Magin Maigot Para sa Harong ni Jehova!

“Mapapano ako nin kaigotan para sa saimong harong.”—JUAN 2:17.

1, 2. Sa templo kan 30 C.E., ano an ginibo ni Jesus, asin taano?

IMAHINARA an eksena. Panahon kaidto nin Paskua, 30 C.E. Anom na bulan bago kaiyan, pinonan ni Jesus an saiyang ministeryo sa daga. Nagpasiring sia ngonyan sa Jerusalem. Duman sa templo sa Patyo kan mga Hentil, naabotan ni Jesus “an mga nagpapabakal nin mga baka asin karnero patin salampati saka an mga nangongomisyon sa kuarta sa saindang mga tukawan.” Paagi sa pagwasiwas sa sarong latigo na gibo sa lubid, inalaw nia paluwas an gabos na hayop, asin siertong sinundan iyan kan mga negosyante. Iinula man ni Jesus an mga sinsilyo kan mga pararibay nin kuarta asin ibinalintong an saindang mga lamesa. Pinagbotan nia an mga nagtitinda nin mga salampati na kuanon an mga bagay-bagay ninda asin humale.—Juan 2:13-16.

² An ginibo ni Jesus nagpapaheling nanggad kan pagmalasakit nia para sa templo. “Dai na nindo paggibohon an harong kan sakong Ama na harong nin negosyo!” an ipinagboot nia. Mantang pinagmamasdan kan mga disipulo ni Jesus an mga pangyayaring ini, nagirumdoman ninda an mga tataramon na isinurat kan salmistang si David dakol na siglo bago kaini: “Mapapano ako nin kaigotan para sa saimong harong.”—Juan 2:16, 17; Sal. 69:9.

3. (a) Ano an kaigotan? (b) Ano an puede niatong ihapot sa satong sadiri?

³ An pagmalasakit asin kaigotan ni Jesus para sa harong nin Dios an nagpahiro sa saiya. An kaigotan iyo an “entusiasmo asin makosog na interes na gibohon an sarong bagay.” Sa ika-21 siglong ini, labing pitong milyon na Kristiano an nagpapaheling nin pagmalasakit para sa harong nin Dios. Bilang indibiduwal, puedeng ihapot niato, ‘Paano ko daw madudugangan an sakong personal na kaigotan para sa harong ni Jehova?’ Tanganing tabangan kitang masimbag iyan, siyasaton nguna niato kun ano an harong nin Dios ngonyan. Dangan pag-oolayan niato an mga halimbawa sa Biblia nin maimbod na mga tawo na nagpaheling nin kaigotan para dian. An mga halimbawa ninda isinurat “sa pagtokdo sa sato” asin puedeng magpahiro sa sato na magkaigwa nin orog pa nganing kaigotan.—Roma 15:4.

An Harong nin Dios—Kaidto Asin Ngonyan

4. Nagserbi bilang ano an templo na itinogdok ni Salomon?

⁴ Sa suanoy na Israel, an harong nin Dios iyo an templo sa Jerusalem. Siempre, si Jehova dai man literal na nag-istar duman. Sia nagsabi: “An kalangitan iyo an sakong trono, asin an daga iyo an sakong tungtongan. Haen, kun siring, an harong na ikakatogdok nindo para sa sako, asin haen, kun siring, an lugar bilang pahingaloan para sa sako?” (Isa. 66:1) Minsan siring, an templo na itinogdok durante kan paghade ni Salomon nagserbi bilang pinakasentro kan pagsamba ki Jehova, na duman ginigibo an mga pagpamibi.—1 Ha. 8:27-30.

5. An pagsamba sa templo ni Salomon nagserbing ladawan nin anong areglo sa presenteng panahon?

⁵ Ngonyan, an harong ni Jehova bakong sarong edipisyo sa Jerusalem o saen man na lugar. Imbes, iyan an areglo nin pagdolok niato sa saiya sa pagsamba basado sa atang na pantubos ni Cristo. An gabos na maimbod na lingkod nin Dios sa daga nagkakasararo tanganing sambahon si Jehova sa espirituwal na templong ini.—Isa. 60:4, 8, 13; Gibo 17:24; Heb. 8:5; 9:24.

