Mga Bana, Iluga ang Gugma ni Cristo!

SANG katapusan nga gab-i sang iya kabuhi sa duta, ginsilingan ni Jesus ang iya matutom nga mga apostoles: “Nagahatag ako sa inyo sang isa ka bag-o nga sugo, nga maghigugmaanay kamo; subong nga ako nagahigugma sa inyo, maghigugmaanay man kamo. Paagi sa sini ang tanan makahibalo nga kamo mga disipulo ko, kon nagahigugmaanay kamo.” (Juan 13:34, 35) Subong matuod nga mga Cristiano, dapat gid nga maghigugmaanay kita.

Nagahambal sing direkta sa mga bana nga sumulunod ni Cristo, si apostol Pablo nagsulat: “Mga bana, padayon nga higugmaa ang inyo asawa, subong nga si Cristo naghigugma man sang kongregasyon kag nagtugyan sang iya kaugalingon tungod sa sini.” (Efe. 5:25) Paano maaplikar sang Cristianong mga bana ining sugo sang Biblia, ilabi na kon ang iya asawa isa ka dedikado nga alagad ni Jehova?

Ginpalangga ni Cristo ang Kongregasyon

“Ang mga bana dapat maghigugma sang ila asawa subong sang ila kaugalingon nga lawas,” siling sang Biblia. “Sia nga nagahigugma sang iya asawa nagahigugma sang iya kaugalingon, kay wala sing tawo nga nagadumot sang iya kaugalingon nga unod; kundi ginapakaon kag ginapalangga niya ini, subong sang ginahimo ni Cristo sa kongregasyon.” (Efe. 5:28, 29) Palangga gid ni Jesus ang iya mga disipulo. Bisan pa di-himpit sila, malulo kag mainayuhon sia sa ila. Agod “mapaatubang niya sa iya kaugalingon ang kongregasyon nga may katahom,” ang maayo nga mga kinaiya sang iya mga disipulo amo ang gintan-aw niya.—Efe. 5:27.

Subong nga ginpabutyag ni Cristo ang iya gugma sa kongregasyon, dapat ipakita man sang bana ang iya gugma sa iya asawa sa hambal kag sa buhat. Ang asawa nga pirme ginapakitaan sing gugma sang iya bana, nagabatyag nga ginapalangga kag malipayon. Sa pihak nga bahin, mahimo nga indi gid malipayon ang isa ka babayi nga ginabalewala ukon wala ginapabaloran sang iya bana, bisan pa nga maayo ang ila pangabuhi.

Paano mapakita sang bana nga palangga gid niya ang iya asawa? Kon ara sila sa publiko, ginapakilala niya ang iya asawa sa iban sa matinahuron nga paagi kag ginadayaw ang iya pagsakdag. Ginasugid niya sa iban ang nabulig sang iya asawa sa kadalag-an sang ila pamilya. Bisan silahanon lang, mabatyagan sang iya asawa ang iya pagpalangga. Ang pag-uyat sa kamot, pagyuhum, paghakos, kag pagdayaw mahimo diutay lang nga butang sa bana, pero indi gid ini malipatan sang isa ka babayi.

“Wala Sia Mahuya nga Tawgon Sila nga ‘Kauturan’”

“Wala [si Jesucristo] mahuya nga tawgon [ang iya hinaplas nga mga sumulunod] nga ‘kauturan.’” (Heb. 2:11, 12, 17) Kon ikaw isa ka Cristianong bana, dumduma nga ang imo asawa imo man Cristianong utod. Ang iya dedikasyon kay Jehova mas importante sangsa iya sumpa sa inyo kasal, bisan nabawtismuhan man sia antes ukon pagkatapos kamo nag-asawahay. Kon magkomento sia sa mga miting, nagakaigo nga ginatawag sia sang nagadumala nga “Sister.” Utod mo man sia, indi lamang sa Kingdom Hall kundi bisan sa inyo balay. Ang kaayo kag pagtahod nga ginapakita mo sa iya sa Kingdom Hall dapat ipakita mo man sa inyo balay.

