Olketa Hasband, Followim Love Bilong Christ!

LONG lastfala naet wea Jesus laef long earth hem talem olketa faithful aposol bilong hem olsem: “Mi givim wanfala niu law long iufala. Iufala mas lovem iufala evriwan. Mi lovem iufala, and iufala tu mas lovem iufala evriwan long sem wei. Sapos iufala lovem iufala evriwan, pipol bae savve iufala olketa disaepol bilong mi.” (John 13:​34, 35) Tru nao, olketa trufala Christian mas showimaot love for olketa brata and sista.

Aposol Paul tok stret long olketa Christian hasband olsem: “Olketa hasband, gohed for lovem olketa waef bilong iufala, long sem wei wea Christ tu hem lovem kongregeson and givim laef bilong hem for datwan.” (Eph. 5:​25) Long wanem wei nao wanfala Christian hasband savve followim disfala scripture taem waef hem wanfala Christian sista?

Christ Lovem Kongregeson

Bible talem olsem: “Long disfala wei olketa hasband mas lovem waef bilong olketa olsem body bilong olketa seleva. Man wea lovem waef bilong hem lovem hemseleva, from no eni man heitim body bilong hemseleva; bat hem feedim and lukaftarem, olsem Christ hem duim long kongregeson.” (Eph. 5:​28, 29) Jesus barava lovem olketa disaepol bilong hem. Nomata olketa garem sin, hem isi and kaen long olketa. From Jesus laekem ‘kongregeson wea barava luk naes for offerim long hemseleva,’ hem tingim olketa gudfala wei bilong olketa disaepol bilong hem.​—⁠Eph. 5:​27.

Olsem Christ showimaot love long kongregeson, hasband tu mas showimaot love long waef bilong hem long toktok and samting hem duim. Hasband wea showimaot love evritaem hem mekem waef bilong hem barava hapi. Bat woman wea hasband bilong hem no showimaot love long hem, nating hapi nomata tufala garem staka naesfala samting.

Hao nao wanfala hasband savve showimaot hem lovem waef bilong hem? Taem staka pipol stap, datfala hasband bae storyim olketa gudfala samting abaotem waef bilong hem long olketa narawan. Sapos waef bilong hem duim gudfala samting for helpem famili bilong tufala, hasband bae storyim datwan long olketa narawan. Taem tufala stap seleva waef hem savve hasband lovem hem. Taem hasband holem hand bilong waef bilong hem, smile long hem, huggem hem, and tok gud long hem, hem samting wea waef bae tingim evritaem.

“No Shame for Iusim Toktok ‘Olketa Brata’ ”

Christ Jesus “no shame for kolem [olketa anointed wan wea followim hem] ‘olketa brata.’ ” (Heb. 2:​11, 12, 17) Sapos iu wanfala Christian hasband, iu mas tingim hao waef bilong iu hem Christian sista bilong iu tu. Wei wea hem dedicate long Jehovah hem important winim promis bilong marit nomata hem baptaes firstaem or bihaen hem maritim iu. Taem iu duim wanfala part long meeting and askem waef bilong iu for koment, iu fit for iusim toktok “Sista.” Nomata long Kingdom Hall or long haos bilong iutufala, waef bilong iu hem sista bilong iu tu. Hem important for kaen and tok gud long hem long haos and long Kingdom Hall.

Sapos iu garem samfala nara waka long kongregeson, maet iu faendem hao samfala taem hem no isi for duim waka long kongregeson  and semtaem long famili. Wei for waka tugeta witim olketa elder and ministerial servant, and for lanem olketa narawan for lukaftarem waka long kongregeson savve helpem iu for garem inaf taem for sista wea barava needim iu, waef bilong iu. Tingim, staka brata tu savve duim waka wea iu garem long kongregeson, bat iu nomoa brata wea maritim datfala woman.

And tu, iu nao hed ovarem waef bilong iu. Bible talem: ‘Christ hem hed ovarem evri man, man hem hed ovarem woman.’ (1 Cor. 11:⁠3) Long wanem wei nao bae iu followim datfala scripture? Long wei wea iu showimaot love, no long wei for talem disfala scripture and forcem waef for respectim iu. Wei for barava followim diswan, hem for followim Jesus Christ long wei for lukaftarem waef bilong iu long gudfala wei.​—⁠1 Pet. 2:​21.

“Iufala Olketa Fren Bilong Mi”

Jesus talem hao olketa disaepol bilong hem, olketa fren bilong hem. Hem talem olketa olsem: “Mi no kolem iufala olketa wakaman distaem bikos wakaman hem no savve long samting wea boss bilong hem duim. Mi kolem iufala olketa fren bikos mi talem iufala evri samting wea mi herem from Dadi bilong mi.” (John 15:​14, 15) Jesus and olketa disaepol bilong hem savve story gud tugeta. Olketa duim samting tugeta tu. “Jesus and olketa disaepol” go long marit feast long Cana. (John 2:⁠2) Olketa enjoyim olketa naesfala ples tu olsem garden long Gethsemane. Bible talem hao “Jesus and olketa disaepol savve go long there.”​—⁠John 18:⁠2.

Waef need for savve gud hao hem nambawan fren bilong hasband bilong hem. Bae gud tumas sapos iufala olketa hasband and waef duim samting tugeta wea bae mekem iufala hapi! Worshipim God tugeta. Hapi for studyim Bible tugeta. Garem taem for wakabaot, story-story, and kaikai tugeta. No olsem hasband and waef nomoa, bat olsem gudfala fren tu.

Hem “Lovem Olketa Go Kasem End”

Jesus ‘lovem olketa disaepol go kasem taem hem dae.’ (John 13:⁠1) Samfala hasband no followim nao Christ olsem wanem disfala scripture talem. Maet olketa lusim ‘waef wea olketa tekem taem olketa young,’ for tekem nara young wan moa.​—⁠Mal. 2:​14, 15.

Olketa narawan, olsem Willi, olketa followim Christ. For staka year nao Willi need for lukaftarem waef bilong hem bikos health bilong waef no mas gud. Hao nao tingting bilong Willi abaotem Editha? Hem sei: “Mi evritaem tingim waef bilong mi hem wanfala present from God and mi tinghae long Editha. And tu, 60 year wea go pas mi promis for lukaftarem gud Editha nomata long gud and nogud taem. Mi bae nating forgetim datfala promis.”

Olketa Christian hasband, followim love bilong Christ. Lovem waef bilong iu wea worshipim God, hem sista and fren bilong iu.

[Piksa long page 20]

Waswe, waef bilong iu hem nambawan fren bilong iu?

[Piksa long page 20]

‘Gohed for lovem waef bilong iu’