Be Jiwheyẹwhe Nọ Diọ Linlẹn Wẹ Ya?

BIBLU dọ gando Jiwheyẹwhe go dọmọ: “Mẹhe dè didiọ de ma te, kavi oyẹ̀ lilẹpe tọn.” Podọ Jiwheyẹwhe lọsu zinnudeji dọ: “Yẹn OKLUNỌ lọ ma diọ.” (Jakobu 1:17; Malaki 3:6) Lehe Jehovah Jiwheyẹwhe gbọnvo na mẹhe e nọ vẹawu nado hẹn homẹhun bo ma sọgan yin jidedego lẹ na yé nọ to linlẹn diọ to whepoponu wutu do sọ!

Ṣigba Biblu hiatọ delẹ nọ kanse yede eyin Jiwheyẹwhe ma ko diọ linlẹn. Di apajlẹ, to ojlẹ de mẹ wayi Jehovah Jiwheyẹwhe na huhlọn Klistiani delẹ nado wà azọ́njiawu, ṣigba e masọ to mọwà todin ba. To hohowhenu, Jiwheyẹwhe jotẹnna yọnnu-bibẹpli, ṣigba e masọ na dotẹnmẹ enẹ ba. To Osẹ́n Mose tọn glọ, Jehovah biọ dọ omẹ etọn lẹ ni nọ yìn Gbọjẹzan, ṣigba enẹ masọ yin nubiọtomẹsi de to egbehe ba. Be ehelẹ ma dohia dọ Jiwheyẹwhe ko diọ ya?

Tintan whẹ́, mí sọgan kudeji dọ Jiwheyẹwhe ma nọ diọ nujinọtedo etọn lẹ gando owanyi po whẹdida dodo po go gbede. Podọ “lẹndai madopodo” etọn nado dona gbẹtọvi lẹ gbọn Ahọluduta etọn gblamẹ ma ko diọ. (Efesunu lẹ 3:11) Ṣigba, kẹdẹdile hiẹ sọgan diọ aliho he mẹ a nọ yinuwa hẹ mẹhe hẹn we jẹflumẹ whlasusu de te do, Jehovah lọsu nọ diọada sọgbe hẹ ninọmẹ lẹ.

Jiwheyẹwhe sọ nọ diọ anademẹ he e nọ na omẹ etọn lẹ sọgbe hẹ ninọmẹ po nuhudo yetọn lẹ po. Ehe ma dona paṣa mí. Di apajlẹ, mí ni dọ dọ mẹhe to anadena saditọ lẹ mọ owùnu de hlan nukọn, etẹwẹ a lẹndọ e na wà? Ayihaawe ma tin dọ e na deanana saditọ lọ lẹ gbọn aliho devo, fie owù ma te. Ṣigba, be enẹ zẹẹmẹdo dọ anademẹtọ lọ diọ linlẹn gando fie yé jei lọ go wẹ ya? Paali! Enẹwutu, mì gbọ mí ni gbadopọnna apajlẹ atọ̀n he yin nùdego wayi lọ lẹ, he nọ ze mẹdelẹ do bẹwlu mẹ.

Naegbọn Azọ́njiawu lẹ Doalọte?

Naegbọn Jiwheyẹwhe na huhlọn Klistiani owhe kanweko tintan tọn delẹ nado wà azọ́njiawu? Vlavo hiẹ na flindọ to whenue Islaeli yin akọta dide Jiwheyẹwhe tọn, Jiwheyẹwhe nọ saba dohia gbọn azọ́njiawu lẹ dali dọ emi tin po yé po. Gbọn Mose gblamẹ, Jiwheyẹwhe do huhlọn jiawu etọn hia to whenuena e tún Islaelivi lẹ dote sọn Egipti bo deanana yé gbọn zungbo mẹ yì Aigba Pagbe tọn ji. E blawu dọ, yé gboawupo whlasusu nado do yise hia. To godo mẹ, whenue Jehovah gbẹ́ Islaeli dai bo do agun Klistiani tọn ai, e na huhlọn apọsteli lẹ po mẹdevo lẹ po nado wà azọ́njiawu. Di apajlẹ, apọsteli Pita po Johanu po hẹn dawe he yin jiji taidi sẹkunọ de jẹgangan, podọ Paulu hẹn dawe he ko kú de gọwá ogbẹ̀. (Owalọ lẹ 3:2-8; 20:9-11) Azọ́njiawu he yé wà lẹ zọ́n bọ agun Klistiani tọn yin didoai to fisusu. To whelọnu lo, naegbọn azọ́njiawu lẹ doalọte?

