Diosqa manan cambianchu

DIOSQA manan runakuna hinachu sapa kutilla ima nisqantapas cambian. Chaymi paypuni nin: “Ñoqaqa Señor Diosmi kani, kaqllapunin kashani”, nispa. Bibliapas khaynatan nin paymanta: “Payqa manan cambianchu, manataqmi llanthu hinachu kuyuykachanpas”, nispa (Malaquías 3:6; Santiago 1:17). Mana cambiaq kasqanraykun yachanchis payta kusichinapaq ima ruwananchista, yachallanchistaqmi ima prometesqantapas hunt’ananta.

Chhaynaña kaqtinpas, wakin runakunaqa “Diosqa cambianmi” nispan ninku Bibliapi wakin textokunata leespanku. Paykunan tapukunku: “¿Imaraykutaq Diosri manaña apostolkunaq tiemponpi hinañachu cristianokunaman atiyninta qon milagrota ruwanankupaq? ¿Imaraykun manaña munanchu ñawpa Israel llaqtapi hina runakuna askha warmiyoq kanankuta? ¿Imaraykun manaña kamachinchu sábado p’unchaypi samanata?” nispa. Chay tapukusqankumantan qatiqninpi yachasunchis.

Diosqa munakuqtaq chanintaq ima chayqa, manan hayk’aqpas mana allin kaqtaqa “allinmi” ninmanchu. Payqa manan ‘wiñay yuyaykusqantapas’ cambianmanchu, chay yuyaykusqanman hinan lliw kasukuq runakunapaq imaymana bendicionkunata chayachimunqa hanaq pacha Gobiernonwan (Efesios 3:11). Chhaynaña kaqtinpas, Jehová Diosqa cambianmanmi wakin ruwayninkunata imachus necesitakusqanman hina. Ñoqanchispas chhaynan kanchis; chayraykun manaña kaqllatachu tratanchis pipas sapa kutilla mana allinkuna ruwaqtaqa.

 Diosqa imatapas serviqninkunata kamachinanpaqqa allintaraqmi qhawarin imaynapichus tarikusqankuta, imatachus necesitasqankutawan. Chayta allinta entiendenanchispaq turistakunata pusaq runamanta rimasun. ¿Imatan pay ruwanman purinanku ñan sinchi millay kasqanta yachaspa? ¿Kutichipunmanchu pusasqan turistakunata? Manan riki. Aswanpas huk ladontachá paykunata pusanman chhaynapi maychus chayanankuman chayanankupaq. Chay runa hinallataqmi Jehová Diospas imachus necesitakusqanman hina wakin kamachikuyninkunata qoran.

¿Imaraykun milagrokunata manaña ruwakunñachu?

¿Imaraykun Jehová Dios ñawpa tiempopi wakin cristianokunaman atiyta qoran milagrokunata ruwanankupaq? Chaywanyá Diosqa rikuchiran cristianokunawan kashasqanta. Moisespa tiemponpipas milagrokunata ruwaspanmi Diosqa rikuchiran Israel runakunawan kashasqanta. Arí, Moiseswanmi paykunata horqoran Egipto llaqtamanta, chaymantataq ch’inneq aqo pampanta pusaran prometesqa hallp’aman. Paykunan ichaqa sapa kutilla mana kasukurankuchu Jehová Diosta, chaymi payqa chay llaqtata saqepuran, hinaspan cristianokunata akllaran llaqtan kananpaq. Chaymantan apostolkunata wakin cristianokunatawan atiyta qoran milagrota ruwanankupaq. Chayraykun apóstol Pedro Juanpiwan huk such’u naceq runata qhaliyachiranku, apóstol Pablopas Diospa atiyninwanmi huk wañusqa runata kawsarichiran (Hechos 3:2-8; 20:9-11). Chhayna milagrokunata rikuspaqa askha runakunachá Cristota qatikuyta qallariranku. Chhaynaqa, ¿imaraykun tukupuran milagrokuna ruway?

Chayta entiendenapaq qhawasunchis apóstol Pabloq nisqanta, paymi niran: “Huch’uyllaraq kashaspayqa wawa hinan rimarqani, yuyaykurqani, unancharqanipas. Takyasqa runaña kaspaymi ichaqa, wawa hina kasqaytaqa saqerqani”, nispa (1 Corintios 13:11). Tayta mamakunaqa manan huch’uy wawankuta hatun wawankutawan kaqllatachu tratanku, chhaynallatataqmi Jehová Diospas llaqtan wiñasqanman hina imatapas kamachin, ruwanpas. Chayraykun manaña cristianokunaman atiyninta qonchu milagrokunata ruwanankupaq, profetizanankupaq, huk simikunapi rimanankupaqpas. Apóstol Pabloq nisqan hina, chay atiykunaqa ‘tukukapuranmi’ (1 Corintios 13:8).

