Ani Nyɔŋmɔ Tsakeɔ Ejwɛŋmɔ?

BIBLIA lɛ wie Nyɔŋmɔ he akɛ: “Su tsakemɔ kɛ tsɔ̃mɔ susuma ko bɛ lɛ.” Agbɛnɛ hu, Nyɔŋmɔ diɛŋtsɛ wie yɛ gbɛ ni haa wɔtsui nyɔɔ wɔ mli lɛ nɔ akɛ: “Mi Yehowa lɛ, mitsakeee.” (Yakobo 1:17; Maleaki 3:6) Esoro Yehowa Nyɔŋmɔ kwraa yɛ gbɔmɛi ni sane wa ni anyɛɛɛ amu afɔ̃ amɛnɔ akɛni amɛtsakeɔ amɛjwɛŋmɔ daa lɛ ahe!

Shi, mɛi ni kaneɔ Biblia lɛ ateŋ mɛi komɛi susuɔ akɛ Nyɔŋmɔ tsakeɔ ejwɛŋmɔ. Ákɛ nɔkwɛmɔnɔ lɛ, be ko ni eho lɛ Yehowa Nyɔŋmɔ duro Kristofoi hewalɛ ni baanyɛ aha amɛfee naakpɛɛ nii, shi amrɔ nɛɛ efeee nakai. Yɛ blema beaŋ lɛ, Nyɔŋmɔ ŋmɛ gbɛ ni akɛ yei pii hi shi, shi amrɔ nɛɛ eŋmɛɛɛ nakai feemɔ gbɛ. Yɛ Mose Mla lɛ shishi lɛ, Yehowa bi ni aye Hejɔɔmɔ Gbi, shi amrɔ nɛɛ ebiii ni aye. Ani nɔkwɛmɔnii nɛɛ tsɔɔ akɛ Nyɔŋmɔ etsake ejwɛŋmɔ?

Klɛŋklɛŋ kwraa lɛ, wɔbaanyɛ wɔná nɔmimaa akɛ Nyɔŋmɔ tsakeee shishitoo mlai ni kudɔɔ esuɔmɔ kɛ ejalɛsaneyeli lɛ. Kɛfata he lɛ, ‘enaanɔ yiŋ ni eto’ akɛ ebaajɔɔ adesai kɛtsɔ e-Maŋtsɛyeli lɛ nɔ lɛ tsakeko kwraa. (Efesobii 3:11) Shi, taakɛ ekolɛ obaatsake jwɛŋmɔ ni ohiɛ yɛ mɔ ko ni etee nɔ eba ejeŋ yɛ gbɛ ni haaa oná ehe miishɛɛ nɔ lɛ he lɛ, nakai nɔŋŋ hu Yehowa tsakeɔ ehe ewoɔ shihilɛi ni tsakeɔ lɛ amli.

Agbɛnɛ hu, Nyɔŋmɔ tsakeɔ gbɛtsɔɔmɔi ni ekɛhaa ewebii kɛ́ amɛshihilɛi kɛ amɛhiamɔ nii tsake. Esaaa akɛ enɛ haa wɔnaa kpɛɔ wɔhe. Susumɔ nɔ ni mɔ ko ni tsɔɔ shisharalɔi agbɛ ni le enitsumɔ jogbaŋŋ lɛ baafee kɛji ena akɛ  amɛbaanyɛ amɛkɛ oshara ko ayakpe yɛ gbɛ ni amɛnyiɛ nɔ lɛ nɔ lɛ he okwɛ. Ebaakɛɛ kuu ni ekɛnyiɛ lɛ ni amɛtsɔ gbɛ kroko nɔ kɛjo oshara lɛ naa foi. Shi no etsɔɔɔ akɛ etsake ejwɛŋmɔ yɛ he ni amɛyaa lɛ he, aloo jeee nakai? No hewɔ lɛ, nyɛhaa wɔpɛia nɔkwɛmɔnii etɛ ni awie he kɛtsɔ hiɛ ni haa mɛi komɛi ahiɛ feɔ amɛ yaa lɛ amli wɔkwɛa.

Mɛni Hewɔ Naakpɛɛ Nifeemɔi Asɛɛ Efo?

