Mangin Makugi sa Balay ni Jehova!
Mangin Makugi sa Balay ni Jehova!
“Mapuno gid ako sang kakugi para sa imo balay.”—JUAN 2:17.
1, 2. Sang 30 C.E., ano ang ginhimo ni Jesus sa templo, kag ngaa?
HANDURAWA ang nagakatabo. Tion sang Paskua sang 30 C.E. Anom ka bulan antes sini, ginsugdan ni Jesus ang iya ministeryo diri sa duta. Nagapakadto sia karon sa Jerusalem. Didto sa templo sa Luwang sang mga Gentil, nakita ni Jesus “ang mga nagabaligya sang mga baka kag mga karnero kag mga salampati kag ang mga manugbaylo sing kuarta nga yara sa ila pulungkuan.” Gintabog niya ang tanan nga sapat paggua paagi sa latigo nga lubid amo nga ginpanglagas sang mga negosyante ang mga sapat. Gin-ula man ni Jesus ang mga sensilyo sang mga manugbaylo sing kuarta kag ginpamaliskad ang ila mga lamesa. Ginsugo niya ang mga nagabaligya sang mga pating nga kuhaon ang ila mga baligya kag maghalin.—Juan 2:13-16.
2 Ginpakita ni Jesus paagi sa iya ginhimo nga nagaulikid gid sia sa Templo. “Untati ninyo ang paghimo sa balay sang akon Amay nga isa ka balay nga balaligyaan!” sugo niya. Sang nakita ini tanan sang iya mga disipulo, nadumduman nila ang mga tinaga nga ginsulat sang salmista nga si David mga pila na ka siglo ang nagligad: “Ang kakugi sa imo balay naglamon sa akon.”—Juan 2:16, 17; Sal. 69:9.
3. (a) Ano ang kakugi? (b) Ano ang ipamangkot naton sa aton kaugalingon?
3 Ginhimo ini ni Jesus bangod sa iya kabalaka kag kakugi sa balay sang Dios. Ang kakugi amo ang “kalangkag kag matuod nga interes sa isa ka butang nga luyag mo matigayon.” Sa sining ika 21 nga siglo, sobra na sa pito ka milyon nga Cristiano ang nagapakita sang kakugi sa balay sang Dios. Mahimo naton pamangkuton ang aton kaugalingon, ‘Paano ako mangin mas makugi sa balay ni Jehova?’ Agod masabat naton ini, hibaluon anay naton kon ano ang balay sang Dios sa karon. Dayon binagbinagon naton sa Biblia ang mga halimbawa sang matutom nga mga lalaki nga nagpakita sing kakugi sa sini. Ginsulat ang ila mga halimbawa sa “pagtudlo sa aton” kag sa pagpahulag sa aton nga mangin mas makugi.—Roma 15:4.
Ang Balay sang Dios sang Una kag Karon
4. Ano ang katuyuan sang templo nga ginpatindog ni Solomon?
4 Sa Israel sang una, ang templo sa Jerusalem amo ang balay sang Dios. Pero indi buot silingon nga didto nagaistar si Jehova. Nagsiling sia: “Ang langit amo ang akon trono, kag ang duta palatungan sang akon mga tiil; ano bala nga bagay sang balay ang patindugon ninyo sa akon, kag ano bala nga duug ang akon palahuwayan?” (Isa. 66:1) Bisan pa sa sini, nagpatindog si Hari Solomon sang templo agod mangin sentro sang pagpangamuyo kag pagsimba kay Jehova.—1 Hari 8:27-30.
5. Ano nga kahimusan sa karon ang nagalaragway sa pagsimba sa templo ni Solomon?
5 Sa karon, ang balay ni Jehova indi na isa ka tinukod sa Jerusalem ukon sa iban nga lugar. Kundi, isa na ini ka kahimusan agod makasimba kita sa iya paagi sa halad gawad ni Cristo. Ang tanan nga matutom nga alagad sang Dios diri sa duta nahiusa sa pagsimba kay Jehova sa iya espirituwal nga templo.—Isa. 60:4, 8, 13; Binu. 17:24; Heb. 8:5; 9:24.
