Kaihhruaina Chhawr Tlâk Zawnna

THURAWN i zawng a nih chuan, hmuh tûr tam tak a awm a. Mahnia inzirna lam thila sumdâwn chu khawvêla sumdâwnna ṭhang chak berte zînga mi a ni. Hnam hrang hrang awm pawlhna ram Britain te, Latin America te, Japan te, leh United States-ah te chuan mahnia inzirna lehkhabute chu lehkhabu hralh tla ber berte zînga mi a ni a. Video-ah te, seminar-ah te, leh TV program-ah te pawh mahnia inzirna chungchâng sawihona chu a lâr hle a ni. Chûnga an thurâwnte chuan a nunpuitute hnênah rilru lama mi thiam emaw, nupa kâr harsatna lama thurâwn petu emaw, a nih loh leh sakhaw hruaitu emaw râwn kher ngai lova an buainate ching fel thei nia inhriatna a neihtîr a ni. Chûng mahnia inzirnate chuan eng chungchângahte nge kaihhruaina a pêk?

Lungawina neih dân te, kawppui tûr zawn dân te, leh fa enkawl dân te chungchânga kaihhruaina chu a langsâr zualte zînga mi a ni a. Rilru beidawnna te, lusûnna te, leh nupa inṭhennain a nghawngte tawrh chhuah dân chungchâng pawh a lâr hle. Tin, ei leh in insûm dân te, mei zûk te, leh zu in bânsan theih dân te chungchânga thurâwnte pawh a lâr hle bawk. Chûng thurâwnte chu a chhawr tlâk em? Chhawr tlâk châng chu a awm ngei mai; mahse, chhawr tlâk loh châng a tam zâwk. Chuvângin, Bible vaukhânna thu: “Mi mâwl chuan thu tin a ring a, mi remhria erawh chuan a kalna a en ṭha ṭhîn,” tih ngaihtuah chu a finthlâk a ni.—Thufingte 14:15.

Mahnia inzirna lehkhabu chu thiam thil engemaw—thlalâk dân te, sum enkawl dân te, a nih loh leh ṭawng zir thiam dân ang chite—neihna atâna kaihhruaina lehkhabu nên a inang lo va. Chûng thiam thil neihna atâna  kaihhruaina lehkhabute chu a ṭangkai hlein, sum sêng vak lova thiam thil engemaw bîk tak zir chhuahna a ni thei bawk. Mahse, mahni inzirna lehkhabute chu—sumdâwnna lam a ni emaw, nupa lam a ni emaw, fa enkawlna lam a ni emaw, a nih loh leh hrisêlna lam a ni emaw pawh ni se—chutiang a ni ve lo. Chûng chuan nun dân tûr kawng engemaw chu a fak mawiin, ngaih dân engemaw chu a vawrh lâr ṭhîn a. Chuvângin: ‘Thurâwn petu chu tunge ni? A thurâwn pêkte chu khawi aṭanga a lâk nge?’ tia inzawh chu a finthlâk a ni.

Mi thiamte chuan an thurâwn pêkte chu ngun taka finfiah tawh thilte ṭanchhanin an siam lo fo ṭhîn. Ṭhenkhat chuan mi hriat duhzâwng sawina chuan sum tam tak a hui lût dâwn tih an hriat avângin, thurâwn hralh tla ber tûr chu an pe mai ṭhîn. Entîr nân, ram pakhatah phei chuan mahnia inzirna lam thila sumdâwnna chuan kum tinin dollar tlûklehdingâwn riat chuang a lei chhuak hial zu nia!

Mahnia Inzirnate Chu Eng Ang Taka Chhawr Tlâk Nge A Nih?

Mahnia inzirnate i râwn chuan, thurâwn chhawr tlâk tak takte hmuh chu i beisei ngei ang. Mahse, a châng chuan thurâwn rin tlâk loh takte emaw, ngaihruat thil mai maite emaw i hmu ṭhîn a ni. A tlângpui thuin, an kaihhruaina pêkte chu: ‘Hlawhtling tûra i inbeisei tlat chuan, i hlawhtling ngei ngei ang. I thil duh apiang, sum emaw, hrisêlna emaw, a nih loh leh kawppui neih emaw pawh ni se, nei thei tûra i inbeisei phawt chuan i nei ngei ngei ang,’ tih ang chi a ni ṭhîn. Chutiang chi thurâwn chu a ṭangkai em? Chûng thurâwnte chuan nuna lunghnualnate leh thilthleng tak takte hmachhawn thei tûrin a ṭanpui che ang em?

Entîr nân, lehkhabu lâr ber berte zînga mi, mite inkâr leh nupa inkâra inlaichînna chungchâng ziakna lehkhabute hi lo ngaihtuah ta ila. Chûngte chuan mite chu chhûngkaw nun hlim leh nghet nei tûrin a ṭanpui em? A ṭanpui lo fo. Lehkhabu thlifîmtu nu pakhat sawi dân chuan, Latin America rama vawi lehkhata hlawhtling thut, hmangaihna lama mahnia inzirna lehkhabu ziaktu pakhat chuan “a chhiartute chu inlaichînna ṭha leh mahni inhlutna neih dân a hrilh” a ni. Chu lehkhabu ziaktu chuan inrem thei si lova chên dun reng chu mahni inbumna chi khat niin a sawi a. A sawi tum ber chu mahni thiam lohna lai hriat thiam a, chinfel tum ai chuan, mahni lung lâwmzâwnga thil tih mai a pawimawh zâwk tih hi a ni.

Mahnia inzirnate chuan thurâwn ṭha pai tel châng chu a nei ngei mai. Mahse, thurâwn mi tichhe thei takte pawh an pe thei tho bawk a ni. Mi thiam pakhat chuan thil pakhat chungchânga thurâwn ṭangkai tak a pêk laiin, thil danga a thurâwn pêk chuan thil a tikhaw lo zâwk mah thei bawk a. Chûng mi thiamte thurâwn pêk chi hrang tam tak, inkalh fo ṭhîn sîte zînga a dik zawn chhuah chu thil theih a ni lo. A nih chuan tu thurâwn nge i rin tâk ang? Hetiang hian inzâwt rawh: ‘A thurâwn pêk hi ngun taka zir chian hnua pêk a ni em? Nge, a ziaktu ngaih dân ringawtah a innghat mai zâwk? Thudik tak sawi tûra a ziaktu rinawmna chu hausak tumna emaw, hmingthan tumna emawin eng chen nge a thunun?’ tiin.

Hun rei tak chhûng ṭangkai taka lo hman tawh kaihhruaina petu chu Bible hi a ni a. Chu chuan mahnia inzirnate sawi lan thu tam takte chungchânga thurâwn ṭangkai tak a pêk bâkah, thil dang chungchângah pawh a pe bawk. Chu chuan mi maktaduai têlte chu: ‘In rilru thlarauvah chuan atharin lo awm ula, mihring tharin inthuam rawh u,’ tih fuihna chu zâwm tûrin a chêttîr a ni. (Ephesi 4:23, 24) Bible chuan buaina min thlentu hriat thiamna min pêk bâkah, a tihven dân tûr pawh min zirtîr bawk a. A pawimawh berah chuan, thil dik kan tih nachhan tûr ṭha tak min pe bawk hi a ni. A dawta thuziak chuan chutiang a nih dân chu a hrilhfiah ang. (w09 6/1)