Imayna kawsanapaq achkallaña yanapakuykuna

KAY tiempopiqa imayna kawsanapaq yanapakuq librokunaqa achkallañam. Kanmi televisionpipas videokunapipas, chaymi runakunaqa maypipas tarinmanku. Gran Bretaña, Latinoamérica, Japón hinaspa Estados Unidos nisqan lawkunapim chaykunataqa llumpayllataña rantikunku. ¿Imanasqataq runakunaqa munanku? Chay yanapakuykunam runakunata piensachin consejaqkunaman, religionkunaman, doctorkunamanpas mana rispalla sasachakuykunata kikillankumanta atipay atisqankuta. Ichaqa, ¿imakunamantataq chay yanapakuykunaqa riman?

Rimanmi allin kawsakuy haypanamanta, piwan casarakunamanta, wawa-churikunata imayna uywanamanta, rakinakuy hinaspa llumpay llakikuy kaptin otaq ayllunchikpas wañukuptin imayna atipanamanta, drogata otaq trago viciota saqenamanta, chaynallataq mana llumpayta poqonamantapas. ¿Cheqaptapunichu yanapakunman? Wakillanmi, wakinqa manam. Chaymi Bibliapa kayna nisqanpi piensananchik: “Pisi experienciayoq runaqa creerunmi tukuy imapas nisqankuta. Yachayniyoq runam ichaqa entienden imaynam kawsananta” (Proverbios 14:15).

Ichaqa negociomanta, idiomakunamanta hinaspa hukkunamantapas yachachiq librokunaqa manam chaynallachu imayna kawsanapaq consejakuq librokunawanqa. ¿Imanasqa? Chay librokunaqa allinpaschá kanman mana ancha qollqellawan imatapas yachanapaq. Ichaqa imayna kawsanamanta consejakuq librokunaqa, kallpanchanmi runakunapa imayna piensasqallanta hinaspa imayna kawsasqallanta qatipakunapaq. Chaymi tapukunanchik: “¿Maymantataq kay libropa nisqankunaqa horqosqa kachkan?”, nispa.

Allinta musyaptinchikqa, kay yanapakuykunapa nisqankunaqa mana confianapaqmi. Kay yanapakuykunata wakin qellqaqkunaqa qollqeraykullam runakunapa uyariy  munasqallankuta qellqanku. Arí, huk watallapim chullalla nacionpi, 8.000 millon dolarta gananku kay yanapakuykunata rantikuspanku.

¿Cheqaptachu yanapakunku?

Munanchikmi kaykuna yanapawananchiktaqa. Ichaqa manam chaynachu. Kay yanapakuykunam ninku: “Ima sasachakuytapas, atinaykipaq hinam qawanayki hinaspaqa munasqaykitam tarinki, qollqeta, kuyasqa kayta otaq sanolla kaytapas”, nispa. ¿Allinchu chayna nisqankuna? ¿Cheqaptachu sasachakuyninchikpi yanapawanchikman?

Runamasinchikwan chaynataq casado vidapi imayna kawsanapaq rimaq ancha rantikusqa librokunapi piensasun. ¿Cheqaptachu familiakunata yanapanman? Manam llapallanpichu. Latinoamérica lawpi ancha rantikusqa libromantam, huk revista nirqa: “Runakunatam kallpanchan runamasinwan hawka kawsananpaq hinaspa kikin kuyakunankupaqpas”, nispa. Ichaqa nintaqmi, warmi-qari kawsakuy mana allin kachkaptin hinalla kuska kayqa, engañakuymi nispa. Kaynata nispanqa, leeqkunatam kallpanchan kikillankupi piensanankupaq, sasachakuyninkuta entiendespanku allichanankumantaqa.

Kay yanapakuykunapa nisqanqa wakinmi yanapakun. Wakinmi ichaqa mana chaynachu. Wakinpiqa yachaspankuchá allinninchikpaq consejawasun, wakinpim ichaqa mana. Chaynataq hukraq-hukraq rimasqankum hukmanyachiwanchik. Chaymi tapukunanchik: “Kay libro ruraqpa nisqan, ¿kikinpa piensasqallanchu icha allinta yachaykuspan qellqasqanchu? Icha, ¿qollqeyoq otaq reqsisqa kayta munaspanchu rurarqa?”, nispa.

Chay librokunamantaqa, kachkanmi ñawpa tiempomantaraq runakunata tukuy ima necesitasqanpi allintapuni yanapaq libro. Chay libroqa Bibliam. Kay libropa yanapakuyninwanmi achkallaña runakuna ‘imayna piensasqankuta mosoqyarachinku’, hinaspam ‘mosoq runa’ hinaña kachkanku (Efesios 4:23, 24). ¿Imanasqataq Bibliapa yanapakuyninqa allinpuni? Yanapawanchikmi sasachakuyninchikkuna imanasqa kasqanta entiendenapaq hinaspa imayna atipanapaqpas. Chaymantapas kallpanchawanchikmi imatapas allinta ruranapaq. Kaymantam qawasunchik qatiqnin yachachikuypi.