Magmaliw a Maseseg Parad Abung nen Jehova!
Magmaliw a Maseseg Parad Abung nen Jehova!
“Say paga [odino, seseg] ed abung mo akmonen to ak.”—JUAN 2:17.
1, 2. Nen 30 C.E., antoy ginawa nen Jesus diad templo, tan akin?
ILITRATOM pa iya’d nonot mo. Say taon ed saman et 30 C.E., tan panaon lay Paskua. Anem bulan antis na satan, ginapoan nen Jesus so ministeryo to diad dalin. Sanen sinmabi lay panaon na Paskua, sikatoy linma ed Jerusalem. Kasabi to ed templo, diad Korte na saray Gentil, anengneng to ray ‘manlalako na baka, karnero, tan malapati, tan saray managsalat na pilak a manyudyurong.’ Sikatoy nanggawa na lewet a lubir tan inaablog toy amin ya ayayep, tan siempre, inuusilan iratan na saray manlalako. Imbuyandak met nen Jesus iray pilak na saray managsalat na kuarta tan binalintuag to ray lamisaan da. Ingganggan to iramay manlalako na malapati ya ekalen da ray lako ra tan ontaynan la ra.—Juan 2:13-16.
2 Saman a ginawa nen Jesus et pakapatnagan na agaylan panangiyansakit to ed templo. Ingganggan to: “Agyo gawaen so abung nen Amak ya abung na tagtagilako!” Sanen naimatonan na saray disipulo nen Jesus iyan inkagawa, anonotan da imay insulat nen salmistan David pigaran siglo lay apalabas: “Say paga [odino, seseg] ed abung mo akmonen to ak.”—Juan 2:16, 17; Sal. 69:9.
3. (a) Anto so inkaseseg? (b) Anto so nitepet tayo’d inkasikatayo?
3 Say amakiwas ed si Jesus et say panangiyansakit, paga, odino inkaseseg to parad abung na Dios. Say inkaseseg et kabaliksan toy “inkamagunaet tan pampilpilalek a dampoten so sakey a bengatla.” Diad sayan koma-21 a siglo, masulok lan pitoran milyon a Kristiano so maseseg parad abung na Dios. Sirin et tepetan tayoy inkasikatayo, ‘Panon ak a magmaliw a mas maseseg parad abung nen Jehova?’ Pian naebatan tayo itan, aralen tayo nin unona no anto so natutukoy ya abung na Dios natan. Insan tayo aralen iray alimbawa ed Biblia na saray matoor a lalaki ya angipanengneng na ontan a seseg. Say alimbawa ra et nisulat ya “onkana ed kibangat tayo” tan mamakiwas ed sikatayon magmaliw a lalon maseseg.—Roma 15:4.
Abung na Dios—Nensaman tan Natan
4. Anto so gagala na templon impaalagey nen Solomon?
4 Diad Israel nensaman, say templo ed Jerusalem so abung na Dios. Siempre, agditan manaayam si Jehova ta oniay inkuan to: “Say tawen sikato so tronok, et say dalin sikato so gagatinan na saray salik. Anto a nengneng na abung so ipaalagey yo naani a nipaakar ed siak? Tan anto naani a pasen so pampainawaan ko?” (Isa. 66:1) Anggaman ontan, say templon impaalagey legan na uley nen Solomon so manunan pasen parad panagdayew ed si Jehova, tan ditan so pampipikasian na saray totoo To.—1 Ara. 8:27-30.
5. Diad sayan panaon, antoy irerepresenta na samay panagdayew diad templo nen Solomon?
5 Diad sayan panaon balet, say abung nen Jehova et aliwan sakey a bilding ed Jerusalem odino ed anggan iner a pasen. Imbes, say tutukoyen na satan et say uksoyan pian makaasingger tan makapandayew itayo ed sikato base ed dondon bagat nen Kristo. Nankakasakey so amin a matoor a lingkor nen Jehova ed dalin pian sikatoy dayewen diad sayan espiritual a templo.—Isa. 60:4, 8, 13; Gawa 17:24; Heb. 8:5; 9:24.
