Kọ Ọghẹnẹ O Re Nwene Iroro?

EBAIBOL e ta kpahe Ọghẹnẹ nọ: “Ẹrẹriẹ ọ rọ obọ riẹ hẹ, hayo uwoho ekurẹriẹ.” Ọghẹnẹ omariẹ ọ ta ẹme omosasọ nana: “Mẹ ỌNOWO na mẹ rẹ rẹriẹ hẹ.” (Jemis 1:17; Malakae 3:6) Jihova Ọghẹnẹ o wo ohẹriẹ no ahwo nọ i re dhe iroro enwenwene, onọ u re ru ei bẹbẹ re a fi eva họ ae hayo ru ae eva were!

Rekọ o be hai gbe ahwo jọ nọ a bi se Ebaibol na unu sọ Ọghẹnẹ o nwene iroro no. Wọhọ oriruo, evaọ ikpe-udhusoi ọsosuọ, Jihova Ọghẹnẹ ọ kẹ Ileleikristi ogaga nọ a ro ru iruo igbunu, rekọ o gbẹ rrọ ere enẹna ha. Evaọ oke anwae, Ọghẹnẹ ọ kẹ uvẹ re ọzae o wo vrẹ aye ọvo, rekọ o gbẹ rrọ ere enẹna ha. Evaọ Uzi nọ Jihova ọ rọ kẹ emọ Izrẹl, ọ ta kẹ ae nọ a koko Ẹdijala, rekọ o gbẹ rrọ ere enẹna ha. Kọ onana u gbe dhesẹ nọ Ọghẹnẹ o nwene no?

Orọ ọsosuọ, o rẹ sai mu omai ẹro inọ Ọghẹnẹ o re nwene itee uvioziẹ gbe uyoyou riẹ hẹ. Ofariẹ, “ẹjiroro ebẹdẹ bẹdẹ” riẹ nọ ọ te rọ rehọ ẹkwoma Uvie riẹ ghale ahwo-akpọ o ri nwene vievie he. (Ahwo Ẹfẹsọs 3:11) Dedena, wọhọ epanọ whọ rẹ sai nwene iroro ra kpahe ohwo nọ o wo ekpehre uruemu yọ o bi si obọ noi hi na, ere ọvona Jihova o re nwene lele uyero nọ o romavia.

Ọghẹnẹ o re je nwene uthubro nọ ọ rẹ kẹ idibo riẹ lele oghẹrẹ uyero nọ o rrọ otọ. Onana u re gbe omai unu hu. Roro kpahe oware nọ ohwo nọ o re su ahwo evaọ ugheriwo o re ru nọ ọ tẹ kparo ruẹ enwoma. Ọ rẹ rehọ ahwo na nya edhere ọfa. Rekọ oyena u dhesẹ hẹ inọ o nwene iroro riẹ, inọ ọ gbẹ be rọ ahwo na te oria na ha. Fikiere, joma kiẹ eware esa nọ ma fodẹ na riwi, enọ i bi ru ahwo jọ roro inọ Ọghẹnẹ o nwene iroro no.

Fikieme Iruo Igbunu I ro Serihọ?

Fikieme Ọghẹnẹ ọ rọ kẹ Ileleikristi ikpe-udhusoi ọsosuọ jọ ogaga iruo igbunu? Ẹsejọhọ whọ kareghẹhọ inọ okenọ Izrẹl ọ jọ orẹwho nọ Ọghẹnẹ ọ salọ, ẹsibuobu ọ rọ iruo igbunu dhesẹ via inọ ọ rrọ kugbe ai. Ọghẹnẹ ọ rọ ẹkwoma Mosis rọ edhere igbunu siwi orẹwho Izrẹl no Ijipti, o te je su ai nya udhude vrẹ ruọ Ẹkwotọ Eyaa na. Rekọ u yoma gaga inọ kẹse kẹse emọ Izrẹl a jẹ hae ghẹmeeyo kẹ Ọghẹnẹ. Nọ Jihova ọ siọ emọ Izrẹl jẹ rehọ ukoko Ileleikristi na mu no, ọ tẹ kẹ ikọ na gbe amọfa ogaga iruo igbunu. Wọhọ oriruo, Pita avọ Jọn ikọ na a siwi ọzae jọ nọ a yẹ ko, yọ Pọl ọ kpare ohwo nọ o whu ziọ uzuazọ. (Iruẹru Ikọ Na 3:2-8; 20:9-11) Iruo igbunu rai u ru nọ ukoko Ileleikristi na o rọ d’owọ muotọ evaọ ekwotọ buobu. Kọ, fikieme iruo igbunu na i ro serihọ?

Pọl ukọ na ọ rọ ẹkwoma ọtadhesẹ ru onana vẹ, ọ ta nọ: “Oke nọ mẹ jọ ọmaha, mẹ jẹ ta ẹme wọhọ ọmaha, mẹ jẹ jiroro wọhọ ọmaha, me wo iroro wọhọ ọmaha, rekọ nọ mẹ te kpako uno na, me te siobọnọ eware emaha na.” (1 Ahwo Kọrint 13:11) Wọhọ epanọ ọyewọ o re nwene obọ evaọ eyerikugbe ọmọ nọ o bi te ohwo no na, ere ọvona Jihova o nwene obọ evaọ oghẹrẹ nọ o bi ro yerikugbe ukoko Ileleikristi na nọ o gbẹ rrọ “ọmaha” ha na. Pọl ukọ na ọ ta inọ iruo igbunu wọhọ okẹ evẹravẹrẹ hayo aruọruẹ i ti “serihọ.”—1 Ahwo Kọrint 13:8.

