Atamela ho Molimo

O Utloisisa Moo re Haelloang Teng

Levitike 5:2-11

“KE LEKILE sohle seo nka se khonang, empa ha ho mohla nkileng ka utloa ke khotsofetse.” Ke kamoo ho boletseng mosali e mong ka mor’a ho ikitlaelletsa ho khahlisa Molimo. Na Jehova Molimo o ananela boikitlaetso ba barapeli ba hae ha ba entse sohle se matleng a bona? Na oa utloisisa hore ho na le lintho tseo ba ke keng ba khona ho li etsa le tseo maemo a bona a ke keng a ba lumella ho li etsa? E le ho araba lipotso tsena, ho molemo hore re tšohle se boletsoeng Molaong oa Moshe mabapi le linyehelo tse itseng, joalokaha se tlalehiloe ho Levitike 5:2-11.

Ho ea ka Molao, Molimo o ne a batla hore ho etsoe mahlabelo, kapa linyehelo tsa mefuta e sa tšoaneng e le ho koahela libe. Maemong a boletsoeng litemaneng tsena, ke ha motho a ne a entse sebe a sa rera kapa e se ka boomo. (Temana ea 2-4) Ha motho a ne a elelloa sebe sa hae, o ne a lokela ho se bolela ebe o etsa nyehelo ea molato ka “konyana e tšehali kapa potsanyane e tšehali.” ((Temana ea 5, 6) Empa o ne a tla etsa joang haeba e ne e le mofutsana ’me a se na konyana kapa pōli eo a ka nyehelang ka eona? Na Molao o ne o qobella motho ea joalo hore a e’o alima phoofolo ea mofuta oo, ebe o kena likolotong? Na o ne a lokela ho sehla ka thata ho fihlela a ka e fumana, e leng se neng se ka etsa hore sebe sa hae se liehe ho koaheloa?

E le ho bontša hore Jehova o nahanela batho ka tsela e lerato, Molao o ne o re: “Leha ho le joalo, haeba [a] sa khone ho fana ka nku, joale [a] tlise ho Jehova maebana-khoroana a mabeli kapa maebana a mabeli e le nyehelo ea molato bakeng sa sebe seo [a] se entseng, le leng bakeng sa nyehelo ea sebe ’me le leng bakeng sa nyehelo ea secheso.” (Temana ea 7) Poleloana e reng “haeba [a] sa khone,” e bontša hore Molimo o ne a thabela ho amohela ho hong hoo motho ea nyehelang a neng a ka khona ho fana ka hona. Haeba Moiseraele a ne a futsanehile haholo hoo a neng a hlōleha ho fana ka nku, Molimo o ne a ananela ntho leha e le efe eo a neng a ka fana ka eona—ebang ke maebana-khoroana a mabeli kapa maebana a mabeli.

Motho o ne a etsa joang haeba a ne a sitoa ho fana ka maebana-khoroana kapa maebana ao a mabeli? Molao o ne o re: “Joale bakeng sa nyehelo ea [hae] ea sebe seo [a] se entseng [a] tlise karolo ea leshome ea efa ea phofo e thumisehileng [likopi tse robeli kapa tse robong] bakeng sa nyehelo ea sebe.” (Temana ea 11) Jehova o ile a etsetsa batho ba itšokolang haholo tokisetso e fapaneng, a ba lumella hore ba etse nyehelo ea sebe ntle ho mali. * Iseraeleng, bofuma bo ne bo sa sitise motho hore a koahele sebe kapa ho mo tima monyetla oa ho lokisa kamano ea hae le Molimo.

Re ithuta’ng ka Jehova molaong o mabapi le linyehelo tsa molato? Re ithuta hore ke Molimo ea utloelang barapeli ba hae bohloko, ea utloisisang moo ba haelloang teng. (Pesaleme ea 103:14) O batla hore re atamele haufi le eena ’me re loanele ho ba le kamano e ntle le eena esita leha re tobane le mathata a kang a botsofali, a ho haelloa ke bophelo, mathata a lelapa esita le lintho tse ling tseo re tlamehang ho li etsa. Re ka tsoha molota ha re tseba hore Jehova Molimo oa thaba ha a bona re etsa sohle se matleng a rōna.

[Mongolo o botlaaseng ba leqephe]