¿Piensasqanta Dios cambianchu?

DIOSQA manam runakuna hinachu piensasqanta cambian. Kikinmi nin: “Ñoqa Tayta Diosqa haykapipas hina kaqllam kani”, nispa. Bibliapas ninmi: ‘Diosqa manam cambianchu llantuy hinaqa’, nispa (Malaquias 3:6; Santiago 1:17). Chaymi yachanchik Diospa favorninta chaskinapaq ima ruranamanta, hinaspa promesankunatapas cumplinanmanta.

Ichaqa, Bibliata leespankum wakin runakuna piensanku Dios piensayninta cambiasqanta. Ichapas yuyarinku ñawpaq tiempopi imapas kamachisqanta otaq saqesqantapas. Punta cristianokunapa tiemponpim wakinkunaman Diosqa atiyta qorqa milagrokuna ruranankupaq, Israelpa tiemponpiñataq saqerqa runakuna iskay-kimsa warmiyoq kanankupaq, kamachirqataqmi sabado punchawpi samanankupaqpas. Kunanmi ichaqa cheqap cristianokunaqa manaña rurankuñachu. ¿Chaychu nichwan piensayninta Dios cambiasqanta? Qawasunchikyá.

Puntataqa allintam entiendenanchik Diosqa kuyakuyninpi chaynataq justicianpiqa manam haykapipas cambianchu. Manataqmi Gobiernonwan runakunapaq ima  munasqantapas cambianchu (Efesios 3:11). Ichaqa imapas karuptinmi imayna rurasqanta cambian munayninta rurananpaq. Kayqa manamá hukmanyachiwananchikchu, ñoqanchikpas wakinpiqa chaynam kanchik. Pipas sapa kuti hukmanyachiwaptinchikqa, manañam hina kaqllachu paywanqa kanchik, ¿aw?

Diospas, serviqninkunaman kamachikuy qosqantam cambian tiemponkupi necesitasqankuman hina. Piensarisunchik ñanta reqsichiq runapi. Risqanku ñanpi imapas kasqanta yacharuspanqa, ¿imatam ruranqa? Ninqachá huklaw ñannintaña rinankupaq. ¿Chaywanchu nichkanman risqankuman manaña pusananmanta? Manamá. Chayna kaqllatam Diospas rurarqa rimasqanchik kimsa kaqkunapi. Sapakamamantayá qawasunchik.

¿Imanasqataq milagrokuna chinkarun?

Chaypaqqa kay tapukuyta kutichisun: ¿imanasqam Diosqa punta cristianokunaman atiyta qorqa milagrokunata ruranankupaq? Qorqaqa llaqtan kasqanta runakuna reqsinankupaqmi, israelitakunapa tiemponpi hina. Paykunata librananpaqmi Moisesnintakama Diosqa atiyninta servichikurqa Egiptomanta Prometesqan Allpaman pusananpaq. Ichaqa sapa kuti mana kasukuptinkum, Jehová Diosqa qepancharuspan cristiana congregaciontaña rikurirachirqa. Hinaspanmi Jesuspa wakin qatiqninkunaman atiyta qorqa milagrokunata ruranankupaq. Chaymi apostol Pedrowan Juanpas sanoyachirqaku nacesqanmantapacha suchu runata, Pablopas huk runatam kawsarichirqa (Hechos 3:2-8; 20:9-11). Kayna milagrokunawanmi huk llaqtapi runakunapas cristiano karqaku. Hinaptinqa, ¿imanasqataq kunanqa manaña kanñachu?

Apostol Pablom kay tupachiywan kutichin: “Taksallaraq kaspayqa warma hinam rimarqani, piensarqani, yuyaymanarqani, hatunyaruspaymi ichaqa manaña warma hinañachu rurani”, nispa (1 Corintios 13:11). Imaynam taytapas churinpa wiñasqanman hina portakun, chaynam Diospas karqa cristiana congregacionwan. Chaymi tukuy milagrokuna rurayqa, Pablopa willakusqanman hina ‘manaña kanñachu’ (1 Corintios 13:8).

