Qusas, Cristojina munakuyniyuq kaychik

JESUSQA, wañupunan pʼunchaymanta ñawpaq chʼisin apostolesninman nirqa: “Uj mosoj kamachisqata qoykichej: Purajmanta munanakuychej. Imaynatachus noqa munakorqaykichej, ajinallatataj qankunapis purajmanta munanakuychej. Qankunachus munanakunkichej chayqa, tukuy runas yachanqanku yachachisqasniy kasqaykichejta”, nispa (Juan 13:34, 35). Arí, chiqa cristianosqa puraqmanta munanakunanku tiyan.

Apóstol Pabloqa, cristiano qusasman ajinata nin: “Qosas, sapa ujpis warmiykichejta munakuychej imaynatachus Cristoqa Iglesiata munakorqa, ajinata, Iglesiaraykutaj kawsayninta churarqa” (Efe. 5:25). ¿Imaynatataq juk qusa kay apóstol Pablo nisqanmanjina kawsayninpi ruwanman, astawanraq warminpis Diospa kamachin kaptin?

Cristoqa, qutuchakuyta jarkʼan

Biblia nin: “Ajinata qosaspis sapa ujpis warminkuta munakuchunku cuerponkuta jina. Warminta munakojqa pay kikinta munakun. Mana pipis paypa cuerpollantatajqa chejninchu; astawanqa mikhunawan kallpachan, allimpi kanampajtaj qhawan. Cristopis kikillantataj Iglesianwan ruwan” (Efe. 5:28, 29). Jesusqa, discipulosninta achkhata munakuq, juchasapa runas kaptinkupis, payqa kʼachamanta, munakuywantaq parlapayaq. Chantapis, kʼacha kaykunasninkuta qhawaq manataq pantasqasninkutachu, imaraykuchus payqa ‘Iglesiata chayri qutuchakuyta kʼancharichkaqtajina’ qhawarqa (Efe. 5: 26, 27).

Imaynatachus Jesucristo, qutuchakuyman munakuyninta rikuchirqa ajinallatataq juk cristianopis warminman, ruwasqasninwan, parlasqanwan ima, munakuyninta rikuchinan tiyan. Juk warmiqa, qusan mayta munakusqanta rikuspa, may jatunpaq qhawasqa, kusisqa ima, sientekun. Juk qusa warminman mana munakusqanta rikuchin chayqa, warminqa juk jatun wasipi tiyakuspapis, tukuy imayuq kaspapis, saqisqajina, llakisqalla sientekunman, manataq ni imapaq valesqanta yuyanman.

Warminman munakuyninta rikuchinanpaq, ¿imastataq juk qusa ruwan? Wak runaspa ñawpaqinpi warminta jatunpaq qhawaspa parlapayan, imatapis allinta ruwasqanmanta sapa kuti allinta ruwasqanta, familiajina allinta kawsachkasqankumanta agradecesqanta ima nin, sapallanku kachkaspapis munakuyninta rikuchillantaq. Warmiqa, qusan makinmanta japʼiykuriptin, uqllaykuriptin ima, mayta kusikun, chaytataq mana qunqanchu.

“Mana hermanos niyta pʼinqakunchu’

Jesucristoqa, akllasqa discipulosninta “hermanos” niyta, ni jaykʼaq pʼinqakuqchu (Heb. 2:11, 12, 17). Qusa, warmiykiqa hermanayki kasqanta yuyarinayki tiyan. Imaraykuchus mana warmillaykichu, manaqa qamwan khuska Diospa kamachin. Jehovaman qukusqan, Jehovap munaynintataq ruwasaq nisqanqa, casarakunanpaq parlasqanmanta nisqa astawan sumaq, casarakuspaña bautizakuptinpis. Chayrayku tantakuypi juk hermano umallirichichkaspaqa, tapusqanman, warmin kutichinanpaq makinta urqhariptin, “hermana” nispa nin. Qampatapis, warmiykiqa hermanayki qutuchakuypipis wasiykipipis. Chayrayku mayllapipis jatunpaq qhawaspa, munakuywantaq parlapayanaykiqa may sumaq.

