De fayafaya gi na oso fu Yehovah!
De fayafaya gi na oso fu Yehovah!
„A faya di mi abi gi na oso fu yu, o bron na ini mi.”—YOH. 2:17.
1, 2. San Yesus du na ini a tempel na ini a yari 30, èn fu san ede a du dati?
NA A ten fu a Paskafesa fu a yari 30, Yesus go na Yerusalem. Siksi mun na fesi, a ben bigin nanga a diniwroko fu en na grontapu. Di Yesus doro na a tempel, dan a go na ini a Fesidyari fu den sma di no de Dyu. Drape a si „sma di ben e seri kaw, skapu, nanga doifi; a si sma tu di ben e sidon na tapu den sturu fu den e broko moni”. A teki wan wipi di ben meki fu titei, èn a yagi ala den meti go na dorosei. A no de fu taki dati den sma di ben e seri den meti disi, go tu na dorosei. Boiti dati, Yesus trowe a moni fu den sma di ben e broko moni, go na tapu a gron, èn a pusu den tafra fu den trowe. A taigi den sma di ben e seri doifi, fu teki den sani fu den èn fu gowe.—Yoh. 2:13-16.
2 Den sani di Yesus du e sori krin taki a ben e broko en ede nanga a tempel. A gi den sma a komando disi: „No meki na oso fu mi Tata de wan presi moro pe sma e kon fu bai noso fu seri sani!” Di den disipel fu Yesus ben e luku san ben e pasa, dan den memre den wortu di a psalm skrifiman David ben skrifi hondrohondro yari na fesi. A ben skrifi: „A faya di mi abi gi na oso fu yu, o bron na ini mi.”—Yoh. 2:16, 17; Ps. 69:9.
3. (a) San a wani taki fu de fayafaya? (b) Sortu sani wi kan aksi wisrefi?
3 Na fu di Yesus ben de fayafaya gi na oso fu Gado, meki a du den sani dati. Wan sma di de fayafaya, ’e angri trutru fu doro wan marki’. Na ini a di fu 21 yarihondro disi, moro leki seibi milyun Kresten e sori taki den de fayafaya gi na oso fu Gado. Ibriwan fu wi kan aksi ensrefi a sani disi: ’Fa mi kan kon abi moro faya gi na oso fu Yehovah?’ Fu man kisi piki tapu na aksi dati, dan meki wi go luku fosi san na a oso fu Gado na ini a ten disi. Baka dati, wi sa poti prakseri na Bijbel eksempre fu reti-ati man di ben de fayafaya gi na oso fu Gado. Den eksempre fu den man disi ben skrifi „ fu leri wi wan sani” èn den kan gi wi deki-ati fu kon abi moro faya. —Rom. 15:4.
Na oso fu Gado na ini owruten èn na ini a ten disi
4. San sma ben e du na a tempel di Salomo ben bow?
4 Na ini owruten Israel, na oso fu Gado ben de a tempel na ini Yerusalem. A no de fu taki dati Yehovah no ben e libi drape trutru. A ben taki: „Hemel na mi kownusturu, èn grontapu na mi futubangi. Pe na oso de dan di un pipel kan bow gi mi, èn pe a presi de dan, di de leki wan rostupresi gi mi?” (Yes. 66:1) Ma toku a tempel di ben bow na a ten di Salomo ben de kownu, ben de a moro prenspari presi pe sma ben e anbegi Yehovah èn pe den ben e begi En.—1 Kow. 8:27-30.
5. San na anbegi di sma ben e anbegi Gado na a tempel, e prenki na ini a ten disi?
5 Na ini a ten disi, na oso fu Yehovah no de wan ston gebow na ini Yerusalem, noso na iniwan tra presi. Na presi fu dati, a de wan seti fu Gado, so taki wi kan anbegi en nanga yepi fu a frulusu-ofrandi fu Krestes. Ala den reti-ati futuboi fu Gado na grontapu e anbegi En na ini wánfasi na ini na agersi tempel.—Yes. 60:4, 8, 13; Tori. 17:24; Hebr. 8:5; 9:24.
