Hala Serka Dios

E Ta Tene Kuenta ku Nos Limitashonnan

Levítiko 5:​2-11

“MI A ègt hasi mi bèst, pero nunka mi a sinti ku esei tabata sufisiente.” Esei ta loke un hende muhé a bisa tokante su esfuerso pa agradá Dios. Yehova ta aseptá e máksimo esfuerso di su adoradónan? E ta tene kuenta ku nan abilidatnan i sirkunstansia? Pa por kontestá e preguntanan ei, ta bon pa konsiderá loke e Lei di Moisés ta bisa na Levítiko 5:​2-11 tokante sierto ofrendanan.

Bou di e Lei, Dios a rekerí vários tipo di sakrifisio, òf ofrenda, pa hasi ekspiashon pa piká. Den e kasonan ku Levítiko 5:​1-11 ta menshoná, e persona a peka sin pensa òf sin ku e tabata konsiente di esei. (Versíkulo 2-4) Ora el a realisá ku el a hasi piká, e mester a konfesá su piká i presentá un ofrenda pa kulpa, esta, ‘un lamchi di karné òf di kabritu.’ (Versíkulo 5 i 6) Pero, kiko si e tabata pober i no tabatin un lamchi di karni ni di kabritu pa ofresé? E Lei a eksigí p’e fia un bestia i asina hinka su kurpa den debe? Òf e mester a bai traha te ora e por a kumpra e bestia pa hasi ekspiashon pa su pikánan?

E Lei a reflehá Yehova su interes amoroso, ora el a bisa: “Si e no por duna un lamchi, e ora ei e mester hiba pa SEÑOR, komo su ofrenda pa kulpa pa su piká ku el a kometé, dos tòrteldùif òf dos pichon.” (Versíkulo 7) Si un israelita tabata muchu pober pa ofresé un lamchi, gustosamente Dios a aseptá loke e persona por a duna, esta, dos tòrteldùif òf dos pichon.

Kiko si e persona no por a duna ni sikiera dos para? “E ora ei e mester hiba komo su ofrenda pa e piká ku el a kometé, e désimo parti di un efa [un kilo] di hariña fini komo un ofrenda pa piká.” (Versíkulo 11) Yehova a disidí di hasi un eksepshon pa e hendenan ku tabata masha pober i a permití nan presentá un ofrenda sin sanger. * Na Israel, e echo ku un hende tabata pober no a strob’é di haña e bendishon ku ekspiashon ta trese kuné ni e privilegio di rekonsiliá ku Dios.

Kiko e lei relashoná ku e sakrifisionan di kulpa ta siña nos tokante Yehova? E ta un Dios miserikòrdioso i kompasivo ku ta tene kuenta ku loke su adoradónan por hasi i loke nan no por hasi. (Salmo 103:14) E kier pa nos hala serka dje i kultivá un relashon íntimo kuné, asta si nos sirkunstansianan ta difísil debí na, por ehèmpel, edat ku ta subi, problema ku salú, asuntunan di famia òf otro obligashonnan. Ta un konsuelo pa sa ku Yehova Dios ta keda kontentu ora nos ta hasi tur loke ta na nos alkanse.

[Nota]