Ni rinabadiidxaʼ cani ruundaʼ

Padxí guládxicabe Binidxabaʼ de guibáʼ (Apo. 12:1-9).

Neca qué ruzeeteʼ libru stiʼ Apocalipsis padxipeʼ nga zándaca guca ni la? ruzeeteni xcaadxi cosa ni bizaaca ne zacané laanu gánnanu padxí guca ni. Primé ni bizaaca nga bizulú cayuni mandar Reinu stiʼ Dios. Nánnanu guca si nga «udinde cabe ibáʼ» ne pur nga guládxicabe Binidxabaʼ de raqué.

Stiidxaʼ Dios culuíʼ laanu lu iza 1914 que nga biluxe dxi biʼniʼ mandar guiráʼ guidxi ne bizulú biʼniʼ mandar Reinu stiʼ Dios (Luc. 21:24). a Pabiáʼ tiempu gudiʼdiʼ dede dxi bizulú gudíndecabe guibáʼ ne guládxicabe Binidxabaʼ yaʼ.

Sicaríʼ cusiene Apocalipsis 12:4: «Bizuhuaa me [Binidxabaʼ] nezalú gunaa que para gabi me xiiñi casi gale». Nga rusihuinni gucalaʼdxiʼ Binidxabaʼ nunitilú Reinu stiʼ Dios, ne pa ñanda si ñúnibe ni casi bizulú cayuni mandar Reinu ca. Neca qué nudii Jiobá lugar ñuni Binidxabaʼ ni gucalaʼdxiʼ la? laa bicaalú Reinu que dxi nacubi bizulú cayuni mandarni. Ngue runi, Miguel ne ca ángel stiʼ oraqueca bicaalucaʼ «dragón ne ca xpinni» ne guládxicabe laacaʼ ti cadi gunduuxecaʼ Reinu stiʼ Dios que. Zacá nga nánnanu guládxicabe Binidxabaʼ de guibáʼ caadxi dxi de bizulú biʼniʼ mandar Reinu stiʼ Dios lu iza 1914.

Sti cosa ni zacané laanu gánnanu padxí guca ni nga guidúʼyanu padxí bizulú cayasa ca xpinni Cristu ni bibí que de lade gueʼtuʼ. Ne cani huadúʼndanu lu Biblia culuíʼ bizulú cayásacabe caadxi dxi despué de bizulú cayuni mandar Reinu stiʼ Dios guibáʼ (Apo. 20:6). b Peru Biblia cadi cuzeeteʼ diʼ pa ne ca xpinni Cristu ni bibí ca nga nuucaʼ dxi guladxi Cristu dragón que ne ca xpinni de guibáʼ. Nga runi, dxi bizulú cayasa ca xpinni Cristu ni bibí de lade gueʼtuʼ que, guca ni despué de guládxicabe Binidxabaʼ ne ca demonio stiʼ de guibáʼ.

Neca cadi cusiene Biblia padxipeʼ nga guládxicabe Binidxabaʼ ne ca demonio stiʼ de guibáʼ la? cani bidúʼyanu ca cusihuínnicani bizaaca nga caadxi dxi despué de guca Jesucristu Rey guibáʼ lu iza 1914.

[Cani cá ñee yaza]