Oyuk tajek ta koʼontontik li sna Jeovae
Oyuk tajek ta koʼontontik li sna Jeovae
«Tsots scʼoplal cʼotem ta coʼnton ta xcaʼi ti achʼulna ti lecuc oyuque.» (JUAN 2:17, Ch)
1, 2. ¿Kʼusi la spas ta chʼulna li Jesús ta sjabilal 30, xchiʼuk kʼu yuʼun?
NOPO avaʼi liʼe: li Jesuse yakal chanav batel ta sbelel Jerusalén sventa chbat li ta kʼin Koltael ta sjabilal 30, vakib xaʼox u slikesoj li yabtel ta chol mantale. Kʼalal kʼot ta Jerusalene tukʼ ibat li ta chʼulnae, vaʼun te la sta «jchonvacaxetic, jchonchijetic, xchiʼuc jchonpalomaetic. Te chotajtic noxtoc jeltaqʼuinetic» ta yamakʼil chʼulna ti jaʼ yavil li jyanlumetike. Te la stsʼot chʼojon, vaʼun jaʼ la snuts-o lokʼel li chonbolometike, jech lokʼ ta anil ek li jpʼolmaletike. La stanibe stakʼinik li jeltakʼinetike xchiʼuk la sbutkʼinbe li xmexaike, laj yalbe li buchʼutik ta xchonik palomaetik ti akʼo stsob batel li kʼusitik yuʼunike xchiʼuk ti akʼo xlokʼik echʼele (Juan 2:13-16).
2 ¿Kʼu yuʼun jech la spas li Jesuse? Yuʼun jaʼ ti skʼanoj tajek li chʼulnae. Xi tsots laj yale: «¡Mu xapasic ta jun chʼivit sna ti Jtote!». Kʼalal jech laj yil yajtsʼaklomtak taje, vul ta sjolik li kʼusi stsʼibaoj David ta salmo ti oy xa ta sjayibal sigloe: «Tsots scʼoplal cʼotem ta coʼnton ta xcaʼi ti achʼulna ti lecuc oyuque» (Juan 2:16, 17; Sal. 69:9, Ch).
3. 1) ¿Kʼusi skʼan xal li jpʼej kʼop ti oy tajek ta oʼontonal, xie? 2) ¿Kʼusi skʼan jakʼbe jbatik ta jujuntal?
3 Ta melel, ti kʼu yuʼun jech la spase jaʼ ta skoj ti oy tajek ta yoʼonton li sna Jeovae. Li jpʼel kʼop oy tajek ta oʼontonal, xie, jaʼ skʼan xal ti «xtiltun ta oʼontonal ta stojolal jtosuk kʼusie o ta stojolal junuk krixchano». Ta jujuntal li yajtsʼaklomutik Cristo ti oyutik mas ta vukub miyon ti jaʼutik li steklumal Diose, skʼan me xi jakʼbe jbatike: «¿Kʼuxi xuʼ xkakʼ ta ilel mas ti oy ta koʼonton li sna Jeovae?». Sventa jtakʼtik taje, baʼyel jkʼeltik kʼusi skʼan xal-o li sna Dios avie xchiʼuk jkʼelbetik batel sloʼilal jayibuk tukʼil viniketik ta voʼne ti laj yakʼik ta ilel ti oy tajek ta yoʼontonik li na taje. Li kʼusi la spasike, ti te tsʼibabil kom sventa jchanubtaseltike, jaʼ me chakʼ ti oyuk tajek ta koʼontontik li sna Jeovae (Rom. 15:4).
Li sna Dios ta voʼnee xchiʼuk li avie
4. ¿Kʼusi stu li chʼulna svaʼanoj Salomone?
