Magmasiboton Alang sa Balay ni Jehova!
Magmasiboton Alang sa Balay ni Jehova!
“Ang kasibot alang sa imong balay maglamoy kanako.”—JUAN 2:17.
1, 2. Unsay gibuhat ni Jesus sa templo niadtong 30 K.P., ug ngano?
HANDURAWA ang esena. Panahon kadto sa Paskuwa, 30 K.P. Unom ka bulan una pa niana, gisugdan ni Jesus ang iyang yutan-ong ministeryo. Niining tungora nagpaingon siya sa Jerusalem. Didto sa templo, sa Sawang sa mga Hentil, nakita ni Jesus ang “mga namaligyag mga baka ug mga karnero ug mga salampati ug ang mga magpapatigayon sa salapi sa ilang mga lingkoranan.” Gamit ang latigo nga pisi iyang giabog ang tanang mananap, ug siyempre ang mga magpapatigayon misunod kanila. Giyabo usab ni Jesus ang mga sensilyo sa mga tig-ilis ug salapi ug gipanglintuwad ang ilang mga lamesa. Iyang gipapahawa ang namaligyag mga salampati.—Juan 2:13-16.
2 Ang gibuhat ni Jesus nagpakita sa iyang dakong kahangawa alang sa templo. “Ihunong na ninyo ang paghimo sa balay sa akong Amahan nga balay sa mga tinda!” siya nagsugo. Samtang nakita sa mga tinun-an ni Jesus kining hitaboa, ilang nahinumdoman ang mga pulong nga gisulat sa salmistang si David daghang siglo nang milabay: “Ang kasibot alang sa imong balay maglamoy kanako.”—Juan 2:16, 17; Sal. 69:9.
3. (a) Unsa ang kasibot? (b) Unsay atong ikapangutana sa atong kaugalingon?
3 Ang kahangawa ug kasibot ni Jesus alang sa balay sa Diyos nagpalihok kaniya sa pagbuhat niana. Ang kasibot nagkahulogag “kahinam ug dulot nga interes sa pagkab-ot sa usa ka butang.” Niining ika-21ng siglo, kapin sa pito ka milyong Kristohanon ang nagpasundayag ug kahangawa alang sa balay sa Diyos. Ang matag usa kanato makapangutana tingali, ‘Sa unsang paagi ako mahimong mas masiboton alang sa balay ni Jehova?’ Aron matabangan kita sa pagtubag niana, susihon una nato kon unsa ang balay sa Diyos karon. Dayon atong tagdon ang mga ehemplo diha sa Bibliya sa matinumanong mga tawo nga nagpasundayag ug kasibot alang niana. Ang ilang ehemplo gisulat “alang sa pagtudlo kanato” ug makatabang kanato nga mahimong mas masiboton.—Roma 15:4.
Balay sa Diyos—Kaniadto ug Karon
4. Unsay katuyoan sa templo nga gitukod ni Solomon?
4 Sa karaang Israel, ang balay sa Diyos mao ang templo sa Jerusalem. Siyempre, si Jehova dili literal nga mipuyo didto. Siya miingon: “Ang mga langit mao ang akong trono, ug ang yuta mao ang tumbanan sa akong tiil. Nan, asa man ang balay nga inyong matukod alang kanako, ug nan, asa man ang dapit ingong dapit-pahulayan alang kanako?” (Isa. 66:1) Bisan pa niana, ang templo nga gitukod panahon sa pagmando ni Solomon nagsilbing sentro sa pagsimba kang Jehova, diin gitanyag ang mga pag-ampo.—1 Hari 8:27-30.
5. Unsang modernong-adlaw nga kahikayan ang gihulagwayan sa pagsimba didto sa templo ni Solomon?
5 Sa pagkakaron, ang balay ni Jehova dili literal nga tinukod nga nahimutang sa Jerusalem o sa ubang dapit. Hinunoa, kana maoy kahikayan nga kita makaduol kaniya sa pagsimba pinasukad sa halad lukat ni Kristo. Ang tanang matinumanong mga alagad sa Diyos dinhi sa yuta nagkahiusa sa pagsimba kang Jehova niining espirituwal nga templo.—Isa. 60:4, 8, 13; Buh. 17:24; Heb. 8:5; 9:24.
