Fišegela Ntlo ya Jehofa!

“Ke tla jewa ke phišego ya ntlo ya gago.”—JOH. 2:17.

1, 2. Ke’ng seo Jesu a ilego a se dira tempeleng ka 30 C.E., gona ka baka la’ng?

AKANYA ka boemo bjo. Ke nako ya Paseka ka 30 C.E. Dikgwedi tše tshela pele ga moo, Jesu o ile a thoma bodiredi bja gagwe bja lefaseng. Ga bjale o leetong la go ya Jerusalema. Ge a le moo ka Lapeng la Bantle, Jesu o hwetša “bao ba rekišago dikgomo le dinku le maeba le baananyi ba ditšhelete ba dutše ditulong tša bona.” A swere sefepi seo se dirilwego ka dithapo, o lelekela diphoofolo ka moka ka ntle gomme go molaleng gore bagwebi le bona ba a di latela. Ke moka, Jesu o tšholla ditšhelete tša tšhipi tša baananyi ba tšhelete gomme o thenola ditafola tša bona. O laela bao ba rekišago maeba gore ba tšee dilo tša bona gomme ba sepele.—Joh. 2:13-16.

² Seo Jesu a se dirilego se tswalana gabotse le go tshwenyega ga gagwe ka tempele. O laela gore: “Tlogelang go dira ntlo ya Tate ntlo ya thekišetšo!” Ge barutiwa ba Jesu ba lebeletše ditiragalo tše, ba gopola mantšu ao a ngwadilwego ke mopsalme Dafida nywaga-kgolong e mentši pele ga moo, a rego: “Ke tla jewa ke phišego ya ntlo ya gago.”—Joh. 2:16, 17; Ps. 69:9.

3. (a) Phišego ke’ng? (b) Ke potšišo efe yeo re ka ipotšišago yona?

³ Go tshwenyega ga Jesu ka ntlo ya Modimo le go e fišegela ke gona go mo tutueleditšego go gata mogato. Phišego ke “go phegelela selo se itšego ka mafolofolo ka gobane o se kgahlegela.” Lekgolong le la bo-21 la nywaga, Bakriste ba fetago dimilione tše šupa ba bontšha gore ba fišegela ntlo ya Modimo. Re le motho ka o tee ka o tee, re ka ipotšiša gore, ‘Nka oketša bjang phišego ya-ka bakeng sa ntlo ya Jehofa?’ E le go re thuša go araba potšišo ye, anke sa pele re ahla-ahleng seo ntlo ya Modimo e lego sona lehono. Ke moka, re tla ahla-ahla mehlala ya Beibele ya banna ba botegago bao ba ilego ba e fišegela. Mehlala ya bona e ngwaletšwe “go re ruta” gomme e ka re tutueletša gore re be le phišego e oketšegilego.—Baroma 15:4.

Ntlo ya Modimo—Mehleng ya Bogologolo le Lehono

4. Tempele yeo Solomone a e agilego e phethile morero ofe?

⁴ Isiraeleng ya bogologolo, ntlo ya Modimo e be e le tempele yeo e bego e le Jerusalema. Ke therešo gore Jehofa o be a sa dule ka go yona ka tsela ya kgonthe. O boletše gore: “Maxodimo ké sedulô sa-ka sa boxoši; lefase ké boxatô bya dinaô tša-ka; byale Ngwakô wo Le kaxo nkaxêla wôna o ka ba kae? Le bodulô byo nkaxo khutša xôna bo ka ba kae?” (Jes. 66:1) Lega go le bjalo, tempele yeo e agilwego nakong ya pušo ya Solomone e be e le lefelo la bohlokwa la borapedi bja Jehofa moo go bego go rapelwa gona.—1 Dikx. 8:27-30.

5. Ke thulaganyo efe lehono yeo e bego e swantšhetšwa ke borapedi tempeleng ya Solomone?

⁵ Lehono, ntlo ya Jehofa ga se moago o lego kua Jerusalema goba lefelong le ge e le lefe le lengwe. Go e na le moo, ke tokišetšo ya gore re rapele Jehofa motheong wa sehlabelo sa Kriste sa topollo. Bahlanka ba Modimo ka moka ba botegago ba lego mo lefaseng ba kopana tempeleng ye ya moya e le gore ba rapele Jehofa.—Jes. 60:4, 8, 13; Dit. 17:24; Baheb. 8:5; 9:24.

