Qosakuna, Jesuspa kuyakuyninta qatipakuychik

MANARAQ wañukusqan tutatam, kasukuq qatiqninkunata Jesucristo kaynata nirqa: “Mosoq kamachikuytam qoykichik, kuyanakuychikyá. Imaynam ñoqa kuyaykichik chaynayá qamkunapas kuyanakuychik. Kuyanakuptikichikqa llapallan runakunam yachanqa discipuloykuna kasqaykichikta”, nispa (Juan 13:34, 35). Arí, cheqap cristianokunaqa kuyanakunanchikmi.

Apostol Pablopas cristiano qosakunatam nirqa: “Cristom iñiqkunata kuyaspan paykunapaq entregakurqa, chaynayá qosakunapas warmikichikta kuyaychik”, nispa (Efe. 5:25). ¿Imaynatam qosakuna chay consejota kasukunmanku aswanqa Diospa serviqnin señoran kaptinqa? Qawasunchikyá.

Cristoqa qatiqninkunatam cuidan

Bibliaqa ninmi: “Chaynallataqyá qosakunapas warmikichikta kuyaychik imaynam kikikichikpa cuerpoykichikta kuyakusqaykichikta hina, warminta kuyaqqa kikintam kuyakun. Manapunim pipas kikinpa cuerpontaqa cheqninmanchu aswanqa mikuchispanmi allinta uywan, chaynatapunim Cristopas ruran iñiqninkunawan”, nispa (Efe. 5:28, 29). Jesusqa qatiqninkuna pantaq kaptinkupas kuyakuywanmi rimapayarqa. Allin rurasqankutam qawaq manam pantasqankutachu, “chaynataqa rurarqa iñiqkunata sumaqllataña kikinman pusaykunanpaqmi” (Efe. 5:27).

Jesusqa qatiqninkuna kuyasqantam qawachirqa, chaynam qosapas rimayninwan hinaspa rurasqanwanpas qawachinan señoran kuyasqanta. Chayna kaptinqa kusisqa hinaspa allin chaninchasqam sientekunqa. Paypaqqa kanmanmi sumaq wasinpiwan tukuy imankunapas, chayna kaptinpas qosan mana kaqpaqpas hapiptin otaq qonqaruptinqa sinchi llakisqam kanman.

¿Imakunatam cristianoqa ruran señoran kuyasqanta qawachinanpaq? Hukkunapa qayllanpim respetowan rimapayan, atikuptinqa alabanmi hinaspa ayllunku allin kananpaq rurasqanmantam reqsichin. Sapallankupipas kuyasqantam qawachin. Señoranta makinmanta hapiykusqan, paywan kusisqa kasqan, abrazaykusqan hinaspa imapas kuyakuywan niykusqanmi sonqonpiqa marca churasqa hina mana chayllaqa chinkanqachu.

Manam penqakunchu paninwan sutichaytaqa

Jesusqa manam haykapipas penqakurqachu hanaq pachaman riqkunata ‘wawqeykuna’ nispa sutichaytaqa (Heb. 2:11, 12, 17). Qosaqa manam qonqananchu señoranpas panin kasqantaqa. Señorayki kaspanpas, puntataqa cristianam. Casarakusqaykichik qepataña bautizakuptinpas, Jehová Diosman vidanta qospan prometekusqanmi puntapiqa kachkan casarakuspa prometekusqanmantapas. Chaymi huñunakuypi rimarinanpaq “paniy” nispaykiqa allintam nichkanki. Payqa congregacionpi hinaspa wasikipipas panikim. Chaymi kuyakuywan hinaspa respetowan maypipas rimapayanayki.

Congregacionpi imatapas ruranaykipaq nombrasqa kaspaqa, wakinpiqa sasachakunkipaschá aylluykita allinta atiendenaykipaq. Ichaqa ancianokunawan siervo ministerialkuna ruranankuta allinta rakinakuspa yanapanakuptinkuqa, aswan necesitaq panikipaq  otaq señoraykipaqmi tiempochakunki. Amayá qonqaychu, huk cristianokunapas ruranmanmi congregacionpi ruranaykitaqa, ichaqa manam mayqanninkupas señoraykimantaqa encargakunmanchu qamllam chaytaqa ruranayki.

Chaynataq, señoraykipa umanqa qanmi kanki. Bibliaqa kaynatam nin: “Cristoqa llapa qaripa umanmi, qariñataqmi warminpa uman”, nispa (1 Cor. 11:3). ¿Imaynatam uma kasqaykitaqa qawachiwaq? Kuyakuywanmi, manam Bibliapa kayna nisqanta sapa kuti yuyarichispachu hinaspa kasusunaykipaq obligaspachu, aswanqa Jesus hina kaspam (1 Ped. 2:21).

“Qamkunaqa kankichik amistadniykunam”

Jesuspa qatiqninkunaqa amistadninmi karqa. Kaynatam nirqa: “Manam sirvientepaqñachu hapikichik, sirvienteqa manam yachanchu patronninpa rurasqankunata. Qamkunaqa amistadniyñam kankichik chaymi Taytapa niwasqankunata yachachirqaykichik”, nispa (Juan 15:14, 15). Paykunawanqa allintam rimaqku, tiempochakuqkum kuska kanankupaqpas. Ejemplopaq, Cana llaqtapi casamientomanmi rirqaku (Juan 2:2). Chaymantapas, achka sitiokunam kuska kanankupaq karqa, hukninmi Getsemani sutiyoq huerta. Bibliam nin: “Chaypiqa achka kutipim Jesus huñunakurqa discipulonkunawan”, nispa (Juan 18:2).

Allin amistadnin kasqaykitam señoraykiqa yachanan. Chaymi imatapas kuska ruranaykichik. Kallpanchakuychik Jehová Diosta kuska servinaykichikpaq, Bibliata estudiaychik, mikuychik, purinaykichikpaq lloqsiychik hinaspa rimanaykichikpaqpas tiempochakuychik. Casado kasqaykichikpiqa qawachiychik allin amistad kasqaykichikta.

Wañunankamam “kuyakuyninta qawachirqa”

Jesusqa wañunankamam qatiqninkunata ‘kuyarqa’ (Juan 13:1). Wakin qosakunaqa Jesuspa ejemplontam mana qatipakunkuchu. Chaymi ‘mozo kaspanku casarakusqanku’ señorankuta saqerunku, wakinpiqa paykunamanta aswan sipaswan pasakunankupaq (Mal. 2:14, 15).

Ichaqa kanmi Willi hina, Cristopa ejemplon qatikuq qosakuna. Señoran onqoptinmi achka wata cuidanan karqa. Chayna kaptinpas, Willim kaynata nin: “Señoraytaqa hanaq pachamanta regalota hinam qawani. Chayna valorniyoqmi ñoqapaq. Chaynataq, yaqa 60 wata pasaqtaraqmi imayna tarikuptinpas cuidanaypaq prometerqani, chaytaqa manam haykapipas qonqasaqchu”, nispa.

Qosakuna, Cristota qatipakuspayá paykunata kuyakuywan cuidaychik: señoraykichikmi, panikichikmi hinaspa allin amistadnikichikmi.

[20 kaq paginapi dibujo]

¿Allin amistadnikichu señorayki?

[20 kaq paginapi dibujo]

Qosakuna, hinallayá señoraykichikta kuyaychik