6. Kinsa nga mga hari sa Juda ang nagpasundayag ug talagsaong kasibot alang sa matuod nga pagsimba?
6 Human mabahin ang Israel niadtong 997 W.K.P., 4 sa 19 ka hari nga nagmando sa Juda, ang habagatang bahin, ang nagpasundayag ug talagsaong kasibot alang sa matuod nga pagsimba. Sila mao si Asa, Jehosapat, Ezequias, ug Josias. Unsang hinungdanong mga pagtulon-an ang atong makat-onan gikan sa ilang mga ehemplo?
Bug-os-Kasingkasing nga Pag-alagad Nagdalag mga Panalangin
7, 8. (a) Unsang matanga sa pag-alagad ang panalanginan ni Jehova? (b) Unsang pasidaan ang atong makat-onan gikan kang Haring Asa?
7 Panahon sa pagmando ni Haring Asa, si Jehova nagpadalag mga manalagna sa paggiya sa Iyang katawhan aron sila makapabiling matinumanon. Pananglitan, ang Bibliya nag-ingon nga si Asa naminaw sa manalagnang si Azarias, nga anak ni Oded. (Basaha ang 2 Cronicas 15:1-8.) Ang reporma nga gihimo ni Asa naghiusa sa katawhan sa Juda maingon man sa daghang katawhan gikan sa gingharian sa Israel nga nanglugsong aron moduyog sa dakong panagkatigom sa Jerusalem. Ilang gipahayag ang ilang determinasyon nga magmaunongon sa pagsimba kang Jehova. Atong mabasa: “Sila nanumpa kang Jehova uban sa makusog nga tingog ug uban sa malipayong pagsinggit ug sa mga trompeta ug sa mga budyong. Ug ang tibuok Juda nagmaya tungod sa butang nga gipanumpa; kay uban sa bug-os nilang kasingkasing nga sila nanumpa ug uban sa bug-os nilang kahimuot nga sila nangita kaniya, mao nga iyang gitugotan nga siya makaplagan nila; ug si Jehova nagpadayon sa paghatag kanila ug pahulay sa tibuok palibot.” (2 Cron. 15:9-15) Tinong panalanginan usab kita ni Jehova kon kita bug-os-kasingkasing nga mag-alagad kaniya.—Mar. 12:30.
8 Ikasubo nga sa ulahi si Asa nasuko sa dihang gibadlong siya ni Hanani nga tigpatin-aw sa panan-awon. (2 Cron. 16:7-10) Unsay atong reaksiyon kon si Jehova mohatag kanatog tambag o mga instruksiyon pinaagi sa mga ansiyano? Ato bang ipadapat dayon ang ilang tambag nga gipasukad sa Kasulatan ug likayan ang pagkasuko?
9. Unsang hulga ang giatubang ni Jehosapat ug sa Juda, ug unsay ilang gibuhat?
9 Si Jehosapat naghari sa Juda sa ikanapulo nga siglo W.K.P. Siya ug ang tibuok Juda nag-atubang sa hulga sa nagkahiusang puwersa sa Ammon, Moab, ug sa mga tawo sa bukirong rehiyon sa Seir. Bisan tuod nahadlok ang hari, unsay iyang gibuhat? Siya ug ang iyang katawhan, hasta ang ilang mga asawa ug mga bata, nagtigom diha sa balay ni Jehova aron sa pag-ampo. (Basaha ang 2 Cronicas 20:3-6.) Susama sa gipamulong ni Solomon atol sa pagpahinungod sa templo, si Jehosapat nangaliyupo kang Jehova: “Oh among Diyos, dili ba ikaw magpahamtang ug paghukom nganha kanila? Kay dinhi kanamo walay gahom atubangan niining dakong panon sa katawhan nga mianhi batok kanamo; ug wala kami mahibalo kon unsay angay namong buhaton, apan ang among mga mata gipunting nganha kanimo.” (2 Cron. 20:12, 13) Human sa pag-ampo ni Jehosapat, didto “sa taliwala sa kongregasyon,” ang espiritu ni Jehova nagpalihok kang Jahaziel, nga usa ka Levihanon, sa pagsultig mga pulong sa paghupay nga naghatag kaisog sa katawhan.—Basaha ang 2 Cronicas 20:14-17.
