Aôndo Gem Ishima Sha Kwagha?

BIBILO ôr kwagh u Aôndo ér: “Un yô, ma mgem ngu ken a Na ga, shin mure u mgem tsô kpaa ga.” Aôndo iyol na ôr kwagh u tesen ér kape i lu vough je la, ér: “Mo TER M gem kposo ga.” (Yakobu 1:17; Malaki 3:⁠6) Sha mimi yô, Yehova Aôndo ngu er ior mba or môm kpa nan fetyô u eren kwagh sha ishima ve ga shi jighjigh kpa i ne ve ga la ga. Mba ne amba la jighjigh ga, sha ci u mba tem geman ishima sha kwagh ga!

Nahan kpa, mbagenev ka vea ôr Bibilo yô ve nenge a akaa ker a i lu ve inja er Aôndo gema ishima sha kwagh yô. U tesen ikyav yô, shighe ngu u Yehova Aôndo yange na Mbakristu tahav mbu eren uivande yô, kpa a kera na ve mbu hegen ga. Ngise la, Aôndo de ér ior ve lu a ikpela ukase, kpa a venda ieren ne hegen. Sha shighe u Tindi u Mose la, Yehova kaa ér i̱ kuran tindi u Iyange i Memen la, kpa hegen yô kera ka nahan ga. Akaa ne cii tese ér Aôndo gema ga zee?

Kwagh u hiihii yô, doo u se fa ser mayange je Aôndo gem sha kwagh u dooshima na man mimi na ga. Shi “awashima Na u tsôron” u a soo u veren uumace doo doo sha ikyev i Tartor na la kpa, gema ga. (Mbaefese 3:11) Nahan cii kpa, Yehova gem er a nenge kwagh a lu zan la, di vough er we kpa u fatyô u geman ishima you sha kwagh u ma or u nan eren akaa a doon we ga hanma shighe la nahan.

Aôndo shi gem akaa aa á we ior nav la, sha u á zua sha mlu ve man mbamgbe vev kpaa yô. Kwagh ne a de kpiligh se iyol ga. U tesen ikyav yô, u hen wer aluer or u hemen ior gbenda u nan fe tom u nan nan nenge a kwaghbo ken hemen nahan, nana er nena? Nana kar gbenda ugen sha er ior mba nan lu hemen la vea tagher a kwaghbo la ga yô. Aluer nan er nahan kpa, u ngu wer nan gema ishima i nan, nan kera soo u zan ape nan lu zan a ve la ga ze, shin nan gemaa? De se hide se time ase nen sha akav a tesen atar a se vande teren ken ngeren ne, aa á taver ior kpishi u kaven la.

Er Nan Ve Mbakristu Ve Kera Eren Uivande Ga?

Er nan ve Aôndo yange na mbagenev ken Mbakristu mba ngise mbara tahav mbu eren uivande? Aluer u umbur yô, shighe u Mbaiserael lu ikyurior i Aôndo la, Aôndo eren uivande sha ci ve sha u tesen ér un ngu a ve. Aôndo yange tese tahav nav sha ikyev i Mose, nahan yima Mbaiserael due a ve ken Igipiti kera shi hemen ve ken deserti zan zan ve kar nyôron ken Tar u Ityendezwa la. Kpa kwagh ka a er i vihi yô, Mbaiserael er akaa a tesen ér ve na Aôndo jighjigh ga acin imôngo. Ken masejime yô, Yehova undu Mbaiserael, gema ver nongo u Kristu shi na mbaapostoli man mbagenev tahav mbu eren uivande. U tesen ikyav yô, apostoli Peteru man Yohane yange ve bee orgen u a sombo ken uya je yô angev, shi Paulu kpa nder wanyekwaor ugen u yange kpe yô. (Aerenakaa 3:​2-8; 20:​9-11) Uivande mba yange ve eren la wase u samber a kwaghaôndo u Mbakristu ken ityar kpishi. Aluer ka nahan yô, er nan ve i kera eren uivande hegen ga?

Apostoli Paulu ôr injakwagh i í wase u pasen er i hii ve kwagh a lu nahan yô, ér: “Zum u m lu wanye la yô, m ôron kwagh er wanye nahan, m henen kwagh er wanye nahan, m nengen kwagh ken ishima er wanye nahan. Kpa hegen er m hingir orvesen ne yô, m de akaa a uye la.” (1 Mbakorinte 13:11) Yehova kera ngu eren kwagh a nongo u Kristu sha gbenda u ngise nongo ne lu kpuaa, shin se kaa ser u lu ‘iyev’ la ve eren kwagh a u la ga, di vough er mbamaren kpa gbenda u ve eren kwagh a wan ve u kiriki la ka u kaha a gbenda u ve eren kwagh a wan ve u nan gande or la nahan. Apostoli Paulu pase wener uivande mba eren er u lamen ken ijô igen shin u ôron akaaôron a profeti nahan, “á va kar a mi kera.”​—⁠1 Mbakorinte 13:⁠8.