6. Ke dikgoši dife tša Juda tšeo di ilego tša bontšha phišego e kgahlišago bakeng sa borapedi bja therešo?

⁶ Ka morago ga go aroganywa ga Baisiraele morago kua ka 997 B.C.E., dikgoši tše nne go tše 19 tšeo di ilego tša buša Juda, e lego karolo ya ka borwa, di ile tša bontšha phišego e makatšago bakeng sa borapedi bja therešo. Dikgoši tšeo  e be e le Asa, Josafate, Hiskia le Josia. Re ka ithuta dithuto dife tša bohlokwa mehlaleng ya bona?

Go Hlankela ka Pelo ka Moka go Tliša Ditšhegofatšo

7, 8. (a) Jehofa o šegofatša tirelo ya mohuta mang? (b) Ke thuto efe ya temošo yeo re ka ithutago yona mohlaleng wa Kgoši Asa?

⁷ Nakong ya pušo ya Kgoši Asa, Jehofa o ile a romela baporofeta gore ba hlahle setšhaba sa Gagwe e le gore se botege. Ka mohlala, Beibele e re botša gore Asa o ile a theetša moporofeta Asaria morwa wa Odede. (Bala 2 Koronika 15:1-8.) Diphetogo tšeo Asa a ilego a di dira di ile tša kopanya batho ba Juda gotee le palo e kgolo ya batho ba mmušo wa Isiraele bao ba bego ba tlile pokanong e kgolo kua Jerusalema. Ka moka ga bona ba ile ba tsebatša boikemišetšo bja bona bja go hlankela Jehofa ka potego. Re bala gore: “Ba ênêla Morêna ka lentšu le lexolo, ka mexobô le ka dinaka le ka diphalafala. Ba-Juda ka moka ba thabêla kênô yeo, xobane ba be ba enne ka pelo ka moka, bà mo nyaka ka xo rata xa bôná ka moka, ba bá ba mo hwetša; ’me Morêna a ba khutšiša ka thokô tše xo fêla.” (2 Kor. 15:9-15) Ka kgonthe, Jehofa le rena o tla re šegofatša ka mo go swanago ge e ba re mo hlankela ka dipelo tša rena ka moka.—Mar. 12:30.

⁸ Ka manyami, Asa o ile a galefa ge a be a phošollwa ke Hanani wa mmoni. (2 Kor. 16:7-10) Re arabela bjang ge Jehofa a re nea keletšo goba tlhahlo a diriša bagolo ba Bakriste? Na re akgofela go amogela keletšo ya bona e theilwego Mangwalong gomme ra phema go wela molabeng wa go galefa?

9. Josafate le Bajuda ba be ba lebeletšane le bothata bofe, gona ba ile ba arabela bjang?

⁹ Josafate o bušitše e le kgoši kua Juda lekgolong la lesome la nywaga B.C.E. Yena gotee le Juda ka moka ba be ba lebeletšane le tlhaselo ya madira a kopanego a Baamone, Bamoaba le batho ba tšwago tikologong ya dithaba ya Seire. Ke’ng seo kgoši e ilego ya se dira, gaešita le ge e be e tšhogile? Yona gotee le banna bao e bego e e-na le bona gotee le basadi le bana ba bona ba ile ba kgobokana ntlong ya Jehofa e le gore ba rapele. (Bala 2 Koronika 20:3-6.) Go dumelelana le mantšu ao Solomone a a boletšego pele ga moo ge go be go kgakolwa tempele, Josafate o ile a rapela Jehofa ka tsela e kgomago pelo, a re: “Modimo wa rena! A O ka se ahlole wa ba lahla naa? Xobane rena xa re na matla xe xo fihla mašaba a makaakaa a re šwahlêla. Xa re tsebe se re kaxo se dira; mahlô a rena a lebeletše Wêna.” (2 Kor. 20:12, 13) Ka morago ga ge Josafate a rapetše, gona moo “bà sa eme ba phuthexile,” moya wa Jehofa o ile wa tutuetša Jehasiele wa Molefi gore a bolele mantšu a homotšago ao a ilego a nea batho kgodišego.—Bala 2 Koronika 20:14-17.