10. (a) Sa unsang paagi si Jehosapat ug ang Juda nakadawat ug mga instruksiyon? (b) Sa unsang paagi atong ikapakita ang apresasyon sa mga instruksiyon nga gihatag ni Jehova kanato karon?
10 Oo, niadtong panahona, si Jehosapat ug ang gingharian sa Juda gihatagan ni Jehova ug mga instruksiyon pinaagi kang Jahaziel. Karon, kita makadawat ug paghupay ug mga instruksiyon pinaagi sa matinumanon ug maalamong ulipon. Tino nga buot gayod natong mokooperar ug magpakitag pagtahod sa tinudlong mga ansiyano, kinsa naghago sa pagbantay kanato ug sa pagpatuman sa mga instruksiyon sa “matinumanon ug maalamong ulipon.”—Mat. 24:45; 1 Tes. 5:12, 13.
11, 12. Unsay atong makat-onan sa nahitabo kang Jehosapat ug sa Juda?
11 Sama kang Jehosapat ug sa iyang katawhan nga nagtigom aron sa pagpangayo sa giya ni Jehova, kinahanglang kanunay kitang motambong sa mga tigom sa kongregasyon kauban sa atong mga igsoon. Kon kita makasinatig kalisdanan ug wala mahibalo kon unsay buhaton, atong sundon ang maayong ehemplo nga gipakita ni Jehosapat ug sa katawhan sa Juda ug modangop kang Jehova pinaagi sa pag-ampo uban ang bug-os nga pagsalig Kaniya. (Prov. 3:5, 6; Filip. 4:6, 7) Bisan pag kita nag-inusara, ang atong mga pangamuyo kang Jehova maghiusa kanato “sa tibuok kapunongan sa [atong] mga igsoon dinhi sa kalibotan.”—1 Ped. 5:9.
12 Si Jehosapat ug ang iyang katawhan misunod sa mga instruksiyon nga gihatag sa Diyos pinaagi kang Jahaziel. Unsay resulta niana? Sila nagmadaogon sa gubat ug namalik sa Jerusalem “uban ang pagmaya” ug “uban sa kinuldasang mga tulonggon ug sa mga alpa ug sa mga trompeta ngadto sa balay ni Jehova.” (2 Cron. 20:27, 28) Sundon usab nato ang mga instruksiyon ni Jehova nga gihatag pinaagi sa ulipon nga matang ug moduyog kanila sa pagdayeg kaniya.
Atimana Pag-ayo ang Atong mga Tigomanan
13. Unsay gibuhat ni Ezequias sa sinugdanan sa iyang pagmando?
13 Sa unang bulan sa pagmando ni Ezequias, siya nagpakitag kasibot alang sa pagsimba kang Jehova pinaagi sa pag-abli pag-usab ug pag-ayo sa templo. Iyang giorganisar ang mga saserdote ug ang mga Levihanon aron sa paglimpiyo sa balay sa Diyos. Nahuman nila kana sulod sa 16 ka adlaw. (Basaha ang 2 Cronicas 29:16-18.) Ang maong paningkamot magpahinumdom kanato sa pagmentinar ug pag-ayo sa atong mga tigomanan nga nagpakita sa atong masibotong pagsimba kang Jehova. Nakadungog ka bag mga eksperyensiya nga nagpakita nga ang mga tawo nakadayeg sa kasibot sa mga igsoon nga nakigbahin sa maong buluhaton? Oo, ang ilang mga paningkamot nakahatag ug dakong kadayeganan kang Jehova.
14, 15. Unsang buluhaton karon ang naghatag ug dakong kadayeganan kang Jehova? Paghatag ug mga pananglitan.
14 Sa usa ka siyudad sa amihanang Inglaterra, ang usa ka tawo mitutol nga ayohon ang Kingdom Hall nga kasikbit sa iyang propiedad. Ang mga igsoon nagpakitag kalulot. Kay namatikdan nila nga kinahanglang ayohon ang paril nga nag-ulang sa Kingdom Hall ug sa propiedad sa ilang silingan, sila mitanyag sa pag-ayo niana nga walay bayad. Sila naghago ug, gani, halos ang tibuok paril ilang giayo. Tungod niana, nausab ang tinamdan sa maong tawo. Sa pagkakaron, motabang na siya pagbantay sa Kingdom Hall.
