Mme Ebe, Ẹkpebe Ima Christ!

JESUS ọkọdọhọ mme anam-akpanikọ apostle esie ke okoneyo oro ekesierede usen oro ẹkeyomde ndiwot enye ete: “Ami mmọnọ mbufo obufa ibet, nte mbufo ẹma kiet eken; kpa nte n̄kamade mbufo, nte mbufo n̄ko ẹma kiet eken. Edieke mbufo ẹnyenede ima ke otu idem mbufo, kpukpru owo ẹyeda emi ẹfiọk ẹte mbufo ẹdi mbet mi.” (John 13:34, 35) Ke akpanikọ, ana ata mme Christian ẹma kiet eken.

Apostle Paul ọkọdọhọ mme ebe ete: “Mme ebe, ẹka iso ẹma iban mbufo, kpa nte Christ n̄ko akamade esop onyụn̄ ayakde idemesie ọnọ ke ibuot esie.” (Eph. 5:25) Didie ke ebe emi edide Christian ekeme ndima n̄wan esie nte itie N̄wed Abasi emi ọdọhọde, akpan akpan edieke n̄wan esie edide asan̄autom Jehovah emi ama akayak idem ọnọ Abasi?

Christ Ama Ama Esop

Bible ọdọhọ ete: “Ntem ke mme ebe ẹkpema iban mmọ nte idem mmọ. Owo eke amade n̄wan esie ama idemesie, koro akananam baba owo kiet isuaha obụkidem esie; edi ọbọbọk onyụn̄ ekpeme enye, kpa nte Christ n̄ko anamde ye esop.” (Eph. 5:28, 29) Jesus ama enen̄ede ama mme mbet esie. Idem okposụkedi emi mmọ ẹkedide mme anana-mfọnmma owo, enye ekesitie sụn̄sụn̄ onyụn̄ ọfọn ido ye mmọ. Enye ekesise nti ido mmọ man “akpada esop emi ọyọhọde ye ubọn̄ ọnọ idemesie.”—Eph. 5:27.

Ana ebe ama n̄wan esie ke ikọ ye ke edinam nte Christ amade esop. Esịt esinen̄ede enem n̄wan emi ebe esie esidọhọde ke imama enye, enye esinyụn̄ okụt ke ebe imọ ama imọ. Edi n̄wan oro enyenede kpukpru nti n̄kpọ ke ediye ufọkidụn̄ idinen̄ekede ikop inemesịt edieke ebe esie mînọhọ enye iso, m̀mê edieke enye mînyeneke ini inọ enye.

Didie ke ebe ekeme ndiwụt ke imama n̄wan imọ? Edi nditoro n̄wan esie ke iso mbon en̄wen, nnam mmọ ẹfiọk asian asian nte ke n̄wan imọ edi emi nnyụn̄ ntịn̄ nte enye ọfọnde ye imọ. Edieke n̄wan fo enen̄erede esịn idem an̄wam ubon, kûmen̄e ndisian mme ufan fo. Nam enye ọfiọk ke amama imọ ke ini ẹdude mbufo mbiba kpọt. Ekeme nditie nte editụk owo, edituak inua imam, ye edifat nnyụn̄ ntoro owo ẹdi n̄kpri n̄kpọ, edi ke nditịm ntịn̄, iwakke se isinemde iban ntre.

“Bụt Inamke Enye Ndikot Mmọ ‘Nditọete’”

‘Bụt ikanamke Christ Jesus ndikot mme anditiene enye oro ẹyetde aran nditọete.’ (Heb. 2:11, 12, 17) Edieke edide Christian, ti ete ke n̄wan fo edi eyenete fo n̄ko. Edide enye ama anana baptism mbemiso mbufo ẹdọ ndọ, m̀mê akana ke ẹma ẹkedọ ndọ, un̄wọn̄ọ oro enye akanamde ọnọ Jehovah ke usen emi enye akayakde idem ọnọ Enye okpon akan un̄wọn̄ọ ndọ oro enye akanamde ye afo. Ke ini eyenete oro odude ke mbot utịn̄ikọ obụpde mbụme ke mbono esop, ndien n̄wan fo emenerede ubọk, n̄kọ ẹsikot enye “Sista,” oro edi, eyenete. Enye edi eyenete fo n̄ko. Enye idịghe eyenete ke Ufọkmbono Obio Ubọn̄ kpọt, edi n̄ko ke ufọk. Fọn ido nyụn̄ tie ufan ufan ye enye ke ufọk nte esinamde ke Ufọkmbono Obio Ubọn̄.