4 Li sna Dios yuʼun j-israeletik ta voʼnee, jaʼ li chʼulna ta Jerusalene. Veno, pe taje maʼuk skʼan xal ti jaʼ te nakal li Jeovae. Xi laj yal stuke: «Li vinajele jaʼ jchotleb; li banamile jaʼ stecʼub cacan. ¿Cʼu xʼelan chapasbicun jna li voʼoxuque? ¿Bu xuʼ chapasbicun xcuxubil coʼnton?» (Isa. 66:1). Ta xichʼ alel ti jaʼ sna Jeova li chʼulna svaʼanoj Salomone yuʼun jaʼ li bu mero yichʼobil ta mukʼ Diose xchiʼuk ti bu ta xichʼ pasbel orasione (1 Rey. 8:27-30).
5. ¿Kʼusi laj yakʼ ta naʼel li chʼulna la svaʼan Salomone?
5 Li sna Jeova avi kʼakʼale maʼuk jun batsʼi na ti xuʼ te jtatik ta Jerusalén o ta yan bu jotukale. Moʼoj, li sna Jeovae jaʼ li kʼusi xchapanoj stuk sventa xkichʼtik ta mukʼ ti jaʼ koliyal ti laj yakʼ sba ta matanal li Jesuse. Li chʼulna ta mantal chkaltik taje jaʼ ti bu tstsob sbaik ta skʼupil kʼoptael Jpasvanej li tukʼil yajtsʼaklom Cristo ta spʼejel Balumile (Isa. 60:4, 8, 13; Hech. 17:24; Heb. 8:5; 9:24).
6. ¿Buchʼu ti ajvaliletik ti lek ta chanbel stalelalik ti kʼuyelan la spakbeik skʼoplal ta sjunul yoʼontonik li melel yichʼel ta mukʼ Diose?
6 Li ta sjabilal 997 kʼalal maʼuk toʼox jkʼakʼaliltike, li Israele la xchʼak sba ta chaʼvokʼ ajvalilal. Li balunlajuneb ti la spasik mantal ta sure —Judá—, oy chanvoʼ ajvaliletik ti toj lek ta chanbel stalelalik ti kʼuyelan la spakbeik skʼoplal ta sjunul yoʼontonik li melel yichʼel ta mukʼ Diose: Asa, Josafat, Ezequías xchiʼuk Josías. ¿Kʼusi xuʼ jchantik ta stojolalik?
Ta jtatik bendisionetik kʼalal ta sjunul koʼontontik chi jtun ta stojolal Diose
7, 8. 1) ¿Kʼusi skʼan jpastik sventa xakʼbutik sbendision li Jeovae? 2) ¿Kʼusi stalelal Asa ti mu stakʼ jchanbetike?
7 Kʼalal jaʼo ch-ajvalilaj li Asae la stak tal j-alkʼopetik li Jeovae, sventa jaʼuk spasik kʼusi lek li jteklume. Jech kʼuchaʼal liʼe, li Vivliae chalbe skʼoplal Azarías ti jaʼ li xnichʼon Obede, ti la stijbe yoʼonton Asa sventa oyuk kʼusi spase (kʼelo 2 Crónicas 15:1-8). Li kʼusi lek la spas li ajvalile jaʼ pas-o ta jun yoʼonton li jteklume. La stsob li buchʼutik ta Jerusalene, jaʼ yuʼun li buchʼutik jaʼ ventainbilik yuʼun li ajvalil taje ayik li ta tsobajele xchiʼuk ep ayik ek li buchʼutik jaʼ ventainbilik yuʼun li ajvalil ta norte yuʼun Israele. Te jmoj laj yalik ti tukʼ yoʼonton chtunik ta stojolal Diose. Xi chal li Vivliae: «Xʼavetic noʼox ta yalel, la stʼabbeic sbi Mucʼul Dios; la sjupan yoqʼuesic xchiʼuc xcachuic. Scotol li jchop yuʼun Judae toj xcuxet noʼox yoʼntonic ti jech laj yichʼ alel ta stojol Diose, yuʼun scotol yoʼntonic ti jech laj yalic ta jamale. Solel yutsil yoʼntonic laj yacʼ sbaic ta stojol li Mucʼul Diose, jech ec li Mucʼul Diose laj yacʼ sba ta stojolic. Jech ipajesbatic pleito ta buyuc noʼox, jech jun noʼox yoʼntonic o» (2 Cró. 15:9-15). Jaʼ me jech xuʼ jpat lek koʼontontik ek ti chakʼbutik sbendision Jeova mi ta sjunul koʼontontik chi jtun ta stojolale (Mar. 12:30).