6. Sin-o nga mga hari sa Juda ang nangin makugi gid sa matuod nga pagsimba?
6 Sang nabahin ang Israel sang 997 B.C.E., 4 sa 19 ka hari nga naggahom sa Juda ang nangin makugi gid sa matuod nga pagsimba. Sila amo kanday Asa, Jehosapat, Ezequias, kag Josias. Anong importante nga mga leksion ang aton matun-an sa ila?
Mga Pagpakamaayo Bangod sa Bug-os Tagipusuon nga Pag-alagad
7, 8. (a) Ano nga klase sang pag-alagad ang ginapakamaayo ni Jehova? (b) Ano nga paandam ang matun-an naton sa halimbawa ni Hari Asa?
7 Sa tion sang paghari ni Asa, nagpadala si Jehova sang mga manalagna nga magatuytoy sa Iya pungsod agod makapabilin sila nga matutom. Halimbawa, ginasugid sa aton sang Biblia nga si Asa nagpamati kay manalagna Azarias nga anak ni Oded. (Basaha ang 2 Cronica 15:1-8.) Ang pagbag-o nga ginhimo ni Asa nagpahiusa sa katawhan sang Juda kag sa madamo nga katawhan sang Israel nga nagkadto sa Jerusalem sa pagbuylog sa daku nga pagtililipon. Ginpabutyag nila didto ang ila determinasyon nga magsimba kay Jehova sing mainunungon. Mabasa naton: “Nagsumpa sila sa GINOO sa mabaskug nga tingug, kag may sininggit, kag may mga budyong, kag mga corneta. Kag ang bug-os nga Juda nagkasadya sa sumpa; kay sa bug-os nila nga tagiposoon nagsumpa sila, kag sa bug-os nila nga handum ginpangita nila sia, kag nakit-an sia nila, kag ginhatagan sila sang GINOO sing kapahuwayan sa palibut.” (2 Cron. 15:9-15) Pakamaayuhon man kita ni Jehova kon bug-os tagipusuon kita nga nagaalagad sa iya.—Mar. 12:30.
8 Sing makapasubo, sang ulihi, naghinakit si Asa sang gintadlong sia ni manalagna Hanani. (2 Cron. 16:7-10) Ano bala ang aton reaksion kon laygayan kita ukon hatagan sing panuytoy ni Jehova paagi sa mga gulang? Handa bala kita nga batunon ang ila suno sa Biblia nga laygay kag likawan ang paghinakit?
9. Ano nga katalagman ang ginaatubang ni Jehosapat kag sang katawhan sang Juda, kag ano ang ila ginhimo?
9 Sang ikanapulo nga siglo B.C.E., naghari sa Juda si Jehosapat. Gin-atubang niya kag sang bug-os nga Juda ang nag-alyansa nga mga pungsod sang Amon, Moab, kag ang katawhan sa kabukiran sang Seir. Bisan pa ginakulbaan ang hari, ano ang iya ginhimo? Sia kag ang iya mga tinawo, upod sa ila asawa kag mga kabataan, nagtipon sa balay ni Jehova agod mangamuyo. (Basaha ang 2 Cronica 20:3-6.) Kaangay sa mga pulong ni Solomon sang gindedikar ang templo, si Jehosapat nangamuyo kay Jehova: “O Dios namon, indi mo bala paghukman sila? Kay wala kami sing kusug batok sa sining daku nga kadam-an nga nagakari batok sa amon. Indi kami makahibalo kon ano ang himoon, apang ang amon mga mata yara sa imo.” (2 Cron. 20:12, 13) Pagkatapos sang iya pangamuyo, “sa tunga sang katilingban,” ginpahulag sang espiritu ni Jehova si Jahaziel nga isa ka Levita agod lugpayan kag pabakuron ang mga tawo.—Basaha ang 2 Cronica 20:14-17.
