Jehoväpa wayimpaq cëlakïmi usharaman

“Wayikipaq sëlakiymi usharaman.” (JUAN 2:17, QKW.)

1, 2. ¿Imatataq Jesus rurarqan kima chunka watachö temploman chärir y imanirtaq tsëtaqa rurarqan?

KËMAN yarpärishun, hoqta killa yachatsikur qallanqampita pasarishqanllachömi Jesus ëwarqan Jerusalen markata, kima chunka (30) wata Pascuata celebrayänan tiempochö. Chärirnam temploman ëwan, tsëchönam taririn nunakuna ‘toritucunata, üshacunata, y palumacunata rantiquicayaqta. Waquincunana qelleta trocarnin tëcayaqta’. Tsëchömi “wascapita chicotita alistaricur” animalkunata qarqaramun templopita, tsënam rantikoq nunakuna animalninkuna qepanta cörripa yarqukuriyan. Y qellëta trocaqkunapa qellënintapis patsamanmi hitakacharkun, y mësankunatapis tikrakacharkun, y palomata rantikoqkunatanam imëkëkikunata apakurkur këpita ëwakuyë nin (Juan 2:13-16).

² ¿Imanirtaq tsëtaqa Jesus rurëkorqan? Jehová adorana wayita alläpa kuyar y respetarmi. Rantikoqkunatam kënö nerqan: “¡Ama nunca Papänïpa wayinta mercadutano inishiyanquitsu”. Kë llapanta ruraqta rikarmi qateqninkuna yarpäriyarqan unë tiempochö salmista David kënö nenqanta: “Wayikipaq sëlakiymi usharaman” (Juan 2:16, 17, QKW; Sal. 69:9).

3. a) ¿Ima ninantaq celoso kë? b) ¿Ima tapukïtataq rurakunantsik cada cristiano?

³ Tsëtaqa Jesus rurarqan Jehoväpa wayimpaq alläpa cëlakoq karmi. Cëloqa, “nunata o imata karpis mana haqishpa pasëpa valorë” ninanmi. Kananqa qanchis millonpitapis masnam celoso cristiänokuna kantsik, tsënö karpis cada unom tapukunantsik: “¿Imanötaq Jehoväpa wayimpaq más celoso kanqäta rikätsiküman?”. Kë tapukïta contestanapaqqa, rikärishun kanan tiempo Diospa wayin imapis kanqanta, hina rikäshun unë tiempochö fiel nunakuna Jehoväpa wayimpaq celoso kayanqanta. Bibliachö tsë rurayanqankuna qellqarëkaqqa yanapamäshun noqantsikpis Jehoväpa wayimpaq celoso kanapaqmi (Rom. 15:4).

Diospa wayin unë kaq y kanan kaq

4. ¿Imatataq rurayaq Salomón ruratsenqan templochö?

⁴ Israelchöqa Diospa wayinqa karqan Jerusalenchö këkaq templom. Këqa manam kikin Jehovämi tsëchö täraq ninantsu. Kikin Jehovämi kënö nerqan: “Ciëloqa gobernarnin täranämi. Kë Patsaqa chakïpa harukunanmi. ¿Mëchötaq wayï rurapayämankiman? ¿Mëchötaq hamarinä sitiota këkan?” (Isa. 66:1). Salomón ruratsenqan templopaqmi Jehoväpa wayin niyarqan, Jehoväta adorayänan y mañakuyänan principal wayi kaptin (1 Rey. 8:27-30).

5. ¿Imataq tiempontsikchö Jehová Diospa wayin?

⁵ Kanan tiempontsikchöqa Jehoväpa wayinqa manam Jerusalenchö o huk markakunachöpis Diosta adorayänampaq rurashqa wayikunatsu. Sinöqa kikin Diosnintsik, imanöpis adoranapaq patsatsimonqanmi, tsëtaqa ruramushqa tsurin Jesuspa sacrificionwanmi. Tsë patsätsimonqan templomanmi llapan markapita tukïläya nunakuna Jehová Diosta alabayänampaq ëllukäyan o qorikäyan (Isa. 60:4, 8, 13; Hech. 17:24; Heb. 8:5; 9:24).

6. ¿Mëqan reykunataq Jehová Diospa adoracionninta celoso kar defendiyarqan?