8 Pe kʼux ta alel, chopol laj yaʼi Asa ti kʼalal akʼbat mantal yuʼun li Hanani ti ch-akʼbat yil yuʼun Dios kʼusitike (2 Cró. 16:7-10). Li avie, sventa tstukʼibtasutik li Jeovae jaʼ tstunes li moletike. ¿Kʼu yelan chkaʼitik ti kʼalal chkichʼtik tojobtasel ti ta Vivlia tslokʼesik li kʼusi chalike? ¿Mi xi jmuyubaj noʼox ta jtsaktik ta mukʼ li mantale o mi chi j-ilin-o?
9. ¿Kʼusi sibtasel la snuptanik li Josafat xchiʼuk li steklumale, xchiʼuk kʼusi la spasik ta skoj taje?
9 Li ta slajunebal siglo kʼalal maʼuk toʼox jkʼakʼaliltik ti kʼalal jaʼo ch-ajvalilaj li Josafate, la stsob sbaik sventa tskontrainik Judá li Amón, Moab xchiʼuk li jnaklejetik ta svitsaltak Seire. ¿Kʼusi la spas ajvalil ta skoj li kʼusi toj xibal sba taje? La stsob li viniketik ta Judae, xchiʼuk li yajnil xnichʼnabtakike, sventa jmoj spasik orasion ta sna li Jeovae (kʼelo 2 Crónicas 20:3-6). Jech kʼuchaʼal laj yal Salomón kʼalal laj yakʼ ta stojolal Jeova li chʼulnae, xi la skʼan vokol li Josafate: «Dios cuʼun, ¿me muc chavacʼbeic stoj smulic leʼe? Yuʼun li vuʼuncutique mu xuʼ cuʼuncutic ta jcontraincutic ti jech yepal cristianoetic leʼe. Mu jnaʼ cʼusi ta jpascutic; jaʼ noʼox ta xcacʼ jbacutic o ta atojol» (2 Cró. 20:12, 13). Kʼalal laj yoʼonton ta spasel orasion li ajvalile, li xchʼul espiritu Jeovae la stijbe yoʼonton jun jleví vinik ti Jahaziel sbie, te oy «ta oʼlol tsobobbail, [NM]» sventa tspatbe yoʼonton li krixchanoetike xchiʼuk ti akʼo spat yoʼontonik ta stojolal Diose (kʼelo 2 Crónicas 20:14-17).
10. 1) ¿Buchʼu ta stojolal laj yichʼik tojobtasel li Josafat xchiʼuk li steklumale? 2) ¿Kʼuxi chkakʼtik ta ilel ti ep sbalil chkiltik li beiltasel chakʼbutik Diose?
10 Kʼuchaʼal chkiltike, li Josafat xchiʼuk li steklumale la staik li beiltasel chakʼ Jeova ta stojolal Jahaziele. Li avie tspat koʼontontik Jeova xchiʼuk tsbeiltasutik ta stojolal li «jʼabtel ti jun [«tukʼ», NM] yoʼnton [...], ti lec bije». Jaʼ yuʼun chaʼa, skʼan me jchʼunbetik smantalik xchiʼuk xkichʼtik ta mukʼ li jkʼelvanejetike, ti yakʼojbeik yipal ta xchabiel li chijetike xchiʼuk ti chchʼunbeik smantal li j-abtel ti tukʼ yoʼontone (Mat. 24:45; 1 Tes. 5:12, 13).
