Jahayhúkena Jehová róga

‘Nde róga ahayhúgui tatáicha okaru cherehe.’ (JUAN 2:17.)

1, 2. Mbaʼépa ojapo Jesús ohórõ guare pe témplope ha mbaʼérepa ojapo upéicha?

 EPENSAMÍNA ko mbaʼe oikovaʼekuére: Áño 30-pe, seis mése Jesús ojevautisa haguépe ohohína Jerusalénpe Paskuarã ha og̃uahẽre ohóma pe témplope. Oikévo upépe ohecha heta hénte ombaʼevendéva. Ovende hikuái ‘tororaʼy, ovecha ha pykasu’ ha oĩ avei okambiáva pláta umi tetã ambueguápe. Upémarõ Jesús ojagarra peteĩ tukumbo ha omondyipa upégui umi mymba ha umi ombaʼevendéva odiparapa avei upégui. Umi pláta kambiahágui katu otumba imesa ha omosarambipa chuguikuéra ipláta. Ha umi pykasu vendehápe katu heʼi ojagarra hag̃ua ikosakuéra ha okañy upégui (Juan 2:​13-16).

² Mbaʼérepa Jesús ojapo upéicha? Ojapo ohayhúgui Ñandejára róga. Haʼe ningo heʼi voi chupekuéra: “Penohẽ umíva koʼágui. Che ru rógagui ani pejapo ñemuha renda”. Upépe hemimboʼekuéra imanduʼa Ñandejára Ñeʼẽme heʼiha: ‘Nde róga ahayhúgui tatáicha okaru cherehe’ (Juan 2:​16, 17; Sal. 69:9).

3. a) Mbaʼépa jajapóta jahayhúramo Ñandejára róga? b) Mbaʼépa iporã ñañeporandumi?

³ Jesús ningo ohayhu ha omombaʼeterei Ñandejára róga, upévaguinte ojapo péicha. Ha ñande jahayhúramo Ñandejára róga ñanerakateʼỹ ha ñañangarekóta avei hese. Koʼág̃a ningo ñande Testígo siete millones arimi ñaiméva ñamombaʼe avei Ñandejára róga. Upévare iporã ñañeporandumi: “Mbaʼéichapa che ikatu ahayhu ha amombaʼeve Jehová róga?”. Ñambohovái mboyve ko porandu, jahechamíta mbaʼépa hína koʼág̃a pe Ñandejára róga ha mbaʼépa ojapovaʼekue yma umi iñeʼẽrendu ha omombaʼéva Ñandejára róga. Umi ehémplo jatopa la Bíbliape ha katuete ningo ñanemokyreʼỹvéta (Rom. 15:4).

Ñandejára róga ymaguare ha koʼag̃agua

4. Mbaʼépa ojejapo pe témplo Salomón ojapoukavaʼekuépe?

⁴ Israélpe ningo Ñandejára róga haʼevaʼekue pe témplo oĩva Jerusalénpe. Péro upéva ndeʼiséi Jehová oiko hague upépe. Haʼe voi ningo heʼivaʼekue: “Yvága cheguapyha ha yvy chepyenda. Mamo piko ikatúta pemopuʼã cherogarã, mamo piko ikatúta pejapo apytuʼu hag̃ua?” (Isa. 66:1). Ojeʼe ningo pe témplo Salomón ojapoukavaʼekue haʼe hague Jehová róga, pórke upépe oñembyatypavaʼekue hikuái omombaʼeguasu ha oñemboʼe hag̃ua Chupe (1 Rey. 8:​27-30).

5. Mbaʼépa hína koʼág̃a rupi Jehová róga?

⁵ Péro koʼág̃a Jehová róga ndahaʼevéima peteĩ témplo oĩva Jerusalénpe térã ambue hendápe. Koʼág̃a rupi Jehová róga haʼehína opa mbaʼe haʼe omoĩva oñemombaʼeguasu hag̃ua chupe ha ojapo Jesucristo omano rupi ñanderehehápe. Jehová organisasiónpe ningo oñembyatyhína isiervokuéra oparupigua omombaʼeguasu hag̃ua chupe (Isa. 60:​4, 8, 13; Hech. 17:24; Heb. 8:5; 9:24).

