Pe e Suia le Finagalo o le Atua?

O LOO faapea mai le Tusi Paia e faatatau i le Atua: “E lē fesuisuiaʻi pe liliu o ia.” Na faamautinoa mai foʻi e le Atua ina ua ia fetalai: “O aʻu o Ieova, ou te lē liliu.” (Iakopo 1:17; Malaki 3:6) E maʻeu le ese o Ieova le Atua mai i ē e faamaliegatā ma lē faatuatuaina ona o le fesuisuiaʻi o o latou mafaufau i taimi uma!

Peitaʻi, ua taumānatu nisi tagata faitau o le Tusi Paia pe faamata na sui le finagalo o le Atua. O se faaaʻoaʻoga, na iai le taimi na tuu atu ai e le Atua le mana i Kerisiano e faia ai vavega, ae e na te lē o toe faia faapea. I aso anamua, sa faataga e le Atua le tele o avā, ae e na te lē o toe faatagaina lenā faiga. E tusa ai ma le Tulafono a Mose, sa manaʻomia e Ieova ona tausia e tagata le Sapati, ae e na te lē o toe manaʻomia i le taimi nei. Po o faaalia mai i nei mea e moni na suia le finagalo o le Atua?

Muamua lava, e tatou te mautinoa e lē taitai suia e le Atua ana faatulagaga o lona alofa ma lona faamasinotonu. E oo foʻi i lona “finagalo e faavavau,” o le faamanuiaina lea o tagata e ala i lona Malo, e lē o suia lava. (Efeso 3:11) Peitaʻi, e pei lava ona sui lou faamoemoeina o se tagata ona ua tele taimi o lē taulau i le lua vā, e faapenā foʻi ona sui le finagalo o Ieova pe a suia tulaga o mea.

O loo suia foʻi e le Atua ana faatonuga mo ona tagata e fua i o latou tulaga ma manaʻoga. E lē tatau ona faateʻia i tatou i lea tulaga. Seʻi manatu i le mea e fai e se tagata taʻitaʻi malaga agavaa, pe a ia iloa atu se mea e lamatia ai i le auala. E mautinoa e na te fai i lana ʻaumalaga e lelei pe a ui i se isi ituala e ʻalofia ai lenā  lamatiaga. E tusa ai o lenā gaoioiga, e lē o faapea ua sui lona mafaufau i le mea e agaʻi i ai le malaga, a ea? O lea la, seʻi o tatou auʻiliʻiliina nisi o faaaʻoaʻoga e tolu lea na taʻua i le amataga, e lē o manino i ai nisi.

Aiseā ua Muta ai Vavega?

Aiseā na avatu ai e le Atua le mana faivavega i nisi o Kerisiano i le uluaʻi senituri? Atonu e te manatua le taimi na avea ai Isaraelu ma nuu filifilia o le Atua, sa masani ona faia e le Atua ia vavega e faamaonia ai sa iai o ia ma i latou. E ala atu iā Mose, sa faaaogā e le Atua lona mana e laveaʻi ai Isaraelu mai Aikupito, ma puipuia i latou i le vao ma oo atu ai i le Nuu o le Folafolaga. Peitaʻi, sa faaauau pea ona lē faatuatua tagata Isaraelu iā te ia. Ina ua teena e Ieova Isaraelu ae faavaeina le faapotopotoga Kerisiano, na ia avatu i aposetolo ma nisi le mana e fai ai vavega. O se faaaʻoaʻoga, sa faamālōlō e Peteru ma Ioane se tamāloa na pipili talu ona fanau mai, ma na faatūina e Paulo se tagata na oti. (Galuega 3:2-8; 20:9-11) Ona o na vavega, sa mafai ai ona faatuatua le toʻatele o tagata o isi atunuu i le faa-Kerisiano. Aiseā la ua muta ai vavega?

Sa taʻua e le aposetolo o Paulo e ala i se talafaatusa e faapea: “A o oʻu laʻitiiti, sa ou tautala faatamaitiiti, mafaufau faatamaitiiti, ma manatunatu faatamaitiiti; a o lenei ua ou tagata matua, ua ou lē toe amio faatamaitiiti.” (1 Korinito 13:11) E pei lava ona ese le auala e fai ai e mātua le la tama laʻitiiti pe a oo ina matua, e faapena foʻi ona sui e Ieova le auala e feutagaʻi ai ma le faapotopotoga Kerisiano, talu ai e lē o toe “laʻitiiti.” Na taʻua e le aposetolo o Paulo o nei meaalofa faavavega, e pei o le poto e tautala ai i gagana eseese ma le faia o valoaga, o le a “faalēaogāina lea.”—1 Korinito 13:8.

Aiseā na Faataga ai le Tele o Avā?

