Tumuppe Taayyo Qoppiyay Deˈii?

Nena gakkida metuwaa tumuppe eriya asi baynnabadan, maaddiyaabi baynnabadaaninne baddo gididabadan neeyyo siyetti erii? Qassi eti ne metuwaa eriyaaba gidikkokka, neessi tumuppe qoppennabadan siyetti erii?

METOY nuna gakkiyo wode, he metuwaappe kiyana danddayennabadan siyettana danddayees. Issi issitoo, nuna gakkiyaabay nuuni hegaappe aaruwan genccana danddayenna, keehippe azzanttiyaabanne bessennaba giidi kuuyanaukka danddayoos. Azzanoy, unˈˈissiyaabaynne wolqqaama daafay gakkiyo wodenne iita harggee oyqqiyo wode woykko hegaa malabay merettiyo wode, darotoo nuussi hegaadan siyettees. Minttettuwaa demmiyo sohoy erettennan ixxin, maaddiyaabinne hidooti baynnabadan nuussi siyettana danddayees. Tumuppe nuussi qoppiyay deˈii?

‘Minttetto Ubbaa Xoossay’ Qoppees

Geeshsha Maxaafay Xoossaa, “maarotettaa Aawaanne minttetto ubbaa Xoossaa” yaagidi qonccissees. (2 Qoronttoosa 1:3) A sunttay Yihoowa gidido Xoossay, nuussi minttettoy koshshiyoogaa erees. Geeshsha Maxaafay “minttetto” giya qaalaa xeetaappe dariya sohuwan dumma dumma ogiyan goˈettees; hegee, Xoossay nuna gakkiyaabaa eriyoogaa xalla gidennan nuna minttettanau koyiyoogaakka ammanettanaadan oottees. Hegaa eriyoogee, harati nuna gakkiya metuwaa erennaba woykko qoppennaba milatiyo wodekka, Xoossaa Yihooway eriyoogaanne qoppiyoogaa nuuni ammanettanaadan oottees.

Geeshsha Maxaafay Yihooway asaassi huuphiyan huuphiyan qoppiyoogaa qonccissidi yootees. Geeshsha Maxaafay: “GODAA aifeti ubbasaa xeelloosona; iitaa oottiyaageetakka lo77uwaa oottiyaageetakka be7oosona” yaagees. (Leemiso 15:3) Hegaadankka, Iyyooba 34:21n: “Xoossai asaa hemetaa xeellees; a tanggo ubbaakka wochchees” yaagiyaagaa nabbaboos. Yihooway nuuni oottiyoobaa, loˈˈo woy iita gidin beˈees; qassi i nuussi oottana bessiya aybanne oottanau, nu hanotaa loyttidi erees. Hananabaa yootiya Hanaani Yihudaa Kawuwaa Asassi yootidobay hegaa boxooxissees: “Ba kumetta wozanaappe GODAN ammanettiya asa minttettanau GODAA aifee sa7aa bollan ubbasaa xeellees.”—2 Hanidabaa Odiya 16:7, 9.

Yihooway ubbatoo nuna beˈiyo hara gaasoy deˈees. Yesuusi: “Tana kiittida ta Aawai taakko ehiido asappe attin, taakko yaanau danddayiya asi baawa” yaagidi qonccissiis. (Yohaannisa 6:44) Yihooway issi uri a loyttidi eranau koyiyaakkonne beˈanau, he uraa wozanaa loyttidi xomoosees. He uri hegaadan oottikko, i a maalaalissiya ogiyan maaddees. Leemisuwau, Dominikan Ripublik giyo biittan, issi maccaasiyaa Kansseriyaa harggiyau shuhettanau hosppitaaliyaa gelaasu. A tumu haymaanootiyaa demmanaadan bana maaddana mala Xoossaa minttada woossaasu. Hegaappe sohuwaara, he gallassi maallado ba soo yiida issi Yihoowa Markkay immido, Xoossay Nuuppe Koyiyoy Aybee? * yaagiya brooshuriyaa i azinay issi ehiis. Maccaasiyaa he broshuriyaa nabbabada, hegee Xoossay i woosaassi immido zaaro gidiyoogaa akeekaasu. A he Yihoowa Markkaara Geeshsha Maxaafaa xannaˈanau eeno gaasu; qassi usuppun aginappe guuxxiya wodiyan ba deˈuwaa Xoossaassi geppada xammaqettaasu.