¿Imaraykun Dios mana hark’aranchu askha warmiyoq kanankuta?

Casarakuymanta rimashaspan Jesusqa niran: “Chayraykun runaqa taytantapas mamantapas saqepunqa, hinaspan warminman hukllachaykakapunqa, huk cuerpollataq kapunqaku”, nispa (Mateo 19:5). Chaypi rikusqanchis hina, qallariymantapachan Diosqa munaran runakuna huk warmillayoq kanankuta. Ichaqa maypachachus Jehová Dios Israel runakunata llaqtanpaq akllakuran, Moiseswantaq askha kamachikuykunatapas qoran chayqa, comunñan kasharan askha warmiyoq kayqa. Arí, manan Dioschu chay costumbretaqa qallarichiran, chhaynaña kaqtinpas wakin kamachikuykunatan qoran chaypaq hina. Maypachachus cristianokunata llaqtanpaq akllaqtinmi ichaqa, sut’ita kamachiran ch’ulla warmillayoq kanankuta (1 Timoteo 3:2).

Bibliaq nisqan hina, Jehová Diosqa tiempollanpin allichan imapas allichana kaqtaqa (Romanos 9:22-24). Payqa Israel runakuna “rumi sonqo” kasqankuraykus pisi tiempollapaq ‘saqesqa’ askha warmiyoq kanankupaq, chaytan Jesús willaran (Mateo 19:8; Proverbios 4:18).

 ¿Imaraykun samana p’unchay tukukapuran?

Egipto llaqtamanta Israel runakunata horqomusqan qhepamanmi Diosqa qallarichiran samana p’unchayta, chaymantataq Kamachikuy Simipi qelqachiran (Éxodo 16:22-30; 20:8-10). Ichaqa manan wiñaypaqchu chayqa kanan karan, chaymi apóstol Pablo niran: ‘Kamachikuy qelqapi kamachikuykunatan Cristoqa pay kikin wañuspa p’uchukachipurqan”, nispa (Efesios 2:15; Colosenses 2:14). Chay kamachikuykuna ukhupin tarikuran sábado p’unchaypi samanapaq kamachikuypas, chayraykun apóstol Pablo nillarantaq: “Ama pipas qankunata huchachachunchu mikhusqaykichismanta, ukyasqaykichismanta, fiesta p’unchaykunamanta, mosoq killa fiestamanta, samana p’unchaykunamantapas”, nispa (Colosenses 2:16). Chhaynaqa, ¿imaraykutaq Diosri Israel runakunaman Kamachikuy Simita qoran?

Chayta yachananchispaq qhawasunchis apóstol Pabloq nisqanta, paymi niran: “Kamachikuy simiqa Cristoman pusawananchispaq wawata hina uywawaqninchismi karqan”, nispa. Chaypi rikusqanchis hina, Cristoq hamunankamallan Kamachikuy Simiqa kanan karan (Gálatas 3:24, 25). Samana p’unchaymanta kamachikuypas manan wiñaypaqchu kanan karan, chayraykun Jehová Diosqa tiempollanpi chayta tukuchipuran. Chhaynaqa, ¿imaraykun Dios samana p’unchayta churaran? Chaywanyá Israel runakunata yachachiran tiempota t’aqaspa paypa yachachikuyninkunapi yuyaymananankupaq. Hinaspapas chay samana p’unchaywanmi Diosqa rikuchiran hamuq tiempopi runakuna tukuy imaymana mana allinkunamanta samanankuta (Hebreos 4:10; Apocalipsis 21:1-4).

Diosqa confianapaq hinan

Kaypi yachasqanchis hina Diosqa manan cambiaranchu yuyaykusqantaqa. Aswanmi serviqninkuna imaynapichus tarikusqankuman hina kamachikuyninkunata qoran, chaytaqa ruwaran paykunaq allinninkupaqmi. Kay tiempopipas chaytan Diosqa ruwashan.

Jehová Diosqa manataq cambianchu chayqa, yachashallasunpunin sonqonta kusichinapaq ima ruwananchista. Chaymantapas allintan yachanchis Diosqa llapa promesankunata hunt’ananta, pay kikinmi prometewanchis: “Tukuy ima munasqaytan ruwasaq [...], yuyaykusqayta hinan hunt’asaq”, nispa (Isaías 46:10, 11).

[17 paginapi willakuy]

Diosqa manan hayk’aqpas mana allin kaqtaqa “allinmi” ninmanchu

[18 paginapi willakuy]

Apóstol Pabloqa willaranmi milagrokuna ‘tukukapunanmanta’

[19 paginapi willakuy]

Qallariymantapachan Diosqa munaran runakuna huk warmillayoq kanankuta