Pathianin A Rilru A Thlak Em?

PATHIAN chungchângah Bible chuan: “Amahah chuan danglamna leh herna hlim rêng rêng a awm thei lo,” a ti a. Amah Pathian ngei pawhin: “Kei Lalpa hi ka danglam si lo,” tiin a nemnghet bawk a ni. (Jakoba 1:17; Malakia 3:6) Tihlâwm harsa tak leh rilru an thlâk reng avânga rin harsa takte lakah chuan Pathian Jehova chu a va danglam tak êm!

Mahse, Bible chhiartu ṭhenkhat chuan Pathianin a rilru a thlâk niin an hria a. Entîr nân, tûn hma chuan Pathian Jehova’n Kristiante chu thilmak tihtheihna a pe a; mahse, tûnah chuan a pe tawh lo va. Hmân lai chuan Pathianin nupui pakhat aia tam neih chu a ngaihhnathiam a; mahse, tûnah chuan a ngaihhnathiam tawh lo. Mosia Dân hnuaiah khân, Pathian Jehova chuan Sabbath serh tûrin a phût a; mahse, tûnah chuan a phût tawh lo bawk. Hêng thilte hi Pathian a inthlâk danglam tih târ lanna a ni em?

A hmasa berin, Pathian chuan hmangaihna leh rorêl dikna chungchânga a tehna chu a thlâk ngai lo tih kan chiang thei a. Chu bâkah, a Lalram hmanga mihringte malsâwm tûra a “chatuana remruat,” a nih loh leh a chatuan thiltum pawh a thlâk lo bawk. (Ephesi 3:10, 11) Amaherawhchu, a khawsazia avânga tibeidawng ṭhîntu che tuemaw i cheibâwl dân chu i thlâk mai theih ang bawkin, Pathian Jehova pawhin dinhmun inthlâkthleng dân a zirin mite a cheibâwl dân chu a thlâk a ni.

Pathian chuan a mite hnêna a pêk a zirtîrna chu an dinhmun leh an mamawhte a zirin a thlâk danglam bawk a. Chu chu mak kan ti tûr a ni lo. Hmun hmingthang tlawha zinte hruaitu tling takin thil hlauhawm an tawng dâwn tih a hriat huna a tih tûr chu ngaihtuah teh. A mi hruaite chu thil hlauhawm chu hêlpuiin kawng dangah a hruai ang. Mahse, chu chu an kal tumna hmun a thlâk tihna a ni em? Ni lo ve. Chuvâng chuan, mi ṭhenkhatte tibuaitu, kan lo sawi tâk entîrna pathumte kha i lo bih chiang ang u.

 Engvângin Nge Thilmak Tihtheihna A Awm Tawh Loh?

Engvângin nge Pathianin kum zabi khatnaa Kristian ṭhenkhatte hnênah thilmak tihtheihna a pêk? Israelte Pathian hnam thlan an nih khân, anmahni A awmpuizia chu thilmak tihna hmangin a lantîr fo tih i hre ngei ang a. Pathian chuan Mosia hmangin Israelte chu Aigupta aṭanga a hruai chhuahnaah leh thlalêr pal tlanga Ram Tiama a hruainaah a thiltihtheihna nasa tak a hmang a. Mahse, Israelte chuan amah an ringhlel leh ṭhîn chu a pawi hle. A tâwpa Pathian Jehova’n Israel hnam chu hnâwla Kristian kohhran a din tâkah chuan, tirhkohte leh mi dangte chu thilmak tihtheihna a pe hlawm a ni. Entîr nân, tirhkoh Petera leh Johana chuan pian tirh aṭanga ke bai pakhat an tidam a, Paula pawhin mitthi a kaitho bawk. (Tirhkohte 3:2-8; 20:9-11) Chûng an thilmak tihte chuan ram tam takah Kristianna ding nghet tûrin a ṭanpui a ni. Chuti a nih chuan, engvângin nge thilmak tihna chu a tâwp si?

Tirhkoh Paula chuan tehkhin thu hmangin hetiang hian a sawifiah a ni: “Ka naupan laiin naupang ṭawngin ka ṭawng a, naupang hriatin ka hria a, naupang ngaihtuahin ka ngaihtuah ṭhîn; tûna ka lo puitlin hnu hian naupang tih dân chu ka bân tawh,” tiin. (1 Korinth 13:11) Nu leh pate’n an fapa a naupan laia an cheibâwl dân leh a puitlin hnua an cheibâwl dân a inan loh ang bawkin, Kristian kohhran pawh “naupang” a nih lai leh a nih tawh loh hnua Pathian Jehova cheibâwl dân chu a inang lo a ni. Tirhkoh Paula chuan thlarau thilpêk mak takte, ṭawng hriat lohva ṭawng theihna emaw, thu hrilh lâwk theihna emaw chu “tihbân a la ni ang” tih a sawi a ni.—1 Korinth 13:8.

Engvângin Nge Tûn Hmain Nupui Pakhat Aia Tam Neih Phal A Nih?

