Ani Mɔ ko Yɛ ni Susuɔ Mihe Lɛɛlɛŋ?

Ani onu he pɛŋ akɛ ohe efee shoo ni ofee shwɛm oookɛɛ mɔ ko kwraa bɛ ni nuɔ naagbai ni okɛkpeɔ lɛ ashishi? Ni kɛ́ amɛle onaagbai lɛ po lɛ, onuɔ he akɛ amɛsusuuu ohe kwraa.

KƐ́ WƆKƐ naagbai kpe lɛ, wɔshihilɛ feɔ tamɔ ahum ko ni naa baaa shi. Bei komɛi lɛ, ekolɛ wɔbaamu sane naa akɛ naagba ni wɔkɛkpeɔ lɛ naa wa waa, ni esaaa ni nɔ ko ni tamɔ nakai baa wɔ nɔ, ni no haa wɔnuɔ he akɛ wɔnyɛŋ wɔdamɔ naa dɔŋŋ. Bei pii lɛ nakai wɔnuɔ he kɛ́ wɔjijaa, shihilɛ je wɔtsine, oshara ko ha wɔgbɔjɔ waa, wɔmiiye hela ko ni ehiii tsamɔ, loo wɔkɛ shihilɛi krokomɛi ni tamɔ enɛɛmɛi kpe. Ekolɛ wɔbaanu he akɛ wɔfee shwɛm ni wɔhiɛnɔkamɔ etã aahu akɛ wɔleee he ni wɔbaaya kɛha miishɛjemɔ. Ani mɔ ko yɛ ni susuɔ ohe lɛɛlɛŋ?

“Miishɛjemɔ fɛɛ Nyɔŋmɔ lɛ” Susuɔ Ohe

Biblia lɛ wie kɛkɔ Nyɔŋmɔ he akɛ eji “musuŋtsɔlɛi atsɛ kɛ miishɛjemɔ fɛɛ Nyɔŋmɔ.” (2 Korintobii 1:3) Nyɔŋmɔ ni gbɛi ji Yehowa lɛ le akɛ miishɛjemɔ he miihia wɔ. Biblia lɛ kɛ wiemɔ ni ji “miishɛjemɔ” lɛ tsu nii nɔ ni fa fe shii ohai abɔ yɛ gbɛ̀i srɔtoi anɔ, koni wɔná nɔmimaa akɛ jeee akɛ Nyɔŋmɔ nuɔ shihilɛi ni wɔkɛkpeɔ lɛ ashishi kɛkɛ, shi eesumɔ ni eshɛje wɔmii. Anɔkwa sane nɛɛ haa wɔnáa nɔmimaa akɛ, kɛ́ etamɔ nɔ ni mɛi enaaa shihilɛ ni wɔkɛkpeɔ lɛ, amɛnuuu shishi, loo amɛsusuuu wɔnaagbai ahe po lɛ, Yehowa Nyɔŋmɔ susuɔ wɔhe.

Ŋmalɛi lɛ haa efeɔ faŋŋ kɛhaa wɔ akɛ Yehowa susuɔ wɔhe akɛ aŋkroaŋkroi. Biblia lɛ kɛɔ akɛ: “Yehowa hiŋmɛii yɛ he fɛɛ he, ni ekwɛɔ mɛi fɔji kɛ mɛi kpakpai fɛɛ.” (Abɛi 15:3) Atsi anɔkwa sane nɛɛ nɔŋŋ hu tã yɛ Hiob 34:21 lɛ akɛ: “Ehiŋmɛii jwere gbɔmɔ gbɛ̀i anɔ, ni enaa enajifaamɔi fɛɛ.” Yehowa naa nibii ni wɔfeɔ—kɛ́ eji ekpakpa aloo efɔŋ—ni ele shihilɛ ni wɔkɛkpeɔ lɛ, ni efeɔ enɛ koni enyɛ ena nɔ ni sa akɛ efee yɛ shihilɛ lɛ he. Hanani, ni ji ninalɔ loo gbalɔ kɛha Yuda maŋtsɛ Asa lɛ wiemɔi lɛ maa anɔkwa sane nɛɛ nɔ mi, ekɛɛ akɛ: “Yehowa yɔɔ nɛɛ, ehiŋmɛii kpaa shikpɔŋ muu lɛ fɛɛ nɔ, ni ejieɔ ehewalɛ kpo ehaa mɛi ni amɛtsui ehi kɛwula shi yɛ egbɛfaŋ lɛ lɛ.”—2 Kronika 16:7, 9.