6. Mbaʼéichapa héra umi rréi odefendevaʼekue pyʼaguasúpe Ñandejára réra?

⁶ Áño 997-pe Jesús ou mboyve, Israel oñembojaʼovaʼekue mokõi rréinope (Judá sur gotyo ha Israel norte gotyo). Ha diesinueve rréi ningo ogovernavaʼekue Judá, umíva apytégui cuatro odefende pyʼaguasúpe Ñandejára réra. Koʼãva hína rréi Asá, Jehosafat, Ezequías ha Josías. Mbaʼépa ñanemboʼe hikuái umi mbaʼe ojapovaʼekuére?

 Heta mbaʼe porã jahupyty jaservíramo Jehovápe ñande pyʼaite guive

7, 8. a) Mbaʼépa jajapovaʼerã Jehová ñanderovasa hag̃ua? b) Mbaʼépa ñanemboʼe Asá ojapovaʼekue?

⁷ Asá ogovernaha tiémpope Jehová ojokuaivaʼekue umi iproféta oisãmbyhy hag̃ua hembiguaikuérape tape porãre. Pór ehémplo, Ñandejára Ñeʼẽ heʼi Oded raʼy Azarías omokyreʼỹ hague Asápe ojapo hag̃ua heta mbaʼe omombaʼeguasu jey hag̃ua hikuái Jehovápe (jaleemína 2 Crónicas 15:​1-8). Ha Asá ojapo Azarías heʼi haguéicha chupe. Ojapo peteĩ aty guasu Jerusalénpe ha upépe ou heta hénte oĩva upérupi ha avei umi oikóva pe rréino de Israélpe. Ha enterovete oñekompromete oservitaha Jehovápe añoite. Ñandejára Ñeʼẽ heʼi: ‘Omeʼẽ hikuái iñeʼẽ Jehovápe, sapukái ha vyʼapópe, trompéta ha turupúpe oservi jeytaha chupe. Opa Judaygua ovyʼajoa opromete haguére ipyʼaite guive, avei oheka ha ojuhúgui Ñandejárape; upévare Jehová omeʼẽ chupekuéra pytuʼu oparupiete’ (2 Cró. 15:​9-15). Ñandéve avei Jehová ñanderovasáta, jaservíramo chupe ñande pyʼaite guive (Mar. 12:30).

⁸ Péro ñambyasýramo jepe, heta tiémpo rire Asá ipochy Jehová rembiguái Hananí oñemoñeʼẽ haguére chupe (2 Cró. 16:​7-10). Ha koʼág̃a rupi Jehová ojokuái umi ansiánope oñemoñeʼẽ hag̃ua ñandéve. Mbaʼépa jajapo oñemoñeʼẽ jave ñandéve hikuái? Ñahendu porãntepa térãpa ñandepochy?

9. Mávapa opuʼã Judá rehe ha mbaʼépa ojapo Jehosafat oikuaávo upéva?

⁹ Jehosafat ogovernárõ guare, Ammón, Moab ha Seirgua oñomoirũ opuʼã hag̃ua Judá rehe. Mbaʼépa ojapo Jehosafat oikuaávo upéva? Ombyatypaite Jehová rógape umi kuimbaʼe, hembireko ha ifamiliakuéra oñemboʼe hag̃ua (jaleemína 2 Crónicas 20:​3-6). Salomón heʼi haguéicha pe témplo oñeinaugurárõ guare, Jehosafat oñemboʼe asy Jehovápe kóicha: ‘Ore Jára, nderekastigamoʼãi piko chupekuéra? Ore niko orembovyeterei rombohovái hag̃ua chupekuéra, ko oúva oréve hetaiterei ñorairõhára reheve. Ndoroikuaái mbaʼépa rojapóta! Nderehe añoite ningo rojerovia’ (2 Cró. 20:​12, 13). Oñemboʼepávo rréi Jehosafat, Jehová espíritu sánto omomýi peteĩ levíta hérava Jahaziélpe ombopyʼaguapy ha omombarete hag̃ua umi héntepe (jaleemína 2 Crónicas 20:​14-17).

10. a) Máva rupivépa Jehová ombopyʼaguapy Jehosafat ha iñirũnguérape? b) Mbaʼéichapa jahechaukáta jaipotaha Jehová ñanesãmbyhy?

