Bushe Lesa Alaluka-aluka?

BAIBOLO ilanda pali Lesa ukuti: “Taluka-aluka nge cinshingwa.” Kabili na Lesa umwine ailondolola ukutila: “Nine Yehova; nshayaluka iyo.” (Yakobo 1:17; Malaki 3:6) Ala mwandini Yehova Lesa alipusana sana na bantu abashitasha nangu ciwame shani kabili abashingacetekelwa pantu bena lyonse balaluka-aluka!

Nomba abantu bamo ababelenga Baibolo balatwishika Lesa no kumona kwati alyaluka. Ku ca kumwenako, inshita imo Yehova Lesa apeele Abena Kristu amaka ya kucita ifipesha amano, nomba ino nshita tabapeela ayo maka. Kale sana Lesa alesuminisha abantu ukulaupa impali, nomba ino nshita alilesha. Mu Mafunde Yehova apeele abena Israele ukupitila muli Mose, abebele ukulasunga Isabata, nomba ino nshita alilesha. Bushe ifi twalandapo tafitulanga ukutila Lesa alyaluka?

Ica kubalilapo ico tufwile ukwishiba ca kutila imibele ya kwa Lesa iya kutemwa no mulinganya tayaluka-aluka. Kabili no “kufwaya kwakwe ukushakaaluke” ukwa kupaala abantunse ukubomfya Ubufumu bwakwe na ko takwa-aluka iyo. (Abena Efese 3:11) Lelo filya fine na imwe mwingaluka nga ca kutila umuntu umo cila nshita alecita ifyo mushifwaya, e fyo na Yehova aluka nga ca kuti ifintu fya-aluka.

Lesa na kabili alalula amafunde yakwe ayo apeela abantu bakwe ukulingana ne fyo ifintu fili e lyo ukulingana ne fyo balekabila. Ici twalandapo tacifwile ukutupapusha nakalya. Tontonkanyeni pa fingacita umuntu uwaishibisha ukutandasha abantu nga amona ukutila uko baleya kuli ubusanso. Kuti apisha abantu aletandasha mu nshila imbi umushili ubusanso. Nga ca kuti abomfya inshila imbi, te kutila  ninshi a-aluka talungame kulya kwine baciba no kuya. Lekeni kanshi tulande pa fya kumwenako fitatu ifyapelenganya abantu bamo ifyo twacilandapo pa kubala.

Mulandu Nshi Ifipesha Amano Fyapwila?

Mulandu nshi Lesa apelele amaka ya kucita ifipesha amano ku Bena Kristu ba kubalilapo bamo? Mufwile mwalishiba ukutila ilyo Lesa asalile uluko lwa bena Israele, ilingi line alecita ifipesha mano kuli bena pa kubalanga ukuti bali bantu bakwe. Ukupitila muli Mose, Lesa alilangile amaka yakwe ayakalamba lintu apuswishe abena Israele ukubafumya mu Egupti no kubatungulula ilyo bali mu matololo ukuyafika na mu Calo ca Bulayo. Ku ca bulanda, imiku ne miku abena Israele tabaletetekela Lesa. Nomba Yehova asukile akaana abena Israele, no kupanga icilonganino icipya ica Bena Kristu, kabili apeele abatumwa na bantu bambi amaka ya kucita ifipesha mano. Ku ca kumwenako, umutumwa Petro na Yohane balyundepe umwaume uwafyelwe uwalemana, e lyo Paulo na o alibuushishepo uwafwile. (Imilimo 3:2-8; 20:9-11) Ifipesha mano balecita fyalengele UbuKristu ukwishibikwa mu ncende ishingi sana. Nomba cinshi ifipesha amano fyapwila?

Umutumwa Paulo alondolwele ukubomfya icilangililo ukuti: “Ilyo nali umwaice, nalelanda ngo mwaice, naletontonkanya ngo mwaice, nalepelulula ngo mwaice; lelo nomba ndi mukalamba, nalileka ifya bwaice.” (1 Abena Korinti 13:11) Inshila abafyashi basungilamo umwana umunono yalipusana ne fyo basunga umwana umukalamba. E fyo caba na kuli Yehova, ifyo acita ku cilonganino ca Bena Kristu fyalyaluka pantu tacaba nge fyo cali ilyo catendeke fye. Umutumwa Paulo alandile ukutila amaka ya kucita ifipesha amano pamo nga ukulandila mu ndimi nelyo ukusesema “fyonse ifi fikapwa.”—1 Abena Korinti 13:8.

Cinshi Lesa Asuminishishe Ukuupa Impali?

