Mga Agom na Lalaki, Arogon an Pagkamoot ni Cristo!

KAN huring banggi kan saiyang buhay digdi sa daga, sinabihan ni Jesus an saiyang maimbod na mga apostol: “Tinatawan ko kamo nin bagong togon, na kamo magkaminorootmootan; siring kan pagkamoot ko sa saindo, na kamo man magkaminorootmootan. Paagi kaini an gabos makakaaram na kamo an sakong mga disipulo, kun kamo nagkakaminorootmootan.” (Juan 13:34, 35) Tunay nanggad, an tunay na mga Kristiano dapat na magkaminorootmootan.

Espesipikong ipinanonongod ni apostol Pablo sa Kristianong mga agom na lalaki an surat niang ini: “Mga agom na lalaki, padagos nindong mamotan an saindong agom na babae, kun paanong an Cristo namoot man sa kongregasyon asin itinao an saiyang sadiri para dian.” (Efe. 5:25) Paano ikakaaplikar nin Kristianong agom na lalaki an sono sa Kasuratan na sadol na ini sa saiyang buhay bilang may agom, partikular na kun an saiyang agom sarong nagdusay na lingkod ni Jehova?

Namotan ni Cristo an Kongregasyon

“An mga agom na lalaki kaipuhan na mamoot sa saindang agom na babae siring sa saindang sadiring hawak,” an sabi kan Biblia. “An namomoot sa saiyang agom na babae namomoot sa saiya man sana, huli ta mayong tawo na naongis kasuarin man sa saiyang sadiring laman; kundi pinapakakan nia asin minamahal iyan, arog kan ginigibo man kan Cristo sa kongregasyon.” (Efe. 5:28, 29) Pinadangat ni Jesus an saiyang mga disipulo asin namotan nia sinda. Mahal nia sinda. Minsan ngani bako sindang sangkap, maboot sia sa sainda. Huling nagmamawot na “ikaatubang nia an kongregasyon sa saiya man sana sa kamurawayan kaiyan,” nagkonsentrar sia sa marahay na mga kualidad kan saiyang mga disipulo.—Efe. 5:27.

Kun paanong nagpaheling si Cristo nin pagkamoot sa kongregasyon, an agom na lalaki dapat man na magpaheling nin pagkamoot sa saiyang agom sa tataramon sagkod sa gibo. An agom na babae na parateng pinapahelingan nin pagkamoot kan saiyang agom naoogma asin nakakamateng namomotan sia. Sa ibong na lado, an babae na igwa kan gabos na kaginhawahan nin magayon na harong puedeng magin grabe kamondo kun sia pinapabayaan o binabaliwala kan saiyang agom.

Paano ipinapaheling nin agom na lalaki na namomotan nia an saiyang agom? Sa publiko, ipinapamidbid nia ini sa iba sa may dignidad na paagi asin hayag nia ining inoomaw huli sa suporta kaini. Kun nagkaigwa nin mahalagang papel an saiyang agom sa sarong kapangganahan kan pamilya, dai nag-aalangan an agom na lalaki na ipaaram iyan sa iba. Kun sindang duwa sana, namamatean kan agom na babae an pagpadangat kan saiyang agom. An pagkapot sa kamot, paghuyom, pagkugos, asin pag-omaw tibaad sadit na mga bagay sana, alagad igwa iyan nin nagdadanay na epekto sa puso nin babae.

‘Dai Nasupog na Apodon Sindang “mga Tugang”’

Si Cristo Jesus ‘dai nasupog na apodon an saiyang linahidan na mga parasunod na “mga tugang.”’ (Heb. 2:11, 12, 17) Kun ika sarong Kristianong agom na lalaki, girumdomon na an saimong agom tugang mo man na Kristiana. An pagdusay nia ki Jehova mas mahalaga kisa sa sinumpaan nia sa kasal, baga man sia binautismohan bago o pagkatapos kan saindong kasal. Kun inaapod an saimong agom tanganing magkomento, an tugang na namamayo sa pagtiripon kan kongregasyon angay na inaapod siang “Tugang.” Sia tugang mo man, bako sana sa Kingdom Hall kundi pati sa harong. Kun paanong dapat kang magin maboot asin magalang sa saiya sa Kingdom Hall, mahalaga man na arog ka kaiyan sa saiya sa harong.

