Irġiel Miżżewġin, Imitaw l-Imħabba taʼ Kristu!
FL-AĦĦAR lejl taʼ ħajtu fuq l-art, Ġesù qal lill-appostli leali tiegħu: “Qed nagħtikom kmandament ġdid, li tħobbu lil xulxin; bħalma ħabbejtkom jien, ħobbu intom ukoll lil xulxin. B’dan ikun jaf kulħadd li intom dixxipli tiegħi, jekk ikollkom l-imħabba bejnietkom.” (Ġw. 13:34, 35) Tabilħaqq, il-Kristjani veri għandhom iħobbu lil xulxin.
Waqt li indirizza lill-irġiel miżżewġin minn fost is-segwaċi taʼ Kristu, l-appostlu Pawlu kiteb: “Irġiel, komplu ħobbu lin-nisa tagħkom, bħalma l-Kristu wkoll ħabb lill-kongregazzjoni u ta lilu nnifsu għaliha.” (Efes. 5:25) Raġel Kristjan kif jistaʼ japplika din it-twissija Skritturali fiż-żwieġ tiegħu, partikolarment meta martu tkun qaddejja dedikata taʼ Ġeħova?
Kristu Kien Jgħożż lill-Kongregazzjoni
“L-irġiel b’dan il-mod għandhom iħobbu lin-nisa tagħhom, bħal ġisimhom stess,” tistqarr il-Bibbja. “Min iħobb lil martu jħobb lilu nnifsu, għax ebda bniedem qatt ma bagħad lil ġismu stess; imma jitimgħu u jgħożżu, bħalma l-Kristu jagħmel ukoll lill-kongregazzjoni.” (Efes. 5:28, 29) Ġesù kellu affezzjoni lejn id-dixxipli tiegħu u kien iħobbhom. Kien jgħożżhom. Avolja kienu imperfetti, hu kien ġentili u qalbu tajba magħhom. Peress li xtaq li “l-kongregazzjoni jagħmilha tidher quddiemu fil-ġmiel kollu tagħha,” hu ffoka fuq il-kwalitajiet tajbin tad-dixxipli tiegħu.—Efes. 5:27.
Sewwasew bħalma Kristu esprima mħabbtu għall-kongregazzjoni, raġel miżżewweġ għandu juri mħabbtu għal martu kemm b’dak li jgħid u kemm b’dak li jagħmel. Mara li żewġha jgħidilha regolarment espressjonijiet taʼ mħabba tħoss li hi għażiża għalih u tkun hienja. Mill-banda l-oħra, mara li jkollha l-kumditajiet kollha taʼ dar mill-isbaħ tistaʼ tkun imdejqa ferm jekk tkun qed tiġi traskurata jew injorata minn żewġha.
Raġel kif juri li jgħożż lil martu? Fil-pubbliku, hu jintroduċiha lil oħrajn b’manjiera dinjituża u jfaħħarha fil-beraħ għall-appoġġ tagħha. Jekk martu kellha rwol fundamentali fis-suċċess tal-familja, hu ma jaħsibhiex darbtejn biex dan jgħarrfu lil oħrajn. Fil-privat, hi tħoss l-affezzjoni tiegħu. Għafsa taʼ l-id, tbissima, tgħanniqa, u xi kumpliment jistgħu jkunu affarijiet żgħar, imma lil mara jmissulha qalbha u jfissru ħafna għaliha.
“Ma Jistħix Isejħilhom ‘Ħuti’”
Kristu Ġesù ma kienx ‘jistħi jsejħilhom “ħuti”’ lis-segwaċi midlukin tiegħu. (Ebr. 2:11, 12, 17) Jekk int raġel Kristjan, ftakar li martek hi wkoll oħtok Kristjana. Id-dedikazzjoni tagħha lil Ġeħova hi iktar importanti mill-wegħda taż-żwieġ tagħha, kemm jekk tgħammdet qabel u kemm jekk tgħammdet wara li żżewġitek. Meta jgħid lil martek biex tagħmel xi kumment, il-ħu li jkun qed jippresiedi f’laqgħa tal-kongregazzjoni b’mod xieraq jirreferi għaliha bħala “Oħtna—.” Hi oħtok ukoll, mhux biss fis-Sala tas-Saltna imma wkoll id-dar. Hu importanti li tkun qalbek tajba u edukat magħha fid-dar daqskemm tkun fis-Sala tas-Saltna.