6. Sairisay na hade sa Juda an nagpaheling nin pambihirang kaigotan para sa tunay na pagsamba?

⁶ Pagkatapos na mabanga an Israel kaidtong 997 B.C.E., 4 sa 19 hade na namahala sa Juda, sa timog na parte, an nagpaheling nin pambihirang kaigotan para sa tunay na pagsamba. Sinda si Asa, Josafat, Ezequias, asin Josias. Anong  mahalagang mga leksion an manonodan niato sa mga halimbawa ninda?

An Bilog na Pusong Paglilingkod Nagbubunga nin mga Bendisyon

7, 8. (a) Anong klase nin paglilingkod an binebendisyonan ni Jehova? (b) Anong nagpapatanid na leksion an manonodan niato sa halimbawa ni Hadeng Asa?

⁷ Durante kan paghade ni Hadeng Asa, nagsugo si Jehova nin mga propeta tanganing giyahan sa kaimbodan an Saiyang nasyon. Halimbawa, sinasabi sa sato kan Biblia na naghinanyog si Asa ki propeta Azarias, na aki ni Oded. (Basahon an 2 Cronica 15:1-8.) An mga repormang ginibo ni Asa nagpangyaring magkasararo an banwaan nin Juda saka an kadakol na tawong hale sa kahadean nin Israel na nagduruman tanganing makiiba sa dakulang pagtiripon sa Jerusalem. Iriba nindang ipinahayag an determinasyon ninda na maimbod na sumamba ki Jehova. Mababasa niato: “Suminumpa sinda ki Jehova na may makosog na tingog asin may magayagayang kururahaw asin may mga trumpeta asin may mga amodyong. Asin an bilog na Juda naggayagaya huli sa sinumpaan; huli ta sa bilog nindang puso na sinda suminumpa asin sa bilog nindang kawilihan na sinda naghanap sa saiya, kaya itinogot nia na sia makua ninda; asin padagos sindang tinawan ni Jehova nin kapahingaloan sa bilog na lugar.” (2 Cron. 15:9-15) Siertong bebendisyonan man kita ni Jehova kun bilog na puso kitang naglilingkod sa saiya.—Mar. 12:30.

⁸ Makamomondo, kan huri ikinaanggot ni Asa an pagtatanos sa saiya ni Hanani na parahula. (2 Cron. 16:7-10) Ano an reaksion niato kun si Jehova nagtatao sa sato nin sadol o paggiya paagi sa Kristianong kamagurangan? Tolos-tolos daw niatong isinasapuso an saindang basado sa Kasuratan na hatol asin linilikayan na mahulog sa siod nin pagkaanggot?

9. Anong huma an napaatubang ki Josafat asin sa Juda, asin ano an nagin reaksion ninda?

⁹ Si Josafat namahala bilang hade sa Juda durante kan ikasampulong siglo B.C.E. Sia asin an bilog na Juda napaatubang sa huma kan pinagsararong puersa nin Amon, Moab, asin kan mga taga duman sa mabukid na rehion nin Seir. Minsan ngani takot an hade, ano an ginibo nia? Sia asin an saiyang mga tawohan, kaiba an saindang mga agom asin mga aki, nagtiripon sa harong ni Jehova tanganing mamibi. (Basahon an 2 Cronica 20:3-6.) Kaoyon kan mas naenot na mga sinabi ni Salomon sa dedikasyon kan templo, si Josafat nakimaherak ki Jehova sa nakakapahirong paagi: “O samuyang Dios, dai ka daw maghohokom sa sainda? Huli ta kami mayo nin kosog sa atubangan kan dakulang kadaklan na ini na minadatong tumang sa samo; asin kami mismo dai nakakaaram kun ano an dapat niamong gibohon, alagad an samong mga mata nakaheling sa saimo.” (2 Cron. 20:12, 13) Pakapamibi ni Josafat, duman “sa tahaw kan kongregasyon,” pinahiro kan espiritu ni Jehova si Jahaziel, sarong Levita, na magtaram nin pagranga na nagtao nin kompiansa sa banwaan.—Basahon an 2 Cronica 20:14-17.

10. (a) Paano nag-ako nin paggiya si Josafat asin an Juda? (b) Paano niato ikakapaheling an pagpahalaga sa paggiya na itinatao sa sato ni Jehova ngonyan?