⁶ Manaraq Jesus shamuptin 997 watachömi Israel ishkëman rakikärerqan, y ishkë gobiernoyoq tikrarerqan. Judätaqa chunka isqon (19) reykunam gobernayarqan, pero chuskoqllam rasumpëpa adoracionta defendiyarqan. Pëkunaqa kayarqan Asá, Jehosafat, Ezequías y Josïasmi. ¿Imatataq pëkunapita yachakuntsik?

 Shonqupita patsë Diosta sirveqqa bendiciontam chaskin

7, 8. a) ¿Imatataq rurashwan Jehová bendecimänapaq? b) ¿Asá imanö kanqantataq qatishwantsu?

⁷ Asá nishqan rey gobernanqan witsëmi, Jehová kacharqan profëtankunata hinantin markakunachö nunakunata willapäyänampaq, tsënöpa alli kaqta rurayänampaq. Musyarinapaq, Bibliam willamantsik Oded nishqampa tsurin Azarías nuna willapäkuptin rey Asá alli kaqta rurar qallëkonqanta (lei 2 Crónicas 15:1-8). Kë rey ruranqanmi yanaparqan llapan nunakuna junto Jehoväta adorayänampaq. Y ëllukätserqan o qorikätserqan llapan nunakunatam Jerusalenman, tsëmi llapan nunakuna ëwayarqan hasta norte kaq lado Israelpitapis. Tsëchömi llapankuna äniyarqan Jehovällatana serviyänampaq. Bibliam kënö nimantsik: “Jehovämanmi kushishqa sinchipa juramentäkuyarqan trompëtata y waqrata tocarëkar. Y Juda nacionpita llapan nunakunam kushikuyarqan shonqunkunapita patsë jurayanqanrëkur, awmi, llapan shonqunkunawanmi Diosta ashiyarqan, tsëmi pëqa permiterqan tariyänanta, y shumaq tranquilo kawakuyänampaqmi yanaparqan” (2 Cró. 15:9-15). Tsënöllam noqantsiktapis Jehová bendecimäshun shonqupita patsë servishqaqa (Mar. 12:30).

⁸ Alli rey këkarnimpis Asäqa tiempo pasariptin Hananí shutiyoq Diospa sirveqnin consejaptim alläpa piñakorqan (2 Cró. 16:7-10). Kanan tiempontsikchöqa congregacionta dirigeq cristiänokunawanmi Jehová Dios willapämantsik o anyamantsik. ¿Wiyakuntsikku Bibliawan consejamashqa? ¿Kushishqaku nimanqantsikta rurantsik o piñakuntsikku?

9. ¿Imatataq rurëta munayarqan Jehosafat-ta y wakin nunankunata chikeqninkuna y defendikuyänampaq imatataq rurayarqan?

⁹ Jehosafat nishqan rey gobernëkanqan witsanmi Ammón, Moab y Seír nishqan hirkakunachö täraq nunakuna willanakuyarqan Judäta ushakätsiyänampaq. ¿Imatataq rurarqan rey Jehosafat kë llapanta musyarirnin? Judächö llapan nunakunata, warmikunata y wambrakunatam mandarqan temploman ëllukäyänampaq o qorikäyänampaq Diosman mañakuyänampaq (lei 2 Crónicas 20:3-6). Salomón templota rurar usharirnin Jehová Diosman mañakonqannomi, Jehosafatpis kënö mañakorqan: “¡Diosnïkuna! ¿Manatsuraq pëkunataqa castiganki? Manam noqakunapaqa kantsu kallpäkuna kë atskaq juntapayämaqni nunakunapita defendekuyänäpaq, y manam ima rurëtapis puëdeyätsu, pero qamllamanmi rikaräyämo yanapayämanëkipaq” (2 Cró. 20:12, 13). Kë rey Jehoväman mañakurir ushariptinmi, Jehoväpa espïritun yanaparerqan Jahaziel nishqan levïtata, llapan nunakunata animanampaq Jehoväman más markäkuyänampaq o yärakuyänampaq (lei 2 Crónicas 20:14-17).

10. a) ¿Imanötaq Jehová yanaparqan Jehosafat-tawan nunankunata? b) ¿Imanötaq rikätsikuntsik Jehová Diosta wiyakonqantsikta y respetanqantsikta?

