Ọ be Kareghẹhọ Ọnyaba Mai

Iruo-Izerẹ 5:2-11

“MẸ DAO oma mẹ kpobi, rekọ o jọ omẹ oma nọ me bi ru te he.” Ere aye jọ ọ ta kpahe oma nọ ọ be dao evaọ egagọ Ọghẹnẹ. Kọ Jihova Ọghẹnẹ ọ rẹ jẹ utho kpobi nọ o rrọ umuo ẹgba odibo riẹ rehọ? Kọ ọ be kareghẹhọ inọ ẹgba gbe uyero idibo riẹ o rẹ sai kpomahọ epanọ a rẹ sai ru te? Oware jọ nọ u ti fi obọ họ kẹ omai kẹ iyo enọ nana họ eroro kpahe oware nọ Uzi Mosis o ta kpahe eghẹrẹ idhe jọ nọ a je dhe, wọhọ epanọ a kere fihọ Iruo-Izerẹ 5:2-11.

Evaọ Uzi na, Ọghẹnẹ ọ ta kẹ idibo riẹ inọ a hai dhe idhe sa-sa ro voro izieraha rai. Evaọ iyero nọ a jọ etenẹ Ebaibol ta kpahe na, ohwo na ọ rọ ọthobọ thọ uzi yọ ọ riẹ hẹ. (Owọ avọ 2-4) Okenọ ọ rọ riẹ no inọ ọ thọ uzi, ọ rẹ nyae fa uzioraha na je dhe idhe uzioraha—“ogodẹ aye hayo ẹwe” o re ro dheidhe na. (Owọ avọ 5, 6) Kọ otẹrọnọ ohwo na oyogbere nọ o wo ogodẹ hayo ẹwe he? Kọ Uzi na o gba ohwo na họ inọ ọ gbẹ rọ arao ọnana ze he oja na, nọ u re ru ei nyae riesa fihọ uzou rọ dẹe? Kọ o gba họ nọ o re ru iruo bẹsenọ o re wo ugho nọ ọ rẹ rọ dẹ arao na, nọ u re go oke omauvoro izieraha na haro?

Ọdawẹ Jihova o dhesẹ oma via evaọ Uzi na, nọ o ta nọ: “Ọgbẹ sae rehọ ogodẹ dhidhe umuomu riẹ kẹ ỌNOWO na ha, ọ vẹ rehọ irueruẹ eni ivẹ hayo ilekuku esese ivẹ” ze. (Owọ avọ 7) Ẹme na “ọgbẹ sae rehọ . . . [ze] ha” o rẹ sai je dhesẹ inọ “otẹrọnọ obọ riẹ u gbe te he.” Ohwo Izrẹl jọ o te yogbe te epanọ ọ gbẹ sae rọ dẹ ogodẹ hẹ, o jẹ hae were Ọghẹnẹ re ọ jẹ oware nọ obọ ohwo na o rẹ sai te rehọ—irueruẹ eni ivẹ hayo ilekuku esese ivẹ.

Kọ otẹrọnọ ohwo na o wo ugho nọ ọ sae rọ dẹ emevra ivẹ na dede he? Uzi na o ta nọ: “Ọ vẹ rehọ abọvo abakpe [koyehọ igho eree hayo izii erọ] owawọ emamọ eka nọ a wuhu ze, fiki idhe uzi nọ ọ raha na.” (Owọ avọ 11) Rọkẹ ahwo nọ i yogbe gaga evaọ oke yena, Jihova ọ re ohrọ rai jẹ kẹ ae uvẹ re a dheidhe izieraha rai ababọ azẹ arao nọ o hwẹ. * Evaọ Izrẹl anwae, uvuhu o jẹ whaha ahwo omauvoro izieraha ha hayo uvẹ nọ a rẹ rọ ruẹrẹhọ kugbe Ọghẹnẹ.

Eme ma wuhrẹ kpahe Jihova rono uzi ọ idhe izieraha na ze? Ma wuhrẹ noi ze inọ Jihova yọ Ọghẹnẹ nọ o wo ohrọriọ jẹ be kareghẹhọ umuo ẹgba idibo riẹ. (Olezi 103:14) Ọ gwọlọ nọ ma si kẹle iẹe, mu usu okpekpe kugbei o tẹ make rọnọ ma bi lele uyero obẹbẹ jọ muabọ dede, wọhọ owho, ẹyao, ewha-iruo uviuwou hayo eware efa jọ. O rẹ sae kẹ omai omosasọ nọ ma tẹ riẹ inọ Jihova Ọghẹnẹ ọ rẹ wereva kugbe omai nọ ma te bi ru utho nọ ẹgba mai o te.

[Oruvẹ-obotọ]