 Fikieme Ọghẹnẹ Ọ jẹ Kẹ Uvẹ re Ọzae O Wo Vrẹ Aye Ọvo?

Jesu ọ ta nọ Ọghẹnẹ o fi utee họ kẹ ọruẹrẹfihotọ orọo nọ Ọghẹnẹ ọ ta kẹ imava-orọo ọsosuọ na nọ: ‘Ọzae ọ [rẹ] se ọsẹ gbe oni riẹ ba o ve [kuomagbe] aye riẹ, ai ivẹ na a vẹ jọ uwo ovo.’ (Matiu 19:5) Ọghẹnẹ o wo rie họ iroro inọ orọo o rẹ jọ oware ibẹdẹ bẹdẹ evaọ udevie imava. Rekọ, evaọ okenọ Ọghẹnẹ o ro koko emọ Izrẹl họ wọhọ orẹwho jẹ kẹ ae Uzi na, yọ uruemu eyae ibuobu iwo o dotọ fia no. Fikiere, dede nọ Ọghẹnẹ ọye ọ tuọ ọruẹrẹfihotọ eyae ibuobu iwo họ họ, ọ kẹ izi nọ e jẹ kpọ onana. Rekinọ a rehọ ukoko Ileleikristi na mu no, Ọghẹnẹ ọ tẹ whaha orọo eyae ibuobu iwo.—1 Timoti 3:2.

Jihova Ọghẹnẹ ọ rẹ kẹ eware jọ uvẹ bẹsenọ oke u re te nọ ọ rẹ rọ kpọ ae họ. (Rom 9:22-24) Jesu o dhesẹ inọ Jihova ọ kuvẹ oghẹrẹ iruemu jọ nọ i fo ho evaọ orọo “fiki udu ogaga” emọ Izrẹl.—Matiu 19:8; Itẹ 4:18.

Fikieme Ekoko Ẹdijala U ro Serihọ?

Ọghẹnẹ ọ kẹ uzi ekoko Ẹdijala ikoka koka evaọ okenọ o siwi emọ Izrẹl no Ijipti. O te ti ru ei fihọ abọjọ izi orẹwho na. (Ọnyano 16:22-30; 20:8-10) Pọl ukọ na ọ ta inọ Jesu ọ rọ uzuazọ riẹ dhidhe jẹ rọ ere “raha [hayo, voro] . . . uzi ujaje nọ e jọ eva izi nọ a fihọ” na je “voro oware nọ uru omai nọ oma jẹ rọ igbo kẹ uzi.” (Ahwo Ẹfẹsọs 2:15; Ahwo Kọlọsi 2:14) Ekoko Ẹdijala na o rrọ usu izi nọ a voro no na, keme Ebaibol na e ta re inọ: “Wha jọ ohwo ọvo ọ rehọ owhai guẹdhọ fiki emuore gbe edada hayo kpahọ eha-iruo, abugo ọkpokpọ, hayo ẹdijala ha.” (Ahwo Kọlọsi 2:16) O tẹ rrọ ere, fikieme Ọghẹnẹ ọ rọ kẹ Uzi na, onọ o kẹre te ekoko Ẹdijala na?

Pọl ukọ na o kere nọ: “Uzi na oye o jọ owuhrẹ mai re o ruẹse rehọ omai bru Kristi.” O te fibae nọ: “Enẹna nọ [orọwọ] o ze ino na, ma gbẹ rọ obọ owuhrẹ na ofa ha.” (Ahwo Galesha 3:24, 25) Orọnikọ Ọghẹnẹ o nwene iroro riẹ kpahe ẹjiroro uzi Ẹdijala na ha, uzi yena o jọ ọruẹrẹfihotọ ubroke nọ o ro wuhrẹ idibo riẹ inọ u fo re a ru uvẹ nọ a re ro wuhrẹ kpahe Ẹme riẹ ẹsikpobi. Dede nọ uzi Ẹdijala na o jọ ubroke, o riobọ kpohọ okenọ ahwo-akpọ a ti ro wo eriosehọ no oghẹrẹ ebẹbẹ kpobi evaọ obaro.—Ahwo Hibru 4:10; Eviavia 21:1-4.

Ọghẹnẹ Oyoyou nọ A re Fi Eva Họ

Iriruo Ebaibol nọ ma ta ẹme te no na i dhesẹ inọ Jihova Ọghẹnẹ ọ kẹ ekpọvio gbe ithubro sa-sa evaọ etoke sa-sa. Rekọ onana u dhesẹ nọ o nwene iroro riẹ hẹ. Ukpoye, ọ jẹ rọ ere jowọ lele ẹgwọlọ idibo riẹ evaọ otọ uyero sa-sa, yọ onana o jọ rọkẹ erere rai. Epọvo na o bi ru nẹnẹ re.

Fikinọ Jihova o re nwene itee riẹ hẹ, ma rẹ sae riẹ oware nọ ma re ru ro ru ei eva were ẹsikpobi. U te no ere no, o rẹ sai mu omai ẹro inọ eware kpobi nọ Ọghẹnẹ ọ ya eyaa rai e te seba erugba ha. Jihova ọ ta nọ: “Me re ru ẹjiroro mẹ gba . . . Mẹ jẹ iroro na no, me reti ru ei.”—Aizaya 46:10, 11.

[Ẹme nọ a fi ẹgba họ nọ ọ rrọ ẹwẹ-obe avọ 18]

Ọghẹnẹ o re nwene itee uvioziẹ gbe uyoyou riẹ hẹ

[Ẹme nọ a fi ẹgba họ nọ ọ rrọ ẹwẹ-obe avọ 19]

Orọo o rẹ jọ oware ibẹdẹ bẹdẹ evaọ udevie imava