10. (a) Paano nakabaton sing panuytoy si Jehosapat kag ang Juda? (b) Paano naton mapakita ang aton apresasyon sa panuytoy nga ginahatag ni Jehova karon?
10 Huo, paagi kay Jahaziel, gintuytuyan ni Jehova si Jehosapat kag ang ginharian sang Juda sadto. Sa karon, mabaton man naton ang lugpay kag panuytoy paagi sa matutom kag mainandamon nga ulipon. Siempre pa, luyag gid naton nga pirme magpasakop kag magpakita sing pagtahod sa gintangdo nga mga gulang, nga nagapangabudlay gid sa pagtatap sa aton kag sa pagpatuman sing mga panuytoy sang “matutom kag mainandamon nga ulipon.”—Mat. 24:45; 1 Tes. 5:12, 13.
11, 12. Ano nga mga leksion ang matun-an naton sa natabo kay Jehosapat kag sa Juda?
11 Subong nga si Jehosapat kag ang katawhan nagtipon kag nangayo sing panuytoy kay Jehova, indi man naton pagpabay-an ang aton pagtililipon sa kongregasyon upod sa aton mga kauturan. Kon makaeksperiensia kita sing kabudlayan, kag indi makahibalo kon ano ang himuon, sundon naton ang maayo nga mga halimbawa ni Jehosapat kag sang katawhan sang Juda kag magdangop man kay Jehova sa pangamuyo nga nagasalig sa Iya sing bug-os. (Hulu. 3:5, 6; Fil. 4:6, 7) Bisan nagaisahanon lang kita, ang mga pangamuyo naton kay Jehova magahugpong sa aton “bug-os nga paghiliutod sa kalibutan.”—1 Ped. 5:9.
12 Ginsunod ni Jehosapat kag sang iya katawhan ang panuytoy sang Dios paagi kay Jahaziel. Ano ang nangin resulta? Nagdaug sila sa inaway kag nagbalik sa Jerusalem nga “may kalipay” kag “may mga salterio kag mga arpa kag mga budyong, pakadto sa balay sang GINOO.” (2 Cron. 20:27, 28) Ginatahod man naton ang panuytoy ni Jehova paagi sa iya palaagyan kag nagabuylog sa pagdayaw sa iya.
Atipana ang Aton mga Tilipunan
13. Anong hilikuton ang ginpangunahan ni Ezequias sang magsugod sia sa iya paghari?
13 Sa una nga bulan sang iya paghari, ginpakita ni Ezequias ang iya kakugi sa pagsimba kay Jehova paagi sa pagbukas kag pagpakay-o sa templo. Gin-organisar niya ang mga saserdote kag mga Levita agod maninlo sa balay sang Dios. Ginhimo nila ini sa sulod sang 16 ka adlaw. (Basaha ang 2 Cronica 29:16-18.) Ginapahanumdom kita sini nga dapat man naton mentinahon kag kay-uhon ang aton mga tilipunan kay nagapakita ini sang aton kakugi sa pagsimba kay Jehova. Nabatian mo na bala ang mga eksperiensia nga gindayaw sang iban ang kakugi sang aton mga kauturan sa pagpakigbahin sa sini nga hilikuton? Huo, ang ila mga panikasog nagahatag sing kadayawan kay Jehova.
14, 15. Ano nga hilikuton subong ang nagahatag gid sing kadayawan kay Jehova? Maghatag sing mga halimbawa.
14 Sa isa ka siudad sa aminhan sang Inglaterra, indi gusto sang isa ka lalaki nga kay-uhon ang isa ka Kingdom Hall sa tupad sang iya propiedad. Gin-ayuhan sia sang mga kauturan. Sang nakita nila nga guba na ang pader sa ulot sang Kingdom Hall kag sang iya propiedad, nagtanyag sila nga kay-uhon ini nga wala sing bayad. Nangabudlay gid sila kag halos bilog nga pader ang ila ginkay-o. Ang ginhimo sang mga kauturan nagpabag-o sa panimuot sang lalaki. Nagabulig na sia karon sa pagbantay sa aton Kingdom Hall.
