Vavanuna Tekelelani Rirhandzu Ra Kreste!

HI VUSIKU byo hetelela Yesu a ri laha misaveni, u byele vaapostola vakwe vo tshembeka a ku: “Ndzi mi nyika xileriso lexintshwa, leswaku mi rhandzana; tanihi leswi ndzi mi rhandzeke, rhandzanani na n’wina. Hinkwavo va ta tiva leswaku mi vadyondzisiwa va mina, loko mi rhandzana.” (Yoh. 13:34, 35) Hakunene Vakreste va ntiyiso va fanele va rhandzana.

Loko muapostola Pawulo a vulavula hi ku kongoma ni vavanuna lava nga Vakreste, u tsale a ku: “Vavanuna, hambetani mi rhandza vasati va n’wina, hilaha Kreste na yena a rhandzeke vandlha hakona kutani a tinyiketa hikwalaho ka rona.” (Efe. 5:25) Xana wanuna loyi a nga Mukreste a nga xi tirhisa njhani xikhutazo lexi xa le Matsalweni evukatini byakwe, ngopfu-ngopfu loko nsati wakwe a ri nandza loyi a tinyiketeleke eka Yehovha?

Kreste A A Ri Khathalela Vandlha

Bibele yi ri: “Vavanuna va fanele ku rhandza vasati va vona ku fana ni mimiri ya vona. Loyi a rhandzaka nsati wakwe wa tirhandza, hikuva a nga kona munhu loyi a tshameke a venga nyama yakwe; kambe wa yi wundla ni ku yi khathalela, hilaha Kreste na yena a endlaka hakona evandlheni.” (Efe. 5:28, 29) Yesu a a va rhandza vadyondzisiwa vakwe. A a va khathalela. Hambileswi a va nga hetisekanga, a a ri ni musa eka vona. Leswi a a navela ku “tisa vandlha emahlweni ka yena n’wini ri ri leri vangamaka,” u langute timfanelo letinene ta vadyondzisiwa vakwe.—Efe. 5:27.

Wanuna u fanele a kombisa leswaku wa n’wi rhandza nsati wakwe hi marito ni hi swiendlo hilaha Kreste a endleke hakona eka vandlha. Wansati loyi a tshamelaka ku kombisiwa rirhandzu hi nuna wakwe wa tsaka naswona u titwa a ri loyi a khathaleriwaka. Kasi wansati loyi a nga ni swilo hinkwaswo leswinene ekaya rakwe a nga ha va ni gome loko a honisiwa hi nuna wakwe.

Wanuna a nga swi kombisa njhani leswaku wa n’wi khathalela nsati wakwe? Loko a ri exikarhi ka vanhu, wa n’wi tivisa eka vona hi ndlela ya xichavo ni ku n’wi bumabumela hileswi a n’wi seketelaka. Loko nsati wakwe a n’wi pfune swinene leswaku ndyangu wa vona swi wu fambela kahle, a nga kanakani ku byela van’wana ha swona. Naswona loko va ri voxe, wa swi xiya leswaku wa rhandziwa. Ku n’wi khoma hi voko, ku n’wayitela, ku n’wi vukarha ni ku n’wi bumabumela swi nga ha vonaka swi nga pfuni nchumu, kambe swi vula nchumu wukulu embilwini ya wansati.

“A Nga Khomiwi Hi Tingana Ku Va Vitana ‘Vamakwerhu’”

Kreste Yesu a a “nga khomiwi hi tingana ku va vitana ‘vamakwerhu’ [valandzeri vakwe lava totiweke].” (Hev. 2:11, 12, 17) Loko u ri wanuna loyi a nga Mukreste, tsundzuka leswaku nsati wa wena na yena i makwerhu wa wena wa xisati loyi a nga Mukreste. Ku tinyiketela ka yena eka Yehovha i ka nkoka swinene ku tlula xihlambanyo xakwe xa vukati, ku nga khathariseki leswaku u khuvuriwe u nga si n’wi teka kumbe loko se u n’wi tekile. Loko makwerhu loyi a fambisaka dyondzo eminhlanganweni a komba nsati wa wena leswaku a hlamula, swa fanela leswaku a n’wi vitana “Makwerhu wa xisati.” Na wena i makwerhu wa wena wa xisati, ku nga ri eHolweni ya Mfumo ntsena kambe ni le kaya. I swa nkoka leswaku u va ni musa naswona u n’wi khoma kahle loko mi ri ekaya hilaha u endlaka hakona loko u ri eHolweni ya Mfumo.

