Nobalumi, Amwiiye Luyando Ndwajisi Kristo!

BUSIKU bwamamanino bwabuumi bwakwe anyika, Jesu wakaambila baapostolo bakwe basyomeka kuti: “Ndamupa mulao mupya wakuti, amuyandane umwi amweenzinyina, mbuli mbwendali kumuyanda, anywebo muyandane mbubonya. Kuliceeci bantu boonse bayoomuziba, kuti muli basikwiiya bangu, mwanooyandana umwi amweenzinyina.” (Joh. 13:34, 35) Masimpe, Banakristo beelede kuyandana.

Kaambila balumi Banakristo, mwaapostolo Paulo wakalemba kuti: “Nobalumi, amuyande banakazi banu, mbuli Kristo mbwaakayanda imbungano akulyaaba nkaambo kanjiyo.” (Ef. 5:25) Ino mbuti mulumi Munakristo mbwakonzya kulubelesya lulayo oolu lwamu Magwalo, kwaambisya ikuti mukaintu wakwe kali mubelesi uulyaabide kuli Jehova?

Kristo Wakaibamba Mbungano

Ibbaibbele lyaamba kuti: “Balumi [beelede] kuyanda banakazi babo mbuli mibili yabo beni. Uuyanda mukaakwe waliyanda mwini. Nkaambo taakwe muntu uusula mubili wakwe mwini, pe, ulausanina akuubamba kuti ubote. Mbubonya obo Mwami mbwacitila imbungano.” (Ef. 5:28, 29) Jesu wakali kubayanda kapati basikwiiya bakwe. Nokuba kuti tiibakalondokede, wakali kubeendelezya calubomba alimwi acaluzyalo. Kayanda kuti ‘imbungano ibe ndemu,’ wakabikkila maanu kapati kubube bubotu mbobakajisi.—Ef. 5:27.

Mbubwenya mbuli Kristo mbwaakaiyanda mbungano, awalo mulumi weelede kutondezya kuti ulamuyanda kapati mukaintu wakwe kwiinda mumajwi ngaamba alimwi amuzyintu nzyacita. Mukaintu uucitilwa zyintu zibotu lyoonse kumulumi wakwe zyalo izitondezya mbwamuyanda ulimvwa kuti ulabikkilwa maanu eelyo ulakkomana. Kulubazu lumwi, mukaintu uujisi zyintu zyoonse ziyandika zyamuŋanda, pele uutabikkilwi maanu kumulumi wakwe takonzyi kukkomana.

Ino mbuti mulumi mbwakonzya kutondezya kuti ulamubikkila maanu mukaintu wakwe? Ciindi naambila bantu kuti ngomukaintu wakwe ooyu, ulacita oobu munzila yabulemu alimwi ulamutembaula akaambo kalugwasyo ndwamupa. Ikuti mukaintu wakwe wakamugwasya kuzuzikizya cintu cimwi ciyandika kapati mumukwasyi, tawayiwayi kwaambila bantu. Nociba ciindi nobali balikke, ulamvwa kuti ulayandwa. Kumujatilila kujanza, kumumwetela, kumukumbata alimwi akumulumbaizya zilakonzya kuba zyintu ziniini buyo, pele zilayandika kapati kumukaintu.

“Tausi Kubaamba Kuti Mbanabakwesu”

Kristo Jesu kunyina naakausa, naa kulisenda “kubaamba [basikumutobela bananike] kuti mbanabakwesu.” (Heb. 2:11, 12, 17) Ikuti kamuli mulumi Munakristo, mutalubi kuti mukaintu wenu mmucizyi wenu Munakristo. Kulyaaba kwakwe kuli Jehova nkokuyandika kapati kwiinda cikonke cakwe calukwatano, kunyina makani naa wakabbapatizyigwa kamutanakwatana naa kamukwetene kale. Ciindi mukwesu weendelezya lyamuswaangano wambungano naayanda kuti mukaintu wenu ape bwiinguzi, katanaamba zyina usaanguna kwaamba kuti “Mucizyi.” Aboobo andinywe mmucizyi wenu, kutali buyo ku Ŋanda ya Bwami, pele akuŋanda yenu. Cilayandika kapati kuba alubomba alimwi akumulemeka ciindi nomuli kuŋanda yenu mbubwenya mbomucita nomuli ku Ŋanda ya Bwami.