11, 12. ¿Kʼusi ta jchantik ta sventa li kʼusi kʼot ta stojolal Josafat xchiʼuk li steklumale?
11 Jech kʼuchaʼal la stsob sbaik li Josafat xchiʼuk li steklumal sventa tsaʼik li beiltasel chakʼ Diose, jaʼ me jech skʼan xi jbatilan ta skotol tsobajeletik xchiʼuk li kermanotaktike. Mi yakal cha nuptan tsatsal vokoliletike xchiʼuk ti mu xa naʼ kʼusi cha pase, chanbo stalelal li Josafat xchiʼuk li steklumal Judae: albo Jeova ti akʼo xa skoltae xchiʼuk pato lek avoʼonton ta stojolal (Pro. 3:5, 6; Fili. 4:6, 7). Manchuk mi atuk bu oyot, li orasionetik cha pase jaʼ me tskoltaot sventa te kapal akʼoplal chavaʼi aba xchiʼuk «li jchʼunolajeletic [o ermanoetik] ti buyuc noʼox oyic ta sbejel banamile» (1 Ped. 5:9).
12 Li Josafat xchiʼuk li steklumale la stsakik ta mukʼ li mantal laj yal Jeova ta stojolal Jahaziele. ¿Kʼusi kʼot ta pasel un? Kuch yuʼun ta pas kʼop li Judae, vaʼun «toj xcuxet noʼox yoʼntonic isutic» ta Jerusalén, «te ibatic ta xchʼulna li Mucʼul Diose; chqʼuejinic batel ta arpa, ta sonetic, xchiʼuc ta oqʼuesetic» (2 Cró. 20:27, 28). Skʼan me jkʼupil kʼoptatik li Jeova avi eke xchiʼuk ti jtsaktik ta mukʼ li mantal chalbutik ta stojolal li kʼusi yakʼoj sventa tsbeiltasutike.
Jkʼuxubintik me ti bu ta jtsob jbatike
13. ¿Kʼusi abtelal la spas Ezequías li ta sba yual ch-ajvalilaje?
13 Li avi une jkʼelbetik skʼoplal Ezequías. Li ta sba yual ch-ajvalilaj li ajvalil taje, la sjam li chʼulnae xchiʼuk la xchaʼmeltsan ta skoj ti oy ta yoʼonton li yichʼel ta mukʼ Jeovae. La spukbe yabtel li paleetike xchiʼuk li jlevietike, vaʼun ta vaklajuneb noʼox kʼakʼal chʼubaj yuʼunik li sna Diose (kʼelo 2 Crónicas 29:16-18). Li kʼusi la spasik taje, jaʼ tsvules ta joltik ti baxbolutik ta smeltsanel kʼusi tsok li bu ta jtsob jbatike xchiʼuk li kʼusitik ta jpastik sventa lekuk oye. ¿Mi oy bu xavaʼi ti oy buchʼu toj labal laj yil ti kʼuyelan xmuyubaj noʼox li ermanoetik kʼalal tspasik li abtelal laj kaltike? Ta batsʼi melel, jaʼ me jech ta jkʼupil kʼoptatik Jeova kʼalal chkakʼ tajek ta koʼontontik li melel yichʼel ta mukʼe.
14, 15. ¿Kʼusi abtelal ti chichʼ-o kʼupil kʼoptael Jeovae? Alo kʼusi kʼotem ta pasel.
14 Li ermanoetik ta jun lum ta norte yuʼun Inglaterra ti la snop chchaʼachʼubtas li salonike la snuptanik kontrainel, jaʼ kontrainvan li buchʼu te nopol nakale. ¿Kʼu yelan laj yilik li ermanoetik taje? Ta skoj ti muʼyuk xa lek ta jyalel li muro ti oy ta tsʼake, ta slekil yoʼonton laj yalbeik li vinik ti jaʼ tsmeltsanik li muroe xchiʼuk ti ta moton tspasike. Toj echʼem abtejik, yuʼun jutuk mu skotoluk la xchaʼvaʼanik li muroe. Pe toj lek ti kʼusi kʼot ta pasel yuʼunike, jaʼ yuʼun jel stalelal li vinike xchiʼuk li avi une ta xa xkoltaatik ta xchabiel li salone.