15 Nagapakigbahin ang katawhan ni Jehova sa bug-os kalibutan nga pagpanukod. Ang lokal nga mga kauturan nagabulig sa internasyonal nga mga boluntaryo sa pagpatindog sang mga Kingdom Hall, Assembly Hall, kag mga puluy-an Bethel. Si Sam isa ka eksperto sa pagtakod sang heater, bentilasyon, kag air-con. Upod sa iya asawa nga si Ruth, nakakadto na sila sa pila ka pungsod sa Europa kag Aprika sa pagbulig sa mga proyekto sa pagpanukod. Diin man sila magkadto, nalipay sila mag-upod sa pagbantala sa kongregasyon nga ila ginabuligan. Ginpaathag ni Sam kon ano ang nagpahulag sa iya nga magbulig sa pagpanukod sa iban nga pungsod: “Bangod ini sa pagpalig-on sang iban nga nagaalagad sa Bethel diri kag sa iban nga pungsod. Bangod sa ila kakugi kag kalipay, napahulag man ako nga mag-alagad sa sini nga paagi.”
Tumana ang Panuytoy sang Dios
16, 17. Sa ano nga pinasahi nga hilikuton nakigbahin ang katawhan sang Dios, kag ano ang nangin resulta sini?
16 Magluwas sa pagpakay-o ni Ezequias sang templo, ginpasag-uli man niya ang pagselebrar sang Paskua kada tuig suno sa ginsugo ni Jehova. (Basaha ang 2 Cronica 30:1, 4, 5.) Gin-agda ni Ezequias kag sang mga pumuluyo sang Jerusalem nga magtambong ang bug-os nga pungsod, bisan ang mga nagapuyo sa aminhan nga ginharian. Nagdalidali ang mga mensahero sa pagdul-ong sang mga imbitasyon.—2 Cron. 30:6-9.
17 Kaanggid man sini ang aton ginhimo sang nagligad lang nga mga tinuig. Naggamit kita sing makagalanyat nga mga imbitasyon sa pag-agda sa mga tawo nga magbuylog sa aton sa pagselebrar sang Panihapon sang Ginuo, suno sa ginsugo ni Jesus. (Luc. 22:19, 20) Nakabaton kita sing mga instruksion sa aton Miting sa Serbisyo, kag nakigbahin kita sing makugi sa sini nga hilikuton. Ginpakamaayo gid ini ni Jehova! Sang nagligad nga tuig, mga pito ka milyon ang nanagtag sing mga imbitasyon, kag 17,790,631 ang nagtambong!
18. Ngaa importante gid nga mangin makugi kita sa matuod nga pagsimba?
18 Ginasiling nga si Ezequias “nagsalig sa GINOO ang Dios sang Israel; sa bagay nga sa olihi niya walay kaangay sa iya sa tunga sang tanan nga hari sang Juda, ukon sa tunga sang mga nahauna sa iya. Kay nagtapik sia sa GINOO; wala sia magbiya sa pagsonod sa iya, kondi ginbantayan niya ang mga sogo nga ginsogo sang GINOO kay Moises.” (2 Hari 18:5, 6) Kabay nga sundon naton ang iya halimbawa. Ang aton kakugi sa balay sang Dios magabulig sa aton nga mangin suod ukon ‘magtapik sa GINOO’ nga may paglaum nga mabuhi sing walay katapusan.—Deut. 30:16.
Sunda Gilayon ang Panuytoy
19. Ano nga kakugi ang ginapakita sa tion sang Memoryal?
19 Sang naghari si Josias, naghimo man sia sing mga kahimusan nga saulugon ang Paskua, kag ginpreparahan ini sing maayo. (2 Hari 23:21-23; 2 Cron. 35:1-19) Ginatinguhaan man naton nga mapreparahan sing maayo ang aton distrito nga mga kombension, sirkito nga mga asembleya, pinasahi nga mga asembleya, kag subong man ang Memoryal. Ginarisgo pa gani sang iban naton nga kauturan ang ila kabuhi para makatambong sa Memoryal. Ginapat-od sang makugi nga mga gulang nga ang tanan sa kongregasyon makatambong. Ginabuligan man ang mga tigulang kag may mga sablag agod makatambong.