¹⁰ Rikanqantsiknömi Jehosafat-ta y wakin nunakunata Jehoväqa yanaparqan Jahaziel nishqan nunawan. Kanan tiempoqa, Jehová Dios yanapamantsik y pushamantsik “mäcoq, mäcoq cumplidu sirweqnin[wanmi]”. Tsëmi noqantsikpis wiyakunantsik y respetanantsik congregacionchö dirigeq cristiänokunata, pëkunaqa alläpa empëñuwanmi llapantapis yachatsiyan y mäkoq mäkoq cumplido sirveq nenqantam rurayan (Mat. 24:45; 1 Tes. 5:12, 13).

11, 12. ¿Imatataq yachakuntsik Jehosafat-ta y judïokunata pasanqampita?

¹¹ Jehosafat y Judächö täraq nunakunaqa ëllukäyarqan o qorikäyarqan Jehová Diospa yanapakïninta ashirninmi, tsënöllam noqantsikpis imëpis mana haqishpa qorikänantsik o ëllukänantsik cristiano mayintsikwan junto congregacionnintsikchö. Imëka problëmapa pasëkarnin, imatapis rurëta mana puëderqa, Jehosafat y Juda nunakuna rurayanqannö rurë, Jehová Diosman mañakï y shonqupita patsë pëman markäkï o yärakuy (Pro. 3:5, 6; Fili. 4:6, 7). Hapallëki këkarpis Diosman mañakonqëkim yanapashunki cristiano mayikikunawan junto këkaqno karinëkipaq (1 Ped. 5:9).

¹² Jehosafat y llapan judïokunam wiyakuyarqan Jehová Profëtan Jahazielwan willatsenqanta. ¿Imataq pasarqan wiyakuyanqanrëkur? Guërrachömi ganariyarqan, y kushishqam kutiyämorqan Jerusalenta. “Hatun arpakunawan, taksha arpakunawan y cornëtakunawanmi Jehoväpa wayinman yëkuriyarqan” (2 Cró. 20: 27, 28). Noqantsikpis Jehovällatam alabanantsik y dirigimänapaq churamushqankunatam cäsokunantsik.

Yachakunantsik wayikunata cuidashun

13. ¿Imatataq ruratsir qallëkorqan Ezequías Gobernar qallanqan killa?

¹³ Kananqa rikärishun Ezequías ruranqanta. Kë reyqa rikätsikorqan Jehoväta adorëqa alläpa preciso kanqantam, tsëmi gobernar qallanqan killallachöna Jehová Diosta adorana wayita altsatsir qallëkorqan. Sacerdotekunata y levïtakunatam churarqan, y pëkunam chunka hoqta (16) hunaqllachö Jehová Diospa wayinta limpiarnin ushariyarqan (lei 2 Crónicas 29:16-18). Këqa yarpätsimantsik Diosta adoranantsikpaq wayi mana alli këkaqta rikarnin raslla altsapärëkanapaq y shumaq limpiota katsinapaqmi. ¿Imëllaqa wiyashqaku kanki Jehoväpita yachakuna wayita kushishqa altsaqta o limpiaqta rikämarnintsik pillapis alläpa admirakoqta? Awmi, Jehová Diosta adoranqantsikchö celoso karnenqa, rikätsikushun Jehoväpa shutin alabashqa kanantam.

14, 15. ¿Ima trabäjokunataq Jehoväpa shutinta alaban? Willakaramï.

¹⁴ Inglaterra nacionpa norte lädon markanchömi Jehoväpa testïgonkuna willanakuyarqan yachatsikuyänan wayita altsayänampaq. Pero lädonchö täraq vecïnoqa manam munarqantsu. ¿Imanir? Tsë yachakuyänan wayita wayintawan rakeq perqata huchunëkaqta rikarnin. Tsënam testïgokunaqa huk mushoqtam shäritsiyämushaq y qamqa manam ni imatapis gastakunkitsu niyarqan. Alleqmi trabajayänan karqan llapan perqataraq yapë shäritsiyänan kaptin. Pero testïgokunaqa shumaqmi kë vecïnota parlapäyarqan y kananqa kë vecino alläpam kushikun y yachatsikuyänan wayita täparpis yanapakunmi.