 Edieke enyenede ifetutom ke esop, ekeme ndidi esisọn̄ fi ndise mban̄a esop ye ubon. Edieke mbiowo ye mme asan̄autom unamutom ẹnen̄erede ẹdiana kiet ẹnyụn̄ ẹkpepde mbon en̄wen ndise mban̄a ndusụk n̄kpọ ke esop, oro ọyọnọ fi ini ndidu ye n̄wan fo, kpa eyenete fo an̄wan, oro oyomde ọnọ ntịn̄enyịn akan. Ti ete ke owo ekededi ekeme ndinam utom fo ke esop, edi idụhe owo ndomokiet oro ekemede ndidọ n̄wan fo nnọ fi.

Akan oro, afo edi ibuot ọnọ n̄wan fo. Bible ọdọhọ ete: “Christ edi ibuot ọnọ kpukpru irenowo; erenowo onyụn̄ edi ibuot ọnọ n̄wan.” (1 Cor. 11:3) Didie ke afo emi edide ibuot ufọk akpanam n̄kpọ? Idịghe ndikọkwọ itie N̄wed Abasi emi kpukpru ini nnọ n̄wan fo man enye okpono fi. Se idinamde fi edi eti ibuot ufọk edi ndikpebe Jesus Christ ke nte anamde n̄kpọ ye n̄wan fo.—1 Pet. 2:21.

“Mbufo Ẹdi Mme Ufan Mi”

Jesus ọkọdọhọ ke mme mbet esie ẹdi mme ufan imọ. Enye ọkọdọhọ mmọ ete: “Ami n̄kotke mbufo aba mme ifịn, koro ofụn mîfiọkke se eteufọk esie anamde. Edi n̄kot mbufo mme ufan, koro kpukpru n̄kpọ oro n̄kopde nto Ete mi mmanam mbufo ẹfiọk.” (John 15:14, 15) Jesus ama esineme nneme ye mme mbet esie. Mmọ ẹkesinyụn̄ ẹnam n̄kpọ ọtọkiet. Ẹma ẹkot “Jesus ye mme mbet esie” usọrọ ndọ ke Cana. (John 2:2) Jesus ama esinyụn̄ ada mmọ aka nti itie nte In̄wan̄ Gethsemane. Bible ọdọhọ ke “Jesus ye mbet esie ẹma ẹsisop idem do ediwak ini.”—John 18:2.

Nam n̄wan fo ọfiọk ke mbufo mbiba ẹdi itai ye aban̄. Idụhe se ifọnde nte ebe ye n̄wan ndinam n̄kpọ ọtọkiet! Ẹkpono Abasi ọtọkiet. Ẹma ndikpep Bible ọtọkiet. Ẹtie kiet ẹneme nneme, ẹsan̄a kiet ẹwọrọ an̄wa, ẹnyụn̄ ẹdia udia ọtọkiet. Ẹkûdi ebe ye n̄wan kpọt, edi ẹdi ata nti ufan.

Enye Ama “Ama Mmọ Tutu Esịm Utịt”

Jesus ama “ama [mme mbet esie] tutu esịm utịt.” (John 13:1) Ndusụk ebe isikpebeke Jesus ke afan̄ emi. Mmọ ẹkeme ndikpọn̄ ‘n̄wan uyen mmọ’ man ẹkedọ n̄kaiferi.—Mal. 2:14, 15.

Edi ndusụk ebe nte Willi ẹkpebe Christ. N̄wan esie ama ọdọn̄ọ ke ediwak isua, ndien ama oyom esise enye enyịn kpukpru ini. Nso ke Willi akanam? Enye ọkọdọhọ ete: “Nsisụk nda n̄wan mi nte enọ Abasi, mmonyụn̄ nnen̄ede mma enye. N̄kọ mma n̄n̄wọn̄ọ ini n̄kọdọde enye isua 60 emi ẹkebede ke nyese mban̄a enye ke mfọnọn̄kpọ ye ndiọhọn̄kpọ. Ndifreke un̄wọn̄ọ oro tutu amama.”

Edieke afo edide Christian onyụn̄ enyenede n̄wan, kpebe ima Christ. Ma n̄wan fo. Kûfre ke enye onyụn̄ edi eyenete fo ye ufan fo nde.

[Ndise ke page 20]

Ndi afo ye n̄wan fo ẹdi itai ye aban̄?

[Ndise ke page 20]

‘Ka iso ma n̄wan fo’