Ifyo Yesu alandile filatulanga bwino ifyo Lesa alefwaya icupo ukuba ilyo aebele abantu ba kubalilapo babili ukuti: ‘Umwaume akasha wishi na nyina no kulambatila ku mukashi wakwe, kabili aba babili bakaba umubili umo.’ (Mateo 19:5) Lesa alefwaya ukuti icupo cibe ca bantu fye babili kabili tacali no kupwa. Nomba lintu Lesa apangile uluko lwa bena Israele no kubapeela Amafunde, ninshi kale kale ukuupa impali kwaliseeka. Kanshi nangu ca kutila Lesa te waebele nangu ukukoselesha abantu ukulaupa impali, alibikileko amafunde ayo abaupile impali balingile ukulakonka. E ico lintu icilonganino ca Bena Kristu capangilwe, Icebo ca kwa Lesa ukwabula no kupita mu mbali calileseshe ukulaupa impali.—1 Timote 3:2.

Inshita shimo Yehova Lesa alasuminisha ifintu fimo ukutwalilila mpaka inshita yakwe iya kufilungika yafika. (Abena Roma 9:22-24) Yesu alandile ukutila ico Yehova ‘asuminishishe’ abena Israele ukulakonka intambi shimo isha fyupo, ni pa mulandu wa ‘kukosa kwa mitima yabo.’—Mateo 19:8; Amapinda 4:18.

Mulandu Nshi Ukusunga Isabata Kwabelele fye pa Nshita Inono?

Ilyo Lesa alubwile abena Israele ukufuma mu Egupti, e lyo abebele ukuti balesunga Isabata cila  mulungu. Mu kuya kwa nshita, ukusunga Isabata kwaishileba pa Mafunde ayo abena Israele bonse balingile ukulakonka. (Ukufuma 16:22-30; 20:8-10) Umutumwa Paulo alondolwele ukutila Yesu aipeele umwine nge lambo kabili “afumishepo . . . amafunde, umwali ifyebo fya kukonka ne fipope” e lyo “no kufuuta amafunde ayalembelwe ku minwe.” (Abena Efese 2:15; Abena Kolose 2:14) Kanshi pa mafunde Lesa “afumishepo” no “kufuuta” pali ne funde lya kusunga Isabata, pantu Baibolo ilanda no kutila: “E ico mwileka umuntu nangu umo amupingule pa fya kulya na pa fya kunwa nelyo pa mutebeto nangu pa kusunga ubushiku bwa mweshi upya nangu isabata.” (Abena Kolose 2:16) Nomba cinshi Lesa abikileko Amafunde apali ne funde lya kusunga Isabata?

Umutumwa Paulo alembele ati: “Amafunde yaisaba aya kututungulula kuli Kristu.” Kabili alandile no kutila: “Apo icitetekelo caliisa, tatutungululwa na kabili no mubomfi.” (Abena Galatia 3:24, 25) Te kuti tulande ukuti Lesa alyaluka ifi abebele ukuleka ukulasunga Isabata, pantu ukusunga Isabata kwali fye kwa pa nshita inono pa kutila abantu basambilile ukuti balingile ukukwata inshita iikalamba iya kutontonkanya pa fya kwa Lesa. Nangu ca kutila ifunde lya kusunga Isabata lyali fye lya pa nshita inono, lyalelanga ukuti ku ntanshi abantunse bakatuusha ku fintu fibacusha mu mibili yabo kabili bakalapepa Lesa bwino.—AbaHebere 4:10; Ukusokolola 21:1-4.

Lesa wa Cishinka Kabili Uwaba no Kutemwa

Ifya kumwenako ifya mu Baibolo ifyo twalandapo fitulanga ukutila Yehova Lesa apeele amafunde yalekanalekana pa nshita ishalekanalekana. Lelo ici tacilepilibula ukuti alaluka-aluka. Alecitila fye abantu bakwe ifyo balekabila ukulingana ne fyo ifintu fyali pali ilya nshita, kabili ico alecitila ifi ni pa kuti abantu bakwe basekelemo. E fyo caba na muno nshiku.

Pa mulandu wa kutila Yehova taluka-aluka, lyonse kuti twaishiba ifyo tulingile ukucita pa kuti tumusekeshe. Na kabili ukwishiba ici cishinka kuti kwalenga twacetekela sana ukutila fyonse ifyo Lesa atulaya fikacitika nangu cikabe shani. Yehova atila: “Conse ico natemwa nkacita . . . Nalipanga, kabili nkacicita.”—Esaya 46:10, 11.

[Amashiwi pe bula 21]

Imibele ya kwa Lesa iya kutemwa no mulinganya tayaluka-aluka

[Amashiwi pe bula 22]

Paulo alandile ukuti kukaba inshita ilyo ifipesha amano ‘fyonse fikapwa’

[Amashiwi pe bula 23]

Lesa alefwaya ukuti icupo cibe ca bantu fye babili kabili tacali no kupwa