¹⁵ Jehová Diospa sirveqninkunaqa hinantin Patsapam Diosta adoranapaq wayikunata rurayan. Siervos internacionales de tiempo completo nishqankunaqa huk nacionpita huk nacionmanmi ëwayan Jehoväpa Testïgonkuna Yachatsikuyänan Wayikunata ruraq, Asambleakunapaq Localkunata ruraq, y Betel wayikunata ruraq, pëkunatanam yanapayan patsan kaq testïgokuna. Sam y warmin Ruthmi Europa y Africapa atska nacionninkunapa ëwayashqa Jehoväta adorayanan wayikuna rurecho yanäpakoq. Y cada markaman trabajaq chäyanqanchömi patsan testïgokunawan Jehoväpita yachatsikoq yarquyan. Sammi willakun imanöpa kë trabäjokunachö yanapakunampaq animanqanta: “Atskaq cristiänokunatam reqï y pëkunaqa atska sucursalkunachömi yanapakur kayashqa y  pëkunam animayämarqan. Kushishqa y voluntadwan trabajaqta rikarmi noqapis yanapakïta munarerqä”.

Jehová nimanqantsikta rurashun

16, 17. ¿Ima invitacionta puritsirtaq Jehoväpa sirveqninkuna kushishqa yanapakuyashqa, y nunakuna tsë celebracionman ëwayashqaku?

¹⁶ Ezequiasqa manam Jehoväpa wayinllatatsu altsatserqan, sinöqa Pascuatapis cada wata celebrayänampaqmi yapë patsätserqan unëpitana Jehová mandakonqannö (lei 2 Crónicas 30:1, 4, 5). Ezequías y tsëchö täraq nunakunaqa invitayarqanmi wakin markakunapitapis tsë celebracionman shayämunampaq. Y huk grupo nunakunam hinantin markakunapa invitación cartakunata haqirnin ëwayarqan (2 Cró. 30:6-9).

¹⁷ Noqantsikpis tsënöllam atska watapana rurëkantsik. Shumaq invitacionkunatam vecïnontsikkunapaq apëkantsik, noqantsikwan paqta Señorpa Cënanta celebrayänampaq Jesus mandakonqannö (Luc. 22:19, 20). Diospa Gobiernompita Yachatsikunapaq nishqan reunionchömi kë invitacionkunata imanö haqinapaqpis yachatsimarqontsik, y tsë invitacionkunata haqinapaqqa kushishqam yarqorqontsik. ¿Tsënö trabajanqantsikta bendecimushqaku Jehová? ¡Awmi! Qanyan watam qanchis millón publicadorkuna invitakoq yarquyarqan hinantin Patsapa, y tsënö invitakur puriyanqampitam shayämorqan 17.790.631 nunakuna.

18. ¿Imanirtaq Jehoväta cëlowan servi alläpa preciso kanqanta rikankiman?

¹⁸ Ezequïaspaqmi Biblia kënö nimantsik: “Israelpa Diosnin Jehovämanmi Ezequiasqa confiakorqan, Juda nacionchö reykunaqa manam mëqampis Ezequïasnöqa karqantsu pëpa puntanta, ni qepantapis. Jehovämanmi más confiakorqan. Pëpitaqa manam rakikarqantsu, tsëpa rantenqa Moisestawan Jehová mandamientokunata qomunqantam cäsokur siguerqan” (2 Rey. 18:5, 6). Kë rey ruranqannö noqantsikpis rurashun. Jehová Diospa wayimpaq celoso kanqantsikmi yanapamäshun Jehoväman más markäkunapaq o yärakunapä, y mana wanushpa kawakï qarëta chaskinata mana qonqëkunapaq (Deu. 30:16).

Raslla wiyakushun

19. ¿Imanötaq Jesuspa wanïnin alläpa preciso kanqanta Diospa sirveqninkuna rikätsikuyan?

¹⁹ Hina Josías shutiyoq reypis alistapakorqanmi Pascuata celebrayänampaq (2 Rey. 23:21-23; 2 Cró. 35:1-19). Noqantsikpis tiempollapitanam shumaq alistapakuntsik huk hunaq kaq, ishkë hunaq kaq, y kima hunaq kaq asambleata y Jesuspa wanïnintapis celebranapaq. Wakin nacionkunachöqa cristiänokuna kawëninkunatapis peligroman churarmi ëllukäyan o qorikäyan Jesuspa wanïninta yarpäyänampaq. Congregacionta dirigeq cristiänokunam kuyakïninkunata rikätsikuyan, qeshyaqkunata, awkinkunata, chakwankunata yanaparnin, mana faltashpa tsë celebracionman ëwayänampaq.