 Er Nan Ve Aôndo Yange Na Ian Ér Ior Ve Vôson Kasev Kpishi?

Yesu ngise ôr kwagh u a tese ér Aôndo pase mnenge na sha kwagh ivaa i eren yô. Aôndo yange kaa a nom man kwase u hiihii la ér: ‘Nomsoor nana undu ter u nan man ngô u nan, nana var ken kwase u nan, ve uhar vea hingir iyôgh i môm.’ (Mateu 19:⁠5) Yange gba u ivaa ia lu mzough u nomsoor man kwase u lun gbekeke. Nahan kpa, sha shighe u Aôndo kohol Mbaiserael ve hingir ikyurior shi na ve Tindi la, ieren i vôson kasev kpishi la dumbur hen shighe la. Nahan yô, er lu Aôndo va a ieren ne shin na zwa ér ior ve eren ikpela ukase ga nahan kpa, gema ver atindi a nyôôso ieren ne. Kpa shighe u i ver nongo u Kristu la, Mkaanem ma Aôndo venda ieren ne wanger wanger.​—⁠1 Timoteu 3:⁠2.

Akaa agen nga a Yehova Aôndo yange de ér ior ve eren zan zan shighe va kuma u una pase kwagh u a lu u vough yô. (Mbaromanu 9:​22-24) Yesu pase ér Yehova yange na ian, kpa lu hila tsô, ér Mbaiserael ve nyôr iyol ken aeren a sha kwagh u ivaagh a yange doo ga yô; yange i̱ “gba lumun tsô” ér ve eren akaa ne sha ci u “mcighir u asema” a ve la.​—⁠Mateu 19:8; Anzaakaa 4:⁠18.

Er Nan Ve Tindi u Kuran Iyange i Memen la Lu Gbekeke Ga

Aôndo yange duen a Mbaiserael ken Igipiti kera yô, maa kaa ér ve kuran Iyange i Memen ken hanma kasua. Shighe kar yô, Aôndo gema kwagh u kaa ér ve eren ne hingir Tindi u tar ve la. (Ekesodu 16:​22-30; 20:​8-10) Apostoli Paulu pase ér Yesu na nagh sha iyol na, nahan “bunde tindi u akaawan a a lu sha gbaaôndo la kera” shi “mnger u anzô ase a atindi a na” la kpaa, á “ese” kera. (Mbaefese 2:15; Mbakolose 2:14) Kwagh u yange i “bunde” shi i “ese” kera la kua tindi u Iyange i Memen la kpa ker, gadia Bibilo za hemen kaa ér: “Nahan yô, ma or nana̱ de kera ôron ne ijir sha kwagh u kwaghyan man kwaghman shin sha kwagh u iniongo shin uwer u he shin iyange i memen kpaa ga.” (Mbakolose 2:16) Kpa jighilii yô, er nan ve Aôndo yange wa Tindi, kua tindi u Iyange i Memen laa?

Apostoli Paulu nger ér: “Tindi a lu orkuran wase u zan a vese ken Kristu.” A za hemen a kaa ér: “Kpa jighjigh u nan a za ve yô, se kera mba sha ikyev i orkuran ga.” (Mbagalatia 3:​24, 25) Aôndo yange gema a gema ishima na sha kwagh u Iyange i Memen ga, kpa yange ver Iyange i Memen lu kwagh u hila tsô, sha u tesen ior ér doo u vea ver shighe u vea henen sha akaa a ken jijingi yô. Shin er tindi u Iyange i Memen la lu kwagh u gbekeke ga nahan kpa, tindi ne tese ér shighe ngu van ken hemen u mbamzeyol mba uumace mba sha iyol man mba ken jijingi cii vea bee kera yô.​—⁠Mbaheberu 4:10; Mpase 21:​1-4.

Aôndo u Dooshima U A Kom u Se Na Un Jighjigh Yô

Akaa a ken Bibilo a se er kwagh sha mi sha heen ne cii tese ér Yehova Aôndo yange tese kwagh u ior vea er sha ashighe kposo kposo yô. U ngu wer, yange gema a gema ishima na ga, yange er a er kwagh u kuren mbamgbe mba ior nav sha ashighe kposo kposo man sha ci u mtsera ve tseegh tsô. Nyian kpa kape i lu je la.

Er Yehova a gem atindiakaa a na ga yô, se fatyô u eren ishima na hanma shighe cii gadia se fa kwagh u a soo yô. Heela tseegh ga, se fatyô u nan jighjigh kpaa ser, uityendezwa mba Aôndo cii vea kure sha mi vough. Yehova kaa ér: “Me er kwagh u a doom ken ishima u eren la cii . . . M vande veren ishima sha kwagh, shi Me er un kpaa.”​—⁠Yesaia 46:​10, 11.

[Mkaanem ma sha peeji 18]

Mayange je Aôndo gem sha kwagh u dooshima na man mimi na ga

[Mkaanem ma sha peeji 19]

Yange gba u ivaa ia lu mzough u nomsoor man kwase u lun gbekeke