Sena Kuli Uutulanganya?

Sena kuli nomwakalendelelwa akuyeeya kuti kunyina muntu uumubikkila maano? Ambweni mwakali kuyeeya kuti nokuba kuti bantu bamwi bakalaazyi mapenzi aanu, tiibali kumubikkila maano.

NOTUBA amapenzi, tulakonzya kuyeeya kuti taakamani. Zimwi ziindi, tulakonzya kwaamba kuti mapenzi ngotujisi mapati kapati cakuti tatukonzyi kuliyumya. Eeci ncecicitika bunji bwaziindi ikuti naa twanyongana mumizeezo, twatyompwa, twacitikilwa ntenda mpati, twaciswa malwazi aatamani naa mapenzi amwi buyo. Tulakonzya kuyeeya kuti kunyina uukonzya kutugwasya. Sena ncobeni kuli uutulanganya?

“Leza Siluumbulizyo Loonse” Ulatulanganya

Mu Bbaibbele Leza waambwa kuti “Taateesu siluzyalo, Leza siluumbulizyo loonse.” (2 Ba-Korinto 1:3) Jehova Leza, ulizyi kuti tweelede kuumbulizyigwa. Ibbaibbele libelesya ibbala lya “kuumbulizya” munzila ziindene-indene, alimwi litusyomezya kuti Leza ulaazyi mapenzi eesu alimwi uyanda kutuumbulizya. Eeci citugwasya kusyoma kuti, Jehova Leza ulatulanganya nokuba kuti ibamwi balaazyi mapenzi ngotujisi pele tabatubikkili maano.

Magwalo alakonzya kutugwasya kubona kuti Jehova ulatulanganya. Ibbaibbele lyaamba kuti, “Meso aa-Jehova ali koonse koonse, alalanga basizibi ababotu boonse.” (Tusimpi 15:3) Mbubwenya buyo, kuli Jobu 34:21, tubala kuti: “Meso aa-Leza ali kumuntu; ulalanga ntaamo zyakwe zyoonse.” Jehova ulabona nzyotucita—zibotu azibi—alimwi ulaazyi mapenzi eesu, aboobo ulakonzya kucita cintu cili coonse ncabona kuti cilakonzya kutugwasya. Kaambo aaka kalakonzya kubonwa mumajwi ngaakaamba musinsimi Hanani ku Mwami Asa waku Juda aakuti: “Nkaambo Jehova, meso aakwe alalanga-langa moonse munyika, kuti aliyumye kukugwasya abo balulama mumoyo kumeso aakwe.”—2 Makani 16:7, 9.

Kuli kaambo akamwi ikapa kuti Jehova katulanga. Jesu wakaamba kuti: “Takukwe muntu uukonzya kuza kulindime Taata uwakandituma atamukwela.” (Johane 6:44) Jehova ulalingula moyo wamuntu kutegwa abone naa ulayanda kumuzyiba. Ikuti naa wabona kuti ulayanda, ulamugwasya kucita oobu. Mucikozyanyo, ku Dominican Republic, mukaintu umwi wakali kucibbadela kutegwa asilikwe bulwazi bwakkansa. Wakalomba Leza kutegwa amugwasye kujana bukombi bwakasimpe. Tiikwakainda ciindi, mulumi wakwe wakamuletela broshuwa yakuti, Ncinzi Leza Ncayanda Kulindiswe? * njaakapegwa naakaswaigwa mafwumo-fwumo a Kamboni wa Jehova. Mukaintu ooyu wakaibala broshuwa eeli kumane wakabona kuti oobu bwakali bwiinguzi bwamupailo wakwe kuli Leza. Wakazumina kwiiya Bbaibbele amukaintu umwi Kamboni, alimwi kaitanakwana myezi iili cisambomwe, wakalyaaba kuli Jehova akubbapatizyigwa.