15 Li steklumal Jeovae oy kʼusitik tsvaʼanik ta spʼejel Balumil. Li jtuneletik ti ch-abtejik ta yantik balumil ti jaʼ xa tspasik-o li abtelal taje, chkoltaatik yuʼun li ermanoetik ti te noʼox nakalik sventa tsvaʼanik li Salonetik sventa Tsobobbaile, li Salonetik sventa Mukʼta Tsobajele xchiʼuk li Beteletike. Li Same jaʼ jun chanem injeniero sventa calefacción, ventilación xchiʼuk sventa acondicionamiento de aire. Ep xanavem xchiʼuk yajnil ti Ruth sbie, ayemik ta mukʼtikil lum ta Europa xchiʼuk ta África sventa tskolta sbaik ta svaʼanel jeltos kʼusitik xchiʼuk li ta lumetik bu chkʼotik taje chcholik mantal xchiʼuk li ermanoetik ti te noʼox nakalike. Xi chal kaʼitik li Sam ti kʼu yuʼun lik abtejuk jeche: «Oy jayvoʼ ermanoetik xkojtikin ti tunemik ta jeltos Beteletik ta spʼejel balumile; jaʼ la stijik koʼonton sventa jechuk jpas. Kʼalal laj kil ti xmuyubajik noʼoxe, la stij koʼonton ti akʼo jechuk xi abtej eke».
Jchʼuntik li mantal chakʼ Diose
16, 17. ¿Kʼusi kampanyail ti xmuyubaj noʼox la spasik li yajtuneltak Diose, xchiʼuk kʼusi kʼot ta pasel ta skoj?
16 Maʼuk noʼox la smeltsan kʼusitik sokem yuʼun chʼulna li Ezequiase, yuʼun la xchaʼlikes xtok li kʼin Koltael ta jujun jabil ti oy xa ta sjayibal siglo slikesoj Jeovae (kʼelo 2 Crónicas 30:1, 4, 5). Li ajvalil xchiʼuk li jnaklejetik tee la stakik ta ikʼel sjunul lum sventa xtalik li ta kʼin Koltaele —la stakik ta ikʼel ek li buchʼutik ventainbilik yuʼun li ajvalil ta nortee—, vaʼun bat jtsop jpuk kartaetik ta sjunul li lume (2 Cró. 30:6-9).
17 Oy xa ta sjayibal jabil yakal ta jpastik jun abtelal jech ek. Jpukojtik uni vunetik ti toj kʼupil sba sventa ta jtaktik ta ikʼel li krixchanoetik yoʼ xtal xchiʼinutik li ta Veʼlil ta bat kʼakʼal yuʼun Kajvaltike, ta sventa ti jaʼ jech yalojbutik mantal li Jesuse (Luc. 22:19, 20, NM). Li ta Tsobajel sventa Tunelale te kichʼojtik albel kʼuxi ta pasel li kampanyaetik taje, vaʼun xi jmuyubaj noʼox ta jpastik li abtelale. ¿Mi yakʼojbe bendision Jeova li kabteltik taje? ¡Ta melel yakʼojbe! Ta skoj li kampanya la spasik echʼ jabil li vukub miyon jchol mantaletik ta spʼejel balumile la stsob sbaik 17,790,631 krixchanoetik.
18. ¿Kʼu yuʼun chaval ti tsots skʼoplal ti oyuk tajek ta koʼontontik xi jtun ta stojolal li Diose?