Mɛni hewɔ Nyɔŋmɔ duro Kristofoi ni hi shi yɛ klɛŋklɛŋ afii 100 lɛ mli lɛ ateŋ mɛi komɛi hewalɛ ni akɛfeɔ naakpɛɛ nii lɛ? Ekolɛ ole akɛ beni Nyɔŋmɔ hala Israel akɛ emaŋ lɛ, bei pii lɛ etsɔɔ naakpɛɛ nii anɔ etsɔɔ akɛ ekɛ amɛ yɛ. Nyɔŋmɔ tsɔ Mose nɔ ekpɔ̃ Israel kɛjɛ Mizraim, ni etsɔɔ amɛ gbɛ kɛtsɔ ŋa lɛ nɔ kɛtee Shiwoo Shikpɔŋ lɛ nɔ, ni ekɛtsɔɔ akɛ eyɛ hewalɛ kple. Dɔlɛ sane ji akɛ, bei pii lɛ Israelbii lɛ ejieee Nyɔŋmɔ mli hemɔkɛyeli kpo. Beni yi yawula shi lɛ, Yehowa kpoo Israel, ni eto Kristofoi asafo lɛ ema shi, ni ekɛ hewalɛ ni akɛfeɔ naakpɛɛ nii duro bɔfoi lɛ kɛ mɛi krokomɛi. Ákɛ nɔkwɛmɔnɔ lɛ, bɔfo Petro kɛ bɔfo Yohane tsa nuu ko ni afɔ lɛ akɛ obubuafo, ni Paulo tee nuu ko ni egbo lɛ shi kɛba wala mli. (Bɔfoi lɛ Asaji 3:2-8; 20:9-11) Naakpɛɛ nii ní amɛfee lɛ ha anyɛ ato Kristojamɔ ama shi yɛ shikpɔji babaoo anɔ. Belɛ, mɛni hewɔ naakpɛɛ nifeemɔi asɛɛ fo lɛ?

Bɔfo Paulo kɛ nɔkwɛmɔnɔ ko tsɔɔ mli akɛ: “Beni miji abifao lɛ, miwieɔ tamɔ abifao, mijwɛŋɔ nii ahe tamɔ abifao, misusuɔ [nii ahe] tamɔ abifao; shi beni mitsɔ̃ nuu nukpa lɛ, mishɛrɛ abifabii anii lɛ mishwie sɛɛ.” (1 Korintobii 13:11) Taakɛ esoro bɔ ni fɔlɔi kɛ gbekɛ bibioo yeɔ ehaa yɛ bɔ ni amɛkɛ onukpa yeɔ ehaa lɛ he lɛ, nakai nɔŋŋ gbɛ ni Yehowa tsɔɔ nɔ ekɛ Kristofoi asafo lɛ yeɔ lɛ tsake beni asafo lɛ jeee “abifao” dɔŋŋ lɛ. Bɔfo Paulo tsɔɔ mli akɛ naakpɛɛ duromɔ keenii tamɔ nyɛmɔ ni akɛwieɔ maŋsɛɛ wiemɔ loo akɛgbaa gbalɛi lɛ ‘asɛɛ baafo.’—1 Korintobii 13:8.

Mɛni Hewɔ Aŋmɛ Yei Pii Kɛshihilɛ Gbɛ Lɛ?

Yesu tsɔɔ akɛ Nyɔŋmɔ kɛ gbalashihilɛ he shishitoo mla ha beni Ekɛɛ klɛŋklɛŋ adesai enyɔ lɛ akɛ: ‘Nuu aaashĩ etsɛ kɛ enyɛ ni eeekpɛtɛ eŋa he, ni amɛyi enyɔ lɛ fɛɛ amɛaatsɔ heloo kome lɛ.’ (Mateo 19:5) Gbalashihilɛ ji naanɔ wekukpãa ni mɛi enyɔ boteɔ mli. Shi, beni Nyɔŋmɔ to Israelbii lɛ ashishi akɛ maŋ ni eha amɛ Mla lɛ, no mli lɛ yei pii kɛshihilɛ ehe shi momo. No hewɔ lɛ, eyɛ mli akɛ jeee Nyɔŋmɔ ni to yei pii kɛshihilɛ shishi loo ewooo yei pii kɛshihilɛ he hewalɛ moŋ, shi ewo mlai ni baakudɔ nifeemɔ nɛɛ. Beni ato Kristofoi asafo lɛ shishi lɛ, Nyɔŋmɔ Wiemɔ lɛ fee lɛ faŋŋ akɛ Nyɔŋmɔ miihi yei pii kɛshihilɛ.—1 Timoteo 3:2.

Yehowa Nyɔŋmɔ eŋmɛ nibii komɛi afeemɔ gbɛ kɛyashi ebe ni eto akɛ ekɛbaajaje amɛ lɛ baashɛ. (Romabii 9:22-24) Yesu tsɔɔ akɛ Yehowa ŋmɛ gbɛ ni gbalashihilɛ mli nifeemɔi ni esaaa lɛ aya nɔ kɛyashi be ko, ni eji “hegbɛ” ni ekɛha Israelbii lɛ yɛ ‘amɛtsuiwalɛ’ lɛ hewɔ.—Mateo 19:8; Abɛi 4:18.

 Mɛni Hewɔ Aŋmɛ Gbɛ ni Aye Hejɔɔmɔ Gbi Kɛyashi Be ko Lɛ?

