Wuhrẹ Emọ ra

Ọmọ Oniọvo Pọl O Siwi Uzuazọ Pọl

KỌ WHỌ riẹ nọ imoni Pọl ukọ na jọ e jọ ilele Jesu? *— Whaọ oniọvo-ọmọtẹ riẹ jọ avọ ọmọzae riẹ a jọ ilele Jesu. Ọmọ oniọvo-ọmọtẹ riẹ yena o siwi uzuazọ Pọl! Ma riẹ odẹ ọmọ na hayo odẹ oni riẹ hẹ, rekọ oware nọ ọmọ na o ru ma riẹ. Kọ whọ gwọlọ riẹ oware nọ ọmọ na o ru?—

Pọl ọ nwani no erẹ usiuwoma ota avesa riẹ ze obọ, yọ ọ rrọ Jerusalẹm. O wọhọ nọ o jọ ukpe ọ 56 C.E. A mu Pọl fihọ uwou-odi, yọ a be te rehọ iẹe guẹdhọ. Rekọ ewegrẹ riẹ a gwọlọ hẹrẹ bẹsenọ a rẹ rehọ Pọl gu ẹdhọ no ho. A gwọlọ nọ a re kpei no! Fikiere, a tẹ gbaemu inọ oware wọhọ ezae udhuvẹ a ti dhere oria jọ, re okenọ a te rehọ Pọl nyai guẹdhọ na, a vẹ vẹruọ ai re a kpei no.

Ọmọ oniọvo Pọl ọ rọ edhere jọ yo kpahe ẹguae omuomu nana. Kọ whọ riẹ oware nọ ọmọ na o ru?— Ọ nyae vuẹ Pọl. Ababọ okioraha, Pọl ọ tẹ ta kẹ omọvo elakpa na jọ nọ: “Rehọ ọmọzae ọnana se olou elọkọ; keme o wo ẹme nọ ọ be te ta kẹ e.” Alakpa na o te su ọmoha na bru Klọdiọs Lisias, oletu ogbaẹmo na, jẹ vuẹe inọ ọmoha na o wo okpẹme jọ nọ ọ gwọlọ ta kẹe. Klọdiọs o te kru ọmọ oniọvo Pọl na ruọ akotọ jẹ nọe oware nọ o wọ riẹ ze, ọmoha na ọ tẹ vuẹe kpahe ẹguae omuomu nọ ewegrẹ e gba kpahe Pọl.

Klọdiọs ọ tẹ vẹvẹ ọmọ oniọvo Pọl na unu inọ: “Whọ ta kẹ ohwo ọvo nọ whọ vuẹ omẹ onana ha.” Kẹsena, o te se ilori elakpa ivẹ, jẹ vuẹ ae nọ a ruẹrẹ elakpa-ẹmo udhusoi akuava (200) họ, ahwo udhosa gbe ikpe (70) nọ e rẹ dhẹ isi, gbe ahwo udhusoi akuava (200) nọ e rẹ wha izuẹ re a su Pọl kpobọ Sisaria. Evaọ ighọjọ izi aso yena, ezae egba ene gbe ikpe ihrẹ (470) na a tẹ ruọ edhere re a rehọ Pọl bru Ọba na Fẹliks, ohwo Rom nọ o je su evaọ Sisaria. Evaọ ileta nọ o kere lele ai, Klọdiọs ọ vuẹ Fẹliks kpahe ẹguae nọ ewegrẹ a gba re a kpe Pọl.

Fikinọ ẹguae omuomu rai o kiethọ, o tẹ gba ahwo Ju na họ inọ a re kpobọ Sisaria re te ai te Pọl a jọ okọto ta ọvuọ ẹkẹ-unu riẹ. Rekọ a ruẹ oware ovo kru dhobọ họ inọ Pọl o ru thọ. Ghele na, a rọ okienyẹ nyasiọ Pọl ba uwou-odi ikpe  ivẹ soso. Fikiere, Pọl ọ tẹ yare nọ o re tu ẹdhọ na kpohọ Rom, a tẹ rehọ iẹe kpohọ obei.—Iruẹru 23:16–24:27; 25:8-12.

Eme ma rẹ sai wuhrẹ no ikuigbe oware nana nọ ọmọ oniọvo Pọl o ru na ze?— U dhesẹ nọ o gwọlọ aruọwha re ohwo ọ ta oware nọ ọ riẹ nọ u kiehọ via, gbe inọ ma te ru ere ma sai siwi uzuazọ ahwo. Makọ okenọ Jesu ọ riẹ inọ ewegrẹ riẹ a “guọlọ nọ a re kpe i,” ọ gbẹ jẹ vuẹ ahwo kpahe Uvie Ọghẹnẹ. Jesu ọ vuẹ omai inọ ma ru epọvo na re. Kọ ma ti ru ere? Ma ti ru ere otẹrọnọ ma wo ọkpọ aruọwha ọmọ oniọvo Pọl na.—Jọn 7:1; 15:13; Matiu 24:14; 28:18-20.

Pọl ọ tuduhọ ọmoha na Timoti, ogbẹnyusu riẹ awọ inọ: “Sẹro oma ra gbe uwuhrẹ ra; yọrọ oyena ga, keme fiki ere oruo who re ro siwi oma ra gbe ahwo nọ a be kezọ ẹme ra.” (1 Timoti 4:16) Uzẹme, ọmọ oniọvo Pọl na o fi oghẹrẹ uduotahawọ nana họ iruo ziezi. Kọ who ti ru ere?

[Oruvẹ-obotọ]

Enọ:

○ Amono họ imoni Pọl jọ, kọ eme ma wuhrẹ kpahe ai?

○ Eme ọmọ oniọvo Pọl o ru ro siwi uzuazọ Pọl?

○ Evaọ ẹmeoyo kẹ Jesu, oware jọ vẹ ma rẹ sai ru nẹnẹ nọ o rẹ sai fi obọ họ siwi uzuazọ ahwo?