6. Sioparan arari ed Juda so angipanengneng na makapadinayew a seseg parad dugan panagdayew?
6 Kayarin naapag ed duaran panarian so Israel nen 997 B.C.E., 4 ed saray 19 ya arari na Juda (say abalaten a panarian) so angipanengneng na makapadinayew a seseg parad dugan panagdayew. Saraya et di Asa, Josafat, Hezekias, tan Josias. Antoran importantin leksion so naaral tayo ed saray alimbawa ra?
Bebendisyonan nen Jehova so Interon Puson Panaglingkor
7, 8. (a) Anton klase na panaglingkor so bebendisyonan nen Jehova? (b) No nipaakar ed panangawat na simbawa, antoy naaralan tayo ed si Arin Asa?
7 Nen uley nen Arin Asa, angibaki si Jehova na saray propeta a mangigiya ed nasyon To pian makapanmatoor ira. Singa bilang, ibabaga na Biblia a dinengel nen Asa si propetan Azarias, ya anak nen Obed. (Basaen so 2 Awaran 15:1-8.) Lapud saray reporman ginawa nen Asa, apankasakey toy totoo ed Juda tan ontan met ed saray dakerakel a sakop na amianen a panarian a dinmayo ed Jerusalem pian mibiang ed baleg a pantitipon. Nankakasakey dan imbesngaw so determinasyon dan matoor a dayewen si Jehova. Oniay nabasa tayo: “Sinambaan da ed Jehova ed maksil a boses, tan ingal, tan saray trumpeta, tan saray tambuyog. Et amin a Juda nanliket ed samba; ta sinambaan da ed simoon a puso ra, tan sikato so inanap da ed simoon a pilalek da; et sikato so aromog da. Et inikdan ira nen Jehova na painawa.” (2 Awa. 15:9-15) Seguradon bendisyonan itayo met nen Jehova no manlingkor itayo ed sikato ed interon puso.—Mar. 12:30.
8 Makapaermen balet ta diad saginonor et naopendi si Asa sanen sikatoy sinimbawa nen Hanani a “managnengneng.” (2 Awa. 16:7-10) Sikatayo ey, antoy reaksion tayo sano simbawaen itayo nen Jehova panamegley na saray mamatatken? Imbes ya abuloyan tayoy inkasikatayo a naopendi, tampol kasin awaten tayo tan iyaplika iray base ed Biblian simbawa ra?
9. Akin et tinmakot si Josafat tan say interon Juda, ingen ta antoy ginawa ra?
9 Nanari si Josafat ed Juda nen koma-samplon siglo B.C.E. Say interon uuleyan to et aatakien na nanuulop a puersa na Ammon, Moab, tan saray taga’d kapalandeyan na Seir. Anggaman natatakot so ari, antoy ginawa to? Sikato tan saray amin a lalaki ed Juda, pati saray kaasawaan tan ananak da, et nandaragup ed abung nen Jehova pian manpikasi. (Basaen so 2 Awaran 20:3-6.) Mitunosan ed samay pikakasi nen Solomon sanen indedika so templo, oniay mikakasin kerew nen Josafat ed si Jehova: “O Dios mi, agmo ta ra ukomen? Ta andian kami na pakapanyari sumpa ed saya a baleg ya ulop ya onsabi a sumpa ed sikami; agmi met amta no anto so gawaen mi. Balet saray mata mi wala ra ed sika.” (2 Awa. 20:12, 13) Kayari na impanpikasi nen Josafat “ed pegley na tipon,” pinakiwas na espiritu nen Jehova so Levitan si Jahaziel a mamaseseg ed saray totoo pian ombiskeg so linawa ra.—Basaen so 2 Awaran 20:14-17.
