Gado e kenki prakseri?

BIJBEL e taki disi fu Gado: „A Tata no e kenki soleki fa skaduw e kenki.” Gado srefi e gi wi a dyaranti disi: „Mi na Yehovah; mi no kenki” (Yakobus 1:17; Maleaki 3:6). Yehovah Gado trutru de heri tra fasi leki den sma di muilek fu plisi èn di no de fu frutrow, fu di den e kenki prakseri ibri leisi baka.

Ma son sma di e leisi Bijbel, e aksi densrefi efu Gado e kenki en prakseri. Fu eksempre, wan pisi ten a ben de so, taki Yehovah Gado ben gi Kresten a krakti fu du wondru, ma now a no e du dati moro. Na ini owruten, Gado ben gi pasi taki sma ben kan abi moro leki wán trowpatna, ma now dati no de so moro. Na ini a Wet di Gado gi Moses, Yehovah ben wani taki sma musu hori a sabat, ma now dati no de fanowdu moro. Den sani disi no e sori taki Gado kenki?

Na a fosi presi, wi kan de seiker taki Gado noiti e kenki den gronprakseri fu en di abi fu du nanga lobi èn nanga retidu. Boiti dati, den sani di a „abi na prakseri ala ten”, na fu blesi libisma nanga yepi fu a Kownukondre fu en, èn disi no kenki noiti (Efeisesma 3:11). Ma neleki fa yu kan kenki a fasi fa yu e handri nanga wan sma di e meki yu sari ibri leisi baka, na so Yehovah e kenki a fasi fa a e handri te situwâsi e kenki.

Den sani di Gado e taigi en pipel fu du e kenki tu, te den de na ini difrenti situwâsi èn te den abi difrenti sani fanowdu. A sani disi no musu fruwondru wi. Poti prakseri na a sani disi: Wan sma di sabi wan kontren bun, e tyari wan grupu sma fu go koiri, èn te den de na pasi a e si taki wan ogri kan pasa efu den e waka go doro. A sma disi ben o taigi a grupu fu teki wan tra pasi,  so taki den kan wai pasi gi na ogri. Ma disi no wani taki dati a kenki prakseri te a abi fu du nanga a presi pe a e tyari a grupu go, a no so? Fu dati ede, meki wi go luku den dri eksempre di wi ben kari kaba, èn di e meki son sma tweifri.

Fu san ede wondru no e pasa moro?

Fu san ede Gado ben gi sonwan fu den fosi yarihondro Kresten a krakti fu du wondru? Kande yu sabi taki di Gado ben teki Israel fu de en pipel, dan nofo tron a ben du wondru fu sori den taki a ben de nanga den. Nanga yepi fu Moses, Gado sori taki a abi bigi krakti di a frulusu Israel fu Egepte èn tyari den pasa a sabana go na ini a Pramisi Kondre. A de wan sari sani taki ibri leisi baka, den Israelsma no ben poti bribi na ini en. Di Yehovah no ben wani Israel moro leki en pipel èn di a seti a Kresten gemeente, dan a ben gi den apostel nanga trawan a krakti fu du wondru. Fu eksempre, den apostel Petrus nanga Yohanes ben dresi wan man di ben lan sensi di a gebore, èn Paulus ben gi wan man di ben dede, wan opobaka (Tori fu den Apostel 3:2-8; 20:9-11). Den wondru di den ben du, ben meki taki sma na ini furu kondre poti bribi na ini a Kresten bribi. Ma fu san ede wondru no e pasa moro?

Na apostel Paulus tyari a sani disi kon na krin nanga yepi fu wan agersitori: „Di mi ben de wan pikin-nengre, mi ben e taki leki wan pikin-nengre, mi ben e denki leki wan pikin-nengre, èn mi ben e prakseri leki wan pikin-nengre; ma now di mi tron wan man, mi no e du moro leki wan pikin-nengre” (1 Korentesma 13:11). Neleki fa papa nanga mama e handri tra fasi nanga wan pikin-nengre leki nanga wan bigi pikin, na so Yehovah ben handri tra fasi nanga a Kresten gemeente di a no ben de „wan pikin-nengre” moro. Na apostel Paulus ben tyari kon na krin taki den presenti disi fu du wondru, soleki fu taki na ini tra tongo noso fu taki profeititori, ben „o kon na wan kaba”.​—1 Korentesma 13:8.

Fu san ede sma ben mag abi moro leki wán trowpatna?