Yehowa kwɛɔ wɔnifeemɔi yɛ yiŋtoo kroko hu hewɔ. Yesu wie akɛ: “Mɔ ko nyɛŋ aba miŋɔɔ, akɛ ja tsɛ lɛ ni tsu mi lɛ gbala lɛ dã.” (Yohane 6:44) Yehowa susuɔ wɔhe aahu akɛ epɛiɔ wɔtsui mli akɛ aŋkroaŋkroi kɛkwɛɔ kɛji wɔmiisumɔ ni wɔle lɛ jogbaŋŋ lo. Kɛji ena akɛ mɔ aŋkro ko miisumɔ ni ele lɛ jogbaŋŋ lɛ eyeɔ ebuaa mɔ nɛɛ yɛ gbɛ̀i ni haa mɔ naa kpɛɔ ehe waa anɔ. Ákɛ nɔkwɛmɔnɔ lɛ, yɛ Dominican Republic lɛ, akɛ yoo ko yafɔ̃ helatsamɔhe koni afee lɛ kansa opireshɛn. Ekpa Nyɔŋmɔ fai ní eye ebua lɛ ni ena anɔkwa jamɔ lɛ. No sɛɛ nɔŋŋ ni ewu kɛ wolo ko ni gbɛi ji Mɛni Nyɔŋmɔ Taoɔ yɛ Wɔdɛŋ? * ni Yehowa Odasefoi lɛ ateŋ mɔ kome kɛha lɛ yɛ shĩa gbi lɛ leebi lɛ ha lɛ. Yoo lɛ kane wolo lɛ ni eyɔse akɛ Nyɔŋmɔ eha esɔlemɔ lɛ hetoo. Ekpɛlɛ ni Odasefonyo lɛ kɛ lɛ akase Biblia lɛ, ni yɛ nɔ ni shɛɛɛ nyɔji ekpaa mli lɛ, ejɔɔ ewala nɔ eha Nyɔŋmɔ ni abaptisi lɛ.

Wiemɔi babaoo ní taa mɔ tsuiŋ waa ni blema Hebri lalatsɛmɛi lɛ folɔ, tamɔ nɔ ni Maŋtsɛ  David fo kɛtsɔɔ bɔ ni Yehowa jɛɔ suɔmɔ mli esusuɔ etsuji ahe lɛ nɛkɛ, yɛ Biblia mli wolo ni ji Lalai Awolo lɛ mli. Maŋtsɛ David sɔle ekpa Nyɔŋmɔ fai yɛ Lala 56:9 lɛ akɛ: “Okɛ mihiɛ yaafonui awo otɔ lɛ mli! Ani amɛbɛ owolo lɛ mli?” Mfonirifeemɔŋ wiemɔ nɛɛ tsɔɔ akɛ David le akɛ jeee akɛ Yehowa na piŋmɔ ni epiŋ lɛ kɛkɛ, shi moŋ ele bɔ ni epiŋmɔ lɛ ná lɛ David lɛ henumɔ nɔ hewalɛ hu eha. Yehowa na piŋmɔ ni David piŋ lɛ ni ekai bɔ ni piŋmɔ lɛ ná David henumɔ nɔ hewalɛ aahu akɛ David fó lɛ hu. Yɛ anɔkwale mli lɛ, wɔ-Bɔlɔ lɛ kwɛɔ mɛi fɛɛ ni bɔɔ mɔdɛŋ akɛ amɛfee esuɔmɔnaa nii lɛ, “mɛi ni amɛtsui ehi kɛwula shi yɛ egbɛfaŋ lɛ.”