18 Xi chal li Vivlia ta sventa li Ezequiase: «Li Ezequiase jaʼ noʼox la spat o yoʼnton ta stojol Mucʼul Dios, jaʼ li Dios yuʼun Israele. Ta scotol li ajvaliletic ta Judá ti jelovenic xa yuʼune xchiʼuc ti tsʼacal to ijelovique muʼyuc yan jech tucʼ yabtel jech chac cʼu chaʼal li stuque. Jun yoʼnton o ta stojol li Mucʼul Diose; me jutuc muʼyuc la svocʼ sba ta stojol. Jaʼ la xchʼun scotol li mantaletic ti iʼalbat yuʼun Mucʼul Dios li Moisese» (2 Rey. 18:5, 6). Kakʼ me kipaltik ti jchanbetik stalelal li ajvalil taje. Ti oy tajek ta koʼontontik li sna Diose jaʼ me tskoltautik ti «jun[uk koʼontontik] ta stojol li Mucʼul Diose» xchiʼuk ti mu xchʼay ta jsatik li matanal kuxlejal sbatel osile (Deu. 30:16).
Jchʼuntik me ta anil li mantale
19. ¿Kʼuxi chakʼ ta ilel li yajtuneltak Dios ti oy tajek ta yoʼontonik li sNaʼobil slajel Cristoe?
19 Oy jun ajvalil xtok ti oy kʼusitik la spas sventa xichʼ pasel li kʼin Koltaele, jaʼ li Josiase (2 Rey. 23:21-23; 2 Cró. 35:1-19). Li avi kʼakʼal eke ta jchapan jbatik lek sventa xi jbat li ta mukʼta tsobajeletik ta oxib kʼakʼale, li ta chib kʼakʼale, li ta jun kʼakʼale xchiʼuk li ta sNaʼobil slajel Cristoe. Li ta junantik lume oy ermanoetik ti chakʼ ta vokol xkuxlejalik sventa xbatik li ta sNaʼobil slajel Cristoe. Jech xtok, li moletike chakʼ ta ilel ti toj ep sbalil chilik taje, yuʼun tskʼelik ti akʼo xbat stekel li ermanoetike, xchiʼuk tskʼelik ti akʼo xbatik ek li ermanoetik ti oy xa sjabilalike xchiʼuk li buchʼutik ipike.
20. 1) ¿Kʼusi kʼot ta pasel kʼalal ch-ajvalilaj li Josiase, xchiʼuk kʼu yelan laj yaʼi? 2) ¿Kʼusi chakʼ jchantik li loʼil taje?
20 Li ajvalil Josiase laj yal mantal ti akʼo xchaʼta yav li xchʼulna Jeovae. Kʼalal yakal xaʼox smeltsanel li chʼulnae, li bankilal pale Hilquiase (Hilcias) «te la sta li svunal mantaletic yuʼun Mucʼul Dios [ti] laj yal comel ta sventa Moisese», vaʼun laj yakʼbe li Safán ti jaʼ li yajtsʼibajom ajvalile. Li Safán une laj yichʼbe echʼel li ajvalile xchiʼuk lik skʼelbe (kʼelo 2 Crónicas 34:14-18). ¿Kʼu yelan laj yaʼi li Josiase? La sliʼ skʼuʼ ta skoj ti chat tajek yoʼontone, vaʼun ta ora laj yalbe mantal sviniktak ti akʼo sjakʼbeik kʼusi tsnop li Jeovae. Li Diose laj yal ta stojolal meʼ j-alkʼop Hulda ti chopol chil li kʼusitik toj ibal sba tspasik ta sventa relijion li ta Judae xchiʼuk laj yal ti chil svokol li lume. Pe kʼelavil, li Jeovae laj yil ti ta sjunul yoʼonton la slokʼes li kʼusitik jecheʼ chichʼ ichʼel ta mukʼe xchiʼuk laj yakʼbe bendision li ajvalil ta skoj taje (2 Cró. 34:19-28). ¿Kʼusi chakʼ jchantik li loʼil taje? Jaʼ ti jechuk jpastik kʼuchaʼal Josiase. Jchʼuntik me ta anil li smantal Jeovae. Teuk me ta joltik ti kʼusi xuʼ xkʼot ta pasel ta jtojolaltik mi jech ta jpastik kʼuchaʼal li j-israeletik ti muʼyuk noʼox chopol chkiltik li buchʼutik tsvalopatinik mantal xchiʼuk ti muʼyuk tukʼ yoʼontonik ta stojolal Diose. Kʼuchaʼal chkiltik ta stojolal Josiase: ta me stsak lek ta mukʼ Jeova ti oy tajek ta koʼontontik ta spakbel skʼoplal li yichʼel ta mukʼ ta melele.
