Wumɛi, Nyɛkasea Kristo Suɔmɔ Lɛ!

GBƐKƐ dani enɔjetsɛremɔ ni Yesu gbo lɛ, ekɛɛ ebɔfoi anɔkwafoi lɛ akɛ: “Kitã hee miŋɔhaa nyɛ, akɛ nyɛsumɔ nyɛhe; taakɛ bɔ ni misumɔ nyɛ lɛ, nakai nyɛ hu nyɛsumɔa nyɛhe. Kɛji nyɛsumɔɔ nyɛhe lɛ, no mɛi fɛɛ kɛaale akɛ mikaselɔi ji nyɛ.” (Yoh. 13:34, 35) Eji anɔkwale akɛ esa akɛ anɔkwa Kristofoi asumɔsumɔɔ amɛhe.

Bɔfo Paulo kɛ Kristo sɛɛnyiɛlɔi ateŋ mɛi ni ji wumɛi lɛ wie tɛɛ akɛ: “Nyɛ wumɛi lɛ, nyɛsumɔa nyɛ diɛŋtsɛ nyɛŋamɛi, taakɛ bɔ ni Kristo hu sumɔ asafo lɛ ni eŋɔ lɛ diɛŋtsɛ ehe eha yɛ ehewɔ.” (Efe. 5:25) Mɛɛ gbɛ nɔ wu ni ji Kristofonyo lɛ baanyɛ ekɛ Ŋmalɛ mli ŋaawoo nɛɛ atsu nii yɛ egbalashihilɛ mli, titri lɛ kɛ́ eŋa lɛ ji Yehowa tsulɔ ni ejɔɔ ehe nɔ?

Kristo Hiɛ Asafo lɛ Dɔdɔɔdɔ

Biblia lɛ kɛɔ akɛ: “Sa akɛ wumɛi hu asumɔ amɛ diɛŋtsɛ amɛŋamɛi, tamɔ amɛ diɛŋtsɛ amɛgbɔmɔtsei. Mɔ ni sumɔɔ eŋa lɛ, lɛ diɛŋtsɛ ehe esumɔɔ. Ejaakɛ mɔ ko enyɛko lɛ diɛŋtsɛ eheloo da, shi moŋ elɛ̀ɔ lɛ ni ehiɛɔ lɛ dɔdɔɔdɔ, taakɛ bɔ ni Nuŋtsɔ lɛ hiɛɔ asafo lɛ.” (Efe. 5:28, 29) Yesu sumɔ ekaselɔi lɛ ni edɔ amɛhe. Ehiɛ amɛ dɔdɔɔdɔ. Eyɛ mli akɛ amɛyeee emuu moŋ, shi ejie mlijɔlɛ kɛ mlihilɛ kpo etsɔɔ amɛ. Akɛni eesumɔ ni ‘eŋɔ asafo lɛ edamɔ shi eha lɛ diɛŋtsɛ ehe akɛ anunyam asafo’ hewɔ lɛ, ekɛ ejwɛŋmɔ ma sui kpakpai ni ekaselɔi lɛ yɔɔ lɛ anɔ.—Efe. 5:27.

Esa akɛ wu atsɔ ewiemɔ kɛ enifeemɔ nɔ ejie suɔmɔ kpo etsɔɔ eŋa tamɔ bɔ ni Kristo jie suɔmɔ kpo etsɔɔ asafo lɛ. Yoo ni ewu jieɔ suɔmɔ kpo etsɔɔ lɛ daa lɛ náa miishɛɛ ni enuɔ he akɛ ewu dɔɔ ehe waa. Yɛ gbɛ kroko nɔ lɛ, kɛ́ ŋa ko ná shihilɛ mli nibii fɛɛ yɛ shĩa, shi ewu náaa dekã ehaaa lɛ loo esusuuu ehe lɛ, no lɛ ŋa lɛ naŋ miishɛɛ ko kwraa.