6. Sortu kownu fu Yuda ben de fayafaya gi a tru anbegi?
6 Na ini a yari 997 bifo Krestes, Israel prati na ini tu kownukondre. Fo fu den 19 kownu di ben e tiri Yuda, noso a zuidsei kownukondre, sori na wan heri moi fasi taki den ben de fayafaya gi a tru anbegi. Den kownu dati na Asa, Yosafat, Heskia, nanga Yosia. Sortu prenspari sani wi kan leri fu na eksempre fu den?
Wi e kisi blesi te wi e dini Gado nanga wi heri ati
7, 8. (a) Fa wi musu dini Yehovah efu wi wani taki a blesi wi? (b) Fa na eksempre fu Kownu Asa de leki wan warskow gi wi?
7 Na a ten di Kownu Asa ben e tiri, Yehovah seni tu profeiti fu yepi a pipel fu En, so taki den ben kan tan anbegi en na a yoisti fasi. Fu eksempre, Bijbel e taki dati Asa ben arki a profeiti Asaria, a manpikin fu Oded. (Leisi 2 Kroniki 15:1-8.) Asa ben tyari kenki kon na ini a kondre fu en. A sani dati meki taki a pipel fu Yuda èn sosrefi furu sma fu a kownukondre fu Israel di ben kon na wan bigi konmakandra na ini Yerusalem, kon de na ini wánfasi. Den alamala meki bekènti taki den ben o anbegi Yehovah nanga den heri ati. Bijbel e taki: „Sobun, nanga wan tranga sten den sweri gi Yehovah, taki den ben o du den sani disi. Den ben e bari fu prisiri tu èn den ben e bro trompeti nanga tutu. A heri lo fu Yuda ben e prisiri di den sweri gi Gado taki den ben o du den sani disi. Bika nanga den heri ati den ben meki a sweri disi. Den ben breiti tu taki den ben suku Gado èn taki Gado ben meki taki den feni en. Baka dati Yehovah tan meki sani waka bun gi den” (2 Kron. 15:9-15). A no de fu taki dati Yehovah sa blesi wi tu te wi e dini en nanga wi heri ati.—Mark. 12:30.
8 Ma a sari fu taki dati bakaten Asa no ben wani teki rai fu Hanani, a man di ben e kisi fisyun (2 Kron. 16:7-10). Fa wi feni en te Yehovah e gi wi rai nanga yepi fu den Kresten owruman? Wi e luku bun taki wi no e atibron, ma taki wi e gi yesi wantewante na a rai fu den di e komoto fu Bijbel?
9. Sortu ogri ben kan miti Yosafat nanga a pipel fu Yuda èn san den du?
9 Yosafat ben e tiri leki kownu fu Yuda na a ten fu a di fu tin yarihondro bifo Krestes. En nanga a heri pipel fu Yuda ben e frede fu di den legre fu Amon, Moab, nanga a pipel fu a bergi kontren fu Se-ir, ben wani kon feti nanga den. Aladi a kownu ben frede, san a du? En nanga den man di ben e horibaka gi en, èn sosrefi den wefi nanga den pikin fu den, kon makandra na a oso fu Yehovah fu begi. (Leisi 2 Kroniki 20:3-6.) Den sani di Yosafat taki na ini a begi fu en, e kruderi nanga den wortu di Salomo ben taki di a ben gi a tempel abra na Yehovah. Yosafat ben begi fayafaya: „Ke wi Gado, san yu o du? Yu o strafu den? Wi no tranga nofo fu feti nanga a bigi legre di e hari kon feti nanga wi. Boiti dati, wi no sabi san wi musu du. Na fu dati ede wi e aksi yu fu yepi wi” (2 Kron. 20:12, 13). Baka di Yosafat begi drape „na mindri den sma di ben kon makandra”, dan a santa yeye fu Yehovah meki Yahasièl, wan Leifisma, taki wan tu wortu fu trowstu a pipel èn fu gi den deki-ati.—Leisi 2 Kroniki 20:14-17.