 Mubbuku lya Intembauzyo, kuli mabala manji aakkomanisya aakalembwa abasintembauzyo bana Hebrayo, mbuli Mwami Davida, aapandulula Jehova mbwabalanganya babelesi bakwe. Ku Intembauzyo 56:8, Mwami Davida wakalomba Leza kuti: “Bika misozi yangu munsazi yako. Sa tiilembedwe mubbuku lyako?” Cikozyanyo eeci citondezya kuti Davida wakalizyi kuti Jehova wakalilizyi penzi lyakwe alimwi wakalizyi mbwaakali kulimvwa kumoyo. Jehova wakalaazyi mapenzi ngaakajisi Davida alimwi wakali kwayeeya. Ncobeni, Mulengi wesu ulabalanganya bantu boonse bacita kuyanda kwakwe, “abo balulama mumoyo kumeso aakwe.”

Cibalo acimwi camu Bbaibbele icipandulula Leza mbwatulanganya cijanika ku Intembauzyo 23. Majwi aantalisyo akozyanisya Leza kumweembezi siluyando: “Jehova ngumweembeli wangu, nsikabuli cintu.” Imweembezi waku Middle East ulazibikkila maano mbelele alimwi zyoonse wakazipa mazyina. Abuzuba ulaita mbelele aimwi alimwi akwiilanga-langa kutegwa abone naa ili acilonda. Ikuti wajana kuti ili acilonda, ulainanika musamu kutegwa cipone kufwambaana. Ikuti naa mbelele yaciswa, mweembezi ulaisinikizya kunywa musamu akwiilanzya mutwe mujulu kutegwa itooni akufwa. Eeci cikozyanyo citugwasya kubona Jehova mbwabalanganya aabo bamusyoma.

Mupailo a Bubuke —Zitondezya Kuti Leza Ulatulanganya

Intembauzyo nzyotwabala azimwi tiizyakalembwa mu Bbaibbele kuti katuzibala buyo akukomana. Zitugwasya kubona  babelesi ba Leza basyomeka bakaindi mbobakali kwaambila Jehova kuti abagwasye akumulumba camoyo woonse akaambo kakubasololela akubalongezya. Nzyobakali kwaamba babelesi ba Leza bakaindi zitondezya kuti bakali kusyoma kuti Leza wakali kubalanganya ncobeni. Kubala akutukkalila ansi twaambo ntobakali kwaamba kulakonzya kutugwasya kuti andiswe katumusyoma Leza. Masimpe, mupailo utondezya kuti Leza ulatulanganya.

Zimwi ziindi tulakonzya kukatazyigwa amapenzi cakuti tatuzyi mbotukonzya kupaila. Sena eeci cipa kuti Jehova atazyibi penzi lyesu? Lugwalo lwa Ba-Roma 8:26 lwaamba kuti: “Awalo Muuya ulatugwasya munkompamo zyesu. Nkaambo kukomba mbutweelede tatucizi pe, pele Muuya mwini ulatukombelezezya amitongelo iitaambiki.” Oolu lugwalo lutwaambila kuti mipailo yakasololelwa amuuya yababelesi ba Leza bakaindi ilakonzya kutondezya mbotulimvwa cakuti Jehova, ‘Uuswiilila mipailo’ ulakonzya kwiiswiilila akubona mbuli kuti ndiswe tupaila.—Intembauzyo 65:2.

Bulangizi bwabubuke ncitondezyo acimwi cakuti Leza ulamulanganya muntu aumwi. Jesu Kristo wakaamba kuti: “Ciindi ciyoosika ncobati kamvwe ijwi lyakwe boonse abali muzyuumbwe, bayoozwa mpoonya.” (Johane 5:28, 29) Ibbala lya Chigiliki lyakasandululwa kuti “zyuumbwe” lyakazwa kucciti lya Chigiliki lyaamba “kuyeekezya.” Litondezya kuti Leza ulakonzya kumuyeeya muntu mbwaakabede naakacili kupona.