¹⁰ Jahechaháicha, Jahaziel rupive Jehová ombopyʼaguapy Jehosafat ha iñirũnguérape ha heʼi chupekuéra mbaʼépa ojapovaʼerã. Ha koʼág̃a rupi Jehová ñanembopyʼaguapy ha ñanesãmbyhy pe ‘tembiguái jeroviaha ha iñarandúva’ rupive ha heʼi avei ñandéve mbaʼépa jajapovaʼerã. Upévare ñaneñeʼẽrendu ha jarrespetavaʼerã umi ansiánope. Haʼekuéra ningo kyreʼỹme oñangareko ñanderehe ha ojapo opa mbaʼe pe tembiguái jeroviaha heʼihaichaite (Mat. 24:45; 1 Tes. 5:​12, 13).

11, 12. Mbaʼépa ñanemboʼe Jehosafat ha iñirũnguéra ojapovaʼekue?

¹¹ Rehasáramo peteĩ provléma ijetuʼúva ha ndereikuaáiramo mbaʼéichapa rembohováita, rejapovaʼerã Jehosafat ha umi Judaygua ojapo haguéicha. Ejerure Jehovápe nepytyvõmi hag̃ua ha ejerovia hese (Pro. 3:​5, 6; Fili. 4:​6, 7). Ha reikóramo jepe mombyry, ne ñemboʼe rupive reñandúta reimeha ne ermanokuéra apytépe (1 Ped. 5:9). Jehosafat ha umi Judaygua oñembyaty haguéicha, ñande avei akóinte ñañembyatyvaʼerã ñane ermanokuéra ndive kongregasiónpe.

¹² Jehosafat ha iñirũnguéra ojapovaʼekue Jehová heʼíva chupekuéra Jahaziel rupive. Ha mbaʼépa ohupyty hikuái upévare? Upéva mediánte ningo ogana hikuái pe ñorairõ ha “vyʼapópe” ou jey Jerusalénpe. ‘Mbaraka, árpa ha trompéta púpe og̃uahẽ Jehová rógape’ (2 Cró. 20:​27, 28). Ñande avei koʼág̃a rupi ñamombaʼeguasuvaʼerã Jehovápe ha jajapo  haʼe heʼihaichaite ñandéve pe tembiguái jeroviaha rupive.

Ñañangarekókena umi lugár ñande atyháre

13. Mbaʼépa ojapo Ezequías oñepyrũrõ guare ogoverna?

¹³ Ezequías ningo oipotaitereivaʼekue opavave omombaʼeguasu Jehovápe, upévare oñepyrũrõ guare ogoverna, oavrika jey pe témplo ha omyatyrõkapaite. Upéi ombyaty umi saserdóte ha levitakuérape, ha diesiséis díape potĩ asýma oheja hikuái Ñandejára róga (jaleemína 2 Crónicas 29:​16-18). Koʼã mbaʼe ñanemomanduʼa mbaʼéichapa ñande ñamyatyrõ ha ñañangareko porã vaʼerã avei umi lugár ñañembyatyháre. Oiméne nde rehendúmava mbaʼéichapa umi hénte oponderajoa ohechávo kyreʼỹme ñañomoirũmba upearã. Péicha jahechakuaa, ñamombaʼéramo Jehová róga ñamombaʼeguasuhañaína chupe.

14, 15. Mbaʼe tembiapópa omombaʼeguasu avei Jehovápe? Emombeʼu peteĩ ehémplo.

¹⁴ Pór ehémplo, peteĩ távape amo Inglatérrape umi ermáno ohecha mbaʼéichapa omyatyrõta peteĩ Salón del Reino. Péro pe karai oikóva salón ykére ndoipotái ojapo hikuái mbaʼeve. Upémaramo umi ermáno heʼi pe karaípe omyatyrõseha chupe reieténte pe imurálla oĩva salón ykére. Ha heta ombaʼapo hese hikuái, haimetete voi ningo ombopyahupaite jey. Péicha ojapo rupi umi ermáno, pe karai tuichaiterei okambia ha koʼág̃a haʼe oñangareko avei salón rehe ani hag̃ua oike mondaha.