10. (a) Fa Yosafat nanga a kownukondre fu Yuda kisi rai? (b) Fa wi kan sori taki wi abi warderi gi a rai di Yehovah e gi wi na ini a ten disi?
10 Iya, na a ten dati, Yosafat nanga a kownukondre fu Yuda, kisi rai fu Yehovah nanga yepi fu Yahasièl. Na ini a ten disi, wi e kisi trowstu nanga rai, nanga yepi fu a getrow èn koni srafu. A no de fu taki dati ala ten wi wani horibaka gi den owruman di Gado poti fu teki fesi. Wi wani sori lespeki tu gi den, fu di den e wroko tranga fu hori densrefi na den rai di e komoto fu „a getrow èn koni srafu”.—Mat. 24:45; 1 Tes. 5:12, 13.
11, 12. San wi kan leri fu den sani di pasa nanga Yosafat èn a pipel fu Yuda?
11 Soleki fa wi si, dan Yosafat nanga a pipel fu en ben kon makandra fu suku rai na Yehovah. Neleki den, wi musu go na den gemeente konmakandra doronomo fu abi demakandra nanga wi Kresten brada nanga sisa. Efu son leisi wi abi bigi problema, èn wi no sabi san fu du, dan meki wi teki a moi eksempre fu Yosafat èn a di fu a pipel fu Yuda. Iya, meki wi begi Yehovah fu suku yepi na en, aladi wi abi a frutrow taki A sa yepi wi (Odo 3:5, 6; Fil. 4:6, 7). Te wi e begi Yehovah, wi e kon de na ini wánfasi nanga ’ala den brada fu wi na heri grontapu’, awansi wi e tan na wan farawe presi.—1 Petr. 5:9.
12 Yosafat nanga a pipel fu en ben gi yesi na a rai di Gado ben gi den nanga yepi fu Yahasièl. San ben de a bakapisi? Di den feanti kon feti nanga den, dan den wini a feti, èn den drai go baka na Yerusalem „nanga prisiri” èn nanga „harpu, trompeti, nanga tra pokusani di gersi harpu” (2 Kron. 20:27, 28). Wi abi lespeki tu gi den rai di Yehovah e gi wi nanga yepi fu a getrow èn koni srafu, èn wi e prèise En tu.
Wi musu sorgu bun gi den konmakandra presi fu wi
13. Sortu wroko Heskia bigin du di a tron kownu?
13 Na ini a fosi mun di Heskia ben e tiri leki kownu, dan a sori taki a ben de fayafaya gi na anbegi fu Yehovah. A opo a tempel baka èn a seti en kon bun baka. A gi den priester nanga den Leifisma a frantwortu fu krin na oso fu Gado. Den du dati na ini 16 dei. (Leisi 2 Kroniki 29:16-18.) Den sani disi e memre wi na a wroko di sma e du fu sorgu taki den konmakandra presi fu wi e tan bun, so taki sma kan si taki wi e anbegi Yehovah fayafaya. Yu yere ondrofenitori di e sori taki sma e fruwondru taki wi Kresten brada nanga sisa e du a wroko dati nanga so furu faya? Iya, a muiti di den e du e gi grani na Yehovah.
14, 15. Sortu wroko na ini a ten disi e gi bigi grani na Yehovah? Gi wan tu eksempre.
14 Na ini wan foto na a noordsei fu Ingrisikondre, wan man no ben feni en bun taki wan brada ben o du wan tu bigi bow-wroko na a Kownukondre zaal di ben de na sei a dyari fu en. Den brada fu a birti handri na wan switi fasi nanga a man. Den si taki a skotu di ben e prati a dyari fu a man nanga a di fu a Kownukondre zaal, ben musu seti kon bun baka. Dati meki den taigi a man taki den ben o du a wroko dati, èn a no ben o abi fu pai noti. Den brada wroko tranga, èn fu taki en leti, den meki wan heri pisi fu a skotu baka. Den handri so bun nanga a man disi, taki a kenki den fasi fu en. Now a e yepi fu luku taki fufuruman no e kon na tapu a dyari fu a Kownukondre zaal.