Loko u ri ni vutihlamuleri lebyi engetelekeke evandlheni, minkarhi yin’wana swi nga ha ku tikela ku ringanisela vutihlamuleri bya le vandlheni ni bya le kaya. Ku khomisana lokunene exikarhi ka vakulu ni malandza ya vutirheli ni ku avela van’wana mintirho ya vandlha swi nga ku nyika  nkarhi lowu engetelekeke wo tshama ni makwerhu wa xisati loyi a ku lavaka swinene, ku nga nsati wa wena. Tsundzuka leswaku va kona vamakwerhu van’wana lava nga endlaka mintirho ya vandlha leyi u averiweke yona kambe hi wena ntsena makwerhu loyi a hlanganisiweke ni nsati wa wena evukatini.

Ku tlula kwalaho, u nhloko ya nsati wa wena. Bibele yi ri: “Nhloko ya wanuna un’wana ni un’wana i Kreste; kasi nhloko ya wansati i wanuna.” (1 Kor. 11:3) Xana u fanele u byi tirhisa njhani vunhloko byebyo? Hi ndlela ya rirhandzu, ku nga ri hi ku tshamela ku tshaha ndzimana leyi nga laha henhla kutani u n’wi sindzisa leswaku a ku xixima. Ndlela leyinene yo tirhisa vunhloko i ku tekelela Yesu Kreste endleleni leyi u khomaka nsati wa wena ha yona.—1 Pet. 2:21.

“Mi Vanakulorhi Va Mina”

Yesu u vitane vadyondzisiwa vakwe a ku i vanakulobye vakwe. U va byele leswi: “A ndza ha mi vitani mahlonga, hikuva hlonga a ri swi tivi leswi n’wini wa rona a swi endlaka. Kambe ndzi mi vitane vanakulorhi, hikuva swilo hinkwaswo leswi ndzi swi tweke eka Tatana ndzi mi tivise swona.” (Yoh. 15:14, 15) Yesu ni vadyondzisiwa vakwe a va vulavurisana kahle. Nakambe a va endla swilo va ri swin’we. “Yesu ni vadyondzisiwa vakwe” va rhambiwe enkhubyeni wa vukati eKana. (Yoh. 2:2) A ku ri ni tindhawu leti a va rhandza ku ya eka tona to fana ni le ntangeni wa Getsemani. Bibele yi vula leswaku “Yesu minkarhi yo tala a a hlangana kona ni vadyondzisiwa vakwe.”—Yoh. 18:2.

Hakunene wansati u fanele a swi xiya leswaku munghana wakwe lonkulu i nuna wakwe. I swa nkoka swinene leswaku n’wina vavanuna na n’wina vavasati mi endla swilo leswi tsakisaka evuton’wini mi ri swin’we! Tirhelani Xikwembu swin’we. Tiphineni hi ku dyondza Bibele swin’we. Tinyikeni nkarhi wo va swin’we—wo famba swin’we, wo vulavurisana ni wo dya swin’we. Mi nga vi vatekani ntsena; vanani vanghana lava rhandzanaka.

“U Va Rhandze Ku Fikela eMakumu”

Yesu u ‘rhandze vadyondzisiwa vakwe ku fikela emakumu.’ (Yoh. 13:1) Vavanuna van’wana va tsandzeka ku tekelela Kreste emhakeni leyi. Va kala va tshika ‘nsati wa vuntshwa bya vona,’ kumbexana leswaku va teka lava ha riki tintombhi.—Mal. 2:14, 15.

Vavanuna van’wana vo fana na Willi va tekelela Kreste. Leswi rihanyo ra nsati wa Willi, a ri tsanile, a a lava ku khathaleriwa ku ringana malembe yo tala. Xana Willi u titwe njhani hi mhaka leyi? U te: “Minkarhi hinkwayo a ndzi teka nkatanga a ri nyiko leyi humaka eka Xikwembu naswona a ndzi yi tlangela nyiko yoleyo. Handle ka sweswo, eka malembe ya 60 lama hundzeke ndzi hlambanye leswaku ndzi ta n’wi khathalela hi minkarhi yo tsakisa ni leyi nonon’hwaka. A ndzi nge pfuki ndzi xi rivarile xihlambanyo xolexo.”

Vavanuna lava nga Vakreste, tekelelani rirhandzu ra Kreste. Khathalela nsati wa wena loyi a chavaka Xikwembu—makwerhu wa wena wa xisati tlhelo munghana.

[Xifaniso lexi nga eka tluka 20]

Xana nsati wa wena i munghana wa wena lonkulu?

[Xifaniso lexi nga eka tluka 20]

‘Hambeta u rhandza nsati wa wena’