Yihooway ba asaassi siiquwan qoppiyoogaa qonccissida Kawuwaa Daawita mala beni wode  Ibraawe mazamuraaweti yootido ufayssiya qaalata, Geeshsha Maxaafan Mazamure maxaafan demmoos. Mazamure 56:8n [NW]: Kawuwaa Daawiti: “Ta afuttaa ne ogoruwan dagaya. Eti ne mazggafan deˈokkonaa?” yaagidi Xoossaa woossidoogaa akeekoos. Issi alˈˈobaa ogoruwan yeggiyoogaara geeddarissidoogaappe akeekiyoogaadan, Daawiti ba tuggaa xalla gidennan hegee kaalettiyoobaakka Yihooway eriyoogaa akeekiis. Yihooway Daawita waayiyaa eriis; i afuxxanaadan oottida a wozanan siyettidabaa akeekiis. Nuna Medhidaagee, ba sheniyaa polanau baaxetiya, “kumetta wozanaappe GODAN ammanettiya” asaa naagiyoogee tuma.

Xoossay siiquwan qoppiyoogaa qonccissiya Geeshsha Maxaafan erettida hara qofay Mazamure 23n deˈiyaagaa. Doometta qofay Xoossaa: “GODAI ta henttanchchaa; taayyo aibinne paccenna” yaagidi, siiqiya henttanchan leemisees. Beni wode Israaˈeele heeran deˈiya henttanchay ba dorssatussi huuphiyan huuphiyan qoppees; ubba eta sunttan sunttan xeesees. Ubba galla, dorssata huuphiyan huuphiyan baakko xeesees; qassi siiquwan eta bosheretteesinne dorssay qohettidosay deˈikko xeellees. Qohettido soho demmikko, masunttay eesuwan paxanaadan zaytiyaa woy xaliyaa tiyees. Dorssay sakettikko, zinˈˈosan hayqqennaadan henttanchay wolqqan xaliyaa ushshanaunne tookkidi denttanau danddayees. Hegee, Yihooway baakko simmiyaageetuyyo qoppiyoogaa bessiya loˈˈo leemiso.

Woosaynne Dendduwaa Hidootay Xoossay Qoppiyoogau Naqaasha

Hageenne hara loˈˈo mazamureti Geeshsha Maxaafan xaafettidoy nuuni eta nabbabidi ufayttana xallaassa gidenna. Ha mazamureti beni wode deˈida, ammanettida Xoossaa ashkkarati Xoossaa maaduwaa koyiyoogaanne a  kaaletuwaunne a anjjuwau galatiyoogaa bessanau bantta wozanan siyettidabaa Yihoowayyo yootidoogaa bessoosona. Hegaa mala qofay, beni wode deˈida Xoossaa ashkkarati Xoossay etayyo qoppiyoogaa minttidi ammaniyoogaa qonccissoosona. Eti bantta wozanan siyettidabaa yootido he qofaa nabbabiyoogeenne wotti denttidi a qoppiyoogee Xoossaa xeelliyaagan nuuyyookka hegaadan siyettanaadan maaddana danddayees. Woossanaadan Xoossay nuussi immido maatay, i nuussi qoppiyoogau mino naqaasha.

Gidikkonne, issi issitoo nuuni woygidi woossanaakkokka erenna, wolqqaama metoy gakkees. Hegee Yihooway nuuni unˈˈettiyoogaa erennaadan oottii? Roome 8:26y he oyshaa: “Geeshsha Ayyaanai nu daafuraa maaddanau yees; aissi giikko, nuuni Xoossaa waati woossanau bessiyaakko erokko; shin Geeshsha ayyaanai ba huuphen asau haasayanau danddayettenna ooliyan nuuyyo gaannatees” yaagidi zaarees. Ha xiqisee beni wode deˈida, Xoossaa ashkkarati ayyaanay denttettin woossido woosay nuuyyo siyettiyaabaa qonccissana danddayiyoogaa bessees; yaatiyo gishshau, ‘woosaa siyiya’ Yihooway he woosaa nuuni woossidobadan oottidi ekkees.—Mazamure 65:2.

Dendduwaa hidootay, Yihooway asaassi huuphiyan huuphiyan qoppiyoogaa ammanttiya hara naqaasha. Yesuus Kiristtoosi: “Duufuwan de7iyaageeti a [Yesuusa] cenggurssaa siyiyo wodee yees. Siyidi eti duufuwaappe gaxi kiyana” yaagiis. (Yohaannisa 5:28, 29) ‘Duufuwaa’ geetettidi birshshettida Giriike qaalay “hassayissiyoogaa” giya birshshettay deˈiyo Giriike qaalaappe yiidaagaa. Hegee hayqqida bitanee ba deˈuwan oottidobaa Xoossay hassayiyoogaa bessiya qofaa oyqqiis.