¹⁵ Ñandejára rembiguaikuéra ningo opárupi ombaʼapo oñondivepa. Umi siervo internacional ningo oiporupaite itiémpo omopuʼã hag̃ua umi Salón del Reino, Salón de Asambléa ha Betel. Ha chupekuéra oipytyvõ avei heta ermáno. Pór ehémplo Sam haʼe peteĩ ermáno ikatupyryetereíva ombaʼapo hag̃ua calefacción, ventilación ha acondicionamiento de aire rehe. Haʼe ha hembireko Rut ningo hetaiterei tetãmema oho ombaʼapo Europa ha Áfricare. Ha ohohápente opredika hikuái ermanokuéra ndive. Sam omombeʼu mbaʼérepa ombaʼapo construcción internacional-pe: “Aikuaa heta ermáno ohomavaʼekuépe ombaʼapo opárupi omopuʼã hag̃ua Betel. Haʼekuéra ningo chemokyreʼỹ ajapo hag̃ua avei upéicha. Ha ahechakuaa hesekuéra mbaʼeichaitépa ovyʼa ha  oñeñandu porã, upévare ambaʼaposeterei avei upéicha”.

Jajapókena Jehová heʼihaichaite

16, 17. Maʼerãpa ñainvita ñane vesinokuérape ha mbaʼéichapa Jehová ohovasa upe tembiapo?

¹⁶ Omyatyrõkapa rire pe témplo, Ezequías heʼi ojejapo jeytaha pe Páskua káda áño Jehová ojerureháicha (jaleemína 2 Crónicas 30:​1, 4, 5). Upe rire Ezequías ha umi Jerusalengua oinvita enterovetépe, umi norte gotyo oikóvape avei ou hag̃ua Paskuarã. Opárupi voi oñemondo heta tembiguái oporoinvita hag̃ua (2 Cró. 30:​6-9).

¹⁷ Ñande avei heta áñorema ñainvitahikóni ñane vesinokuérape ogueromanduʼami hag̃ua ñanendive Jesús omano hague ára. Jesús voi ojerurevaʼekue jajapo hag̃ua upéva (Luc. 22:​19, 20). Pe Aty ñanemboʼéva japredika hag̃ua ojejapo jave ningo ojehechauka jepi ñandéve mbaʼéichapa ñainvitáta la héntepe ha kyreʼỹme voi jajapo jepi upéicha. Ha jaʼekuaa Jehová oguerohory ha ohovasaha ko tembiapo pórke pe áño ohasavaʼekuépe, umi siete millones puvlikadór oĩva ko yvy ape ári osẽ oinvita la héntepe. Ha upéicha rupi 17.790.631 ñaimékuri Conmemoracionhápe.

18. Mbaʼérepa nde ere iporãha jahayhu Ñandejára róga?

¹⁸ Ñandejára Ñeʼẽ ningo heʼi péicha Ezequías rehe: ‘Ezequías ojerovia Ñandejára Jehová, Israel Jára rehe. Opa Israel ruvicha guasukuéra apytépe haʼe mboyve ha haʼe rire ndaipóri haʼeichagua. Oiko Ñandejára oipotaháicha ha ndojeíri hapégui arakaʼeve. Ojapo umi léi heʼíva, Jehová ohejavaʼekue Moisés rupive’ (2 Rey. 18:​5, 6). Upévare, ñañehaʼãkena jajapo rréi Ezequías ojapo haguéicha. Jahayhúramo Ñandejára róga ‘jaikóta’ Jehová oipotaháicha ha jahupytýta pe jeikove opaveʼỹva (Deu. 30:16).

Kyreʼỹme jajapovaʼerã ojeʼéva ñandéve

19. Mbaʼéichapa ermanokuéra ohechauka omombaʼetereiha pe Conmemoración?

¹⁹ Rréi Josías opreparapaitevaʼekue opa mbaʼe tekotevẽva ojejapo hag̃ua Páskua (2 Rey. 23:​21-23; 2 Cró. 35:​1-19). Ha ñande avei koʼág̃a kyreʼỹme ñambaʼapo ojejapo hag̃ua umi ñande aty guasu ha pe Conmemoración. Heta tetãme ningo ojeproivi ojejapo koʼã mbaʼe, péro upéva ndojokói ñane ermanokuérape oikuaáramo jepe ikatuha ojejuka chupekuéra upévare. Umi ansiáno ningo oipotaiterei enterove oĩ Conmemoracionhápe ha oipytyvõ umi ermáno hasykatumívape térã ijedávape oho hag̃ua.

20. a) Mbaʼépa oiko ojejuhúrõ guare Ñandejára léi pe témplope ha mbaʼépa ojapo rréi Josías upe rire? b) Mbaʼépa ñanemboʼe rréi Josías ojapovaʼekue?

