E te Au Tane, e Aru i to Karaiti Aroa!

I TE po openga o tona oraanga i runga nei i te enua, kua akakite a Iesu ki tana au apotetoro akarongo mou e: “E tuku atu au i te akauenga ou kia kotou, E aroa kotou ia kotou uaorai: mei iaku i aroa ia kotou na, e aroa katoa oki kotou ia kotou uaorai. Ko te mea teia e kite ei te tangata katoa e e pipi kotou naku, kia aroa kotou ia kotou uaorai.” (Ioa. 13:34, 35) E tika rai, kia aroa te au Kerititiano mou i tetai e tetai.

I te tuatua tika atu anga ki te au tane i rotopu i te au pipi a Karaiti, kua tata te apotetoro ko Paulo e: “E te au tane ra, e aroa atu kotou i ta kotou au vaine, mei te Mesia katoa i aroa i te ekalesia, e kua oronga iaia uaorai ei oko.” (Ephe. 5:25) Akapeea tetai tane Kerititiano i te taangaanga anga i teia akoanga Tuatua Tapu i roto i tona akaipoipo, me e tavini akatapuia tikai tana vaine no Iehova?

Kua Akaperepere a Karaiti i te Putuputuanga

“E aroa katoa te au tane i ta ratou uaorai au vaine e tikaʼi, mei to ratou uaorai kopapa,” i akakite ei te Pipiria. “Ko tei aroa i tana uaorai vaine, kua aroa aia iaia uaorai. Kare ua e tangata e makitakita i tona uaorai kopapa e teia noaʼi oki; kareka e angai e te akaperepere marie; mei ta te Atu i te [“putuputuanga,” NW] nei.” (Ephe. 5:28, 29) E manako aroa to Iesu no tana au pipi e kua akaperepere aia ia ratou. Noatu e e aronga apa ratou, kua akaari aia i te tu maru e te takinga meitaki kia ratou. I te inangaro anga ‘kia tuku i te ekalesia kakā kiaia uaorai,’ kua akara mou aia ki runga i te au tu meitaki o tana au pipi.—Ephe. 5:27.

Mei te Karaiti rai tei akaari i te aroa no te putuputuanga, e mea tau kia akaari tetai tane i te aroa no tona tokorua na roto i tana ka tuatua e tana ka rave. Ko tetai vaine te akakite putuputu maira tana tane i te inangaro, te manako akaperepere ra e te mataora ra. I tetai tua ra, ko tetai vaine te rauka ra te au mea meitaki o te ngutuare, kare e mataora tikai ana me kopaeia aia e me akangaropoinaia aia e tana tane.

Akapeea tetai tane i te akaari anga e te akaperepere ra aia i tana vaine? I te ngai tangata, ka akaaravei aia i tana vaine ki tetai ke na roto i tetai tu ngateitei, e te akameitaki ua anga iaia no tana turuturu anga. Me kua tauturu ana tana vaine i te akatupu i tetai mea puapinga i roto i te ngutuare, kare aia e emiemi i te akakite i te reira ki tetai ke. Me ko raua anake ua, ka kite mai tana vaine i tona inangaro iaia. I te mou anga i te rima, te katakata anga, te takave anga, e tetai tuatua akameitaki anga, noatu e e meangiti ua te reira, e mea puapinga maata tikai te reira i roto i te ngakau o tetai vaine.

‘Kare i Akama i te Tuatua ia Ratou e, e Taeake’

‘Kare te Karaiti ko Iesu i akama i te tuatua i tana au pipi akatainuia e, e taeake.’ (Ebe. 2:11, 12, 17) Me e tane Kerititiano koe, kia akamaara e e tuaine Kerititiano katoa taau vaine noou. E mea puapinga atu tana akatapuanga kia Iehova i runga ake i tana tia no te akaipoipo, noatu e kua papetitoia aia i mua ake me kore i muri ake i te akaipoipoanga kia koe. Me kapikiia taau vaine kia pau mai, ka taiku te taeake e akaaere ra i te uipaanga putuputuanga kiaia e ko te “Tuaine.” E tuaine katoa aia noou, kare i ko ua i te Are Uipaanga Patireia, e i te kainga katoa. E mea puapinga katoa i te akaari i te takinga meitaki e te ngateitei kiaia i te kainga e pera katoa i ko i te Are Uipaanga Patireia.