Jekk għandek iżjed privileġġi taʼ servizz fil-kongregazzjoni, kultant għandek mnejn issibha diffiċli biex tibbilanċja
r-responsabbiltajiet tal-kongregazzjoni u tal-familja. Kooperazzjoni tajba fost l-anzjani u l-qaddejja ministerjali u l-iddelegar effettiv taʼ responsabbiltajiet jistgħu jgħinuk biex ikollok iktar ħin għall-oħt li għandha bżonnok l-iktar—martek. Ftakar, hemm aħwa rġiel oħrajn li bla dubju jistgħu jwettqu d-dmirijiet tal-kongregazzjoni li int inkarigat minnhom, imma int l-uniku ħu magħqud maʼ martek fiż-żwieġ.Iktar minn hekk, int il-kap taʼ martek. Il-Bibbja tgħid: “Il-kap taʼ kull raġel hu l-Kristu; u l-kap tal-mara hu r-raġel.” (1 Kor. 11:3) Kif għandek teżerċita dan l-istat taʼ kap? Bl-imħabba, u mhux billi toqgħod tikkwota ripetutament il-vers li ssemma qabel u tesiġi r-rispett. Il-qofol biex teżerċita l-istat taʼ kap b’mod xieraq hu li timita lil Ġesù Kristu fil-mod kif tittratta lil martek.—1 Pt. 2:21.
“Intom Ħbiebi”
Lid-dixxipli tiegħu, Ġesù sejħilhom ħbiebu. Qalilhom: “Ma nsejħilkomx iktar ilsiera, għax ilsir ma jafx x’jagħmel sidu. Imma sejjaħtilkom ħbieb, għax kulma smajt mingħand Missieri għarrafthulkom.” (Ġw. 15:14, 15) Ġesù u d-dixxipli tiegħu kellhom komunikazzjoni tajba. Huma għamlu wkoll affarijiet flimkien. “Ġesù u d-dixxipli tiegħu” kienu mistidnin għall-festa tat-tieġ f’Kana. (Ġw. 2:2) Kellhom postijiet favoriti, bħal per eżempju l-ġnien tal-Ġetsemani. Il-Bibbja tgħid li “Ġesù kemm-il darba kien jiltaqaʼ hemmhekk mad-dixxipli tiegħu.”—Ġw. 18:2.
Mara ċertament li għandha bżonn tħoss li hi l-aqwa ħabiba taʼ żewġha. Kemm hu vitali li intom l-irġiel u n-nisa miżżewġin tgawdu l-ħajja flimkien! Aqdu lil Alla flimkien. Ħudu gost tistudjaw il-Bibbja flimkien. Qattgħu l-ħin flimkien—timxu, titkellmu, tieklu flimkien. Kunu iktar minn koppja miżżewġa; kunu ħbieb għeżież.
“Baqaʼ Jħobbhom Sa l-Aħħar”
Ġesù ‘ħabb lid-dixxipli tiegħu sa l-aħħar.’ (Ġw. 13:1) Xi rġiel miżżewġin ma jimitawx lil Kristu f’dan ir-rigward. Għandhom mnejn saħansitra jabbandunaw lill-‘mara taʼ żgħożithom,’ forsi għal xi ħadd iżgħar.—Mal. 2:14, 15.
Oħrajn, bħal Willi, jimitaw lil Kristu. Peress li saħħitha kienet sejra mill-ħażin għall-agħar, mart Willi kellha bżonn min jieħu ħsiebha b’mod kostanti għal ħafna snin. Kif ħassu Willi dwar dan? Hu qal: “Jien dejjem qist lil marti bħala għotja minn Alla u apprezzajtha bħala tali. Barra minn hekk, 60 sena ilu jien wegħedt li nieħu ħsiebha kemm fi żminijiet tajbin u kemm fi żminijiet ħżiena. Jien qatt ma se ninsieha dik il-wegħda.”
Irġiel miżżewġin Kristjani, imitaw l-imħabba taʼ Kristu. Għożżu lil martkom li tibżaʼ minn Alla—oħtkom u l-ħabiba tagħkom.
[Stampa f’paġna 20]
Hija martek l-aqwa ħabiba tiegħek?
[Stampa f’paġna 20]
‘Kompli ħobb lil martek’