²⁰ Rréi Josías heʼi oñemyatyrõ hag̃ua Ñandejára róga. Ha oñembaʼapo jave pe témplore, saserdóte guasu Hilquías ‘ojuhu pe kuatiañeʼẽ ojehaihápe Ñandejára léi, oñemeʼẽvaʼekue Moisés rupive’. Ha omeʼẽ rréi Josías rembijokuáipe hérava Safán. Haʼe oraha upe kuatiañeʼẽ ha olee rréi Josíaspe (jaleemína 2 Crónicas 34:​14-18). Mbaʼépa ojapo Josías upe rire? Ojepyʼapyeterei ha omondoro la ijao. Upepete voi ojerure umi hembijokuáipe oho hag̃ua ohecha mbaʼépa Jehová oipota ojejapo. Ha profetisa Huldá rupive Jehová oikuaauka chupekuéra hembipota. Huldá heʼi ombopochyha Ñandejárape umi mbaʼe vai ojejapóva Judápe oñemombaʼeguasu hag̃ua ñandejára guaʼúpe. Heʼi avei Jehová omboutaha heta jehasa asy upe tetãme. Ha rréi Josías oikuaávo upéva ojapo ikatumíva anivéma hag̃ua oñemombaʼeguasu umi ñandejára  guaʼúpe. Upévare Jehová oguerohory chupe (2 Cró. 34:​19-28). Mbaʼépa ñanemboʼe upe oikovaʼekue? Jahechakuaa jajapovaʼerãha Josías ojapo haguéicha. Kyreʼỹme ñañemoĩvaʼerã jajapo Jehová heʼihaichaite ha ñapensa mbaʼépa oikóta ñanderehe umi Israelguáicha ñamboykéramo Jehovápe ha ñamombaʼeguasu ñandejára guaʼúpe. Péicha rréi Josías rekovekue ohechauka porã ñandéve Jehová ohecha ha oguerohoryetereiha ñañehaʼãramo ñamombaʼeguasu chupe añoite.

21, 22. a) Mbaʼépa jajapovaʼerã jahayhúgui Jehová róga? b) Mbaʼépa jahecháta pe artíkulo oúvape?

²¹ Rréi Asá, Jehosafat, Ezequías ha Josías ningo ehémplo ñandéve g̃uarã. Haʼekuéra ohechauka ñandéve mbaʼéichapa jahayhu ha ñanerakateʼỹvaʼerã Jehová róga rehe ha Chupe añoiténte ñamombaʼeguasuvaʼerãha. Upévare, ñañehaʼãkena ñamombaʼeguasu Jehovápe ñande pyʼaite guive ha jajerovia hese. Koʼýte ningo javyʼáta jaikóramo Jehová oipotaháicha ha ñahendúramo chupe oñemoñeʼẽ jave ñandéve kongregasión ha umi ansiáno rupive. Ha ojeʼéramo ñandéve jajavyha katu pyaʼe ñakambiavaʼerã.

²² Pe artíkulo oúvape jahecháta mbaʼéichapa kyreʼỹme ñamombeʼuvaʼerã pe marandu porã. Ha omokyreʼỹta avei umi imitãvape vyʼápe oservi hag̃ua ñande Ru ñanderayhuetévape. Jahecháta avei mbaʼe ñuhãpa Satanás oiporuhína koʼág̃a rupi ha mbaʼépa jajapovaʼerã ani hag̃ua jaʼa pype. Ha kyreʼỹme jajapóramo Jehová rembipota jajoguavéta jahávo Jesúspe. Hese ningo la Biblia heʼi voi ‘Ñandejára róga ohayhúgui tatáicha okaruha hese’ (Sal. 69:9; 119:​111, 129; 1 Ped. 2:21).

Nemanduʼápa koʼã mbaʼére?

• Mbaʼéichapa jaservivaʼerã Jehovápe ñanderovasa hag̃ua ha mbaʼérepa jajapovaʼerã upéicha?

• Mbaʼéichapa jahechaukáta jajeroviaha Jehováre?

• Mbaʼérepa jajapovaʼerã Jehová heʼihaichaite ñamombaʼéramo chupe?

[Porandu ñahesaʼỹijóva]

[Nóta oĩva taʼanga ndive páhina 9]

Mbaʼéichapa ohechauka Asá, Jehosafat, Ezequías ha Josías omombaʼeha Jehová róga?