10. (a) Josafate le mmušo wa Juda ba ile ba newa tlhahlo bjang? (b) Re ka bontšha bjang tebogo bakeng sa tlhahlo yeo Jehofa a re neago yona lehono?

¹⁰ Ee, ka nako yeo Jehofa o ile a hlahla Josafate le mmušo wa Juda a diriša Jehasiele. Lehono, re newa khomotšo le tlhahlo ka sehlopha sa mohlanka yo a botegago le wa temogo. Ka kgonthe, ka mehla re nyaka go dirišana le bagolo ba kgethilwego gomme re ba nee tlhompho ka ge ba šoma ka thata go re diša le go diriša tlhahlo ya “mohlanka yo a botegago le wa temogo.”—Mat. 24:45; 1 Bathes. 5:12, 13.

11, 12. Re ka ithuta’ng go seo se diragaletšego Josafate le Juda?

¹¹ Go etša ge Josafate le batho ba gagwe ba ile ba kgobokana bakeng sa go tsoma tlhahlo ya Jehofa, anke le rena re se ke ra hlokomologa go bokana gotee le bana babo rena le dikgaetšedi dibokeng tša phuthego. Ge e ba ka dinako tše dingwe re ikhwetša re le mathateng a šoro gomme re sa tsebe seo re ka se dirago, anke re lateleng mohlala o beilwego ke Josafate le batho ba Juda gomme re retologele go Jehofa ka thapelo re mmotile ka mo go feletšego. (Die. 3:5, 6; Bafil. 4:6, 7) Gaešita le ge re arogantšwe le bana babo rena, dithapelo tša rena go Jehofa di re kopanya le ‘mokgatlo ka moka wa bana babo rena lefaseng.’—1 Pet. 5:9.

¹² Josafate gotee le batho bao a bego a e-na le bona ba ile ba latela tlhahlo ya Jehasiele e tšwago go Modimo. Mafelelo e bile afe? Ba ile ba fenya ntwa yeo e ilego ya latela gomme ba boela Jerusalema “bà thabile” ba swere “diletšô le ka  makope le ka dinaka, ba ya Ngwakong wa Morêna.” (2 Kor. 20:27, 28) Le rena ka mo go swanago re hlompha tlhahlo yeo Jehofa a re neago yona a diriša mokero wa gagwe gomme re tšea karolo go mo tumišeng.

Hlokomela Mafelo ao re Bokanago go Ona

13. Ke modiro ofe woo Hiskia a ilego a o thoma mathomong a pušo ya gagwe?

¹³ Kgweding ya pele ya pušo ya gagwe, Hiskia o ile a bontšha gore o fišegela borapedi bja Jehofa ka go bula tempele lefsa le go e tsošološa. O ile a rulaganya baperisita le Balefi gore ba hlwekiše ntlo ya Modimo. Ba ile ba dira bjalo ka matšatši a 16. (Bala 2 Koronika 29:16-18.) Maiteko ao a re gopotša modiro wa go hlokomela le go lokiša mafelo a rena a borapedi woo o a bolokago a le boemong bjo bo bontšhago gore re rapela Jehofa ka phišego. Na ga se wa ka wa kwa diphihlelo tšeo di bontšhago gore batho ba kgahlišwa ke phišego ya bana babo rena le dikgaetšedi bao ba tšeago karolo modirong o bjalo? Ee, maiteko a bona a tumiša Jehofa kudu.

14, 15. Ke modiro ofe lehono wo o tumišitšego Jehofa kudu? Nea mehlala.

¹⁴ Motseng o mongwe ka leboa la Engelane, monna yo mongwe o be a le kgahlanong le modiro o bego o šišintšwe wa go lokiša Holo ya Mmušo yeo e bego e bapelane le ntlo ya gagwe. Bana babo rena ba lefelong leo ba ile ba arabela ka botho. Ka ge ba be ba bona gore leboto leo le aroganyago Holo ya Mmušo le jarata ya monna yoo le nyaka go lokišwa, ba ile ba ithapela go le lokiša ntle le go mo lefiša. Ba ile ba šoma ka thata gomme ge e le gabotse ba tsošološa karolo e kgolo ya leboto leo. Ba ile ba swaragana le boemo gabotse kudu mo e lego gore monna yoo o ile a fetoša pono ya gagwe. Ga bjale o thuša ka go hlapetša Holo ya Mmušo.