Yesus ben sori taki Gado ben poti gronprakseri te a abi fu du nanga a trowlibi. Gado ben taigi a fosi libisma trowpaar: „Wan man sa gowe libi en papa nanga mama èn a sa tan nanga en wefi, èn a man nanga en wefi sa de wán skin” (Mateyus 19:5). A trowlibi ben o de wan matifasi na mindri tu sma, di ben o tan de fu ala ten. Ma na a ten di Gado orga den Israelsma leki wan pipel èn a gi den a Wet, dan sma ben kon abi a gwenti fu teki moro leki wán trowpatna. Sobun, aladi Gado no ben seti a trowlibi so na a bigin èn aladi a no ben gi sma deki-ati fu teki moro leki wán trowpatna, toku a ben gi den wet fu sorgu taki sani waka na wan orga fasi. Di a Kresten gemeente ben seti, Gado Wortu ben sori krin taki wan sma no mag abi moro leki wán masra noso wefi.​—1 Timoteyus 3:2.

Yehovah Gado e gi pasi son leisi taki wan sani pasa, teleki a ten doro gi en fu poti den sani dati kon reti (Romesma 9:22-24). Yesus ben sori taki, fu wan pisi ten Yehovah ben ’gi pasi’ taki sma du a sani disi di no fiti na ini a  seti fu a trowlibi, fu di den Israelsma ’ati ben tranga’.​—Mateyus 19:8; Odo 4:18.

Fu san ede a sabat ben de fu wan pisi ten nomo?

Baka di Gado frulusu den Israelsma fu Egepte, a ben seti sani so taki den ben musu hori a sabat ala wiki. Bakaten, a meki a sani disi tron wan pisi fu a Wet di a ben gi a pipel (Exodus 16:22-30; 20:8-10). Na apostel Paulus ben tyari kon na krin taki di Yesus gi ensrefi leki wan ofrandi, „a ben puru . . . a Wet di abi komando na ini”, èn a ben „figi puru san ben skrifi nanga anu na ini a dokumenti” (Efeisesma 2:15; Kolosesma 2:14). A Sabat wet ben de wan fu den sani di ben „puru”, fu di Bijbel e taki moro fara: „Fu dati ede, no meki nowan sma krutu unu te a abi fu du nanga nyan noso dringi, wan fesadei, a nyunmun-fesa, noso wan sabadei” (Kolosesma 2:16). Ma, dan fu san ede Gado ben gi a Wet, èn sosrefi a Sabat wet?

Na apostel Paulus ben skrifi: „A Wet kon tron wi leriman di e tyari wi go na Krestes.” A ben taki tu: „Now di a bribi doro, dan wi no de moro na ondro wan leriman” (Galasiasma 3:24, 25). Na presi taki Gado kenki prakseri, a gebroiki a sabat leki wan seti fu wan pisi ten, so taki sma ben kan leri taki den musu teki ten doronomo fu denki dipi fu sani di abi fu du nanga na anbegi. Aladi a Sabat wet ben de fu wan pisi ten nomo, toku a ben sori go na wan ten te libisma no o abi problema moro èn te noti o man tapu den fu anbegi Gado na a yoisti fasi.​—Hebrewsma 4:10; Openbaring 21:1-4.

Wan lobi-ati Gado di wi kan frutrow

Den eksempre fu Bijbel di wi luku didyonsro, e sori taki Yehovah Gado ben taigi sma fu du difrenti sani èn a ben gi difrenti wet na ini difrenti pisi ten. Ma disi no wani taki dati a kenki prakseri. Na presi fu dati, a gi sma san den ben abi fanowdu na ini difrenti situwâsi, èn a ben du dati gi a bun fu den. Na so a de tu na ini a ten disi.

Fu di Yehovah no e kenki den gronprakseri fu en, meki ala ten wi kan sabi san wi musu du fu plisi en. Boiti dati, wi kan de seiker taki ala sani di Gado pramisi sa kon tru. Yehovah e taki: „Ala san mi feni bun, mi sa du . . . Na mi seti en, mi sa du en sosrefi.”​—Yesaya 46:10, 11.

[Prenspari pisi na tapu bladzijde 25]

Gado noiti e kenki den gronprakseri fu en di abi fu du nanga lobi èn nanga retidu

[Prenspari pisi na tapu bladzijde 26]

Paulus ben taki dati baka wan pisi ten den presenti fu du wondru ben „o kon na wan kaba”

[Prenspari pisi na tapu bladzijde 27]

A trowlibi ben o de wan matifasi na mindri tu sma, di ben o tan de fu ala ten