Mɛni wu ko baafee kɛtsɔɔ akɛ edɔɔ eŋa he? Kɛ́ ekɛ lɛ miiŋa mɛi lɛ, efeɔ lɛ yɛ bulɛ mli ni ejieɔ eŋa lɛ yi yɛ yelikɛbuamɔ ni ekɛhaa lɛ lɛ hewɔ. Kɛ́ yoo lɛ efee nɔ ko titri kɛye ebua weku lɛ, eshashaooo shi akɛ ebaaha mɛi krokomɛi ale enɛ. Kɛ́ ekɛ ewu lɛ pɛ yɛ he ko lɛ, esa akɛ enu he akɛ ewu lɛ dɔɔ ehe waa. Mɔ mli mɔmɔ, hiɛ ŋmɔlɔŋmɔlɔ feemɔ, mɔ fuamɔ, kɛ yijiemɔ wiemɔi ji nifeemɔi ni abuɔ amɛ akɛ amɛjeee nɔ ko tsɔ, shi amɛnáa yei anɔ hewalɛ waa diɛŋtsɛ.

“Ehiɛ Gbooo akɛ Eeetsɛ́ Amɛ Nyɛmimɛi”

Kristo Yesu ‘hiɛ gbooo akɛ eeetsɛ́ esɛɛnyiɛlɔi ni afɔ amɛ mu lɛ akɛ nyɛmimɛi.’ (Heb. 2:11, 12, 17) Kɛ́ oji wu Kristofonyo lɛ, kaimɔ akɛ oŋa lɛ hu ji onyɛmi Kristofonyo. Abaptisi oŋa lɛ dani okɛ lɛ hi shi jio, okɛ lɛ hi shi dani abaptisi lɛ jio lɛ, ehe nɔ ni ejɔɔ kɛha Yehowa lɛ he miihia kwraa fe egbalashihilɛ kitakamɔ lɛ. Kɛ́ nyɛmi nuu ko miikwɛ asafoŋ kpee nɔ ni ebaatsɛ oŋa koni eha sane hetoo lɛ, ebaatsɛ lɛ yɛ gbɛ ni ja nɔ akɛ “Nyɛmiyoo [ashimashi].” Bo hu oŋa lɛ ji onyɛmi yoo yɛ Maŋtsɛyeli Asa lɛ nɔ kɛ shĩa fɛɛ. Ehe miihia ni ojie mlihilɛ kpo otsɔɔ lɛ yɛ shĩa ni okɛ lɛ awie kɛ bulɛ taakɛ obaafee kɛ́ ayɛ Maŋtsɛyeli Asa lɛ nɔ lɛ.

Kɛ́ oyɛ sɔɔmɔ gbɛnaa yɛ asafo lɛ mli lɛ, bei komɛi lɛ ebaanyɛ efee nɔ ni wa akɛ oootsu  asafoŋ kɛ weku lɛ mli sɔ̃i ni jwere onɔ lɛ ahe nii. Kɛ́ ekomefeemɔ yɛ onukpai kɛ asafoŋ sɔɔlɔi lɛ ateŋ, ni okɛ onitsumɔi lɛ ekomɛi woɔ mɛi krokomɛi adɛŋ koni amɛtsu amɛha bo lɛ, no baanyɛ aye abua bo ni oná dekã oha oŋa ni ji nyɛmi yoo ni ohe hiaa lɛ fe fɛɛ lɛ. Kaimɔ akɛ, nyɛmimɛi pii yɛ asafo lɛ mli ní baanyɛ atsu nitsumɔi ni akɛwo odɛŋ lɛ, shi bo pɛ ji nyɛmi nuu ni baanyɛ atsu oŋa gbalashihilɛ mli hiamɔ nii ahe nii.

Kɛfata he lɛ bo ji oŋa lɛ yitso. Biblia lɛ kɛɔ akɛ: “Nuu fɛɛ nuu yitso ji Kristo, ni yoo fɛɛ yoo hu yitso ji nuu.” (1 Kor. 11:3) Te esa akɛ otsu yitsoyeli nɛɛ he nii oha tɛŋŋ? Jeee kɛtsɔ ŋmalɛ nɛɛ yisɛɛ ni oootsɛ shii abɔ ni obi ni oŋa lɛ abu bo lɛ nɔ, shi moŋ yɛ suɔmɔ mli. Gbɛ titri ni oootsɔ nɔ otsu oyitsoyeli lɛ he nii ji ni okase Yesu Kristo yɛ bɔ ni okɛ oŋa lɛ yeɔ ohaa lɛ mli.—1 Pet. 2:21.