Nyɔŋmɔ to daa otsi Hejɔɔmɔ Gbi lɛ shishi beni ekpɔ̃ Israelbii lɛ kɛjɛ Mizraim lɛ sɛɛ. Sɛɛ mli lɛ, eha akɛfata Israel maŋ lɛ Mla lɛ he. (2 Mose 16:22-30; 20:8-10) Bɔfo Paulo tsɔɔ mli akɛ Yesu ŋɔ ehe eha akɛ afɔle, ni ‘egu kitai amla lɛ ni yɔɔ akpɔi amli lɛ,’ ni “egbe wɔhe wolo ni aŋma” lɛ. (Efesobii 2:15; Kolosebii 2:14) Hejɔɔmɔ Gbi mla lɛ fata mlai ni ‘agu’ ni ‘agbe’ lɛ ahe, ejaakɛ Biblia lɛ wie kɛfata he akɛ: “No hewɔ lɛ nyɛkahaa mɔ ko miikojoa nyɛ yɛ niyeli loo ninumɔ loo gbijurɔ loo nyɔŋ hee loo hejɔɔmɔ gbii agbɛfaŋ.” (Kolosebii 2:16) Mɛni hewɔ Nyɔŋmɔ to Mla ni Hejɔɔmɔ Gbi lɛ fata he lɛ shishi?

Bɔfo Paulo ŋma akɛ: “Mla lɛ etsɔ wɔtsɔselɔ kɛmiiya Kristo ŋɔɔ.” Kɛkɛ ni ekɛshi sɛɛ akɛ: “Ni hemɔkɛyeli ba nɛɛ, wɔbɛ tsɔselɔ lɛ shishi dɔŋŋ.” (Galatabii 3:24, 25) Jeee akɛ Nyɔŋmɔ tsake ejwɛŋmɔ, shi moŋ eto Hejɔɔmɔ Gbi lɛ shishi koni ekɛtsɔɔ ewebii lɛ anii kɛyashi be ko akɛ, esa akɛ amɛhe be ni amɛkɛjwɛŋ nibii ni kɔɔ amɛ kɛ Nyɔŋmɔ teŋ wekukpãa lɛ ahe lɛ anɔ. Eyɛ mli akɛ Hejɔɔmɔ Gbi mla lɛ tsu nii kɛyashi be ko moŋ, shi efeɔ be ko ni baaba be mli ni adesai baaná gbɔmɔtsoŋ hewalɛ kpakpa ni amɛ kɛ Nyɔŋmɔ teŋ wekukpãa lɛ baahi jogbaŋŋ kɛya naanɔ lɛ he mfoniri.—Hebribii 4:10; Kpojiemɔ 21:1-4.

Nyɔŋmɔ ni Yɔɔ Suɔmɔ ni Anyɛɔ Akɛ He Fɔ̃ɔ Enɔ

Biblia mli nɔkwɛmɔnii ni wɔsusu he nɛɛ tsɔɔ akɛ Yehowa Nyɔŋmɔ kɛ gbɛtsɔɔmɔi kɛ mlai srɔtoi ha yɛ bei srɔtoi amli. Shi no etsɔɔɔ akɛ etsake ejwɛŋmɔ. Shi moŋ nɔ ni etsɔɔ ji akɛ, etsu ewebii lɛ ahiamɔ nii ahe nii yɛ shihilɛi srɔtoi amli, ni efee nakai yɛ amɛsɛɛnamɔ hewɔ. Nakai nɔŋŋ eji ŋmɛnɛ hu.

Akɛni Yehowa tsakeee eshishitoo mlai lɛ hewɔ lɛ, be fɛɛ be lɛ wɔbaanyɛ wɔle nɔ ni kɛ́ wɔfee lɛ ebaasa ehiɛ. Kɛfata he lɛ, wɔbaanyɛ wɔná nɔmimaa akɛ nibii fɛɛ ni Nyɔŋmɔ ewo he shi lɛ baaba mli anɔkwale. Yehowa kɛɛ akɛ: “Nibii fɛɛ ni sa mihiɛ lɛ mafee . . . Mito miyiŋ, ni mafee hu!”—Yesaia 46:10, 11.—w09 06/01-E.

[Wiemɔ ni akɔ ni akɛmiitsu nii ni yɔɔ baafa 19]

Nyɔŋmɔ tsakeee shishitoo mlai ni kudɔɔ esuɔmɔ kɛ ejalɛsaneyeli lɛ

[Wiemɔ ni akɔ ni akɛmiitsu nii ni yɔɔ baafa 20]

Paulo tsɔɔ mli akɛ, kɛ́ be shwie mli lɛ, naakpɛɛ duromɔ keenii lɛ ‘asɛɛ baafo’

[Wiemɔ ni akɔ ni akɛmiitsu nii ni yɔɔ baafa 21]

Gbalashihilɛ ji naanɔ wekukpãa ni mɛi enyɔ boteɔ mli