¹⁰ Iyo, kaidto, si Josafat asin an kahadean nin Juda nag-ako nin paggiya hale ki Jehova paagi ki Jahaziel. Ngonyan, nag-aako kita nin pagranga asin paggiya paagi sa grupong maimbod asin mapagmansay na oripon. Tunay nanggad, gusto niato pirmeng makikooperar asin magpaheling nin paggalang sa nombradong kamagurangan, na nagmamaigot sa pagpastor sa sato asin pagpaotob kan mga paggiya kan “maimbod asin mapagmansay na oripon.”—Mat. 24:45; 1 Tes. 5:12, 13.

11, 12. Anong leksion an manonodan niato sa nangyari ki Josafat asin sa Juda?

¹¹ Kun paanong nagtiripon si Josafat asin an saiyang mga kahimanwa tanganing hagadon an paggiya ni Jehova, dai man niato pagpabayaan an regular na pag-atender sa mga pagtiripon kan kongregasyon kaiba kan satong mga tugang. Kun beses, kun kita nasa masakit na mga kamugtakan, na dai aram kun ano an gigibohon, sunodon niato an marahayon na halimbawa na ipinaheling ni Josafat saka kan mga taga Juda asin dumolok kita ki Jehova paagi sa pamibi na lubos na nagtitiwala sa Saiya. (Tal. 3:5, 6; Fil. 4:6, 7) Dawa kun kita napapasuway, an satong mga pakimaherak ki Jehova nagpapangyaring makasaro niato an “bilog na kasararoan nin [satong] mga tugang sa kinaban.”—1 Ped. 5:9.

¹² Sinunod ni Josafat asin kan saiyang mga kahimanwa an paggiya na itinao nin Dios ki Jahaziel. Na may anong resulta? Sinda nanggana sa  suminunod na ralaban asin nagbaralik sa Jerusalem na “may paggayagaya” asin “may mga instrumentong de kuerdas asin may mga arpa asin may mga trumpeta pasiring sa harong ni Jehova.” (2 Cron. 20:27, 28) Iginagalang man niato an paggiya ni Jehova na itinatao paagi sa Saiyang “maimbod asin mapagmansay na oripon” asin minaiba kita sa pag-omaw sa Saiya.

Ingatan an Satong mga Tiriponan

13. Anong gibohon an pinonan ni Ezequias sa pagpopoon kan paghade nia?

¹³ Sa enot na bulan kan paghade ni Ezequias, ipinaheling nia an saiyang kaigotan para sa pagsamba ki Jehova paagi sa pagbukas liwat asin paghirahay sa templo. Inorganisar nia an mga saserdote asin Levita tanganing linigan an harong nin Dios. Ginibo ninda iyan sa laog nin 16 na aldaw. (Basahon an 2 Cronica 29:16-18.) An trabahong iyan nagpapagirumdom sa sato kan pagmantenir asin paghirahay na nagpapadanay sa satong mga tiriponan sa kamugtakan na nagpapaheling kan satong maigot na pagsamba ki Jehova. Bako daw na nakadangog na kamo nin mga eksperyensia na nagpapaheling na napapahanga an mga tawo sa kaigotan kan mga tugang na lalaki asin babae na nakikikabtang sa siring na gibohon? Iyo, an saindang mga paghihingoa nagtatao nin dakulang kaomawan ki Jehova.

14, 15. Anong gibohon ngonyan an nagtatao nin dakulang kaomawan ki Jehova? Magtao nin mga halimbawa.

¹⁴ Sa sarong siudad sa amihanan na Inglatera, kontra an sarong lalaki sa pinaplanong paghirahay sa Kingdom Hall na kataed kan saiyang propiedad. An mga tugang sa lugar na iyan nagpaheling nin kabootan. Kan maheling ninda na kaipuhan na hirahayon an paril sa pag-oltanan kan Kingdom Hall asin kan propiedad kan kataed, nag-alok sindang gibohon iyan na daing bayad. Mahigos na ginibo ninda iyan asin, sa katunayan, sinalidahan ninda an kadaklan na parte kan paril. Marahayon nanggad an ginibo ninda kaya nagbago an saboot kan kataed. Ngonyan nagmamato na sia kan Kingdom Hall bilang tabang nia.