15 A pipel fu Yehovah e teki prati na a bow-wroko di e du na heri grontapu. Kresten brada nanga sisa di de klariklari fu yepi nanga a wroko di e du na ini a kondre fu den, e wroko makandra nanga brada nanga sisa fu tra kondre. Den e bow Kownukondre zaal, Kongreshal, nanga Bethel-oso. Sam, na wan wrokoman di abi a koni fu wroko nanga apparaat di e sorgu taki den inisei fu den gebow no e kowru èn no e waran tumusi. En nanga en wefi Ruth, go na difrenti kondre na ini Europa nanga Afrika fu yepi nanga bow-wroko. Na iniwan presi pe den e go, den lobi fu preiki makandra nanga den gemeente drape. Sam e fruteri san meki taki a bigin teki prati na a bow-wroko di e du na heri grontapu. A e taki: „Na fu di mi kisi deki-ati fu brada nanga sisa di e dini na den Bethel-oso na ini difrenti kondre. Di mi si fa den sma de fayafaya èn fa den e prisiri, dan mi kisi na angri fu go du a diniwroko disi.”
Gi yesi na rai di e komoto fu Gado
16, 17. Na sortu prenspari wroko a pipel fu Gado teki prati fayafaya? San na a bakapisi?
16 Boiti taki Heskia seti a tempel kon bun baka, a meki a pipel hori a Paskafesa ibri yari baka, soleki fa Yehovah ben taigi den fu du. (Leisi 2 Kroniki 30:1, 4, 5.) Heskia nanga den sma fu Yerusalem gi a heri pipel wan kari fu kon na a Paskafesa. Den gi sosrefi a pipel fu a noordsei kownukondre wan kari. Boskopuman lon go na difrenti presi fu a kondre fu tyari brifi go gi sma fu gi den wan kari.—2 Kron. 30:6-9.
17 Na ini den yari di pasa, wi yepi fu du wan srefi sortu sani. Nanga yepi fu moi traktaat, wi gi sma na ini a kontren fu wi a kari fu kon makandra nanga wi fu hori a Memrefesa fu Masra, soleki fa Yesus ben taigi wi fu du (Luk. 22:19, 20). Fu di wi kisi rai na den Diniwroko Konmakandra, meki wi teki prati fayafaya na a wroko disi. Èn a no de fu taki dati Yehovah blesi a muiti di wi meki! A yari di pasa, sowan seibi milyun fu wi prati traktaat gi sma fu gi den wan kari, èn 17.790.631 sma kon na a Memrefesa!
18. Fu san ede yu musu de fayafaya gi a tru anbegi?
18 Bijbel e taki fu Heskia: „Heskia ben de wan sma di ben e frutrow tapu Yehovah, a Gado fu Israel. Nowan enkri kownu fu Yuda di tiri fosi Heskia ben de leki en, èn noiti moro wan kownu kon di ben de leki en. Heskia no gowe libi Yehovah. Ala ten Heskia gi yesi na en èn a gi yesi na den komando di Yehovah ben gi Moses” (2 Kow. 18:5, 6). Wi musu teki na eksempre disi tu.Te wi de fayafaya gi na oso fu Gado, dan dati sa yepi wi fu „no gowe libi Yehovah”, èn wi sa abi a howpu fu kisi têgo libi.—Deut. 30:16.
Gi yesi na rai wantewante
19. Sortu muiti den Kresten brada nanga sisa e du na a ten fu a Memrefesa?
19 Di Yosia ben e tiri leki kownu, dan a seti sani finifini tu, so taki a pipel fu en ben kan hori a Paskafesa (2 Kow. 23:21-23; 2 Kron. 35:1-19). Wi musu seti sani finifini tu fu man de na den distrikt kongres, den kring konmakandra, den spesrutu-dei konmakandra, nanga a Memrefesa. Son brada na ini wan tu kondre de klariklari fu go na a Memrefesa, aladi den kan lasi den libi. Owruman di e wroko fayafaya e sorgu taki den e poti prakseri na ibri sma na ini a gemeente. Den owruwan nanga den sikiwan e kisi yepi so taki den kan de na a Memrefesa.