10. (a) Panon ya akaawat na instruksion si Josafat tan say Juda? (b) Panon tayon nipanengneng so panamabli ed saray instruksion ya iiter nen Jehova natan?
10 On, diad saman et angiter si Jehova na instruksion ed si Josafat tan ed Juda panamegley nen Jahaziel. Diad panaon tayo, makakaawat itayo met na panamaseseg tan instruksion panamegley na matoor tan makabat ya aripen. Seguradon labay tayo so lawas mikoopera tan mangipanengneng na respeto ed saray tinuron mamatatken, a mansasagpot ed panagpastol tan ed pangiiter ed saray instruksion a nanlapud “matoor tan makabat ya aripen.”—Mat. 24:45; 1 Tes. 5:12, 13.
11, 12. Antoy naaralan tayo ed si Josafat tan ed saray taga Juda?
11 Singa si Josafat tan saray totoo to a nantitipon pian paiwanwan ed si Jehova, agtayo met komon papaulyanan so regular ya iyatendi ed aral kaiba iray agagi. No walaray dadalanen tayon seryoso met a problema tan agtayo amta so gawaen tayo, aligen tayoy maabig ya alimbawa nen Josafat tan saray totoo ed Juda. Manpikasi itayo ed si Jehova tan sigpot a manmatalek ed Sikato. (Uli. 3:5, 6; Fil. 4:6, 7) Anggano bukbukor tayo, saray kerew tayo ed si Jehova so mangikasakey ed sikatayo ed saray ‘agagi a walad nanduruman pasen na mundo.’—1 Ped. 5:9.
12 Inunor di Josafat tan saray sakop to so inter na Dios ya instruksion panamegley nen Jahaziel. Antoy resulta? Impanalo ira nen Jehova tan pinmawil ira ed Jerusalem a “malikeliket,” a pinaknol da ray “salterio tan harpa tan tambuyog angga ed abung nen Jehova.” (2 Awa. 20:27, 28) Ontan met ed sikatayo natan, igagalang tayoy panangiwanwan nen Jehova panamegley na uusaren ton paralanan tan mibibiang itayo ed panagdayew ed sikato.
Asikasoen a Maong Iray Pasen a Pandaragupan Tayo
13. Anton kimey so indaulo nen Hezekias diad gapo na uley to?
13 Diad primeron bulan na uley nen Hezekias, impanengneng toy inkaseseg to ed panagdayew ed si Jehova sanen nilukasan to lamet so templo tan inapiger to itan. Inorganisa to iray saserdote tan Levita pian linisan so abung na Dios. Ginawa da itan ed loob na 16 ya agew. (Basaen so 2 Awaran 29:16-18.) Ipapanonot na satan so panamantini tan panag-apiger tayo ed saray pasen a pandaragupan tayo pian napansiansian marakep iratan. No gagawaen tayo itan, ipapanengneng tayoy inkaseseg ed panagdayew ed si Jehova. Seguradon wala la ray nadngelan yon eksperiensya a ditan et pandinayewan na arum so seseg na saray agagin mibibiang ed ontan a kimey. Petepeteg a parad kirayewan nen Jehova iratan a sagpot da.
14, 15. Anton kimey natan so kirarayewan a maong nen Jehova? Mangiter na saray alimbawa.
14 Diad sakey a syudad ed amianen na Inglatera, walay sakey a lakin sumpa ed plano na kongregasyon a pan-renovate ed Kingdom Hall a kaabay na sular to. Maomaong nin siansia balet so impideneng na saray agagi ed sikato. Sanen naimano ran kaukolan ya apigeren so padir a walad baetan na Kingdom Hall tan sular to, namboluntaryo iray agagi a gawaen itan, ya agda la siningil. Makulikuli ran ginawa itan, a diad katuaan to et apasimbalo lawari so interon padir. Lapud satan a ginawa na saray agagi, anguman so pitotoo na sayan laki. Natan et iyaansakit to la so Kingdom Hall.