Apọsteli Paulu na gblọndo gbọn apajlẹ de yiyizan dali dọmọ: “Whenuena yẹn yin yọpọ, yẹn nọ dọho di yọpọ de, yẹn nọ tunwun di yọpọ, yẹn nọ lẹnnu di yọpọ; ṣigba whenuena yẹn lẹzun sunnu, yẹn jo yọpọnu lẹpo dai.” (1 Kọlintinu lẹ 13:11) Mẹjitọ lẹ nọ diọ aliho he mẹ yé nọ yinuwa hẹ ovi yetọn te whenue ovi lọ whẹ́n mẹho, mọdopolọ Jehovah diọ aliho he mẹ e nọ yinuwa hẹ agun Klistiani tọn te whenue agun lọ masọ yin “yọpọ de” ba. Apọsteli Paulu basi zẹẹmẹ dọ nunina jiawu lẹ taidi jonọgbè dido kavi dọdai didọ na “zun ovọ́” kavi busẹ.—1 Kọlintinu lẹ 13:8.

Naegbọn Jiwheyẹwhe Jotẹnna Yọnnu-Bibẹpli?

Jesu dohia dọ Jiwheyẹwhe ze nujinọtedo he na deanana alọwle dai whenue E dọna Adam po  Evi po dọmọ: ‘Sunnu na jo otọ́ po onọ̀ etọn po do, bo na sẹbọdo asi etọn go: yé omẹ awe lẹ nasọ lẹzun agbasalan dopo.’ (Matiu 19:5) Alọwle dona yin kanṣiṣa tẹgbẹ tọn de to omẹ awe ṣẹnṣẹn. Ṣigba, yọnnu-bibẹpli ko lẹzun aṣa to ojlẹ he mẹ Jiwheyẹwhe basi titona Islaelivi lẹ taidi akọta bo na yé Osẹ́n lọ. Dile etlẹ yindọ Jiwheyẹwhe ma ze aṣa yọnnu-bibẹpli tọn dai kavi nọgodona ẹn, e wleawuna osẹ́n he na deanana ẹn lẹ. To whenue agun Klistiani tọn yin didoai, Ohó Jiwheyẹwhe tọn jẹagọdo aṣa yọnnu-bibẹpli tọn to aliho he họnwun mẹ.—1 Timoti 3:2.

Jehovah Jiwheyẹwhe nọ jotẹnna onú delẹ kakajẹ whenue ojlẹ sọ nado diọ yé. (Lomunu lẹ 9:22-24) Jesu dohia dọ Jehovah “dike na” aṣa alọwle tọn he ma sọgbe lẹ ni tin na ojlẹ gli de na “sinsinyẹn ayiha” Islaelivi lẹ tọn wutu.—Matiu 19:8; Howhinwhẹn lẹ 4:18.

Naegbọn Ojlẹ Gli de Wẹ Tito Gbọjẹzan Tọn Nọ̀ Aimẹ Na?