¹⁵ An banwaan ni Jehova nakikikabtang sa pambilog na kinaban na pagtogdok. An lokal na mga boluntaryo gikan sa boot na nakikiiba sa bilog na panahon na internasyonal na mga lingkod tanganing magtogdok bako sanang nin mga Kingdom Hall kundi pati mga Assembly Hall asin erokan na Bethel. Si Sam sarong inhenyero na eksperto sa heating, ventilation, asin air-conditioning. Sia asin an agom niang si Ruth nakaduman na sa nagkapirang nasyon sa Europa asin Aprika tanganing tumabang sa mga proyekto nin pagtogdok. Saen man sinda magduman, naoogma man sindang maghulit kaiba an lokal na mga kongregasyon.  Ipinaliwanag ni Sam kun ano an nagpahiro sa saiya na makikabtang sa siring na internasyonal na mga proyekto: “Nadagka ako kan iba na naglilingkod sa mga erokan na Bethel sa laen-laen na nasyon. Maheling ko sana an saindang kaigotan asin kagayagayahan talagang napapahiro na ako na booton ko man na maglingkod sa paaging ini.”

Kuyogon an mga Instruksion nin Dios

16, 17. Sa anong espesyal na aktibidad entusiastikong nakikabtang an banwaan nin Dios, asin may anong resulta?

¹⁶ Apuera sa paghirahay kan templo, ibinalik ni Ezequias an taonan na selebrasyon nin Paskua na ipinagboot ni Jehova. (Basahon an 2 Cronica 30:1, 4, 5.) An bilog na nasyon—pati an mga nasa kahadean sa amihanan—inimbitaran ni Ezequias asin kan mga nag-iistar sa Jerusalem na mag-atender. An mga paradara nin surat marikas na naglibot sa nasyon tanganing manao nin mga imbitasyon.—2 Cron. 30:6-9.

¹⁷ Kan nakaagi pa sanang mga taon, nakikabtang kita sa medyo kaagid na gibohon. Naggamit kita nin magayon na inimprentang mga imbitasyon tanganing imbitaran an mga tawo sa satong mga teritoryo na makipagtipon sa sato sa pagselebrar kan Pamanggihan kan Kagurangnan, bilang pagkuyog sa pagboot ni Jesus. (Luc. 22:19, 20) Kita nag-ako nin mga instruksion sa satong mga Pagtiripon sa Paglilingkod asin nakikabtang sa gibohon na ini na may kaigotan. Asin binendisyonan nanggad ni Jehova an paghihingoang ini! Iyo nanggad, kan nakaaging taon, mga pitong milyon sa sato an nagdistribwir nin mga imbitasyon, asin may total na 17,790,631 katawo an nag-atender!

18. Taano ta mahalagang marhay sa saindo an kaigotan para sa tunay na pagsamba?

¹⁸ Sinabi manongod ki Ezequias: “Sia nagtiwala ki Jehova na Dios nin Israel; asin pakalihis nia mayo na nin nagin arog nia sa gabos na hade sa Juda, dawa idtong nagkaerenot sa saiya. Asin sia padagos na nagdanay ki Jehova. Dai sia suminuhay sa pagsunod sa saiya, kundi nagpadagos sia sa pag-otob sa saiyang mga togon na ipinagboot ni Jehova ki Moises.” (2 Ha. 18:5, 6) Logod na magin arog man kita kaiyan. An satong kaigotan para sa harong nin Dios makakatabang sa sato na ‘padagos na magdanay ki Jehova,’ na may paglaom na mabuhay na daing katapusan.—Deut. 30:16.

Tolos-Tolos na Maghimate sa Paggiya

19. Anong maigot na paghihingoa an ginigibo sa panahon nin Memorial?

¹⁹ Kan si Josias mamahala bilang hade, iinareglo man nia na selebraron an Paskua, na naggibo nin detalyadong mga preparasyon para dian. (2 Ha. 23:21-23; 2 Cron. 35:1-19) Sinisierto man niato na kita mag-andam na marhay para sa mga pandistritong kombension, mga pansirkitong asamblea, mga aldaw nin espesyal na asamblea, saka Memorial. An mga tugang sa nagkapirang nasyon isinasapeligro pa ngani an saindang buhay tanganing magtiripon para sa paggirumdom kan kagadanan ni Cristo. Sinesegurado kan maigot na kamagurangan na mayong malingawan na miembro kan kongregasyon. An mga may edad na asin an mga maluya an hawak tinatabangan na magin presente sa okasyon na iyan.

