Kʼáatchiʼob ku beetaʼal

¿Baʼax kʼiin ka jóoʼsaʼab Satanás teʼ kaʼanoʼ? (Apo. 12:1-9)

Kex u libroi Apocalipsis maʼatech u yaʼalik jach baʼax kʼiineʼ, ku yaʼalik jejeláas baʼaloʼob úuch jeʼel u yáantkoʼon k-il bey baʼax kʼiin ka jóoʼsaʼab teʼ kaʼanoʼ. Le yáax baʼax úuchoʼ letiʼe ka tsʼaʼab Cristo u beet u Reyiloʼ. K-ojleʼ le ka úuch lelaʼ «yanchaj jumpʼéel baʼateʼel [teʼ] kaʼanoʼ»; le Kʼaasilbaʼal túunoʼ peʼernaji, ka puʼul way Luʼumeʼ.

Le Bibliaoʼ ku yeʼesikeʼ tu jaʼabil 1914 ka tsʼoʼok «u kʼiiniloʼob le gentiloʼob» yéetel le ka tsʼaʼab Jesús u beet u Reyiloʼ (Luc. 21:24, LTN). * ¿Bukaʼaj tiempo máan túun ka baʼatelnaj tu contra Satanás teʼ kaʼan yéetel ka tu pulaj way Luʼumeʼ?

Apocalipsis 12:4 ku yaʼalik: «Le kaan [wa Satanasoʼ] waʼalaj aktáan tiʼ le koʼolel ku síijsajoʼ utiaʼal u jaant le paal chéen pʼel u síijiloʼ». Lelaʼ ku yeʼesikeʼ Satanaseʼ u kʼáat kaʼach u xuʼuls le Reino jach teʼ súutuk ken káajak u meyajoʼ. Kex Jéeoba maʼ tu chaʼaj tiʼeʼ, Satanaseʼ maʼ xuʼul u yilik bix jeʼel u luʼsik le Reino táant u tsʼaʼabloʼ. Le oʼolal «Miguel yéetel u angeloʼobeʼ» tu séebaʼanil tu jóoʼsoʼob «le kaan yéetel u angeloʼob» utiaʼal maʼ u xuʼulskoʼob le Reinooʼ. Bey túunoʼ, Satanaseʼ jóoʼsaʼab teʼ kaʼan le maʼ sen úuch tsʼaʼabak le Reino tiʼ Jesús tu jaʼabil 1914.

Uláakʼ baʼax unaj k-chʼaʼik en cuentaileʼ letiʼe ka káaj u kaʼa kuxkíintaʼal le máaxoʼob yéeyaʼanoʼob utiaʼal u binoʼob kaʼanoʼ. Le Bibliaoʼ ku yaʼalikeʼ lelaʼ káaj le maʼ sen úuch káajak u beetik u Reyil Jesusoʼ (Apo. 20:6). * Baʼaleʼ maʼatech u yaʼalik wa táakpajoʼob yéetel Cristo teʼ baʼateʼel tu contra Satanás yéetel u kʼasaʼan angeloʼoboʼ. Le oʼolaleʼ, le ka káaj u kaʼa kuxkíintaʼal le máaxoʼob yéeyaʼanoʼob utiaʼal bin kaʼanoʼ tsʼokaʼaniliʼ u puʼulul Satanás yéetel u kʼasaʼan angeloʼob way Luʼumeʼ.

Bey túunoʼ, kex le Biblia maʼatech u yaʼalik jach baʼax kʼiin ka jóoʼsaʼab Satanás yéetel u kʼasaʼan angeloʼob teʼ kaʼanoʼ, jeʼel u páajtal k-aʼalikeʼ lelaʼ úuch chéen upʼíit kʼiinoʼob tsʼoʼokok u tsʼaʼabal Jesucristo u beet u Reyil teʼ kaʼan tu jaʼabil 1914.

[Tsolajiloʼob]