Naquiiñeʼ gannaxhii hombre xheelaʼ cásica nadxii Cristu ca xpinni

GUEELAʼ ante gati Jesús que gúdxibe ca discípulo stibe ca diidxaʼ riʼ: «Chi tixhe caʼ xiixa nacubi guni tu, ganaxhii saa tu cásica huayanaxhiee laatu. Zacá laganaxhii saa. Pa ganaxhii saa tu zacá la? zanna binni xpinne laatu» (Juan 13:34, 35). Nga runi, naquiiñeʼ gannaxhiisaa cani dxandíʼ xpinni Cristu.

Qué nindaa de ngue bicaa apóstol Pablu ca diidxaʼ riʼ ra nuu ca hombre ni maʼ bichaganáʼ: «Ne laatu, ca hombre ni ma bichaganáʼ, laganaxhii xheela tu cásica gunaxhii Cristu ca xpinni, dede bidii xpida pur laacaʼ» (Efe. 5:25). Guidúʼyanu ximodo zanda chinándacabe conseju ni maʼ bidúʼndanu ca, ne jmaruʼ si pa Testigu xheelacabe.

Cayapa Cristu ca xpinni

Sicaríʼ na Biblia: «Naquiiñe ganaxhii hombre xheela casi nadxii cuerpu stiʼ. Ni nadxii xheela la? nadxii laca laa. Purti iruti raca nanalaʼdxi cuerpu stiʼ, sínuque ruyaana ni ne ranaxhii ni. Ne zacaca runi Cristu ca xpinni» (Efe. 5:28, 29). Jesús nabé gunnaxhii ca discípulo stiʼ ne neca gúcacaʼ binni ruchee la? gúcabe nachaʼhuiʼ ne laacaʼ. Ne jma biiyabe ca cosa ni galán rúnicaʼ ne cadi ra rucheesicaʼ (Efe. 5:27).

Cásica gunnaxhii Jesucristu ca binni ridagulisaa la? hombre ni maʼ bichaganáʼ laaca naquiiñeʼ gabi xheelaʼ pabiáʼ nadxii laabe ne gusihuinni ni. Ti gunaa ni maʼ bichaganáʼ ni rusihuinni xheelaʼ nadxii laa la? runi sentir risaca ne riuu nayecheʼ. Peru ti gunaa ni qué guni tender xheelaʼ laa o qué gulabi laa la? qué ziuu diʼ nayecheʼ neca gapa ti yoo nabé galán ne stale luju.

Xi runi ti hombre ni naca xpinni Cristu para guluíʼ nadxii xheelaʼ yaʼ. Ora nuucabe nezalú binni la? riníʼnebe xheelabe ne respetu ne ruyúbibe modo gusisácabe laa ne riguube naróʼ stiʼ purtiʼ cabeendú binnilídxicabe ni galán pur stipa ni cayuni xheelabe. Peru ora maʼ nuucabe stubisícabe laaca rusihuínnibe nadxiibe laa. Casi ora cápibe naʼ, guxidxinebe laa, quiidxibe laa o gábibe laa xiixa diidxaʼ naxhi, neca ruluíʼ qué risácapeʼ cani la? peru qué ziuu dxi gusiaandaʼ xheelabe cani.

«Qué rituí lú [Jesús] guni biʼchi ca xpinni»

Qué huayuu dxi guituilú Jesucristu guiníʼ «biʼchi» ca xpinni ni bibí para cheʼ guibáʼ (Heb. 2:11, 12, 17). Pa Testigu xheelaluʼ la? naquiiñeʼ guietenaláʼdxiluʼ bizáʼnaluʼ laabe purtiʼ laaca nuube ndaaniʼ xquidxi Dios. Ne dede ante guichaganaluʼ laabe, maca nácabe xpinni Cristu. Ne ni bidii stiidxabe Jiobá zúnibe dxi bidiibe laabe laa la? jma risácani que ni bidii stiidxabe zúnibe ora bichaganabe lii, neca guyuunísabe despué de bichaganabe. Nga runi, ora maʼ dxiʼbaʼ ti xpinni Cristu lu plataforma ra cayaca guendaridagulisaa ne gudii guicábibe la? biáʼsipeʼ nga rabi laabe bizaʼnaʼ. Laabe laaca bizáʼnaluʼ laabe ra ridagulisaatu ne ralídxitu. Nga runi, naquiiñeʼ gusihuínniluʼ runi respetarluʼ laabe ne nadxiiluʼ laabe ratiica nuutu.