15 Ang katawhan ni Jehova nakigbahin sa tibuok-kalibotang pagpanukod. Ang lokal nga mga igsoon kinabubut-ong mitabang sa bug-os-panahong internasyonal nga mga alagad sa pagtukod dili lamang sa mga Kingdom Hall kondili sa mga Assembly Hall ug puy-anang Bethel usab. Si Sam maoy usa ka inhenyero nga hanas sa heating, ventilation, ug air-conditioning. Siya ug ang iyang asawa nga si Ruth nakaadto na sa ubay-ubayng kanasoran sa Uropa ug Aprika aron sa pagtabang diha sa mga proyekto sa pagpanukod. Bisan asa sila moadto, sila mosangyaw usab uban sa lokal nga mga kongregasyon. Gipatin-aw ni Sam kon unsay nagpalihok kaniya sa pagpakigbahin nianang internasyonal nga mga proyekto: “Gidasig ako sa mga igsoon nga nag-alagad sa mga puy-anang Bethel sa lainlaing nasod. Ang ilang kasibot ug kalipay nagtukmod kanako sa pag-alagad niining paagiha.”
Sunda ang mga Instruksiyon sa Diyos
16, 17. Sa unsang espesyal nga buluhaton nga ang katawhan sa Diyos madasigong nakigbahin, ug unsay resulta niana?
16 Gawas sa pag-ayo sa templo, gibalik ni Ezequias ang tinuig nga pagsaulog sa Paskuwa nga gisugo ni Jehova. (Basaha ang 2 Cronicas 30:1, 4, 5.) Gidapit ni Ezequias ug sa mga molupyo sa Jerusalem ang tibuok nasod—bisan kadtong sakop sa amihanang gingharian. Gilibot sa mga mensahero ang tibuok nasod aron sa paghatod sa mga imbitasyon.—2 Cron. 30:6-9.
17 Niining milabayng mga tuig, kita nakigbahin sa susamang buluhaton. Kita naggamit ug maanindot nga mga imbitasyon aron dapiton ang mga tawo sa atong teritoryo sa pagtambong sa Panihapon sa Ginoo, agig pagtuman sa sugo ni Jesus. (Luc. 22:19, 20) Kita nakadawat ug mga instruksiyon diha sa atong Tigom sa Pag-alagad ug masibotong nakigbahin niining buluhatona. Ug gipanalanginan gayod ni Jehova ang atong paningkamot! Gani, sa miaging tuig mga pito ka milyon kanato ang nanagtag sa mga imbitasyon, ug 17,790,631 ang nanambong!
18. Nganong hinungdanon gayod kanimo ang kasibot alang sa matuod nga pagsimba?
18 Kini ang giingon bahin kang Ezequias: “Kang Jehova nga Diyos sa Israel siya misalig; ug sunod kaniya walay usa nga sama kaniya taliwala sa tanang hari sa Juda, bisan kadtong nahiuna kaniya. Ug siya nagpadayon sa pag-unong kang Jehova. Siya wala motipas sa pagsunod kaniya, apan siya nagpadayon sa pagtuman sa iyang mga sugo nga gisugo ni Jehova kang Moises.” (2 Hari 18:5, 6) Hinaot nga atong sundon ang iyang ehemplo. Ang atong kasibot alang sa balay sa Diyos motabang kanato sa ‘pagpabiling maunongon kang Jehova’ nga may paglaom nga mabuhi sa walay kataposan.—Deut. 30:16.
Sunda Dayon ang mga Instruksiyon
19. Unsang masibotong paningkamot ang gihimo panahon sa Memoryal?
19 Sa dihang naghari si Josias, gihikay usab niya nga saulogon ang Paskuwa, nga nangandam pag-ayo alang niana. (2 Hari 23:21-23; 2 Cron. 35:1-19) Mangandam usab kita pag-ayo alang sa distritong mga kombensiyon, sirkitong mga asembliya, espesyal nga mga asembliya, maingon man sa Memoryal. Ang mga igsoon sa pipila ka nasod nagpameligro gani sa ilang kinabuhi aron sa paghandom sa kamatayon ni Kristo. Gitino sa masibotong mga ansiyano nga ang tanan makatambong. Ang mga tigulang ug ang mga baldado gitabangan aron makatambong niini nga okasyon.
