Nzambi utu ukudimuka anyi?

BIBLE udi wamba bua Nzambi ne: ‘Kudiye kakuena dikudimuka anyi mundidimbi wa tshintu tshidi tshinyunguluka.’ Ne Nzambi udi utujadikila ne: “Meme Yehowa tshitu ngakudimuka.” (Yakobo 1:17; Malaki 3:6) Yehowa Nzambi mmushilangane ne bantu ba malu makole ne batudi katuyi mua kueyemena bualu bobu batu bashintuluka misangu yonso.

Kadi kudi bamue babadi ba Bible batu badiebeja bikala Nzambi utu ukudimuka. Tshilejilu, kuvua tshikondo tshivua Yehowa Nzambi mupeshe bena Kristo bukole bua kuenza bishima, kadi katshiena wenza nanku lelu to. Kale, Nzambi uvua witabila bantu bua kusela bakaji ba bungi, kadi lelu mmubenge. Mu mikenji ivua Yehowa mupeshe Mose, uvua mubelele mukenji wa kuenza Nsabatu, kadi lelu kautshienaku. Malu onso aa kaenaku aleja ne: Nzambi mmushintuluke anyi?

Tshia kumpala tumanye ne: Nzambi katu muanji kushintulula mikenji yende ya dinanga ne buakane to. Kabidi, bua “dipangadika diende dia kashidi” dia kubenesha bantu ku diambuluisha dia Bukalenge buende kadiena mua kushintuluka nansha kakese. (Efeso 3:11, MMM) Anu bu muudi mua kushintulula lungenyi luebe bua muntu kampanda udi ne bikadilu bitu kabiyi bikusankisha, Yehowa udi ushintuluka pende bilondeshile mudi malu ashintuluka.

Nzambi utu kabidi ushintulula mikenji idiye muelele bantu bende bilondeshile nsombelu udibu nende ne majinga abu. Kabitukemeshi to. Tangila tshitu muntu udi mumanye mua kulombola bakuabu mua kuenza yeye mumone njiwu kumpala. Udi mua kuambila bantu badiye nabu bua kuyila njila mukuabu ntanta mule ne  muaba udi njiwu. Abi kabiena bisua kumvuija ne: mmushintulule lungenyi bua kubenga kuya kabidi kuvuabu baya to. Ki mmuomu anyi? Nanku, tuanji tukonkononayi bilejilu bisatu bituvua baleje bidi bitatshisha bantu bakuabu abi.

Bua tshinyi bishima biakashikila?

Bua tshinyi Nzambi uvua mupeshe bamue bena Kristo ba kumpala bukole bua kuenza bishima? Umanye ne: patshivua bena Isalele tshisamba tshisungula tshia Nzambi, uvua utamba kuleja muvuaye nabu ku diambulusha dia bishima. Nzambi wakaleja bukole buende bua dikema kupitshila kudi Mose pa kupatula bena Isalele mu Ejipitu ne kubalombola mu tshipela batangile mu buloba bulaya. Bia dibungama, misangu ne misangu bena Isalele kabavua ne ditabuja dikole kudiye to. Pakabenga Yehowa tshisamba tshia Isalele ne kujadika tshisumbu tshia bena Kristo, wakapesha bapostolo ne bantu bakuabu bukole bua kuenza bishima. Tshilejilu, mupostolo Petelo ne Yone bakondapa muntu mukuabu uvua ne bulema bua ku tshilelelu, ne Paulo pende wakabisha muntu ku lufu. (Bienzedi 3:2-8; 20:9-11) Bishima bivuabu benza biakambuluisha bua kujadika buena Kristo mu matunga a bungi. Kadi, bua tshinyi bishima biakashikila?

Mupostolo Paulo wakumvuija bualu ebu kupitshila ku tshilejilu etshi ne: ‘Pangakadi muana, ngakadi ngakula bu muana, ngakadi ngela meji bu muana, ngakadi njingulula malu bu muana; katataka pangakulua muntu mukole, ngakulekela malu a buana.’ (1 Kolinto 13:11) Anu mutu baledi benzela bana batekete malu bishilangane ne bakulumpe, ke muvua Yehowa muenzele tshisumbu tshia bena Kristo malu pavuatshi katshitshiyi kabidi bu “muana.” Mupostolo Paulo wakumvuija ne: mapa a kuenza malu mu bishima bu mudi kuakula mu miakulu anyi kumanyisha malu avua ne bua ‘kushikila.’​—1 Kolinto 13:8.

Bua tshinyi bavua babanyishile bua kusela bakaji ba bungi?