¹⁵ Batho ba Jehofa ba tšea karolo modirong wa kago wa lefase ka bophara. Baithapi ba mafelong ao go agwago go ona bao ba ikemišeditšego go thuša ba šoma le baithapi ba nako e tletšego ba ditšhaba-tšhaba go agweng ga Diholo tša Mmušo, Diholo tša Kopano gotee le magae a Bethele. Sam ke moentšeneare yo a nago le bokgoni go tša tshepedišo ya go ruthetša le go tsenya moya wa go tonya. Yena le mosadi wa gagwe e lego Ruth ba etetše dinaga tše mmalwa kua Yuropa le Afrika e le gore ba thuše medirong ya kago. Kae le kae mo ba yago gona, ba thabela go dira modiro wa boboledi le diphuthego tša moo. Sam o hlalosa seo se dirilego gore a nyake  go tšea karolo medirong e bjalo ya ditšhaba-tšhaba ya kago ka gore: “Ke tutueditšwe ke kgothatšo ya bao ba ilego ba hlankela magaeng a Bethele nageng ya gešo le dinageng dišele. Go bona feela lethabo la bona le phišego go ile gwa ntutueletša gore ke nyake go hlankela ka tsela ye.”

E-kwa Ditaelo tša Modimo

16, 17. Batho ba Modimo ba tšere karolo ka phišego modirong ofe o kgethegilego, gona ka mafelelo afe?

¹⁶ Go tlaleletša go tsošološeng tempele, Hiskia o ile a tsošološa monyanya wa ngwaga le ngwaga wa Paseka woo Jehofa a bego a laetše gore o binwe. (Bala 2 Koronika 30:1, 4, 5.) Hiskia le badudi ba Jerusalema ba ile ba laletša setšhaba ka moka gore se be gona, go akaretša le bao ba bego ba le mmušong wa ka leboa. Batseta ba ile ba kitima nageng ka moka ba swere mangwalo a ditaletšo.—2 Kor. 30:6-9.

¹⁷ Nywageng ya morago bjale, re tšere karolo modirong o swanago. Re dirišitše ditaletšo tše kgahlišago tšeo di gatišitšwego go laletša batho ba lego tšhemong ya gabo rena gore ba bokane le rena ge re gopola Selalelo sa Morena, e le ge re e-kwa taelo ya Jesu. (Luka 22:19, 20) Re ile ra newa ditaelo Dibokeng tša rena tša Tirelo gomme ra tšea karolo ka phišego modirong wo. Ruri Jehofa o šegofaditše maiteko ao! Ngwagola feela, batho ba ka bago dimilione tše šupa ba abile ditaletšo tšeo gomme palo-moka ya batho ba 17 790 631 e bile gona Segopotšong!

18. Ke ka baka la’ng go fišegela borapedi bja therešo go le bohlokwa go wena?

¹⁸ Go ile gwa bolelwa ka Hiskia gore: “O be a botile Morêna Modimo wa Isiraele. Mo xo maxoši ka moka a Juda, xo a kxalê le xo ao mo latetšexo, xa xo’ e a swanaxo le Yêna. O be a xomarêla Morêna, a se kê a xomêla nthaxo, a hlôkômela ditaêlo tše Morêna a di laetšexo Mošê.” (2 Dikx. 18:5, 6) Eka go ka ba bjalo le ka rena. Go fišegela ga rena ntlo ya Modimo go tla re thuša go dula re kgomaretše Jehofa re e-na le tebelelo ya bophelo bjo bo sa felego.—Doit. 30:16.

Diriša Tlhahlo Gatee-tee

19. Ke maiteko afe ao a dirwago ka phišego nakong ya Segopotšo?

¹⁹ Ge Josia a buša e le kgoši, le yena o ile a rulaganya gore go be le monyanya wa Paseka gomme a dira dithulaganyo tše di tseneletšego e le gore o binwe . (2 Dikx. 23:21-23; 2 Kor. 35:1-19) Le rena re kgonthišetša gore re itokišetša gabotse bakeng sa dikopano tša selete, tša tikologo le tša letšatši le le kgethegilego go akaretša le Segopotšo. Dinageng tše dingwe bana babo rena ba bea le maphelo a bona kotsing e le gore ba bokane bakeng sa go gopola lehu la Kriste. Bagolo ba fišegago ba kgonthišetša gore ga go le o tee ka phuthegong yo a hlokomologwago. Batšofadi le bao ba fokolago ba a thušwa e le gore ba be gona tiragalong ye.