Isua chuan Pathianin nupa hmasa berte hnêna: “Mipain a nu leh a pa a kalsan ang a, a nupui a vuan ang; tichuan an pahnih chuan tisa pumkhat an lo ni tawh ang,” tia a hrilh khân, inneihna chungchângah tehna A siam tih a târ lang a. (Matthaia 19:5) Inneihna chu  mi pahnih an dam chhûnga phuar khâwmtu a ni tûr a ni a. Mahse, Pathianin Israelte chu hnam pakhat ni tûra a din a, Dân a pêk khân, nupui pakhat aia tam neih chu an lo chîng daih tawh a ni. Chuvâng chuan, nupui pakhat aia tam neih chu Pathian din leh tihtîr ni lo mah se, mumal taka thunun nân dân a pe a ni. Kristian kohhran a din hnuah erawh chuan, Pathian Thu chuan nupui pakhat aia tam neih chu a khap ta hmiah a ni.—1 Timothea 3:1, 2.

Pathian Jehova chuan thil ṭhenkhat chu siam ṭhat hun a tih hma chu a dawh ṭhîn a. (Rom 9:22-24) Isua chuan Pathian Jehova’n inneihna kawnga Israelte chîn dân dik lo tak chu an “thinlung khauh avângin” hun engemawti chhûng chu a dawh a, a “phal” mai a ni tih a târ lang.—Matthaia 19:8; Thufingte 4:18.

Engvângin Nge Sabbath Serh Chu Hun Engemaw Chhûng Atân Chauh A Nih?

Pathian chuan Israelte Aigupta ram ata a chhanchhuah hnu khân chawlhkâr tin Sabbath serh tûrin thu a pe a. A hnuah chuan chu chu an hnam Dân zîngah a telh ta a ni. (Exodus 16:22-30; 20:8-10) Tirhkoh Paula chuan Isua chu inthâwina atân inhlânin, “ani chuan . . . (thiltih tûrahte thupêk dân awm chu) . . . tibovin,” “batna lehkha thupêka ziak . . . chu a thai bo tawh si a,” tiin a sawi a ni. (Ephesi 2:14, 15; Kolossa 2:14) Chûng a ‘tihbo’ leh a “thai bo” te zîngah chuan Sabbath serhna dân pawh a tel a ni, Bible-in: “Chutichuan ei thu-ah emaw, in thu-ah emaw, kût ni thu-ah emaw thla thar thu-ah emaw, chawlhni thu-ah emaw, tuman sawisêl che u suh se,” a tih avângin. (Kolossa 2:16) Chutianga tihbo leh tho tûr si, engvângin nge atîr aṭangin Pathianin Sabbath serhna dân pawh tiama Dân thupêk chu a pêk rêng rêng?

Tirhkoh Paula chuan: “Dân chu Krista hnên lama min kaihruaitu a lo ni a,” tiin a ziak a. “Tûnah rinna a lo thlen hnu hian, kaihruaitu hnuaiah kan awm tawh lo ve,” tiin a ziak zawm a ni. (Galatia 3:24, 25) Pathian chuan a rilru thlâk ahnêkin, mite’n thlarau lam thil ngaihtuah nâna hun an hman ziah a ṭûlzia zirtîr nân Sabbath dân chu hun engemawti chhûng atâna ruahmanna angin a hmang a ni. Chu chu hun engemawti chhûng atân chauh ni mah se, nakina mihringte’n tisa leh thlarau lama chawlhna tluantling an neih hun tûr a entîr lâwk a ni.—Hebrai 4:10; Thu Puan 21:1-4.

Hmangaihna Ngah leh Rin Tlâk Pathian

Bible-a entawn tûr kan ngaihtuah tâkte chuan Pathian Jehova’n hun leh dinhmun a danglam ang zêlin kaihhruaina leh kawhhmuhna hrang hrang a pe ṭhîn tih a târ lang a. Mahse, chu chu Pathianin a rilru a thlâk tihna a ni lo va, dinhmun hrang hrang hnuaia awm a mite chu an mamawh ang zêlin, an tâna ṭha tûrin a chhâng lêt ṭhîn mai a ni zâwk. Tûn laiah pawh chutiang tho chu a ni.

Pathian Jehova chuan a tehnate a thlâk ngai loh avângin amah tihlâwm nâna kan tih tûr chu englai pawhin kan hre thei a ni. Chu bâkah, Pathian thutiam zawng zawngte chu a lo thleng dik vek ang tih kan chiang thei bawk. Pathian Jehova chuan: “Ka duhzâwng zawng zawng chu ka ti vek ang, . . . ka tum tawh a, ka ti bawk ang,” a ti a ni.—Isaia 46:10, 11. (w09 6/1)

[Phêk 30-naa thu lâk chhuah]

Pathian chuan hmangaihna leh rorêl dikna chungchânga a tehnate chu a thlâk ngai lo

[Phêk 30-naa thu lâk chhuah]

Paula chuan thlarau thilpêk mak takte chu “tihbân a la ni ang” tih a sawi

[Phêk 31-naa thu lâk chhuah]

Inneihna chu mi pahnih an dam chhûnga phuar khâwmtu a ni tûr a ni