Biblia mli ŋmalɛ kroko ni tsɔɔ akɛ Nyɔŋmɔ jɛɔ suɔmɔ mli esusuɔ wɔhe ji Lala 23 ni mɛi le waa lɛ. Wiemɔi ni akɛje lala lɛ shishi lɛ kɛ Nyɔŋmɔ to tookwɛlɔ ni yɔɔ suɔmɔ he, ekɛɔ akɛ: “Yehowa ji mikwɛlɔ, nɔ ko nɔ ko ehiaŋ mi.” Tookwɛlɔi ni yɔɔ Asia Wuoyi-Anaigbɛ (Middle East) susuɔ amɛtooi lɛ ateŋ eko fɛɛ eko he aahu akɛ amɛwoɔ amɛteŋ eko fɛɛ eko gbɛi. Daa gbi lɛ, amɛtsɛɔ amɛtooi lɛ ateŋ eko fɛɛ eko kɛbaa amɛmasɛi ni amɛshwɛɔ amɛhe blɛoo kɛkwɛɔ kɛji amɛpila. Kɛji amɛna akɛ tooi lɛ eko epila lɛ, amɛkɛ mu loo tsofa toɔ nɔ koni fala lɛ agbo mra. Kɛ́ tooi lɛ eko bɛ hewalɛ lɛ, ekolɛ tookwɛlɔ lɛ baatsɔ tsofa ewo too lɛ sɛŋ ni ebaamɔ too lɛ mli kɛdamɔ shi koni ekabu shi ni egbo. Ŋwanejee ko bɛ he akɛ tookwɛlɔ ni tamɔ nɛkɛ ni akɛfeɔ bɔ ni Yehowa susuɔ mɛi ni baa lɛ abo lɛ ahe ehaa lɛ he mfoniri lɛ sa jogbaŋŋ.

Sɔlemɔ kɛ Gbohiiashitee lɛ Tsɔɔ akɛ Nyɔŋmɔ Susuɔ Ohe

Aŋmalaaa lalai nɛɛ kɛ ekrokomɛi ni ŋɔɔ ni yɔɔ Biblia lɛ mli lɛ koni wɔkane ni wɔmii ashɛ wɔhe kɛkɛ. Amɛtsɔɔ bɔ ni Nyɔŋmɔ  anɔkwa tsuji ni hi shi yɛ blema lɛ fɔse amɛtsuiŋ amɛtsɔɔ Yehowa ni amɛkɛtsɔɔ akɛ Nyɔŋmɔ yelikɛbuamɔ he miihia amɛ kɛ agbɛnɛ hu ni amɛkɛtsɔɔ akɛ amɛhiɛ sɔɔ gbɛtsɔɔmɔ kɛ jɔɔmɔi ni amɛnine shɛɔ nɔ kɛjɛɔ Yehowa ŋɔɔ lɛ. Wiemɔi nɛɛ tsɔɔ faŋŋ akɛ Nyɔŋmɔ anɔkwa tsuji ni hi shi yɛ blema nɛɛ he amɛye waa akɛ Nyɔŋmɔ susuɔ amɛhe. Kɛ́ wɔkane ni wɔjwɛŋ wiemɔi ni jɛ amɛtsuiŋ nɛɛ anɔ lɛ, ebaanyɛ eye ebua wɔ ni wɔ hu wɔnu he akɛ Nyɔŋmɔ susuɔ wɔhe. Anɔkwa sane ni eji akɛ Yehowa ŋmɛɔ gbɛ ni wɔsɔle wɔha lɛ lɛ ji odaseyelii ni mɔɔ shi waa ni tsɔɔ akɛ Nyɔŋmɔ susuɔ wɔhe lɛ ateŋ ekome.

Shi bei komɛi lɛ, wɔnaagbai lɛ haa wɔhaoɔ waa aahu akɛ wɔleee bɔ ni wɔbaasɔle yɛ he wɔha po. Ani enɛ haaa Yehowa ana wɔhaomɔ lɛ? Romabii 8:26 lɛ haa hetoo akɛ: “Mumɔ lɛ hu yeɔ buaa wɔgbedemɔi lɛ; ejaakɛ nɔ ni wɔɔsɔle wɔbi ni ja lɛ wɔleee; shi moŋ Mumɔ lɛ diɛŋtsɛ kɛ ŋtsɔidɔɔmɔi ni anyɛŋ akɛɛ damɔɔ mli haa wɔ.” Ŋmalɛ nɛɛ miikɛɛ wɔ akɛ Yehowa, ‘Mɔ ni boɔ sɔlemɔ toi’ lɛ, naa sɔlemɔi ni mumɔ tsirɛ Nyɔŋmɔ tsuji ni hi shi yɛ blema lɛ ni amɛsɔle lɛ ateŋ nɔ ni kɛ wɔhenumɔi kpãa gbee lɛ oookɛɛ amɛji wɔsɔlemɔi.—Lala 65:3.