Ikuti kamujisi mikuli aimwi mumbungano, zimwi ziindi cilakonzya kukatazya kwiilanganya mikuli eeyi alimwi ayamumukwasyi aciindi comwe. Ikuti baalu abakutausi babelekela antoomwe alimwi akugwasya bambi kuti beelele kuba amikuli imwi mumbungano cilakonzya kumupa ciindi cinji cakuba amucizyi walo uuyandika kapati kuba andinywe—imukaintu wenu. Amuyeeye kuti kuli bakwesu banji ibakonzya kucita milimo njomuyandika kucita mumbungano, pele ndinywe buyo nyolikke nomukonzya kuzuzikizya mikuli iijatikizya mukaintu wenu.

Kunze lyaboobo, ndinywe mutwe wamukaintu wenu. Ibbaibbele lyaamba kuti: “Mutwe wamwaalumi umwi aumwi ngu-Kristo, awalo mutwe wamwanakazi ngumwaalumi.” (1 Kor. 11:3) Ino mbuti mbomukonzya kuba silutwe uuli kabotu? Mweelede kutondezya luyando, kutali kwiile kwiinduluka-induluka kuzubulula kapango aaka kaambwa atala aawa alimwi akumusinikizya kuti kamulemeka. Kutegwa mucite busilutwe bwenu munzila iili kabotu, mweelede kwiiya Jesu Kristo nomweendelezya mukaintu wenu.—1 Pet. 2:21.

“Munooli Beenzuma”

Jesu wakaamba basikwiiya bakwe kuti mbeenzinyina. Wakabaambila kuti: “Nsicimwaambi limbi kuti muli bazike, nkaambo muzike tezi ncacita simalelaakwe, anu ndamwaamba kuti muli beenzuma, nkaambo zintu zyoonse nzendakamvwa kuli-Taata, ndamuzibya nzizyo.” (Joh. 15:14, 15) Jesu abasikwiiya bakwe bakali kubandika kabotu. Alimwi bakali kucitila antoomwe zyintu. “Jesu wakalitambidwe abasikwiiya bakwe kupobwe” lyabwiinga ku Kana. (Joh. 2:⁠2) Bakalijisi masena aamwi ngobakali kuyandisya, mbuli muunda wa Getesemane. Bbaibbele lyaamba kuti: “Jesu nkwaali kuya kanjikanji antoomwe abasikwiiya bakwe.”—Joh. 18:2.

Mukaintu weelede kulimvwa kuti mulumi wakwe ngomweenzinyina ngobamvwana limwi kwiinda. Elo kaka cilayandika kapati kuti nywebo nobamalumi abamakaintu kamucitila aantoomwe zyintu zikkomanisya! Amubelekele Leza antoomwe. Amukukkomanine kwiiya Bbaibbele antoomwe. Kamuba antoomwe—kweenda, kubandika, kulya antoomwe. Mutabi buyo banabukwetene, pele amube balongwe.

“Wakabayanda Mane Kusikila Kumamanino”

Jesu ‘wakabayanda basikwiiya bakwe mane kusikila kumamanino.’ (Joh. 13:1) Balumi bamwi balaalilwa kwiiya Kristo mumakani aaya. Mane balakonzya kusiya ‘mukaintu mutaanzi,’ ambweni akaambo kakuti bayanda umbi uucili mwana-mwana.—Malk. 2:14, 15.

Bamwi, mbuli ba Willi, baiya Kristo. Akaambo kakuciswa-ciswa, ibakaintu baba Willi bakali kuyandika kulanganyizyigwa lyoonse kwamyaka minji. Ino ba Willi bakalimvwa buti kujatikizya penzi eeli? Bakaamba kuti: “Lyoonse ndibona mukaintu wangu kuba cipego kuzwa kuli Leza, eelyo ndilalumba kapati akaambo kakuba anguwe. Kunze lyaboobo, myaka iili 60 yainda, ndakasyomezya kuti ndiyoomulanganya kabotu muziindi zyoonse zibotu alimwi azyamapenzi. Tandikacilubi cisyomezyo eeci.”

Nobalumi Banakristo, amwiiye luyando ndwajisi Kristo. Amumuyande mukaintu wenu uuyoowa Leza—mucizyi wenu alimwi mweenzinyoko.

 [Cifwanikiso icili apeeji 20]

Sena mukaintu wenu ngomweenzinyoko ngomumvwana limwi kwiinda?

[Cifwanikiso icili apeeji 20]

‘Amuzumanane kumuyanda mukaintu wenu’