20. a) ¿Imataq pasakorqan Josías gobernanqan witsë, y Josiasqa imatataq rurarqan? b) ¿Y imatataq noqantsiktaqa yachatsimantsik?

²⁰ Rey Josïasmi mandakorqan Jehoväpa templonta altsayänampaq. Tsë templota altsëkäyanqanchömi sumo sacerdote Hilquías “tarirerqan Jehoväpa leyninkunata Moises qellqanqan librota”, y Safán shutiyoq reypa secretariontam entregarerqan, y kë secretarionam rey kaqman aparerqan y tsë höram leipur qallëkorqan (lei 2 Crónicas 34:14-18). ¿Imanötaq Josías tikrarerqan? Tsë höram alläpa llakikurnin hasta röpantapis rachirerqan, y hinan höram nunankunata mandarqan Jehoväta tapukuyänampaq. Profetisa Huldá nishqanwanmi Jehová willamorqan mana alli rurëkäyanqanta, y llapan marka castigota chaskinanta. Pero reyqa rasllam mana alli adoracionta y idolokunata ushakätsir qallëkorqan, tsënöpam Jehová perdonarerqan (2 Cró.  34:19-28). ¿Kë pasakonqan imatataq yachatsimantsik? Josïasnö noqantsikpis ruranapaqmi. Jehová mandamanqantsikkunataqa shonqupita patsëmi wiyakunantsik y kushishqam ruranantsik. Hina alleqmi yarpakachänantsik israelïtakunano mana wiyakoq kar y Diospa contran tikrashqakunapa yachatsikïninkunata chaskishqaqa tukï mana allikuna pasamänata. Josías ruranqanqa alleqmi rikätsimantsik, Jehoväpa kaqpaq celoso kar defendenqantsiktaqa Jehová musyëkanqanta.

21, 22. a) ¿Imanirtaq Jehoväpa wayimpaq alläpa celoso kashwan? b) ¿Imapitataq qateqnin tëmacho yachakushun?

²¹ Judäpa chuskun reyninkunapaq —Asá, Jehosafat, Ezequías y Josías—parlanqantsikqa rikätsimantsik Jehoväpa wayimpaq y adoracionnimpaq alläpa celoso kayanqantam y tsënölla noqantsikpis kanatam. Alleqmi sinchikunantsik shonqupita patsë Jehoväta adoranantsikpaq, y pëllamanna markäkunantsikpaq o yärakunantsikpaq. Noqantsikpaq alli kaq y kushitsimanqantsik rurëqa, Diosnintsik nimanqantsikta wiyakïmi y raslla rurëmi, hina congregacionchö dirigeq kuyakoq anciänokunapa consëjonta chaskikïmi.

²² Qateqnin tëmachömi yachakushun Jehoväpita yachatsikïchö celoso kanapaq kaqta, y llapan jövenkunatam animanqa kushishqa shonqupita patsë kuyakoq Teyta Diosnintsikta serviyänampaq. Hinamampis rikäshunmi Satanaspa huk toqllanta, y tsëman mana ishkinapaqpis yachakushunmi. Kushishqa shonqupita patsë Jehová Dios mandamanqantsikta wiyakurnenqa, cada hunaqmi más qatishun Jehoväpa Tsurin Jesus ruranqanta, pëpaqmi Biblia kënö nin: “Wayikipaq cëlakïmi usharamashqa” (Sal. 69:9; 119:111, 129; 1 Ped. 2:21).

¿Yarpankiku?

• ¿Imanötaq Jehoväta servishwan bendicionninta chaskinapaq, y imanir?

• ¿Imanötaq rikätsikushwan Jehoväman pasëpa markäkonqantsikta o yärakunqantsikta?

• ¿Imachötaq igualäyan Jehoväpa leyninkunata wiyakonqantsik celoso këwan?

[Yachakunapaq kaqpa tapukïninkuna]

[17 kaq päginachö dibüjukuna]

¿Imanötaq rikätsikuyarqan Asá, Jehosafat, Ezequías y Josías Jehoväpa wayimpaq pasëpa celoso kayanqanta?