15 Saray totoo nen Jehova et mibibiang ed kimey a panagpaalagey a nagagawa ed interon mundo. Walaray manlilingkor bilang sigpot-panaon ya international servant, a mangipapaalagey na saray Kingdom Hall, Assembly Hall, tan saray pasilidad ed Bethel, tan boluntaryon iibaan ira na arum nin agagi. Si Sam et sakey a marundunong ya enhinyero. Sikato tan say asawa ton si Ruth et oonla’d nanduruman bansa ed Europa tan Aprika pian ontulong ed saray proyekton panagpaalagey. Inerman so laen da, labalabay da met so manpulong kaibay agagi. Antoy amakiwas ed si Sam a mibiang ed ontan iran proyekto? Oniay inkuan to: “Apakiwas ak ed panamaseseg na saray agagin manlilingkor ed Bethel diad nanduruman bansa. Nanengneng ko labat so seseg tan liket da et talagan napapakiwas ak lan manlingkor.”
Tuloken Iray Instruksion na Dios
16, 17. Anton espisyal a kimey so maseseg a pibibiangan na saray totoo na Dios, tan antoy resulta?
16 Nilikud ni ed impangapiger ed templo, impawil nen Hezekias so tinaon a panagselebray Paskua ya ingganggan nen Jehova. (Basaen so 2 Awaran 30:1, 4, 5.) Inimbitaan nen Hezekias tan saray taga’d Jerusalem so interon nasyon, anggan saramay taga’d amianen a panarian. Tampol a sikatoy angibaki na saray mangitulor na imbitasyon diad interon nasyon.—2 Awa. 30:6-9.
17 Diad agano ni ran taon, nibagan mipara ed satan so gagawaen tayo. Mangibubunog itayo met na saray imbitasyon pian imbitaan iray totoo’d teritorya a mitipon ed sikatayo diad panselebra ed Pangdem na Katawan, bilang katutulok ed ganggan nen Jesus. (Luc. 22:19, 20) Makakaawat itayo na saray instruksion diad Pantitipon Parad Panagserbi tan maseseg itayon mibibiang ed sayan kimey. Tan talagan bebendisyonan nen Jehova so pansasagpot tayo! Singa bilang, nen katantaon et manga pitoran milyon so angibunog na imbitasyon, tan 17,790,631 a totoo so inmatendi!
18. Akin et importantin maong so pangipanengneng moy seseg parad dugan panagdayew?
18 Oniay ibabaga na Biblia nipaakar ed si Hezekias: “[Sikatoy] nanmatalek ed Jehova, a Dios na Israel; diad ontan a kayari to anggapo so singa sikato ed saray amin ya arari na Juda, nisay dia ed saray inmuna ed sikato. Ta pinmeket ed Jehova; agpinmaliis a manlapu ed itutumbok ed sikato, noag ingen inunor to so saray ganggan to, a si Jehova ingganggan to ed panamegley nen Moises.” (2 Ara. 18:5, 6) Aligen tayo komon so alimbawa nen Hezekias. Ontulong ed sikatayo so inkaseseg parad abung na Dios pian mantultuloy itayon ‘ompeket ed si Jehova,’ a lawas tayon sankanengneng so ilalon bilay ya andi-anggaan.—Deu. 30:16.
Tampol ya Ontulok ed Instruksion
19. Antoran pansasagpot so gagawaen tayo kapagno panaon lay Memoryal?
19 Sanen manaari si Josias, inyuksoy to met a selebraan so Paskua, tan imparaanan ton maong itan. (2 Ara. 23:21-23; 2 Awa. 35:1-19) Ontan tayo met natan, seseguroen tayon akaparaan itayon maong parad saray distriton kombension, sirkiton asemblea, espisyal ya asemblea, tan Memoryal. Wala ni ra ingey agagi ed arum a bansa ya iririsga day bilay da pian naselebraay impatey nen Kristo. Seseguroen na saray mangiyaansakit ya elder ya amin ed kongregasyon et makaatendi. Saray maedad tan agmakayari et tutulongan da pian makaatendi ed satan ya okasyon.