Kun igwa ka nin dagdag na mga pribilehio nin paglilingkod sa kongregasyon, tibaad kun minsan masakitan kang balansehon an mga responsabilidad  sa kongregasyon asin sa pamilya. An marahay na kooperasyon kan kamagurangan asin ministeryal na mga lingkod saka an epektibong pagdelegar nin mga responsabilidad magtatao sa saimo nin mas dakol na panahon para sa tugang na pinakakaipuhan ka—an saimong agom. Girumdomon, may ibang mga tugang na seguradong makakagibo kan pangkongregasyon na mga gibohon na iinasignar sa saimo, alagad ika sana an tugang na makakagibo kan mga obligasyon mo sa saimong agom.

Dugang pa, ika an payo kan saimong agom. An Biblia nagsasabi: “An payo kan lambang lalaki iyo an Cristo; an payo man nin babae iyo an lalaki.” (1 Cor. 11:3) Paano mo isasagibo an pagkapayong ini? Sa mamomoton na paagi, bakong sa paorootrong pagkotar kan nasambit na teksto asin pirit na paghagad na igalang ka. An pinakaliabe sa tamang pagsagibo nin pagkapayo iyo na arogon mo si Jesu-Cristo sa pagtratar mo sa saimong agom.—1 Ped. 2:21.

“Kamo an Sakong mga Katood”

Inapod ni Jesus an saiyang mga disipulo na saiyang mga katood. Sinabi nia sa sainda: “Dai ko na kamo inaapod na mga oripon, huli ta an oripon dai nakakaaram kan ginigibo kan saiyang kagurangnan. Kundi inapod ko kamong mga katood, huli ta an gabos na bagay na nadangog ko sa sakong Ama ipinaaram ko sa saindo.” (Juan 15:14, 15) May marahay na komunikasyon si Jesus asin an saiyang mga disipulo. Magkairibanan man nindang ginigibo an mga bagay-bagay. “Si Jesus asin an saiyang mga disipulo” inimbitaran sa punsion sa kasal sa Cana. (Juan 2:2) May paborito sindang mga lugar, arog kan hardin nin Getsemane. Sinasabi kan Biblia na “dakol na beses nang nakipaghelingan duman si Jesus sa saiyang mga disipulo.”—Juan 18:2.

Tunay nanggad na kaipuhan na mamatean nin agom na babae na sia an pinakadayupot na kaibaiba kan saiyang agom. Bilang mga mag-agom, mahalagang marhay nanggad na magkaibanan nindong ikinakaogma an buhay! Paglingkodan an Dios na magkaibanan. Ikaogmang marhay an pag-adal kan Biblia na magkaibanan. Magtagama nin panahon na magkaibanan—maglakawlakaw, mag-olay-olay, asin magkakan na magkaibanan. Magin labi pa sa pagigin mag-agom sana; magin dayupot na magkatood man.

Sia “Namoot sa Sainda Sagkod sa Katapusan”

Si Jesus ‘namoot sa saiyang mga disipulo sagkod sa katapusan.’ (Juan 13:1) An nagkapirang agom na lalaki dai naaarog si Cristo sa paaging ini. Tibaad bayaan pa ngani ninda ‘an agom na babae nin saindang pagkahoben,’ tibaad huli sa saro na mas hoben.—Mal. 2:14, 15.

An iba, siring baga ki Willi, inarog si Cristo. Huli sa nagluluyang salud, an agom ni Willi kinaipuhan na danay na atamanon sa laog nin dakol na taon. Ano an nagin saboot ni Willi manongod digdi? Sia nagsabi: “Pirme kong minamansay an sakong agom na regalo hale sa Dios asin pinapahalagahan ko sia bilang siring kaiyan. Apuera kaiyan, 60 taon na an nakaagi, nanuga ako na aatamanon ko sia sa marahay sagkod masakit na mga panahon. Dai ko noarin man lilingawan an panugang iyan.”

Kristianong mga agom na lalaki, arogon an pagkamoot ni Cristo. Kamotan an saindong matatakton sa Dios na agom na babae—na saindong tugang asin katood.

[Ritrato sa pahina 20]

An saimo daw na agom na babae an pinakadayupot mong kaibaiba?

[Ritrato sa pahina 20]

‘Padagos na kamotan an saindong agom’