21, 22. 1) ¿Kʼu yuʼun skʼan oyuk tajek ta koʼontontik li sna Jeovae? 2) ¿Kʼusi chkalbetik skʼoplal li ta yan xchanobile?
21 Li chanvoʼ ajvaliletik ta Judá ti laj kalbetik skʼoplale —Asa, Josafat, Ezequías xchiʼuk li Josiase— toj lek me ta chanbel stalelalik, yuʼun laj yakʼ lek ta yoʼontonik li sna Jeovae xchiʼuk li melel yichʼel ta mukʼe. Li voʼotik eke, skʼan me jpat lek koʼontontik ta stojolal Dios xchiʼuk ti xkakʼbetik yipal ta yichʼel ta mukʼ ta sjunul koʼontontike. Li kʼusi mas toj lek ti skʼan jpastike xchiʼuk ti chi jmuyubaj-o yuʼun xtoke, jaʼ ti jtsaktik ta mukʼ li beiltasel chakʼ Diose, ti ta aniluk jchʼamtik li tukʼibtasel xchiʼuk ti jtsaktik ta mukʼ li lekil chabiel chkichʼtik ta stojolal li tsobobbaile xchiʼuk ta stojolal li moletike.
22 Li ta yan xchanobile jaʼ chalbe skʼoplal ti oyuk tajek ta koʼontontik jcholtik li lekil aʼyeje xchiʼuk tstijbe yoʼonton li kerem-tsebetik ti ta muyubajeluk noʼox xtunik ta stojolal li jkʼanvanej Totil kuʼuntike. Jech xtok te ta jchanbetik skʼoplal jtos spetsʼ Satanás ti toj echʼ noʼox ch-ilbajinvane xchiʼuk ta jkʼeltik kʼuxi xuʼ stsal kuʼuntik. Mi ta jchʼuntik ta slekil koʼontontik li mantal chakʼ Diose, mas me chi jkoʼolaj li ta xNichʼon Jeova ti jaʼ li Jesuse, ti xi ch-albat skʼoplal ta Vivliae: «Coʼol sʼelan tilemal cocʼ ta xʼabtej ta coʼnton ta sventa ti achʼulna ti tsots scʼoplal ta xcaʼie» (Sal. 69:9, Ch; 119:111, 129; 1 Ped. 2:21).
¿Mi xvul ta ajol?
• ¿Kʼu yelan skʼan xi jtun ta stojolal Jeova sventa xakʼbutik li sbendisione, xchiʼuk kʼu yuʼun?
• ¿Kʼuxi xuʼ xkakʼtik ta ilel ti jpatoj koʼontontik ta stojolal Jeovae?
• ¿Kʼuxi te snitojbe sba skʼoplal li xchʼunbel smantal Jeova xchiʼuk ti oy tajek ta koʼontontike?
[Sjakʼobiltak sventa xchanobil]
[Lokʼol ta pajina 9]
¿Kʼuxi laj yakʼik ta ilel ti oy tajek ta yoʼontonik xchʼulna Jeova li Asa, Josafat, Ezequías xchiʼuk Josiase?