Goˈˈiya Kaaletuwaa Demmanau Baaxetido Baaxiyaa

NEENI zoriyaa koyiyaaba gidikko, keehi daro zoree deˈees. Asi barkka bana maaddana mala giigissiyoobay alame yuushuwan keehi aakkiiddi deˈiya zalˈˈetuppe issuwaa. Inggilizen, Tohossa Amerkkan, Jaappaaneeninne Huuphessa Amerkkan asi barkka bana maaddana mala giigissiyo maxaafati daro qommuwan giigoosonanne keehi bayzettoosona. Asi barkka bana maaddana mala viiduwan, shiiqotuuninne televizhiiniyaa prograamiyankka immiyo qofay aahuwan erettidaba. Eti yootiyo qofay asaa qofaabaa xannaˈiyaagaa, aqo deˈuwaabaa xeelliyaagan zoriyaagaa woy haymaanootiyaa kaalettiyaagaa zore oychennan intte metuwaa xooni kiyana danddayeeta giyaagan baasettidaagaa. Ha kaaletoti ay ay gujjiyoonaa?

Injjetidoogeeta gidiyoogaa, aqo laggiyaa koyiyoogaanne naata dichiyoogaa giyaageeti, eti keehippe aahuwan yootiyo yohotuppe amaridaageeta. Unˈˈuwaa, azzanuwaanne aqo laggiyaappe shaahettiyoogee kaalettiyoobaa xooni kiyiyoogaa giyaageeti erettida hara allaalleta. Qumau yorattiyoogaa, tambbuwaa uyiyoogaanne daro ushshaa uyiyoogaa agganau maaddiya zoriyaakka daro asay koyees. He zoree goˈˈiyaabee? Issi issitoo goˈˈana danddayees; shin darotoo goˈˈenna. Hegaa gishshau, Geeshsha Maxaafaa akeekissuwaa qoppiyoogee aadhida eratetta: “Eeyya asi ubbabaa ammanees; shin cinccai akeekidi tanggees.”—Leemiso 14:15.

Asi barkka bana maaddana mala giigissiyo kaaletoti pootuwaa denttiyo ogiyaa, miishshaa oyqqiyo ogiyaa woy issi qaalaa tamaariyo ogiyaa yootiya kaaletotuppe keehi dumma. Hegaa mala kaaletoti daro miishshaa qanxxennan issibaa loytti erana danddayiyo oge gidana danddayoosona. Oosuwaa, aqo  deˈuwaa, yelidi dichiyoogaa woy guuggiyaa payyatettaa xeelliyaagan yootiya, asi barkka bana maaddana mala giigissiyo maxaafati hegeetuppe dumma. Eti darotoo issi qommo deˈuwaa woy issi qommo qofaa minttettoosona. Yaatiyo gishshau, ‘Ha zoriyaa yootiday oonee? Ha zoriyaa auppe ekkidi yootidee?’ giidi oychiyoogee eratetta.

Eranchatu qofay darotoo akeekan shiishshido naqaashan baasettidaagaa gidennan aggana danddayees. Asay siyanau koyiyoobaa yootiyoogan daro miishshay beettiyoogaa eriyo gishshau, issoti issoti asay keehi koyiyo zoriyaa immana danddayoosona. Asi barkka bana maaddana mala giigissiyoobaappe issi biitta xallan layttan layttan hosppun biiloone doolaariyaappe dariya miishshay beettees!

He Kaaletoti Ay Keena Goˈˈiyaabee?

Asi barkka bana maaddana mala giigissiyo kaaletota neeni goˈettiyo wode, maaddiya zoriyaa demmana koyaasa. Gidikkonne, issi issitoo neeni demmiyo zoree hanennaagaa woy mela odo. Darotoo hegaa mala kaaletoti hagaadan goosona: ‘Neeni hanees gaada qoppiyaaba gidikko, neeni qoppidobay polettees. Neeni miishshaa, payyatettaa woy haratuura loˈˈo gaytotettaa demmana gaada naagiyaaba gidikko, demmana.’ Hegaa mala zoree goˈˈiyaabee? He zoree neeni deˈuwan gakkiyaabatanne hidoota qanxxissiyaabata xoona kiyanaadan maaddii?

Leemisuwau, haratuuranne aqo laggiyaara deˈiya gaytotettaabaa odiya keehi erettida maxaafatuppe amaridaageeta ane qoppa. Asay ufayssaa demmanaadaaninne so asaa deˈoy woppu giidaagaa gidanaadan eti maaddidonaa? Darotoo maaddokkona. Tohossa Amerkkan mata wode daro asay dosido, siiquwaa xeelliyaagan asi barkka bana maaddana mala giigida maxaafatu xaafee “loˈˈo gaytotettaa medhanaunne banan ammanettiyo hanotaa dichanau nabbabiya asaa zorees” yaagada maxaafaa xeelliyaagan qofaa yootiya issi maccaasiyaa yootaasu. Hegaa xaafidaagee, loˈˈo dabbotaa medhidi deˈennaagee bana kaddiyoogaa mala yaagiis. He maxaafati issi uri bana gakkiya metuwaa akeekidi, hegaa xooni kiyiyo ogiyaa gidennan, ayyo loˈˈo qofay siyettanaadan ay oottana bessiyaakko waannayidi yootoosona.

Asi barkka bana maaddana mala giigissiyo kaaletoti amarida loˈˈo zoriyaa oyqqidoogee erettidaagaa. SHin eti qohiya zoriyaakka zorana danddayoosona. Issi eranchay issi allaalliyaa xeelliyaagan maaddiya qofaa yootana danddayees; shin a zoree hara allaalletun keehi qohiyaaba gidana danddayees. Ha kaaletotun imettiya daro qofay darotoo issoy issuwaara maayettenna gishshau, maaddiyaagaa dooranaagee metiyaaba. Ooni immiyo zoriyaa ammanettana danddayay? Ne huuphiyaa hagaadan oycha: ‘Ha zoree akeekan pilggidi giigissidobeeyye, woy xaafidaagaa qofa xallee? Duretanau woy hayttatanau koyiyoogee xaafidaagee zoriyaa immanaadan ay keenaa denttettidee?’

Geeshsha Maxaafay daro wodiyau maaddiya kaaleto gididi goˈˈiis. Geeshsha Maxaafay asi barkka bana maaddana mala giigissiyo kaaletotu huuphe yohota gujjin, hara darobaara gayttidaagan goˈˈiya zoriyaa immees. Geeshsha Maxaafay miilooniyan qoodettiyaageeta: “Intte wozanainne qofai muleera ooraxxanau bessees. . . . Ooratta asatettaa maayite” yaagiya zoriyaa oosuwan peeshshanaadan denttettiis. (Efisoona 4:23, 24) Geeshsha Maxaafay nu bolli gakkiya metuwau gaasoy aybakko aadhida eratettay deˈiyo akeekaa immees; qassi he metuwaa waati xooni kiyana danddayiyaakko tamaarissees. Hegaappekka aadhiyaagee, Geeshsha Maxaafay loˈˈobaa oottanaadan denttettiya wolqqaama gaasuwaa yootees. Kaalliya huuphe yohoy waatidi hegaadan oottiyaakko qonccissees.