20. (a) Unsay nahitabo panahon sa paghari ni Josias, ug unsay iyang gibuhat? (b) Unsang pagtulon-an ang angay natong palandongon?
20 Panahon sa pag-ayo sa templo nga gihikay ni Haring Josias, si Hilkias nga hataas nga saserdote ‘nakakaplag sa basahon sa balaod ni Jehova nga gihatag pinaagi sa kamot ni Moises.’ Gihatag niya kana kang Sapan nga sekretaryo sa hari kinsa, sa baylo, nagbasa sa unod niini ngadto kang Josias. (Basaha ang 2 Cronicas 34:14-18.) Unsa may epekto niana? Dihadiha, gigisi sa hari ang iyang besti tungod sa kasubo ug gisugo ang iyang mga sinaligan nga magpakisayod kang Jehova. Pinaagi sa manalagnang si Hulda, ang Diyos naghatag ug mensahe nga nagkondenar sa pipila ka relihiyosong mga tulumanon nga gihimo diha sa Juda. Bisan pa niana, namatikdan sa Diyos ang paningkamot ni Josias sa pagwagtang sa idolatrosong mga buhat, ug siya padayong gipaboran ni Jehova bisan pa sa mga kalamidad nga gitagnang mahitabo sa tibuok nasod. (2 Cron. 34:19-28) Unsay atong makat-onan niini? Tino nga ang atong tinguha susama nianang kang Josias. Gusto natong mosunod dayon sa mga instruksiyon ni Jehova ug palandongon kon unsay mahitabo kon atong tugotan ang apostasya ug pagkadili-matinumanon nga mobalda sa atong pagsimba. Ug makasalig kita nga makita usab ni Jehova ug uyonan ang atong kasibot alang sa matuod nga pagsimba, sama sa iyang gibuhat sa kahimtang ni Josias.
21, 22. (a) Nganong angay kitang magpakitag kasibot alang sa balay ni Jehova? (b) Unsay atong hisgotan sa sunod nga artikulo?
21 Kadtong upat ka hari sa Juda—si Asa, Jehosapat, Ezequias, ug Josias—nagpakitag maayong mga panig-ingnan alang kanato maylabot sa pagkamasiboton alang sa balay sa Diyos sa pagsimba. Ang atong kasibot angay usab nga magpalihok kanato sa pagsalig kang Jehova ug sa pagpaningkamot alang sa iyang pagsimba. Maalamon gayod ug makahatag kalipay ang pagsunod sa mga instruksiyon sa Diyos ug pagsanong sa mahigugmaong pag-atiman ug pagtul-id nga atong madawat pinaagi sa kongregasyon ug sa mga ansiyano.
22 Ang sunod nga artikulo maghisgot bahin sa atong kasibot alang sa pagsangyaw ug magdasig sa mga batan-on sa pag-alagad nga masiboton sa atong mahigugmaong Amahan. Hisgotan usab kon sa unsang paagi malikayan ang usa sa labing makadaot nga impluwensiya ni Satanas. Samtang masiboton kitang mosunod sa tanang pahinumdom gikan kang Jehova, atong gisundog ang ehemplo sa Anak ni Jehova nga si Jesus, kinsa gihisgotan diha sa salmo: “Ang tumang kasibot alang sa imong balay naglamoy kanako.”—Sal. 69:9; 119:111, 129; 1 Ped. 2:21.
Nahinumdom Ka Ba?
• Unsang matanga sa pag-alagad ang panalanginan ni Jehova, ug ngano?
• Sa unsang paagi atong ikapakita ang atong pagsalig kang Jehova?
• Sa unsang paagi ang kasibot magpalihok kanato sa pagsunod sa mga instruksiyon sa Diyos?
[Mga Pangutana sa Pagtuon]
[Mga hulagway sa panid 9]
Sa unsang paagi si Asa, Jehosapat, Ezequias, ug Josias nagpakitag kasibot alang sa balay ni Jehova?