Kon madamo ang imo pribilehiyo sa kongregasyon, kon kaisa mahimo nabudlayan ka magbalanse sang imo mga responsibilidad sa kongregasyon kag pamilya. Pero, ang maayo nga kooperasyon sang mga gulang kag sang mga ministeryal nga alagad kag ang paghanas sa iban nga  atipanon ang pila ka responsibilidad sa kongregasyon makapamag-an sang imo responsibilidad. Sa amo, madugangan mo ang imo tion para sa utod nga labi nga nagakinahanglan sa imo—ang imo asawa. Dumduma, madamo nga utod nga lalaki ang makahimo sang imo mga hilikuton sa kongregasyon, pero ikaw lamang ang utod nga bana sang imo asawa.

Dugang pa, ikaw ang ulo sang imo asawa. Ang Biblia nagasiling: “Ang ulo sang tagsa ka lalaki amo ang Cristo; ang ulo naman sang babayi amo ang lalaki.” (1 Cor. 11:3) Paano mo ipakita ang imo pagkaulo? Ipakita mo ini sing mahigugmaon. Indi paagi sa pagsulitsulit sini nga teksto kag mamilit nga tahuron ka, kundi paagi sa pag-ilog kay Jesucristo kon ginatratar mo ang imo asawa.—1 Ped. 2:21.

“Mga Abyan Ko Kamo”

Gintawag ni Jesus ang iya mga disipulo nga iya mga abyan. Ginsilingan niya sila: “Wala ko na kamo ginatawag nga mga ulipon, bangod ang ulipon wala makahibalo sang ginahimo sang iya agalon. Apang ginatawag ko kamo nga mga abyan, bangod ang tanan nga butang nga nabatian ko sa akon Amay ginapahibalo ko sa inyo.” (Juan 15:14, 15) Si Jesus kag ang iya mga disipulo may maayo nga komunikasyon. Updanay man sila pirme sa ila mga hilikuton. “Si Jesus kag ang iya mga disipulo” gin-agda sa punsion sa kasal sa Cana. (Juan 2:2) May paborito man sila nga mga lugar, subong sang hardin sang Getsemane. Ang Biblia nagasiling nga “madamo na nga beses nga nagtipon didto si Jesus kag ang iya mga disipulo.”—Juan 18:2.

Dapat mabatyagan sang asawa nga sia ang pinakasuod nga kaupod sang iya bana. Importante gid nga kamo nga mag-asawa mag-updanay pirme sing malipayon. Alagda ninyo ang Dios nga magkaupod. Tun-i ang Biblia sing magkaupod. Mag-updanay kamo pirme—maglagawlagaw, mag-istoryahanay, magkaon. Magluwas nga mag-asawa kamo, dapat mag-abyan man kamo.

‘Ginhigugma Niya Sila Tubtob sa Katapusan’

‘Ginhigugma ni Jesus ang iya mga disipulo tubtob sa katapusan.’ (Juan 13:1) Ang iban nga bana napaslawan sa pag-ilog kay Cristo sa sini nga bahin. Mahimo pa gani nila biyaan ang ‘asawa sang ila pagkapamatan-on’ agod mangita sing mas hoben.—Mal. 2:14, 15.

Apang, ang iban pareho kay Willi, nag-ilog kay Cristo. Bangod sa balatian, ang asawa ni Willi kinahanglan nga atipanon sa sulod sang madamo nga tinuig. Paano ini gintamod ni Willi? Sia nagsiling: “Ginakabig ko gid ang akon asawa nga regalo halin sa Dios kag ginaapresyar ko gid sia. Isa pa, nagsaad ako 60 ka tuig na ang nagligad, nga atipanon ko sia bisan sa mabudlay nga mga tion. Indi ko gid pagkalimtan ang akon saad.”

Cristianong mga bana, iluga ninyo ang gugma ni Cristo. Palanggaa ninyo ang inyo mahinadlukon sa Dios nga asawa nga inyo man utod kag abyan.

[Retrato sa pahina 20]

Ang imo bala asawa amo ang imo pinakasuod nga kaupod?

[Retrato sa pahina 20]

‘Padayon nga higugmaa ang imo asawa’