20. (a) Antoy agawa legay uley nen Arin Josias, tan antoy reaksion to? (b) Antoy naaralan tayo ed saya?
20 Sanen inyuksoy nen Arin Josias so kimey a pangapiger ed templo, aromog na Atagey a Saserdoten si Helcias so “libro na tunong nen Jehova, a niiter ed panamegley nen Moises.” Insan to itan inter ed si Safan a sekretaryo na ari. Tan binasa itan nen Safan ed si Josias. (Basaen so 2 Awaran 34:14-18.) Antoy reaksion nen Josias? Tampol a pinilat na ari so kawes to lapud ermen, tan walaray ingganggan ton lalaki ya ontupleg ed si Jehova. Panamegley nen propetesan Hulda, angiter so Dios na mensahe a mangokondena ed saray pigaran paraan na panagdayew a gagawaen diad Juda. Anggaman impropesiya lan walay desyang a nagawa’d interon nasyon, inimano nen Jehova so maabig a ginawa nen Josias ya ekalen so idolatriya. Tan nansiansiay panangabobon nen Jehova ed sikato. (2 Awa. 34:19-28) Antoy naaralan tayo ed saya? Seguradon kaliktan tayo met ya aligen si Josias. Labay tayon tamtampol a tuloken so instruksion nen Jehova, a nodnonoten tayo no antoy nagawa no ag-itayo manmatoor tan no abuloyan tayon nalaokan na apostasya so panagdayew tayo. Diad ontan et matalek itayo a naimano tan abobonan nen Jehova so inkaseseg tayo parad dugan panagdayew, a singa ed si Josias.
21, 22. (a) Akin et iyaansakit tayoy abung nen Jehova? (b) Antoy pantongtongan tayo ed onsublay ya artikulo?
21 Saramay apatiran arari ed Juda, salanti di Asa, Josafat, Hezekias, tan Josias, et napanuliranan so panangiyansakit da ed abung na Dios tan inkaseseg da ed panagdayew ed sikato. Mipadpara, nepeg a pakiwasen itayo na inkaseseg tayo a manmatalek ed si Jehova tan mansagpot ed panaglingkor. Talagan maabig no tuloken tayo iray instruksion na Dios, tan no onkiwas itayo ed maaron panangiyansakit tan panangorihe a naaawat tayo panamegley na kongregasyon tan saray mamatatken. No ontan so gawaen tayo, magmaliw itayon maliket.
22 Diad onsublay ya artikulo, pantongtongan tayo so nipaakar ed inkaseseg ed lawak na kimeyan, tan pabiskegen na satan iray tobonbalo a maseseg a manlingkor ed maaron Ama tayo. Naaralan tayo met no panon tayon napaliisan so sakey ed saray sankaugesan ya impluensya nen Satanas. No masimoon tayon tuloken iratan ya amin a panonot nen Jehova, natumbok tayoy ehemplo na Anak ton si Jesus, ya oniay impropesiya nipaakar ed sikato: “Say panagtalima [ed] abung mo kinan to ak.”—Sal. 69:9; 119:111, 129; 1 Ped. 2:21.
Kasin Natandaan Mo?
• Anton klase na panaglingkor so bebendisyonan nen Jehova, tan akin?
• Panon tayon nipanengneng so panagmatalek ed si Jehova?
• Panon itayon pakiwasen na inkaseseg a tuloken iray instruksion na Dios?
[Tepetepet Parad Panagaral]
[Saray litrato ed pahina 9]
Panon a nagmaliw a maseseg parad abung nen Jehova si Asa, Josafat, Hezekias, tan Josias?