¿Dios imaynatachus yuyasqanta tikranchu?

DIOSQA mana runasjinachu, imaynatachus yuyasqanta pisi tiempoman tikran. Pay kikin nirqa: “Noqa Tata Diosqa kasqay jinallapuni kani”, nispa. Chantá Bibliaqa Diosmanta parlaspa nin: “Payqa mana uj jinayanchu, nitaj maychus kasqanmanta waj jinaman tukunchu”, nispa (Malaquías 3:6; Santiago 1:17). Chayrayku Diosta kusichinanchikpaq imatachus ruwananchikta sutʼita yachanchik, nisqasninpitaq atienekuyta atinchik.

Chaywanpis Bibliata ñawirispaqa, ichá wakinkuna, Dios imaynatachus yuyasqanta tikrasqanta ninkuman. Imaraykuchus Diosqa manaña ñawpaqtajina kamachisninniqta milagrosta ruwanchu, nitaq unay tiempo Israel llaqtapijina kamachisninta achkha warmisniyuq kanankuta saqinñachu, nillataq samarikuna pʼunchayta waqaychanankutapis kamachinñachu. Chaywanpis kayqa, mana ninayanchu Dios imaynatachus yuyasqanta tikrasqanta. Qhawarina imaraykuchus.

Qallarinapaq, Diosqa chiqan kaqmanjina, munakuywantaq Bibliapi yuyaychawasqanchiktaqa mana tikranchu. Chantá “wiñay munayninman jina” chiqa sunqu runasta bendecinanpaq Reinonta apamuyta munasqantapis, manallataq tikranchu (Efesios 3:11). Chaywanpis Payqa wakin kuti imatapis wakjinamanta ruwan. Chaytaq mana tʼukunapaqchu, imaraykuchus ñuqanchikpis wakin kuti imatapis wakjinamanta ruwanchik.

Chantapis Jehovaqa, wakin kuti necesitasqanchikmanjina wak kamachiykunata churapuwanchik. Sutʼincharinapaq; turistasta pusaykachaq runapi tʼukurina. Payqa aswan jaqaypi ñan mana allinchu kasqanta yachaytawan, wak ñanta chay runasta pusanqa, ¿icharí? Chaywanpis, ¿chay ninayanchu maymanchus chay runasta pusachkasqanta manaña chayman pusananta? Mana. Jinallatataq Diospis llaqtanwan ruwarqa. Imatachus ruwasqanta jukmanta juk ukhuncharinachik.

¿Imaraykutaq Dios manaña kamachisninman atiyta qunchu milagrosta ruwanankupaq?

Ñawpaqtaqa kay wak tapuymanraq kutichinachik: ¿imaraykutaq Jehová Dios ñawpa cristianosman, milagrosta ruwanankupaq atiyta qurqa? Paykunata allinpaq qhawasqanta rikuchinanpaq. Jinallatataq israelitaspa tiemponkupipis ruwarqa. Diosqa Moisesniqta Egiptomanta paykunata kacharichirqa, chʼin pampaspitaq pusaykacharqa, Sumaq Jallpʼaman chayanankukamataq mayta jarkʼarqa. Chaywanpis paykunaqa, achkha kutispi Diospi mana creesqankuta rikuchirqanku. Chayrayku Jehovaqa paykunata qhisachaspa wak nacionta jatarichirqa, nisunman cristiana qutuchakuyta. Chaypachaqa, Dios apostolesman, discipulosman ima milagrosta ruwanankupaq atiyta qurqa. Chayraykutaq apóstol Pedrowan Juanwanqa, juk suchu runata sanoyachirqanku, apóstol Pablopis juk runata kawsarichirqa (Hechos 3:2-8; 20:9-11). Kay milagrosta ruwasqankuqa, achkha  runasta yanaparqa cristianosman tukunankupaq. Chaywanpis, ¿imaraykutaq Dios manaña kamachisninniqta milagrosta ruwanchu?

Apóstol Pabloqa, juk kikinchaywan kayta sutʼincharqa, nirqataq: “Noqaqa wawallaraj kashaspa, wawa jina parlaj kani, wawa jina yuyaj kani, wawa jinataj imatapis unanchaj kani. Jatunña kaspatajrí, wawa jina ruwanasta saqeporqani”, nispa (1 Corintios 13:11). Imaynatachus juk tata wawanta wiñasqanmanjina wakjinamanta yanapan, jinallatataq Jehovapis, cristiana qutuchakuyta, astawan wiñasqanmanjina jukjinamanta yanaparqa. Chayrayku Pablo sutʼinchasqanmanjina, milagrosta ruwanapaq atiyqa ‘tukukapunan karqa’ (1 Corintios 13:8).