Gbohiiashitee he hiɛnɔkamɔ lɛ ji odaseyeli kroko ni mɔɔ shi ni tsɔɔ akɛ Nyɔŋmɔ susuɔ wɔhe akɛ aŋkroaŋkroi. Yesu Kristo kɛɛ akɛ: “Ŋmɛlɛtswaa lɛ miiba, nɔ̃ mli ni mɛi fɛɛ ni yɔɔ gbohiiabui lɛ amli lɛ aaanu [Yesu] gbee ni amɛaaje kpo.” (Yohane 5:28, 29) Hela wiemɔ ni atsɔɔ shishi akɛ “gbohiiabui” lɛ shishi diɛŋtsɛ ji “kaimɔ bui,” ni etsɔɔɔ gbohiiabui kɛkɛ. Hela wiemɔ ni akɛtsu nii lɛ tsɔɔ akɛ Nyɔŋmɔ kaiɔ nɔ̃ gbɔmɔ ni mɔ ni egbo lɛ ji beni mɔ lɛ yɔɔ wala mli lɛ.

Bo lɛ susumɔ he okwɛ, dani Nyɔŋmɔ baatee mɔ ko shi kɛba wala mli ekoŋŋ lɛ, esa akɛ ele nɔ fɛɛ nɔ ni kɔɔ mɔ lɛ he, bɔ ni egbɔmɔtso yɔɔ, sui ni akɛfɔ lɛ, kɛ sui ni ekase, kɛ agbɛnɛ hu nɔ fɛɛ nɔ ni mɔ lɛ kɛto ejwɛŋmɔ mli! (Marko 10:27) Kɛ́ afii akpei abɔ po ho lɛ, Nyɔŋmɔ hiɛ kpaaa nɔ fɛɛ nɔ ni ele yɛ mɔ lɛ he lɛ nɔ. (Hiob 14:13-15; Luka 20:38) No hewɔ lɛ, Yehowa Nyɔŋmɔ kɛ mɛi akpekpei akpei abɔ ni egboi lɛ ahe saji fitsofitso fɛɛ eto ejwɛŋmɔŋ, enɛ ji odaseyeli ni mɔɔ shi ni tsɔɔ akɛ Nyɔŋmɔ susuɔ wɔhe akɛ aŋkroaŋkroi!

Yehowa Ji Nyɔmɔwolɔ

Mɛni esa akɛ wɔfee koni Nyɔŋmɔ ajɛ suɔmɔ mli esusu wɔhe ni ebu wɔhe? Nɔ̃ titri ni esa akɛ wɔfee ji akɛ, esa akɛ wɔná emli hekɛnɔfɔɔ ni wɔbo lɛ toi, ni wɔkɛtsɔɔ akɛ wɔyɛ emli hemɔkɛyeli. Bɔfo Paulo tsɔɔ akɛ tsakpãa yɛ hemɔkɛyeli kpojiemɔ kɛ Nyɔŋmɔ kwɛmɔ shishi ni mɔ ko baayaje lɛ teŋ. Eŋma akɛ: “Kɛ hemɔkɛyeli bɛ lɛ, anyɛŋ Nyɔŋmɔ hiɛ asa; ejaakɛ mɔ ni baa Nyɔŋmɔ ŋɔɔ lɛ, ja ehe eye akɛ eyɛ ni eji mɛi ni taoɔ esɛɛ gbɛ lɛ anyɔmɔwolɔ hu.”—Hebribii 11:6.