“Mishieŋtsɛmɛi Ji Nyɛ”

Yesu tsɛ ekaselɔi lɛ akɛ eshieŋtsɛmɛi. Ekɛɛ amɛ akɛ: “Mitsɛɛɛ nyɛ nyɔji dɔŋŋ, ejaakɛ nyɔŋ leee nɔ ni enuŋtsɔ feɔ; shi moŋ shieŋtsɛmɛi mitsɛ nyɛ, ejaakɛ nii fɛɛ ni minu yɛ mitsɛ naa lɛ, mitsĩ tã mikɛɛ nyɛ.” (Yoh. 15:14, 15) Yesu kɛ ekaselɔi lɛ fɔɔ sanegbaa. Amɛfeɔ ekome kɛfeɔ nii. Akpee ‘Yesu kɛ ekaselɔi lɛ’ kɛtee yookpeemɔ shishi yɛ Kana. (Yoh. 2:2) Amɛyɛ hei ni amɛsumɔɔ waa tamɔ Getsemane abɔɔ lɛ mli. Biblia lɛ kɛɔ akɛ: “Yesu kɛ ekaselɔi lɛ fɔɔ kpee yɛ jɛi.”—Yoh. 18:2.

Ehe miihia ni ŋa lɛ anu he akɛ lɛ ji ewu lɛ naanyo ni fe fɛɛ. Kwɛ bɔ ni ehe hiaa waa akɛ wumɛi kɛ amɛŋamɛi aaaná amɛhewɔŋ miishɛɛ! Nyɛfea ekome kɛsɔmɔa Nyɔŋmɔ. Nyɛnáa he miishɛɛ akɛ nyɛaafee ekome kɛkase Biblia lɛ. Nyɛnáa be kɛsharaa shi, nyɛgbaa sane, ni nyɛfea ekome kɛyea nii. Nyɛhia shi akɛ nanemɛi kpakpai; shi jeee mɛi ni ebote gbalashihilɛ mli kɛkɛ.

“Esumɔ Amɛ Kɛwula Shi”

Yesu ‘sumɔ ekaselɔi lɛ kɛwula shi.’ (Yoh. 13:1) Wumɛi komɛi ebɔɔɔ mɔdɛŋ akɛ amɛaakase Kristo yɛ enɛ gbɛfaŋ. Amɛnyɛɔ amɛshiɔ ‘amɛblahiiaŋ ŋa lɛ’ po, ni ekolɛ amɛyanyiɛɔ oblayei bibii asɛɛ.—Mal. 2:14, 15.

Mɛi komɛi tamɔ Willi kaseɔ Kristo. Akɛni Willi ŋa náaa hewalɛ hewɔ lɛ ehe bahia ni ekwɛ lɛ afii babaoo. Te Willi nu he eha tɛŋŋ? Ekɛɛ akɛ: “Minaa miŋa daa akɛ nikeenii ni jɛ Nyɔŋmɔ ŋɔɔ, ni misumɔɔ lɛ nakai. Kɛfata he lɛ, afii 60 ni eho nɛ lɛ, miwo lɛ shi akɛ kɛ́ ashĩ able ni ashĩ akwɛ̃ lɛ, makwɛ lɛ. Mihiɛ kpaŋ nakai shiwoo lɛ nɔ kɔkɔɔkɔ.”

Wumɛi Kristofoi, nyɛkasea Kristo suɔmɔ lɛ. Nyɛhiɛa nyɛŋamɛi ni ji nyɛ nyɛmimɛi yei kɛ nyɛ nanemɛi ni sheɔ Nyɔŋmɔ gbeyei lɛ dɔdɔɔdɔ.

[Mfoniri ni yɔɔ baafa 20]

Ani oŋa ji onaanyo ni fe fɛɛ?

[Mfoniri ni yɔɔ baafa 20]

“Nyɛsumɔa nyɛ diɛŋtsɛ nyɛŋamɛi”