Pathian Hnaih Rawh

Ani Chuan Kan Tlin Lohnate A Hre Thiam

Leviticus 5:2-11

“THEIHTAWP chhuah ṭhîn mah ila, ti ṭha tâwk nia inhriatna ka nei thei rêng rêng lo,” tiin nu pakhat chuan Pathian tihlâwm tuma a ṭan lâkna chu a sawi a ni. Pathian Jehova chuan amah betute’n theihtâwp chhuaha an ṭan lâkna chu a pawm em? An theihnate leh dinhmunte a ngaihtuah tel em? A chhânna hriat nân, thil hlan chungchânga Mosia Dân pêk, Leviticus 5:2-11-a chhinchhiah ngaihtuah chu a ṭangkai hle a ni.

Dân hnuaiah chuan, Pathian chuan sual thawi nân inthawina chi hrang hrang a phût a. He Bible châng târ lanah hian, mi chuan tum lo deuhvin thil sual a ti a. (Châng 2-4) A sualna chu a hriat chhuah chuan, a sual chu puangin, bawhchhiat thawina—“berâm rual zînga mi a nu, berâm no emaw kêl emaw”—a hlân tûr a ni. (Châng 5, 6) Mahse, chu mi chuan a retheih avângin berâm no emaw, kêl no emaw hlan tûr nei lo ta se engtin nge ni ang? Dân thu chuan mi dang ran pûka, leiba a neih phah hial chu a phût em? A sual thawina hun pawh tikhawtlai hial khawpin, ran hlan tûr a tuak phawt tûr em ni?

Pathian Jehova’n mite a ngaihtuahna duhawm tak chu târ langin, Dân thu chuan: “A neihin berâm no a tlin loh chuan LALPA hnêna hlan tûrin a sual man atân chuan a bawhchhiat thawinaah ṭhuro pahnih emaw pârva no pahnih emaw a rawn keng tûr a ni; pakhat chu sual thawi nân pakhat chu hâlral thilhlan atân,” tiin a sawi a ni. (Châng 7) Israel mi chu a retheih viau a, berâm a hlan theih loh chuan, a tlin tâwk—ṭhuro pahnih emaw, pârva no pahnih emaw—a hlan chu Pathianin a pawm a ni.

A nih leh mi chuan sava pahnih pawh a lei theih loh chuan, engtin nge ni ang? Dân thu chuan: “A sual man atân thil hlanah sual thawi nân chhangphut dip tak, epha hmun sâwma ṭhena hmun khat [1 kg vêl] a rawn keng ang,” tiin a sawi. (Châng 11) Chutiang chuan mi rethei takte tân Pathian Jehova chuan ruahmanna a siamsak a, thisen tel lova sual thawina thilhlan an neih chu a phalsak a ni. * Israel ramah chuan, an retheihna chuan sual thawina emaw, Pathian nêna inremna emaw an neih tûr chu a dang lo.

Bawhchhiat thawina dân pêk aṭangin Pathian Jehova chungchâng eng nge kan zir? Ani chu lainatna leh hriatthiamna ngah Pathian, amah chibai bûktute tlin tâwk ngaihtuah tel ṭhîntu a ni a. (Sâm 103:14) Ani chuan harsatna chi hrang hrang kum upatna te, hrisêl lohna te, leh chhûngkua emaw, thil dang emawa mawhphurhnate nei chung pawhin amah chu hnaih a, amah nêna inlaichînna ṭha nei tûrin min duh a ni. Kan tlin tâwk ang apiang kan tih achungah Pathian Jehova a lâwm tih hriatna chuan thlamuanna min pe a ni. (w09 6/1)

[Footnote]