Pa nápaluʼ xiixa guenda lade ca binni ridagulisaa la? zándaca nuu biaje nabé nagana raca para lii guni tenderluʼ binnilídxiluʼ. Peru pa quixhe chaahuitu modo gaca dxiiñaʼ stiʼ ca binnigola ne ca siervu ministerial ne  gacanécabe gaca ca dxiiñaʼ ca la? zanda gápaluʼ jma tiempu para guni tenderluʼ xheelaluʼ, bizáʼnaluʼ ni jma caquiiñeʼ gacaneluʼ laa. Naquiiñeʼ gánnaluʼ zanda guni xcaadxi xpinni Cristu dxiiñaʼ ni nápaluʼ lade ca binni ridagulisaa, peru xheelaluʼ la? lii si nga zanda gápaluʼ laa.

Ne laaca naquiiñeʼ gánnaluʼ lii nga xaíque xheelaluʼ. Biblia na: «Cristu nga xaíque sti irá hombre, ne hombre nga xaíque sti gunaa» (1 Cor. 11:3). Peru, ximodo naquiiñeʼ gácaluʼ ne xheelaluʼ casi xaíque yaʼ. Naquiiñeʼ gácaluʼ casi guca Jesús ne ca binni ridagulisaa, naquiiñeʼ guiníʼneluʼ laabe ne diidxaʼ nadóʼ, ne cadi gatigá guluiʼluʼ laabe textu ni maʼ bidúʼndanu ca ne gucaaluʼ laabe guni respetarbe lii (1 Ped. 2:21).

«Xhamigua laatu»

Jesús guníʼ xhamigu ca discípulo stiʼ. Sicaríʼ gúdxibe laacaʼ: «Ma cadi mozo stinne laatu, purti mozo qué ganna xi runi xpixuaanaʼ, sínuque [yanna] ma xhamigua laatu purti ma gudxe laatu irá ni gudxi Bixhoze naa» (Juan 15:14, 15). Jesús nabé guniʼné laacabe diidxaʼ ne gulee tiempu para chuʼné laacabe. Casi ti biaje yené Jesús ca discípulo stiʼ ra guca ti guendaxheelaʼ ndaaniʼ guidxi Caná (Juan 2:2). Ne gúpacabe caadxi lugar ra guyuuláʼdxicabe chécabe, casi ndaaniʼ jardín stiʼ Getsemaní. Biblia na «stale tiru yené be ca discípulu stibe raqué» (Juan 18:2).

Gunaa ni maʼ bichaganáʼ ca naquiiñeʼ guni sentir laasi nga xhamiga xheelaʼ. Nga runi naquiiñeʼ gúnicabe xiixa cosa juntu. Laguni stipa pur gúnitu xhiiñaʼ Jiobá guirópatu, laguundaʼ Biblia juntu, lagó juntu, lasá juntu, lacuee tiempu para guiniʼtu diidxaʼ. Naquiiñeʼ guihuinni cadi xheelasitu, sínuque laaca nabé xhamígutu.

Gunnaxhiibe laacaʼ dede ra «ma chi iluxe xhiiña be»

Jesús gunnaxhii ca discípulo stiʼ dede ra «ma chi iluxe xhiiña» (Juan 13:1). Nuu hombre ni maʼ bichaganáʼ qué rinándacaʼ ejemplu stiʼ Jesús. Ne nuu de laacabe rusaanacaʼ xheelacaʼ ni bichaganacaʼ dxi nahuiinicaʼ pur sti gunaa ni jma nahuiiniʼ (Mal. 2:14, 15).

Peru nuu hombre casi Willi, ni runi stipa pur chinanda ejemplu stiʼ Cristu. Laabe maʼ stale iza de cayápabe xheelabe purtiʼ nabé huará. Neca zacá nuu xheelaʼ Willi la? laabe guniʼbe: «Dede yanna ruuyaʼ xheelaʼ casi ti regalu ni bidii Dios naa. Zacá nga risácabe para naa. Ne maʼ raca sesenta iza bidieeʼ stiidxaʼ laabe zannaxieeʼ laabe ora nazaacabe ne ora maʼ huarabe, ne qué ziuu dxi gusaanaʼ de guneʼ ni bidieeʼ stiidxaʼ laabe».

Hombre ni maʼ bichaganacaʼ, lachinanda ejemplu stiʼ Cristu ne lagannaxhii xheelatu ni zeeda gaca bizáʼnatu ne xhamígatu.

[Dibuju/foto ni zeeda lu yaza 20]

Ñee xheelaluʼ nga ni jma xhamígaluʼ la?

[Dibuju/foto ni zeeda lu yaza 20]

Cadi gusaanatu de gannaxhiitu xheelatu