¿Imaraykutaq unay tiempopi Dios kamachisninta achkha warmisniyuq kanankuta saqirqa?

Jesusqa, qhariwarmi kaqkunapaq, qallariymantapacha imachus Diospa munaynin kasqanta sutʼincharqa, nirqataq: “Qhareqa tatanta, mamanta saqespa, warminwan khuskachakaponqa. Iskayninkutaj ujllaña kanqanku”, nispa (Mateo 19:5). Rikunchikjina, qhariqa juk warmiyuqlla kanan karqa. Chaywanpis israelitasman Dios Leyninta quchkaptinqa, achkha israelitas achkha warmisniyuqña karqanku. Chayrayku chiqamanta nisunman Diosqa, mana achkha warmisniyuq kanankutachu kamachisqanta, nitaq ajinallatapuni ruwanankutapis. Astawanqa casarasqa warmista, wawasninta ima jarkʼananpaq Leyniqta wakin kamachiykunata churarqa. Astawan qhipamantaq, cristiana qutuchakuy qallarichkaptin Diosqa, Palabranpi juk qhari juk warmiyuqlla kananta kamachirqa (1 Timoteo 3:2).

Biblia nisqanmanjina Jehovaqa, juk chʼampay kananta saqin qhawasqanmanjina maykʼaqchus allinchanan kasqanta aswan allin chaykama (Romanos 9:22-24). Chantá Jesús sutʼinchasqanmanjina Diosqa, israelitasta ‘rumi sunqunkuraykulla’, juk tiempollata achkha warmisniyuq kanankuta ‘saqirqa’ (Mateo 19:8; Proverbios 4:18).

¿Imaraykutaq samarikuna pʼunchayta waqaychay kamachiyta chinkachirqa?

Diosqa, Egiptomanta israelitasta kacharichiytawankama, samarikuna pʼunchayta waqaychanankuta paykunaman kamachirqa, kay kamachiytataq Moisesman ley qusqanpi churallarqataq (Éxodo 16:22-30; 20:8-10). Chaywanpis apóstol Pabloqa, Jesuspa wañuynin “Moisespa kamachisqa leyninta yanqhayachi[sqanta]”, “camachiskapi contranchejpi caj chay escritota borra[sqanta]” ima nirqa (Efesios 2:15; Colosenses 2:14, Mosoj Testamentoj). Samarikuna pʼunchayta waqaychay kamachiypis chinkachisqallataq karqa, chayrayku Pablo nillarqataq: “Ama pipis qankunata juchachachunchu mikhunamanta, ujyanamanta, chayri wata fiestamanta, killa fiestamanta, samarikuna pʼunchaykunamanta ima” (Colosenses 2:16). Jina kaptin, ¿imaraykutaq Jehová Moisesman Leyta qurqa astawan qhipaman chinkachinan kaptin?

Imaraykuchus chay Leyqa, israelitaspa Cristoman ‘pusaykachaqninkujinamin karqa’. Chayrayku Cristo kay Jallpʼapiña kachkaptin manaña juk ‘pusaykachaqta’ necesitarqankuchu (Gálatas 3:24, 25, Dios Parlapawanchej). Chayrayku samarikuna pʼunchayta waqaychay kamachiyta chinkachispaqa, Diosqa imaynatachus yuyasqanta mana tikrachkarqachu, imaraykuchus chay kamachiyqa juk tiempollapaq karqa. Jehovaqa kay kamachiyta israelitasman qurqa chay pʼunchaypi Paypa kamachiykunasninpi astawan tʼukurinankupaq. Astawanpis kay samarikuna pʼunchayqa, astawan qhipaman paraisopi runas mana unquspa, Diosta yupaychaspa imaynatachus kawsakunankuta rikuchirqa (Hebreos 4:10; Apocalipsis 21:1-4).

Jehová Diospi atienekuyta atinchik

Rikunchikjina Jehovaqa, imaynatachus yuyasqanta mana tikranchu. Astawanpis kamachisninpa allinninkuta maskʼaspa, wakin kuti necesitasqankumanjina wak kamachiykunata paykunapaq churapurqa. Jinallatataq kunan tiempopipis ruwan.

Jehovaqa unaymantapacha kikillanpuni kasqanrayku mana kamachiykunasninta tikranchu, chayrayku payta kusichinanchikpaq imatachus ruwananchikta yachanchik. Astawanpis munayninta juntʼananmantapuni mana iskaychakunchikchu imaraykuchus Pay kikin nirqa: “Noqaj wakichisqayqa juntʼakonqapuni. Imatacha munasqayta ruwasaj”, nispa (Isaías 46:10, 11).

[28 paginapi sutʼinchaynin]

Pabloqa, milagrosta ruwanapaq atiy ‘chinkachisqa kananta’ nirqa