Yezu wakaleja muvua Nzambi muteke mukenji wa kulonda bua kuselangana pakambilaye Adama ne Eva ne: ‘Bua bualu ebu mulume neashiye tatu wende ne baba wende, nealamate kudi mukaji wende; bubidi buabu nebalue mubidi umue.’ (Matayo 19:5) Dibaka divua ne bua kuikala tshisuikidi tshia kashidi bua bantu babidi. Kadi, pakalua Nzambi kulongolola bena Isalele bu tshisamba ne kubelela mikenji yende, tshilele tshia kusela bakaji ba bungi tshikavua tshimane kutangalaka. Nansha nanku, ki Nzambi uvua mubambile bua kusela bakaji ba bungi to, kadi wakela mikenji bua tshienzeke mu bulongame. Pakenzabu tshisumbu tshia bena Kristo, Dîyi dia Nzambi divua dikandika disela bakaji ba bungi.​—1 Timote 3:2.

Yehowa Nzambi uvua mulekele amue malu enzeka too pavua tshikondo tshia kualongolola ne bua kukumbana. (Lomo 9:22-24) Yezu wakaleja ne: Yehowa ‘wakitabuja’ bua tshikondo kampanda mabaka avua kaayi makane bua “bukole bua mitshima” ya bena Isalele.​—Matayo 19:8; Nsumuinu 4:18.

Bua tshinyi mukenji wa Nsabatu uvua wa tshitupa tshîpi?

Nzambi wakambila bena Isalele bua kuenza Nsabatu lumingu luonso panyima pa yeye mumane  kubapatula mu Ejipitu. Pashishe, yeye kutshivuija mukenji. (Ekesode 16:22-30; 20:8-10) Mupostolo Paulo wakumvuija ne: Yezu wakadifila bu mulambu ne ‘kushipa mêyi ne mikandu bia bena Yuda’ ne ‘kukupulaye dibanda diakatufundilabu bua mikenji.’ (Efeso 2:15, MMM; Kolosai 2:14) Mu bivuabu ‘bashipe’ ne ‘bakupule’ muvua mukenji wa Nsabatu, bualu Bible udi wamba ne: ‘Nunku muntu kanulumbuluishi bualu bua biakudia, anyi bua bia kunua, anyi bua dituku dia disanka dia bidia, anyi bua dituku diabala ngondo, anyi bua dituku dia Lumingu lua Bayuda.’ (Kolosai 2:16) Kadi, bua tshinyi Nzambi wakandianjila kuelela bena Isalele mikenji kumpala, too ne wa Nsabatu?

Mupostolo Paulo wakafunda ne: ‘Mikenji yakalua ndeji wetu wa kutufikisha kudi Kristo.’ Pashishe kusakidilaye ne: ‘Kadi bualu bua ditabuja diakumana kulua, katuena mu bulombodi bua ndeji kabidi.’ (Galatia 3:24, 25) Pamutu pa kushintuluka Nzambi uvua muenze mudimu ne Nsabatu bua tshitupa tshîpi ne tshipatshila tshia kulongesha bantu bende bua bikale ne dîba dia kuelangana meji a malu a Nzambi ku musangu ne ku musangu. Nansha muvua mukenji wa Nsabatu wa tshitupa tshîpi, uvua uleja tshikondo tshialua bantu kubuela mu dikisha dia ku mubidi, bikale ne malanda mimpe ne Nzambi.​—Ebelu 4:10; Buakabuluibua 21:1-4.

Nzambi wa dinanga ne wa kueyemena

Bilejilu bia mu Bible bituafumu ku diumvuija kulu eku bidi bileja ne: Yehowa Nzambi wakafila mêyi ne mikenji bia kulonda mu bikondo bishilashilangane. Kadi abi kabiena bisua kumvuija ne: mmushintulule mapangadika ende nansha. Kadi, uvua ukumbajila bantu bende majinga abu bilondeshile nsombelu uvuabu nende, ne uvua wenza nanku bua diakalenga diabu. Ke mudiye wenza kabidi nanku lelu.

Bu mudi Yehowa kayi ushintulula mikenji yende, tudi mua kumanya tshitudi ne bua kuenza bua kumusankisha. Kupita bionso, tuikale bashindike ne: malu onso adi Nzambi mulaye neakumbane. Yehowa udi wamba ne: ‘Bualu bungakadipangidijila bua kuenza nebuenjibue ngakadipangidijila bualu, nembuenze.’​—Yeshaya 46:10, 11.

[Lungenyi lunene lua mu dibeji 19]

Nzambi katu ushintulula mikenji yende ya dinanga ne buakane to

[Lungenyi lunene lua mu dibeji 20]

Paulo wakumvuija ne: kuvua tshikondo tshivua mapa a kuenza bishima ne bua ‘kushikila’

[Lungenyi lunene lua mu dibeji 21]

Dibaka divua ne bua kuikala tshisuikidi tshia kashidi bua bantu babidi