Amuyeeye buyo, kutegwa Leza amubusye muntu wakafwide weelede kuti kamuzyi kabotu muntu ooyo, nkokuti mbwaakali kulibonya, tulengwa ntwaakajisi, bube bwakwe amizeezo yakwe yoonse! (Marko 10:27) Leza takonzyi kumuluba muntu nokuba kuti kwainda myaka minji. (Jobu 14:13-15; Luka 20:38) Aboobo, mbwaanga Jehova Leza ulibayeeyede alimwi ulibazyi mbobakabede bantu banji bakafwa, citondezya kuti ulatulanganya aumwi kumugama!

Jehova Nguupa Bulumbu

Ino ncinzi ncotweelede kucita kutegwa Leza katubikkila maano akutulanganya? Kusaanguna, tweelede kutondezya kuti tulamusyoma akumumvwida. Imwaapostolo Paulo wakaamba kaambo katondezya lusyomo mbolukonzya kupa kuti Leza katulanganya. Wakalemba kuti: “Kuti kakwiina lusyomo tacikonzeki kukonda Leza, nkaambo woonse muntu uuswena kulinguwe uleelede kuzumina kuti Leza mpali akuti nguupa cilumbo kulibaabo bamuyandaula”—Ba-Hebrayo 11:6.

Amubone kuti lusyomo lukonzya kumukkomanisya Leza lujatikizya zyintu zyobilo. Cakusaanguna, tweelede “kuzumina [naa kusyoma] kuti Leza mpali,” akuti ngo Muleli Mupati, ngotweelede kumvwida akukomba. Cabili, tweelede kusyoma kuti “nguupa cilumbo kulibaabo bamuyandaula.” Lusyomo lwini-lwini lujatikizya kusyoma kuti Leza ulababikkila maano boonse bacita kuyanda kwakwe akuti ulabapa bulumbu. Kwiinda mukwiiya Jwi lya Leza akuswaangana abaabo bamumvwida, andinywe mulakonzya kuba alusyomo lukonzya kupa kuti Leza amupe bulumbu akumulanganya.

Bantu banji mazuba aano basyoma kuti Leza tatubikkili maano. Pele mbuli mbotwabona, Ibbaibbele litondezya kuti Leza ulababikkila maano aabo bamusyoma ncobeni. Nokuba kuti mazuba aano kuli mapenzi manji aatukatazya, tatweelede kutyompwa pe. Jehova Leza ulatubikkila maano. Ulatwaambila kuti katumulomba kuti atugwasye. Sintembauzyo wakaamba kuti: “Bika makani aako oonse mumaanza aa-Jehova, lino ulakutabilila; lyoonse takooyoozuminina baluleme kuwida mumapenzi.”—Intembauzyo 55:22.

Bupanduluzi buyungizidwe

Kabbokesi/[Cifwanikiso icili apeeji 23]

Magwalo Aakonzya Kumugwasya Kusyoma Kuti Leza Ulamuyanda

“Nkaambo Jehova, meso aakwe alalanga-langa moonse munyika, kuti aliyumye kukugwasya abo balulama mumoyo kumeso aakwe.”—2 MAKANI 16:9

“Bika misozi yangu munsazi yako. Sa tiilembedwe mubbuku lyako?”—INTEMBAUZYO 56:8

“Jehova ngumweembeli wangu, nsikabuli cintu.”—INTEMBAUZYO 23:1

“Webo ooswiilila zikombyo, bantu boonse bayoosika kulinduwe.”—INTEMBAUZYO 65:2

“Noyoondiita njoovuwa, Kuti koyandisisya buumi mbowakalengede.”—JOBU 14:15

“Muntu uuswena kulinguwe uleelede kuzumina kuti Leza mpali akuti nguupa cilumbo kulibaabo bamuyandaula.”—BA-HEBRAYO 11:6

“Bika makani aako oonse mumaanza aa-Jehova, lino ulakutabilila; lyoonse takooyoozuminina baluleme kuwida mumapenzi.”—INTEMBAUZYO 55:22