Ane qoppa; issi ura hayquwaappe denttanau, Xoossay a meraa, i laattidonne tamaaridi demmido eeshshaanne a qofan deˈiyaabaa ubba, he uraabaa ubbabaa eranau koshshees! (Marqqoosa 10:27) SHaˈan qoodettiya layttay aadhi simminkka, he uraabaa Xoossay hassayees. (Iyyooba 14:13-15; Luqaasa 20:38) Yaatiyo gishshau, biilooniyan qoodettiya hayqqidaageeta xeelliyaagan Xoossaa Yihooway ubbabaa hassayees; hegee Xoossay nuussi huuphiyan huuphiyan qoppiyoogaa ammanttiya naqaasha!

Yihooway Woytiyaagaa

Xoossay siiquwan qoppiyoogeetanne naagiyoogeeta gidanau nuuni ay oottana bessii? Koyruwan nuuni an ammanettiyoogaanne ayyo azazettiyoogaa, giishin a ammaniyoogaa bessana koshshees. Kiitettida PHauloosi ammaniyoogaanne Xoossaa naaguwaa demmiyoogaa giddon deˈiya gaytotettaa qonccissiis. I: “Ammanoi bainnan ooninne Xoossaa ufaissanau danddayenna; aissi giikko, Xoossaakko yiya ooninne Xoossai de7iyoogaanne bana koyiyaageetuyyo woituwaa immiyoogaa ammananau koshshees” yaagidi xaafiis.—Ibraawe 11:6.

Xoossaa ufayssiya ammanoy naaˈˈubaa gujjiyoogaa akeeka. Koyruwan, “Xoossai de7iyoogaanne” nuuni azazettananne goynnana bessiyo, i Ubbaappe Bollaara nuna Haariyaagaa gidiyoogaa ammanana bessees. Naaˈˈanttuwan, i “bana koyiyaageetuyyo woituwaa [immiyaagaa]” gidiyoogaa nuuni ammanana bessees. Tumu ammanoy, Xoossay a halchuwaa oottanau wozanappe koyiya ubbau qoppiyoogaanne eta woytiyoogaa ammaniyoogaa gujjees. Xoossaa Qaalaa xannaˈiyoogaaninne ayyo azazettiyaageetuura issippetettaa medhiyoogan, Xoossaa woytuwaanne a siiqo naaguwaa demissiya ammanoy neessikka deˈana danddayees.

Ha wodiyan daro asay Xoossay asaa allaalliyau qoppenna giidi ammanees. SHin nuuni beˈidoogaadan, Xoossay tumuppe banan ammaniyoogaa bessiyaageetussi keehippe qoppiyoogaa Geeshsha Maxaafay geeshshidi yootees. Ha wodiyan deˈoy darotoo unˈˈoy, hirggay, azzanoynne qohoy kumidoogaa gidikkokka, nuuni hidootaa qanxxana koshshenna. Xoossaa Yihooway nuussi qoppees. Nuuni maaduwau akko xeellanaadan siiquwan shoobbees. Mazamuraawee: “Ne toohuwaa Xoossan wotta; i nena zemppissana. Xoossai audenne xilloti shabbirettanaadan oottenna” yaagiis.—Mazamure 55:22.

[Tohossa qofata]

[Sinttaa 122n diya misiliyaa]

Xoossay Neessi Qoppiyaagaa Gidiyoogau Ne Ammanuwaa Minttiya Xiqiseta

“Ba kumetta wozanaappe GODAN ammanettiya asa minttettanau GODAA aifee sa7aa bollan ubbasaa xeellees.”—2 ODIYA 16:9

“Ta afuttaa ne ogoruwan dagaya. Eti ne mazggafan deˈokkonaa?”—MAZAMURE 56:8

“GODAI ta henttanchchaa; taayyo aibinne paccenna.”—MAZAMURE 23:1

“Abeet woosaa siyiyaagoo, asai ubbai neekko yaana.”—MAZAMURE  65:2

“Neeni medhdhido tanakka be7anau neeni laamotiyo wode, neeni tana xeesana; xeesin taani neeyyo koyana.”

“Xoossaakko yiya ooninne Xoossai de7iyoogaanne bana koyiyaageetuyyo woituwaa immiyoogaa ammananau koshshees.”—IBRAAWE 11:6

“Ne toohuwaa Xoossan wotta; i nena zemppissana. Xoossai audenne xilloti shabbirettanaadan oottenna.”—MAZAMURE 55:22