20. (a) Ano an nangyari durante kan paghade ni Hadeng Josias, asin ano an nagin reaksion nia? (b) Anong leksion an gusto niatong isapuso?

²⁰ Durante kan paghirahay sa templo na inorganisar ni Hadeng Josias, “nakua [kan Halangkaw na Saserdoteng si Hilcias] an libro kan ley ni Jehova paagi sa kamot ni Moises.” Itinao nia iyan sa sekretaryo kan hade na si Safan, na nagpoon man na basahon ki Josias an laog kaiyan. (Basahon an 2 Cronica 34:14-18.) Ano an nagin epekto? Tolos-tolos na ginisi kan hade an saiyang gubing huli sa kamondoan asin ininstruksionan an mga lalaki na makihumapot ki Jehova. Paagi ki propetisa Hulda, nagtao an Dios nin mensahe na kinokondenar an nagkapira sa relihiosong mga kaugalean na ginigibo sa Juda. Pero, naheling an marahay na mga paghihingoa ni Josias na haleon an idolatrosong mga kaugalean, asin sia nagdanay na  inooyonan ni Jehova sa ibong kan mga kapahamakan na ihinulang mangyayari sa nasyon sa kabilogan. (2 Cron. 34:19-28) Ano an manonodan niato digdi? Sierto na an satong kamawotan kapareho kan ki Josias. Gusto niato na maghimate tolos-tolos sa paggiya ni Jehova, na isinasapuso an nagpapatanid na halimbawa kan puedeng mangyari kun totogotan niato an apostasiya asin pagkabakong maimbod na makaolang sa satong pagsamba. Asin makakasierto kita na hehelingon ni Jehova na may pag-oyon an satong kaigotan para sa tunay na pagsamba, siring kan ginibo nia ki Josias.

21, 22. (a) Taano ta maninigo kitang magpaheling nin kaigotan para sa harong ni Jehova? (b) Ano an pag-oolayan niato sa sunod na artikulo?

²¹ An apat na hadeng iyan sa Juda—si Asa, Josafat, Ezequias, asin Josias—nagtao nin marahay na mga halimbawa sa sato sa pagigin maigot para sa harong nin Dios asin sa pagsamba sa saiya. An kaigotan niato maninigo na magpahiro man sa sato na magtiwala ki Jehova asin gibohon an satong pinakamakakaya para sa pagsamba sa saiya. Tunay nanggad na madonong asin nagtatao nin kaogmahan an pagkuyog sa mga instruksion nin Dios saka paghimate sa mamomoton na pangangataman asin pagtatanos na inaako niato paagi sa kongregasyon asin kamagurangan.

²² An sunod na artikulo isesentro an satong atension sa kaigotan para sa ministeryo sa langtad asin makakadagka iyan sa mga hoben na maglingkod na may kaigotan sa satong mamomoton na Ama. Pag-oolayan man niato kun paano niato malilikayan an saro sa nakakaraot na gayong mga impluwensia ni Satanas. Mantang may kaigotan niatong hinihimate an gabos na siring na pagirumdom hale ki Jehova, sinusunod niato an halimbawa kan Aki mismo ni Jehova, si Jesus, na manongod sa saiya sinabi: “Napano ako nin biyong kaigotan para sa saimong harong.”—Sal. 69:9; 119:111, 129; 1 Ped. 2:21.

Nagigirumdoman daw Nindo?

• Anong klase nin paglilingkod an binebendisyonan ni Jehova, asin taano?

• Paano niato ikakapaheling an pagtitiwala ki Jehova?

• Paano kita mapapahiro nin kaigotan na kuyogon an mga instruksion nin Dios?

[Mga Hapot Para sa Pag-adal]

[Mga Ritrato sa pahina 9]

Paano si Asa, Josafat, Ezequias, asin Josias nagpaheling nin kaigotan para sa harong ni Jehova?