¿Imanasqataq Diosqa saqerqa runakuna iskay-kimsa warmiyoq kanankuta?

Casado vidapaq Diospa munasqanmantam Jesus nirqa: “Qarim tayta-mamanta saqespa hukllawakunqa warminmanña chaymi iskayninku huk runa hinallaña kanqaku”, nispa (Mateo 19:5). Arí, Diosqa munarqam qaripas otaq warmipas hukllawan casado vidapi kanankuta. Israel llaqtaman Jehová Dios kamachikuyninta qoptinqa, ñam runakunaqa iskay-kimsa warmiyoqkunaña karqaku. Hinaptinqa manam Dioschu chaytaqa rikurichirqa nitaq munarqachu, aswanmi allicharqa. Chaymi Diosqa cristianokunapa tiemponpi kamachirqa manaña chayna kanankupaq (1 Timoteo 3:2).

Bibliam niwanchik allichanan tiempo chayamunankama Dios imatapas saqesqanta (Romanos 9:22-24). Jesuspa nisqanman hinam, Diosqa “permitirqa” iskay-kimsa warmiyoq  kanankupaq ‘rumi sonqo kasqankurayku’ (Mateo 19:8; Proverbios 4:18).

¿Imanasqataq sabado punchawta waqaychayqa chinkarurqa?

Egiptomanta israelitakunata Jehová Dios libraruspanmi, kamachirqa sabado punchawpi samanankupaq, qellqachirqataqmi Moisespa chaskisqan Leypipas (Exodo 16:22-30; 20:8-10). Ichaqa Pablopa nisqanman hinam, Jesuspa wañukusqanwan ‘ñawpaq kamachikuykunaqa [. . .] mana valeqpaqña rikurirurqa’ (Efesios 2:15; Colosenses 2:14). ¿Sabado punchawpi samanapaq kamachikuypas chinkarurqachu? Arí, Pablopas nirqam: “Amayá pipas juzgasunkichikchu [. . .] sabado punchawmantaqa”, nispa (Colosenses 2:16, NM). Hinaptinqa, ¿imanasqataq Jehová Diosqa Moisesman qorqa kamachikuykunata chinkachinan kachkaptinqa?

Pablopa nisqanman hinam, chay Kamachikuykunaqa ‘Cristoman pusaq’ karqa. Cristo chayaramuptinmi ichaqa “manaña” (Galatas 3:24, 25). Hinaptinqa, sabado punchawpi manaña samanapaq nispanqa, manamá Diosqa piensasqantachu cambiachkarqa, chay kamachikuykunaqa huk tiempollapaqmi karqa. Diosqa qorqam yachachisqankunapi yuyaymanay ancha allin kasqanta israelitakunaman yachachinanpaq. Qawachirqataqmi hamuq tiempopi runakuna imaymana ñakarisqankumanta samanankupaq (Hebreos 4:10; Apocalipsis 21:1-4).

Diosninchikqa confianapaqmi

Kay kimsa yachachikuykunaqa qawachiwanchikmi piensasqanta Dios mana cambiasqanta. Aswanmi Jehová Diosqa kamachikuyninkunata qorqa llaqtanpa imayna kasqankuman hina chaynataq ima necesitasqankuman hina. Chaynallataqmi kunanpas.

Jehová Dios mana iskay-kimsa piensasqanraykum, yachachikuyninkunapas mana cambianchu, chaymi yachanchik favorninta haypanapaq ima ruranamanta. Chaymantapas seguropunim kanchik Dios rimasqankunata cumplinanmanta, paymi nirqa: “Tukuy munasqaykunatam rurasaq [. . .]. Tanteasqayta hinam rurasaq”, nispa (Isaias 46:10, 11).

[17 kaq paginapi suti rikuylla kaq willakuy]

Diosqa kuyakuyninpi chaynataq justicianpiqa manam haykapipas cambianchu

[18 kaq paginapi suti rikuylla kaq willakuy]

Pabloqa willakurqam milagrokuna ‘manaña kananmanta’

[19 kaq paginapi suti rikuylla kaq willakuy]

Diosqa munarqam qaripas otaq warmipas hukllawan casado vidapi kanankumanta