Me e apainga ke atu taau i roto i te putuputuanga, ka ngata rai ia koe i tetai au taime i te parani i te au apainga o te putuputuanga e to te  ngutuare. Na te angaanga kapiti anga te aronga pakari e te au tavini orometua e te tereni anga i tetai ke kia akono i tetai au apainga i roto i te putuputuanga, ka rauka i te tauturu ia koe kia maata mai toou taime no te tuaine te anoano maata ra ia koe—ko taau vaine. E akamaara, te vai ra tetai au taeake te ka rauka i te rave i tetai au angaanga i roto i te putuputuanga tei akatuangaia kia koe, inara ko koe anake ua te taeake tei tatuaia ki taau vaine i roto i te akaipoipo.

Tei maata atu, ko koe te upoko o taau vaine. Te akakite maira te Pipiria e: “Ko te Mesia te upoko o te tangata ravarai nei; e to te vaine ra upoko, ko te tane ïa.” (1 Kori. 11:3) Akapeea koe i te taangaanga anga i teia taoonga upoko? Na roto i tetai tu aroa, kare koe e taiku putuputu i te irava i taikuia mai i mua akenei e te maro anga kia akangateiteiia mai. Ko te taviri kia taangaanga meitaki i te taoonga upoko koia oki, e aru ia Iesu Karaiti i te akono anga i taau vaine.—1 Pete. 2:21.

“Ko Kotou Toku Oa”

Kua kapiki a Iesu i tana au pipi e ko tona au oa. Kua akakite aia kia ratou e: “Kare atura au e karanga kia kotou e, e tavini; kare oki te tavini i kite i ta tona pu e rave ra: kua karanga ra au kia kotou e, e oa; kua akakite oki au kia kotou i te au tuatua ravarai taku i kite i taku Metua ra.” (Ioa. 15:14, 15) E komunikeiti meitaki ana a Iesu e tana au pipi. Kua rave kapiti katoa ratou i te au mea. Kua patiia mai a “Iesu e te aronga pipi ana” ki te akaipoipo i Kana. (Ioa. 2:2) E reka ana ratou i te aere i tetai au ngai, mei te kainga rai i Getesemane. Te karanga ra te Pipiria e “kua mātau uā Iesu i te aere i reira e tana au pipi katoa.”—Ioa. 18:2.

Te anoano tikai ra tetai vaine i te kite e koia te oa piri vaitata tikai o tana tane. E mea puapinga tikai te reira no kotou e te au tane e te au vaine kia rave kapipiti i te au angaanga ma te mataora i roto i te oraanga. Kia tavini kapipiti korua i te Atua. Kia mataora korua i te apii kapipiti anga i te Pipiria. E akapou meitaki i te au taime na te—aaere kapipiti anga, te tuatua anga, e te kaikai kapiti anga. Kia riro korua ei nga oa piri mou; kare ei nga tangata akaipoipo ua.

Kua ‘Aroa ua Atura Aia ia Ratou e Tae ua Atu ki te Openga’

Kua ‘aroa ua atura a Iesu i tana au pipi e tae ua atu ki te openga.’ (Ioa. 13:1) Kare i rauka ana i tetai au tane i te aru i te Karaiti na roto i teia tu. Penei e akaruke katoa ana ratou i ‘te vaine a to ratou ou anga ra,’ no tetai vaine mapu ake.—Mala. 2:14, 15.

Ko tetai papaki, mei ia Willi rai, kua aru i te Karaiti. No te paruparu o te kopapa, te anoanoia ra kia akono putuputuia te vaine a Willi i te au mataiti e manganui. Eaa to Willi manako no runga i teia? Kua karanga aia e: “E manako ua ana au i taku vaine e e apinga aroa no ko mai i te Atua e kua ariki rekareka tikai au iaia. Pera katoa, e 60 mataiti i topa kua koreromotu au i te akono iaia i roto i te au tuatau meitaki e te tuatau kino. Kare rava e ngaropoina iaku taua koreromotu ra.”

E te au tane Kerititiano e, e aru i to Karaiti aroa. E akaperepere i taau vaine mataku i te Atua—toou tuaine e toou oa.

[Tutu i te kapi 20]

E oa piri vaitata tikai ainei taau vaine noou?

[Tutu i te kapi 20]

‘E aroa atu i taau vaine’