20. (a) Ano ang natabo sang naghari si Josias, kag ano ang iya ginhimo? (b) Ano nga leksion ang dapat man naton hunahunaon?
20 Sa tion sang pagpasag-uli nga gin-organisar ni Hari Josias, nakita ni Hilkias nga Mataas nga Saserdote “ang tolon-an sang kasogoan sang GINOO nga ginhatag paagi kay Moises.” Ginhatag niya ini sa sekretaryo sang hari nga si Safan, nga amo ang nagbasa sini kay Josias. (Basaha ang 2 Cronica 34:14-18.) Ano ang resulta? Bangod sa kalisod, gingisi gilayon sang hari ang iya bayo kag nagsugo sa iya mga tinawo nga magpalapit kay Jehova. Paagi kay manalagna Hulda, ginpahibalo sang Dios nga ginapakamalaut niya ang pila ka buhat sang pagsimba sa Juda. Wala malipatan ang pagtinguha ni Josias nga dulaon ang idolatroso nga mga buhat. Nagpabilin sia nga kahalamut-an sa Dios bisan pa may gintagna nga mga kalamidad sa bilog nga pungsod. (2 Cron. 34:19-28) Ano ang matun-an naton sa sini? Pat-od gid nga pareho man ang aton handum kay Josias. Luyag man naton nga sundon gilayon ang mga panuytoy ni Jehova kag luyag naton nga hunahunaon gid sing maayo kon ano ang matabo kon tugutan naton ang apostasya kag pagkadimatutom nga mag-upang sa aton pagsimba kay Jehova. Makasalig kita nga mahamuot man si Jehova sa aton kakugi sa matuod nga pagsimba, pareho sa ginpakita niya kay Josias.
21, 22. (a) Ngaa dapat kita mangin makugi sa balay ni Jehova? (b) Ano ang aton binagbinagon sa masunod nga artikulo?
21 Ang apat ka hari sang Juda, nga sanday Asa, Jehosapat, Ezequias, kag Josias, nangin maayo nga halimbawa sa aton sa pagpakita sing kakugi sa balay sang Dios kag sa pag-alagad sa Iya. Dapat nga mapahulag man kita sang aton kakugi nga magsalig kay Jehova kag alagaron gid sia. Isa gid ka maalamon nga tikang kag nagahatag sing kalipay ang pagsunod sa mga panuytoy sang Dios kag pagbaton sang mahigugmaon nga pag-atipan kag pagtadlong sang kongregasyon kag sang mga gulang.
22 Binagbinagon naton sa masunod nga artikulo ang kakugi sa pagministeryo. Tun-an man naton kon paano palig-unon ang mga pamatan-on nga mag-alagad sing makugi sa aton mahigugmaon nga Amay, kag kon paano malikawan ang pinakaepektibo nga pagsulay ni Satanas. Kon sundon naton sing makugi ang mga pahanumdom ni Jehova, mailog naton ang halimbawa sang iya Anak, si Jesus, nga parte sa iya ginasiling: “Ang kakugi sa imo balay naglamon sa akon.”—Sal. 69:9; 119:111, 129; 1 Ped. 2:21.
Madumduman Mo Bala?
• Ano nga klase sang pag-alagad ang ginapakamaayo ni Jehova, kag ngaa?
• Paano naton mapakita nga nagasalig kita kay Jehova?
• Paano kita mapahulag sang kakugi nga tumanon ang panuytoy sang Dios?
[Mga Pamangkot sa Pagtinuon]
[Mga Retrato sa pahina 9]
Paano nangin makugi sanday Asa, Jehosapat, Ezequias, kag Josias sa balay ni Jehova?
