hin eksakto nga panahon han paglaboga kan Satanas, nag-uunabi ito han sunod-sunod nga hitabo nga makakabulig ha aton pagbanabana kon kakan-o hiya ginlabog tikang ha langit. An siyahan amo an kaestablisar han Mesianiko nga Ginhadian. Katapos, “nag-araway ha langit,” diin napirde hi Satanas ngan ha kataposan iginlabog tikang ha langit.

Matin-aw nga iginpapasabot han Kasuratan nga han 1914 natapos an “mga panahon han mga Hentil” ngan naestablisar an Ginhadian. * (Luk. 21:24) Tikang hito, mationan-o kaiha nga panahon an naglabay antes magtikang an girra nga nagresulta han paglaboga kan Satanas?

“An dragon natukdaw ha atubangan han babaye nga tipag-aranak,” nasiring an Pahayag 12:4, “basi ha paglamoy han bata kon mag-anak na hiya.” Ipinapakita hini nga kon posible, karuyag ni Satanas nga bungkagon dayon an Ginhadian ha takna mismo nga maestablisar ito. Bisan kon waray matuman an maraot nga plano ni Satanas tungod kay ginpugngan ito ni Jehova, determinado hi Satanas ngan waray gud umundang ha iya pangalimbasog nga bungkagon an Ginhadian nga bag-o pa la naestablisar. Salit, makatadunganon la nga “hi Miguel ngan an iya mga anghel” magios dayon basi paiwason ha langit “an dragon ngan an iya mga anghel” basi diri mabungkag an Ginhadian. Ipinapakita hini nga an kapirde ngan paglaboga kan Satanas nahitabo waray pag-iha katapos maestablisar an Ginhadian han 1914.

Usa pa nga sadang tagdon amo an pagbanhaw ha dinihogan nga mga Kristiano nga sugad han makikita nga ebidensya ha Kasuratan, nagtikang waray pag-iha katapos maestablisar an Ginhadian. * (Pah. 20:6) Tungod kay waray gin-unabi nga dinihogan nga kabugtoan ni Kristo nga kaupod niya ha pakig-away ha dragon ngan ha mga anghel hito, an girra ha langit ngan an paglaboga kan Satanas ngan ha iya mga demonyo sigurado nga tapos na han magtikang an pagbanhaw ha kabugtoan ni Kristo.

Salit, bisan kon waray isaysay han Biblia an eksakto nga panahon han paglaboga kan Satanas ngan han iya mga demonyo tikang ha langit, matin-aw nga nahitabo ini waray pag-iha katapos magin hadi ha langit hi Jesu-Kristo han 1914.

[Mga footnote]