20. (a) San pasa na a ten di Kownu Yosia ben e tiri, èn san a du? (b) San wi wani hori na prakseri?
20 Na a ten di Kownu Yosia ben e seti a tempel kon bun baka, dan a Granpriester Helkia „feni a wètbuku di Yehovah ben meki Moses skrifi”. A gi a buku na Safan, a sekretarsi fu a kownu, èn Safan bigin leisi en gi Yosia. (Leisi 2 Kroniki 34:14-18.) San ben de a bakapisi? Wantewante a kownu bigin firi sari. A priti den krosi na en skin, èn a gi den man a komando fu suku rai na Yehovah. Gado meki na umaprofeiti Hulda go taigi a pipel fu Yuda, taki a no ben e agri nanga wan tu fu den sani di den ben e du na ini na anbegi fu den. Ma a si a muiti di Yosia meki fu tyari wan kaba kon na den sani dati di ben abi fu du nanga falsi anbegi. Dati meki Yehovah tan feni en bun aladi a taki dati rampu ben o miti a pipel (2 Kron. 34:19-28). San wi kan leri fu a tori disi? A no de fu taki dati wi wani de leki Yosia. Wi wani gi yesi wantewante na a rai fu Yehovah, èn wi wani hori krin na prakseri san kan pasa te wi e bribi falsi leri èn te wi e trangayesi Gado. Èn wi kan abi a dyaranti taki Yehovah sa feni wi bun te wi de fayafaya gi a tru anbegi, neleki fa a ben feni Yosia bun.
21, 22. (a) Fu san ede wi musu sori taki wi de fayafaya gi na oso fu Yehovah? (b) Na sortu sani wi sa poti prakseri na ini a tra artikel?
21 Den fo kownu fu Yuda, namku Asa, Yosafat, Heskia, nanga Yosia, ben de bun eksempre gi wi, fu di den ben de fayafaya gi na oso èn na anbegi fu Gado. Te wi de fayafaya gi a tru anbegi, dan wi sa frutrow tapu Yehovah, èn wi sa du ala san wi man fu horibaka gi na anbegi fu en. A no de fu taki dati a de wan koni sani fu gi yesi na den rai fu Gado. A de wan koni sani tu fu kisi wini fu a lobi nanga a piri-ai di wi e kisi nanga yepi fu a gemeente èn nanga yepi fu den owruman. Boiti dati, wi sa de koloku te wi e du den sani disi.
22 Na ini a tra artikel wi sa luku fa wi kan de fayafaya na ini a preikiwroko, èn na artikel disi sa gi yonguwan deki-ati fu dini wi lobi-ati Tata fayafaya. Wi sa kon sabi tu fa wi kan luku bun nanga wan fu den moro prenspari fasi fa Satan e kori sma. Te wi de klariklari fu gi yesi na ala den rai di wi e kisi fu Yehovah, dan wi sa teki na eksempre fu Yehovah en eigi Manpikin, Yesus. Bijbel e taki fu a Manpikin disi: „Bika a faya di mi abi gi na oso fu yu, o bron na ini mi.”—Ps. 69:9; 119:111, 129; 1 Petr. 2:21.
Yu e memre disi?
• Fa wi musu dini Yehovah efu wi wani taki a blesi wi?
• Fa wi kan sori taki wi abi frutrow na ini Yehovah?
• Te wi de fayafaya, dan fa dati kan yepi wi fu gi yesi na den rai fu Gado?
[Aksi fu a tori disi]
[Prenki na tapu bladzijde 9]
Fa Asa, Yosafat, Heskia, nanga Yosia ben sori taki den ben de fayafaya gi na oso fu Yehovah?