Ia Aʻoaʻo Lau Fanau

Na Faasaoina Paulo e le Tama Tama a Lona Tuafafine

PE NA e iloa na iai tauaiga o le aposetolo o Paulo na avea ma soo o Iesu? *— Ioe o lona tuafafine ma lana tama tama. Ma na faasaoina le ola o Paulo e le tama a lona tuafafine! E tatou te lē iloa lona igoa faapea foʻi ma le igoa o lona tinā, ae e tatou te iloa lana mea na fai. Pe e te fia iloa le mea na tupu?—

Ua faatoʻā foʻi mai Paulo i lana malaga faamisionare lona tolu ma o loo iai o ia i Ierusalema. E foliga mai o le tausaga lea e 56 T.A. Ua taofia nei Paulo ma o loo faatali lana faamasinoga. Ae e lē o mananaʻo fili o Paulo e faia sona faamasinoga. Ua latou mananaʻo e fasiotia o ia! Ua latou taupulepule loa ni tane e 40 e faatalitali i le ala e fasiotia ai Paulo.

Peitaʻi, na iloa e le tama a le tuafafine o Paulo lenā taupulepulega. Pe e te iloa lana mea na fai?— Sa ia alu ma taʻu iā Paulo. O le taimi lava lenā na valaau atu ai Paulo i se fitafita ma faapea atu: “Ia avatu lenei tauleʻaleʻa i le alii e pule i ʻau, auā o loo iai se mea ua fia taʻu atu iā te ia.” Ona la ō lea ma le fitafita i le alii e pule i ʻau, o Kalaotio Lusia, ma faamatala atu e iai se feʻau tāua o loo fia taʻu atu e lenei tauleʻaleʻa. Ona talanoa lea na o Kalaotio ma le tama a le tuafafine o Paulo, ma ua taʻu uma e lenei talavou faamatalaga e uiga i le taupulepulega.

Sa faatonuina e Kalaotio le tama a le tuafafine o Paulo: “Aua neʻi e taʻuina i se tasi o lea ua uma ona e faailoa mai nei mea iā te aʻu.” Ona ia valaauina lea o fitafita e toʻalua ma faatonuina i laʻua e sauni ifo ni fitafita e 200, o tagata tiʻetiʻe solofanua e 70, ma fitafita e tau i tao e 200, ma sauni e agaʻi atu i Kaisareia. I le ta o le iva i lenā pō, na faafeao atu ai ma le saogalemu e nei tamāloloa e 470 ia Paulo i le Kovana Roma o Filiki i Kaisareia. I lana tusi iā Filiki, na faamatala atu ai e Kalaotio le taupulepulega e fasiotia Paulo.

O lea, ua leai se isi mea e mafai e tagata Iutaia ae ia ō atu i le faamasinoga i Kaisareia e faaoo atu ai a latou tuuaiga iā Paulo. O le mea moni, e leai ni a latou faamaoniga na faia e Paulo se mea sesē. E ui i na tulaga, ae sa taofia ma le  lē tonu Paulo i le falepuipui mo le lua tausaga. O lea la, na ia talosaga ai e faia lona faamasinoga i Roma, ma na auina atu ai o ia i inā.—Galuega 23:16–24:27; 25:8-12.

O le ā se mea e tatou te aʻoaʻoina mai lenei tala e tusa ai ma le tama a le tuafafine o Paulo?— E manaʻomia ona lototele e tautala i le mea saʻo, ma a tatou faia faapea, o le a mafai ona tatou faasao ai ola. Ina ua silafia e Iesu o loo taumafai ona fili “e fasioti o ia,” sa faaauau pea ona ia taʻutaʻu atu le Malo o le Atua i tagata. Sa faatonu foʻi i tatou e Iesu e faia faapena. Po o le a tatou faia faapena? O le a tatou faia faapena pe a tatou lototetele e pei o le tama a le tuafafine o Paulo.—Ioane 7:1; 15:13; Mataio 24:14; 28:18-20.

Sa augani atu Paulo i lana uō talavou o Timoteo: “Ia uaʻi totoʻa iā te oe lava ma lau aʻoaʻo atu. Ia e tumau ai i nei mea, auā o le faia faapea e te faaolaina ai oe lava atoa ma i latou o faalogo iā te oe.” (1 Timoteo 4:16) E mautinoa lava, sa faatatauina e le tama a lona tuafafine ana fautuaga. Ae a oe?

[Faaopoopoga i lalo]

Fesili:

○ O ai isi o tauaiga o Paulo, ma o le ā ua tatou aʻoaʻoina e faatatau iā i laʻua?

○ O le ā na faia e le tama tama a le tuafafine o Paulo e faasaoina ai le ola o Paulo?

○ O le ā e mafai ona tatou faia, e usiusitai ai iā Iesu, lea e mafai ona faasao ai ola o tagata i aso nei?