Qutuchakuypi astawan llamkʼachkanki chayqa, ichá warmiykiwan parlarinaykipaq mana tiempoyki kanchu. Chaywanpis  qutuchakuymanta ancianoswan, siervo ministerialeswan ima yanapanakunkichik, imastachus ruwanaykichikpaq allinta parlankichik chayqa, astawan tiempochakunki warmiykiwan parlarinaykipaq, paywan khuska kanaykipaq ima. Yuyarikuy, wak hermanosqa qutuchakuypi imachus ruwanasta ruwayta atinkuman, chaywanpis warmiykitaqa ni mayqin hermano jarkʼanmanchu chayri cuidanmanchu, manaqa qamlla warmiykita jarkʼayta, yanapayta ima atinki.

Chaywanpis qam warmiykip kamachiq uman kanki. Biblia nin: “Cristoqa sapa qharipajqa kamachej umajina kasqanta, qharitaj warmimpajqa kamachej uman jina” (1 Cor. 11:3). ¿Imatataq kamachiq umajina ruwanayki tiyan? Mana sapa kutichu kay pʼitip nisqanta kasukunanpaq yuyarichinayki tiyan, manaqa munakuywan Jesusjina ruwanayki tiyan (1 Ped. 2:21).

‘Kawsaqisniy chayri amigosniy kankichik’

Jesusqa, discipulosninta amigosninpaq qhawarqa, nirqataq: “Manaña kamachista jinachu qhawaykichej, imaraykuchus kamacheqa mana yachanchu patronnin imatachus ruwasqanta. Noqaqa kawsaqesniyta jina qhawaykichej, imaraykuchus Tataypa tukuy ima niwasqanta rejsichiykichej” (Juan 15:14, 15). Paykunaqa tukuy imamanta parlaq kanku, sapa kutitaq khuskallapuni kaq kanku. Sutʼincharinapaq Jesusqa, discipulosninwan khuska Caná llaqtaman, casaraku raymiman rirqanku (Juan 2:2). Chantá khuska kanankupaq tukuyniqpi tantankullaqtaq kanku, Getsemaní huertapijina. Biblia nin: “Jesusqa yachachisqasninwan ashkha kutita tantakoj chaypi”, nispa (Juan 18:2).

Juk warmiqa, qusanpa amiganjina sientekuyta munan. Chayrayku khuska imatapis ruwanaykichikqa may allin. Khuska Diosta yupaychaychik, Bibliata ukhunchaychik, mikhuychik, puriykachariq riychik, parlanaykichikpaq tiempochakuychik ima. Qhariwarmi kaspapis, may amigos kasqaykichikta rikuchiychik.

“Tukukuykama munakorqa”

Jesusqa, discipulosninta “tukukuykama munakorqa” (Juan 13:1). Wakin qusasqa, mana Jesusjinachu ruwanku. Imaraykuchus ‘piwanchus wayna kashaspa casarakurqanku, chay warmita’ saqirparinku, wak sipaswan casaranankurayku (Mal. 2:14, 15).

Chaywanpis wak qusasqa Willijina ruwanku, Cristojina munakuyniyuq kanankupaq mayta kallpachakunku. Williqa, warmin unqusqa kasqanrayku may unaytaña cuidan. Chaywanpis pay nin: “Warmiytaqa, janaqpachamanta juk regalotajinallapuni qhawani. Ñuqapaqqa may valorniyuq. Chantapis, 60 wata ñawpaqta, allin kaqpipis, mana allin kaqpipis cuidanayta nirqani, manataq chay nisqayta ni jaykʼaq qunqasaqchu”.

Qusas, Cristojina munakuyniyuq kaychik, munakuywantaq warmiykichikta qhawaychik... hermanaykichiktajina... amigaykichiktajina.

[20 paginapi dibujo/foto]

¿Warmiyki may sumaq amigaykichu?

[20 paginapi dibujo/foto]

‘Warmiykichikta munakullaychikpuni’