20. (a) Go ile gwa direga’ng nakong ya pušo ya Kgoši Josia, gona o ile a arabela bjang? (b) Ke thuto efe yeo re swanetšego go naganišiša ka yona?

²⁰ Nakong ya modiro wa tsošološo woo Kgoši Josia a ilego a o rulaganya, Moperisita yo a Phagamego Hilikia o ile a “hwetša Puku ya Melaô ya Morêna ye e beilwexo ke Mošê.” O ile a e nea mongwaledi wa kgoši e lego Safane yoo a ilego a thoma go balela Josia dikagare tša yona. (Bala 2 Koronika 34:14-18.) Mafelelo e bile afe? Gatee-tee kgoši e ile ya gagola diaparo tša yona e nyamile gomme ya laela banna bao gore ba bolele le Jehofa. A diriša moporofeta wa mosadi e lego Huluda, Modimo o ile a ba nea molaetša o nyatšago meetlo e mengwe ya bodumedi yeo e bego e dirwa Juda. Lega go le bjalo, Jehofa o ile a lemoga maiteko a mabotse a Josia a go fediša borapedi bja medimo ya diswantšho gomme Josia o ile a dula a amogelega go Jehofa go sa šetšwe kotsi yeo e bego e boletšwe e sa le  pele bakeng sa setšhaba ka kakaretšo. (2 Kor. 34:19-28) Re ka ithuta’ng go se? Ka kgonthe, re na le kganyogo e swanago le ya Josia. Re nyaka go diriša tlhahlo e tšwago go Jehofa gatee-tee, re naganišiša ka mohlala wa temošo wa seo se ka diregago ge e ba re dumelela bohlanogi le go se botege di šwahlela borapedi bja rena. Le gona, re ka kgodišega gore Jehofa o tla lemoga phišego ya rena bakeng sa borapedi bja therešo gomme a re amogela, go etša ge a dirile bjalo tabeng ya Josia.

21, 22. (a) Ke ka baka la’ng re swanetše go fišegela ntlo ya Jehofa? (b) Ke’ng seo re tlago go se ahla-ahla sehlogong se se latelago?

²¹ Dikgoši tšeo tše nne—Asa, Josafate, Hiskia le Josia—di re beetše mohlala o mobotse wa go fišegela ntlo ya Modimo ya borapedi. Le rena ka mo go swanago, phišego ya rena e swanetše go re tutueletša go bota Jehofa le go šoma ka thata borapeding bja gagwe. Ruri ke gabohlale e bile ke mo go thabišago go kwa tlhahlo ya Modimo le go arabela tlhokomelong le tayong e lerato tšeo re di newago ka phuthego le ka bagolo.

²² Sehlogo se se latelago se tla lebiša tlhokomelo ya rena tseleng yeo re fišegelago tirelo ya tšhemo gomme se tla kgothaletša bafsa go hlankela Tatago rena yo lerato ka phišego. Le gona, re tla ahla-ahla kamoo re ka phemago e nngwe ya ditutuetšo tše senyago tša Sathane. Ge re dutše re diriša dikgopotšo tše bjalo ka moka ka phišego, re tla ba re latela mohlala wa Morwa wa Jehofa ka boyena, Jesu, yoo go boletšwego ka yena gore: “Ke llwe ke lehufa ka ’baka la Ngwakô wa xaxo.”—Ps. 69:9; 119:111, 129; 1 Pet. 2:21.

Na o a Gopola?

• Jehofa o šegofatša tirelo ya mohuta ofe, gona ka baka la’ng?

• Re ka bontšha bjang gore re bota Jehofa?

• Phišego e ka re tutueletša go kwa ditaelo tša Modimo bjang?

[Dipotšišo tša Thuto]

[Diswantšho go letlakala 9]

Asa, Josafate, Hiskia le Josia ba bontšhitše phišego bjang bakeng sa ntlo ya Jehofa?