Kadimɔ akɛ nibii enyɔ ji nɔ ni tsɔɔ akɛ mɔ ko yɛ hemɔkɛyeli ni saa Nyɔŋmɔ hiɛ. Klɛŋklɛŋ lɛ, esa akɛ ‘wɔhe wɔye akɛ eyɛ,’ ni tsɔɔ akɛ esa akɛ wɔhe wɔye akɛ Nyɔŋmɔ yɛ ni lɛ ji wɔ-Jeŋ Muu Fɛɛ Nɔyelɔ ni esa akɛ wɔbo lɛ toi ni wɔja lɛ. Nɔ ni ji enyɔ lɛ, esa akɛ wɔhe wɔye akɛ eji ‘mɛi ni taoɔ esɛɛ gbɛ lɛ anyɔmɔwolɔ.’ Nɔ ni fata anɔkwa hemɔkɛyeli he ji nɔmimaa ni anaa akɛ Nyɔŋmɔ susuɔ mɛi fɛɛ ni bɔɔ mɔdɛŋ ni amɛfee esuɔmɔnaa nii lɛ ahilɛkɛhamɔ he ni ewoɔ amɛnyɔmɔ. Kɛ́ okaseɔ Nyɔŋmɔ Wiemɔ lɛ daa ni okɛ mɛi ni boɔ lɛ toi lɛ bɔɔ lɛ, bo hu obaanyɛ oná hemɔkɛyeli ni baaha Nyɔŋmɔ ajɔɔ bo ni ejɛ suɔmɔ mli esusu ohe.

Ŋmɛnɛ lɛ, mɛi babaoo heɔ amɛyeɔ akɛ Nyɔŋmɔ susuuu nibii ni yaa nɔ yɛ adesai ashihilɛ mli lɛ ahe. Shi taakɛ wɔna lɛ, Biblia lɛ efee lɛ faŋŋ akɛ Nyɔŋmɔ susuɔ mɛi fɛɛ ni kɛ amɛnifeemɔi tsɔɔ akɛ amɛyɛ hemɔkɛyeli yɛ emli lɛ ahe waa. Eyɛ mli akɛ ŋmɛnɛ lɛ, bei pii lɛ, shihilɛ ni wɔkɛkpeɔ lɛ haa wɔyeɔ awerɛho, wɔhaoɔ, wɔnine nyɛɔ shi, ni wɔnuɔ dɔlɛ he waa moŋ, shi esaaa akɛ no haa wɔfeɔ shwɛm. Yehowa Nyɔŋmɔ susuɔ wɔhe. Yɛ anɔkwale mli lɛ, ejɛɔ suɔmɔ mli efɔ̃ɔ wɔnine koni wɔtsi wɔbɛŋkɛ lɛ koni eye ebua wɔ. Lalatsɛ lɛ kɛɛ akɛ: “Shɛ ojatsu lɛ ofɔ̃ Yehowa nɔ, ni lɛ eeehiɛ omli; eŋmɛŋ gbɛ gbi ko gbi ko ni jalɔ adidã.”—Lala 55:23.—w09 06/01-E.

[Shishigbɛ niŋmaa]

[Akrabatsa/Mfoniri ni yɔɔ baafa 23]

Ŋmalɛi ni Baawaje Hemɔkɛyeli ni Oyɔɔ akɛ Nyɔŋmɔ Susuɔ Ohe

“Yehowa yɔɔ nɛɛ, ehiŋmɛii kpaa shikpɔŋ muu lɛ fɛɛ nɔ, ni ejieɔ ehewalɛ kpo ehaa mɛi ni amɛtsui ehi kɛwula shi yɛ egbɛfaŋ lɛ.”—2 KRONIKA 16:9

“Okɛ mihiɛ yaafonui awo otɔ lɛ mli! Ani amɛbɛ owolo lɛ mli?” —LALA 56:9

“Yehowa ji mikwɛlɔ, nɔ ko nɔ ko ehiaŋ mi.”—LALA 23:1

“Bo ni oboɔ sɔlemɔ toi, bo oŋɔɔ heloo fɛɛ baa.”—LALA 65:3

“Kulɛ oootsɛ́, ni mahereo nɔ; ni oootao onine naa nitsumɔ lɛ sɛɛ gbɛ.”—HIOB 14:15

“Mɔ ni baa Nyɔŋmɔ ŋɔɔ lɛ, ja ehe eye akɛ eyɛ ni eji mɛi ni taoɔ esɛɛ gbɛ lɛ anyɔmɔwolɔ hu.” —HEBRIBII 11:6.

“Shɛ ojatsu lɛ ofɔ̃ Yehowa nɔ, ni lɛ eeehiɛ omli; eŋmɛŋ gbɛ gbi ko gbi ko ni jalɔ adidã.”—LALA 55:23