Ang Pagpangitag Praktikal nga Giya

KON nangita kag giya, daghan kag makaplagan. Kusog kaayo karon ang negosyo bahin sa pagtaganag mga tambag ug giya. Sa Britanya, Latin Amerika, Japan, ug Amerika, halinon kaayo ang mga libro nga naundag mga tambag. Nauso usab ang mga video, seminar, ug mga programa sa TV nga nagtaganag mga giya. Ganahan kaayo ang mga tawo niana tungod kay naghunahuna sila nga masulbad ang ilang problema nga silasila ra, ug dili na kinahanglan nga moadto pa sa usa ka sikologo, magtatambag sa kaminyoon, o sa usa ka ministro. Bahin sa unsa ang ilang mga tambag o giya?

Daghan niini maoy mga tambag bahin sa personal nga katagbawan, malamposon nga relasyon, ug pagpadako sa mga anak. Komon usab ang mga tambag bahin sa pagsagubang sa depresyon, grabeng kaguol, ug diborsiyo. Ang lain pa mao ang mga tambag kon sa unsang paagi malikayan ang pagpanigarilyo, pagkapalahubog, ug ang pagpalabig kaon. Praktikal ba ang ilang mga tambag? Ang uban praktikal, apan ang kadaghanan dili. Busa, maalamon nga atong tagdon ang pasidaan sa Bibliya: “Si bisan kinsa nga walay kasinatian motuo sa tagsatagsa ka pulong, apan ang usa nga maalamon magapalandong sa iyang mga lakang.”—Proverbio 14:15.

Ang mga libro sa tambag dili sama sa mga manual nga nagtudlog kahanas sama sa potograpiya, accounting, o pagsultig laing pinulongan. Ang mga manual makatabang aron makakat-on kitag espesyal nga kahanas nga dili na kinahanglang moeskuyla pa. Apan ang mga libro nga nagtaganag tambag ug giya sa negosyo, kaminyoon, pagkaginikanan, ug pagbatog himsog nga panghunahuna lahi kaayo sa mga manual. Kasagaran, ang mga libro sa tambag nagrekomendar ug usa ka paagi sa pagkinabuhi ug nagpasiugdag usa ka matang sa pilosopiya. Busa maayo gayod nga mangutana kita: ‘Kinsay tinubdan sa tambag? Diin niya gibase ang iyang tambag?’

Ang mga magtatambag dili kanunayng magbase sa ilang mga opinyon diha sa kasaligang  mga impormasyon. Ang pipila maghatag ug tambag nga gustong madunggan sa mga tawo tungod kay sila nahibalo nga mokita silag dako niana. Gani, sa usa lang ka nasod, kining negosyoha mikitag kapin sa otso bilyones dolyares kada tuig!

Makatabang ba Gayod ang Maong mga Tambag?

Kon imong sundon ang ilang mga tambag, imong dahomon nga kana makatabang kanimo. Apan usahay, imong makaplagan nga mabaw ug dili praktikal ang ilang mga tambag. Kasagaran sultihan kag sama niini: ‘Kon positibo kag hunahuna, molampos ka. Bisan unsay imong gusto, kuwarta man, maayong panglawas, o malipayong relasyon, mabatonan nimo kana kon magmapositibo ka.’ Praktikal ba kining tambaga? Makatabang ba kini aron masagubang nimo ang imong mga problema?

Tagda pananglitan ang mga libro bahin sa relasyon ug kaminyoon, nga usa sa labing himalitan. Nakatabang ba kini aron magmalipayon ug molig-on ang mga pamilya? Ang ubang tambag nakatabang, apan ang uban wala. Sumala sa usa ka tig-analisar, ang usa ka magsusulat ug mga libro bahin sa gugma nga mikitag dako sa Latin Amerika “nagtudlo sa mga magbabasa kon unsaon pagbaton ug malipayong relasyon ug pagsalig sa kaugalingon.” Ang maong magsusulat miingon nga pagluib kono sa kaugalingon kon ang usa magpabilin gihapon sa usa ka relasyon bisag silang duha dili na magkasinabot. Buot niyang ipasabot nga ang importante mao ang pagbuhat kon unsay makapalipay sa usa imbes sayron ang mga problema ug sulbaron kana.

Tinuod, mapuslanon usahay ang ilang mga tambag. Apan usahay makadaot usab. Ang usa ka magtatambag maghatag ug maayong mga sugyot bahin sa usa ka kahimtang, apan sa laing kahimtang ang iyang tambag basin makapasamot lang sa problema. Dili gayod nimo masusi ang tanang tambag nga sagad nagkasumpaki. Kang kinsang tambag ang imong masaligan? Pangutan-a ang imong kaugalingon: ‘Gisusi bag maayo kining tambaga, o opinyon lang kini sa tagsulat? Dili kaha gusto lang sa tagsulat nga makakuwarta o mainila?’

Ang usa ka giya nga nagpabiling kasaligan sukad pa kaniadto mao ang Bibliya. Kini naghatag ug praktikal nga tambag maylabot sa lainlaing mga butang. Kini nakatabang sa milyonmilyong tawo nga ipadapat kining tambaga: “Magbag-o kamo diha sa puwersa nga nagpalihok sa inyong kaisipan . . . Magsul-ob sa bag-ong pagkatawo.” (Efeso 4:23, 24) Ang Bibliya nagpatin-aw kon unsay hinungdan sa atong mga problema ug nagtudlo kanato kon unsaon kana pagsagubang. Labaw sa tanan, kini magpalihok ug magpalig-on kanato sa pagbuhat kon unsay husto. Ang sunod nga artikulo magsaysay bahin niana.