Na faailoa mai e Iesu le faatulagaga a le Atua mo le faaipoipoga ina ua Ia fetalai atu i le uluaʻi ulugalii: ‘E tuua e le tane lona tamā ma lona tinā, ma nonofo faatasi ma lana avā, ona avea ai lea o i laʻua ma tino e tasi.’ (Mataio 19:5) O le faaipoipoga o se faiā tumau i le va o tagata e toʻalua. Peitaʻi, e oo ane i le taimi na faamaopoopo ai e le Atua Isaraelu e avea o se nuu ma avatu Tulafono iā i latou, ua latou masani i le tele o avā. O lea la, talu ai e leʻi amataina pe faalaeiauina e le Atua le faia o le tele o avā, sa ia faia tulafono e pulea ai. Ina ua faavaeina le faapotopotoga Kerisiano, sa manino le faasāina e le Afioga a le Atua o le tele o avā.—1 Timoteo 3:2.

Sa onosaia e le Atua na mea seʻia oo i lona taimi e faasaʻo ai. (Roma 9:22-24) Na taʻu mai e Iesu sa onosaia e Ieova mo sina taimi nei tū lē talafeagai tau faaipoipoga, e ‘tuu atu ai’ i tagata Isaraelu ona o le ‘maaa tele o o latou loto.’—Mataio 19:8; Faataoto 4:18.

Aiseā na Lē Tumau ai Ona Tausia le Sapati?

Sa faatulagaina e le Atua le tausia faalevaiaso o le Sapati ina ua laveaʻia tagata Isaraelu  mai Aikupito. Sa ia faia mulimuli ane lea tulaga e avea ma vaega o le tulafono. (Esoto 16:22-30; 20:8-10) Na faamatalaina e le aposetolo o Paulo e faapea, na ofoina e Iesu o ia lava e fai ma taulaga ma “faaumatia ai . . . le Tulafono lea ua iai poloaʻiga ma faatonuga” ma “soloia le Tulafono.” (Efeso 2:15; Kolose 2:14) Sa aofia ai le tulafono o le Sapati i mea sa “faaumatia” ma “soloia,” auā sa faapea atili mai le Tusi Paia: “O lea la, ia aua neʻi faamasino se tasi iā te outou i meaʻai ma meainu, po o se tausamiga, po o le faamanatuina o masina faatoʻā vaaia, po o le tausia o le sapati.” (Kolose 2:16) Aiseā la na saunia ai e le Atua le Tulafono lea e aofia ai ma le Sapati?

Na tusi le aposetolo o Paulo e faapea: “Ua avea le Tulafono ma o tatou taʻitaʻitama e taʻitaʻia ai i tatou iā Keriso.” Sa ia toe faapea mai: “O lenei ua oo mai le faatuatua, ua lē toe pule la le taʻitaʻitama iā i tatou.” (Kalatia 3:24, 25) Nai lo le suia la o lona finagalo, sa faaaogā e le Atua le Sapati o se faatulagaga lē tumau, e taʻu atu ai i tagata e ao ona latou faaalu se taimi e manatunatu ai i mea faaleagaga. Peitaʻi, e ui sa lē tumau le Sapati, sa mafai lava ona faaāta ai le taimi o le a maua ai e tagata le mālōlōga tumau mai faafitauli i le itu i le tino, ma le faaleagaga.—Eperu 4:10; Faaaliga 21:1-4.

O se Atua e Maufaatuatuaina ma Alofa

O faaaʻoaʻoga faale-Tusi Paia na taʻua i luga, ua manino mai ai sa tuuina mai e Ieova le Atua taʻiala eseese ma faatonuga i taimi eseese. Ae e lē o faapea ai na suia lona finagalo. Peitaʻi, na ia gaoioi e tusa ai o manaʻoga o ona tagata i tulaga eseese, ma na ia faia mo lo latou lelei. E faapena foʻi i aso nei.

Ona e lē taitai suia e Ieova ana tapulaa, e mafai pea ona tatou iloa le mea e ao ona fai ina ia faafiafia ai o ia. E tatou te mautinoa ai foʻi o le a taunuu moni folafolaga uma na faia e le Atua. Ua fetalai Ieova: “Ou te faia foʻi mea uma ou te loto i ai . . . na ou fuafuatia, ou te faia lava.”—Isaia 46:10, 11.

[Faamatalaga faaopoopo i le itulau 21]

E lē taitai suia e le Atua ana faatulagaga o lona alofa ma lona faamasinotonu

[Faamatalaga faaopoopo i le itulau 22]

Na faapea mai le aposetolo o Paulo o nei meaalofa faavavega, e iai le taimi e “faalēaogāina” ai

[Faamatalaga faaopoopo i le itulau 23]

O le faaipoipoga o se faiā tumau i le va o tagata e toʻalua