To whenue Jiwheyẹwhe tún Islaelivi lẹ dote sọn Egipti godo, e degbena yé nado nọ yìn Gbọjẹzan to sẹmẹsẹmẹ. To godo mẹ, e yí gbedide ehe dogọ Osẹ́n akọta lọ tọn. (Eksọdusi 16:22-30; 20:8-10) Apọsteli Paulu basi zẹẹmẹ dọ Jesu yí ede do sanvọ́ bo ‘de Osẹ́n aṣẹ lẹ tọn sẹ̀, ehe tin to ogbedai lẹ mẹ’ bosọ “súnsún yiyialọdowlan osẹ́ndoai tọn sẹ̀.” (Efesunu lẹ 2:15; Kọlọsinu lẹ 2:14) Nuhe yin ‘didesẹ’ bosọ yin ‘súnsúnsún sẹ̀’ lọ bẹ osẹ́n Gbọjẹzan tọn hẹn, na Biblu yidogọ dọmọ: “Enẹwutu mì dike mẹde sọ dawhẹna mì to núdùdù mẹ blo, kavi núnùnù mẹ, kavi gbọn azán hùnwhẹ de tọn dali, kavi osun yọyọ de, kavi gbọjẹzan de dali.” (Kọlọsinu lẹ 2:16) Naegbọn Jiwheyẹwhe do na Osẹ́n he bẹ Gbọjẹzan-yìnyìn hẹn lọ to tintan whenu?

Apọsteli Paulu wlan dọmọ: “Osẹ́n wẹ mẹplọntọ nado hẹn mí wá Klisti dè.” Enẹgodo, e yidogọ dọmọ: “Dinvie na yise ko wá, míwlẹ masọ tin to mẹplọntọ glọ ba gba.” (Galatianu lẹ 3:24, 25) Jiwheyẹwhe yí tito Gbọjẹzan tọn zan taidi awuwledainanu ojlẹ gli tọn de nado plọn omẹ etọn lẹ dọ nujọnu wẹ e yin nado nọ de whenu dovo to gbesisọ mẹ bo lẹnayihamẹpọn do gbigbọnu lẹ ji. Ehe ma dohia dọ e diọ linlẹn gba. Dile etlẹ yindọ ojlẹ gli de wẹ osẹ́n Gbọjẹzan tọn nọ̀ aimẹ na, tito ehe dlẹnalọdo ojlẹ lọ whenue gbẹtọvi lẹ na vò kakadoi sọn nuhahun he yé to pipehẹ to agbasa-liho podọ to gbigbọ-liho lẹpo si.—Heblu lẹ 4:10; Osọhia 21:1-4.

Jiwheyẹwhe Owanyinọ He Go Mí Sọgan Dejido

Apajlẹ Biblu tọn he mí gbadopọnna wayi lẹ dohia dọ Jehovah Jiwheyẹwhe na anademẹ po nudọnamẹ voovo lẹ po sọgbe hẹ ojlẹ dopodopo. Ṣigba enẹ ma zẹẹmẹdo dọ e diọ linlẹn. Kakatimọ, e yinuwa sọgbe hẹ nuhudo omẹ etọn lẹ tọn to ninọmẹ voovo lẹ glọ, podọ e wàmọ na ale yetọn. Nudopolọ wẹ e nọ wà to egbehe ga.

To whenuena e yindọ Jehovah ma nọ diọ nujinọtedo etọn lẹ, mí nọ yọ́n nuhe mí dona wà to whepoponu nado hẹn homẹ etọn hùn. Humọ, mí sọgan kudeji dọ opagbe Jiwheyẹwhe tọn lẹpo na mọ hẹndi. Jehovah dọmọ: “Yẹn nasọ wà ojlo ṣie lẹpo . . . yẹn ko lẹn ẹn dai, yẹn nasọ basi i ga.”—Isaia 46:10, 11.

[Blurb on page 18]

Jiwheyẹwhe ma nọ diọ nujinọtedo etọn lẹ gando owanyi po whẹdida dodo po go gbede

[Blurbon page 19]

Alọwle dona yin kanṣiṣa tẹgbẹ tọn de to omẹ awe ṣẹnṣẹn